المساعد الشخصي الرقمي

مشاهدة النسخة كاملة : شبااااااااااب *إلي أخذ الليسن* تفضلوا ...



طموح
18-09-2011, ( 16:26)
مرحبا جميعا,
عام دراسي جديد ... بالتوفيق للجميع ...:smile:

نسمع الكثير من القصص التي هي أشبه بالمغامرات في فترة التدريب وتعلم قيادة السيارة :smile2: , ابتداءاً من البحث عن مدرب ذو أخلاق وكفاءه إلى سالفة manual gear التي يتخوف منها البعض وخصوصاً البنات :RpS_unsure: وووو وغيرها إلى وقت دخول الامتحان أو التراي....

أحب أدرج هالموضوع كدليل يشارك فيه الجميع وكل من لدية خبرة في تعليم وإثراء حافظة كل من له نية في تعلم السياقة ... فلا تبخلون بالشرح والتوضيح بوضع الصور ...

*شاركونا ,بتجربتكم الأولى...
*متى أخذت الليسن وصار لك كم سنه, من أي تراي نجحت:whistling:؟
*ويش نوع سيارتك؟


تحياتي ...

5alil
18-09-2011, ( 17:55)
اولاً تسلمين على الموضوع :RpS_thumbsup:

والله ما ادري ليش يفكر الكل ان التدريب مخييف والمخيف اكثر المرور في التراي:schmoll:


ولله الحمد كملت ثلاثة شهوور من اخذت الليسن :eek:

ولله الحمد ما واجهتني اي مشكلة
لان المدرب واحد يعرف العيلة كلهم:icon30:

ودخلت التراي
واخذت ربع ساعة من رحت مدرسة التدريب إلين ما قصيت الليسن:nosweat:
ونجحت ولله الحمد من اول تراي:blush-anim-cl:

الحمد لله ان ماكنت خايف ويا المرور وكنت اتخيل المرورو المدرب إلي دربني:whistling:

الحياة كلها تعب
18-09-2011, ( 18:00)
يسلمووو حياتو

دعوااتكم بعد 4 اياام باقدم الامتحااان حدي خاايف من الرويس

مدربي يقوول ع كل شي محااسبين

دعوااتكم لي بالنجاح باول ترااي

زهرة الأيام
18-09-2011, ( 18:07)
يسلمووو حياتو

دعوااتكم بعد 4 اياام باقدم الامتحااان حدي خاايف من الرويس

مدربي يقوول ع كل شي محااسبين

دعوااتكم لي بالنجاح باول ترااي


الله يوفقش وتجين لنا ناجحة

مشاعر خجولة
18-09-2011, ( 18:14)
مرحبا

أكثر شي حبيته يوم كنت اتدرب تبديل القير العادي كان شي عجييييييييييب

وتدريبي كان كله من الصبح الساعه خمس بعده ظلام الشمس ما طلعت وهذا الشي بعد كان ممتاز لان ما في احد في الشارع واسرح وامرح على كيفي

الحمدلله نجحت من اول تراي


صار لي سنه و10 شهور من اخذت الليسن

زهرة الأيام
18-09-2011, ( 18:17)
اني اخذت الليسن بتاريج 10/5 /2011 يعني تقريبا 4 اشهر
والي سوا ليي الليسن زوج بنت عمي قال ليي بوقفش المروور مايناسبش تسوقين حجمش صغير ههه
اول ما اخذت الليسن جه ليي اخويي عشان ياخذني من المرور ونروح البيت اني الي سقت فيها طبعا كانت اول مرة بالنسبة ليي
فبغيت اطلع على شاحنة في الهايويي بس اتداركت االشي .. وضربت هرن تن تن تتن بالغلط (هاذي اول مرة اسوق فيها)
بعد مااتعودت على السياقة قمت اسوق بروحي بس مرة كنت طالعة من سار ووصلت لشارع البديع ونسيت انزل الهاندبريك واني كلما ادوس اجوف السيارة ماتمشي
تالي طلع الهاندبريك مرفع هههههه تالي نزلته .. فناتك

مشكورة خيو على الموضوع

قموووورة
18-09-2011, ( 18:22)
بقولكم قصة معاناتي ويه السياقة قصيت الكجة نهاية شهر واحد وظليت ادور مدرب وحصلت واحد من اهل الوالد وقال بدربني وخبركم اني انسانة عجوولة خخ ظليت احن عن راسه كل يووم اتصل اليه واخر شي اتصل الييي في شهر 4 وقال انه بدربني وتدربت وقصيت اول تراي وكان عندي احساس اني برسب بالرغم انه سويت المرتفع صح والريوس سويته من اول مرة بس يوم كنت على المرتفع بندت السيارة وقلت خلاص راسبة راسبة ما بسووي شي صح وفي التراي الثاني خمس محاولات على المرتفع وسيده رجعتني لاني رسبت ههههه والتراي الثالث رونسيد واخدت الليسن بعد عناء طويل في التراي الرابع وكان هذا في شهر 7 وترى الممتحنة ما تخووف بس ما ادري ليش احنا نخاف وعن السيارة للحين قاعدة ادور لليي سيارة ولا حصلت ادعوا اليي احصل سيارة في القريب العاجل .... ومشكورة خيو على الموضوع الي خليتيني اكتب فيه معاناتي

زهرة الأيام
18-09-2011, ( 18:27)
نسيت مااقول لكم اخذت الليسن من الترااي الرابع هههههههه
:bleh:
الثالث داخل المدرسة نجحت ورسبتني بره

the life
18-09-2011, ( 18:27)
القير العادي بصراحه بلوه كبيره بالنسبه للبنات ههههه اني كنت أعاني
انتظرت شهور لين حصلت مدرب ولو اشرح معاناتي هالفتره ما تكفي صفحات
بس بمجرد ما تاخذ الليسن تشوفين السواقه مافي أسهل منها ويا الاوتوماتيك
اني صار لي سنه تقريباً من خذيت الليسن
خذيته من التراي الثاني وكل هذا بسبب خوفي و ربكتي
أخطائي اللي سويتها في التراي حتى اول مره سقت ما سويتها !
لا تربكون روحكم وكل الامور بتكون طيبه
اما فرحتي لا توصف يوم اخذه ما بغيت افتك من هم التدريب لانه كان في رمضان
وبخصووص السياره اللي عندي الحين بي ام وما انكر اني حكيتها مره ههههههه بس هالشي لازم يصير
والله يوفق الجميع في تراياتهم

قهوة الصباح
18-09-2011, ( 18:28)
الموضوع رائع

صار ليي 3 سنين من اخذت الليسن هههههه عجوز

المهم

حبيت فترة التدريب بصراحة
كان عندي حماس اني اتدرب
اول 3 اسابيع صرت عند مدرب الله يستر عليه مايعلم شي كلش
بس يقول يمين ويسار

يعني لا علمني على اللفات ولاشي
وفوق كل هذا مايدربني الا مرة في الاسبوع
هذا غير هراره وهدرته ,,,,,,,,,,,, هدار بشكل مو طبيعي

المهم
خبرته اني ابي اخذ الليسن بسرعه
واقترحت عليه انه يوقع ليي وبدفع ليه بدون مايعلمني <<<<<< جدي جدي مو مستفيدة شي


المهم قال ليي بحولش على مدربة بتمشيش بسرعه وبتخلصين
وفعلا حولني على هالمدربة وحسيت بفرق في التدريب
يعني هي تعلم عدل وهو ماعلمني ولاشي اصلن

وجى يوم التراي
كان تاريخ 13/1/2008
اذكر كنت اقول لزوجي من الصبح جبدي لايعة شكلي متوترة من التراي

وبالاخير طلعت حامل ومادري عن روحي:nosweat:

كان هذا اليوم ممطر بشكل مو طببعي

دخلت السيارة ومشيت كلها دقيقتين وقالت ليي بس دخلي المدرسة

دخلت ورحت جيكت بعد شوي

طلعت ناجحة

استانست لاني اخذته من الاول:rolleyes2:

بس كانت فترة حلوة

نصيحة مني
لا ترتبكون في التراي وركزوا عدل وبسهولة تاخذونه من الاول

بالتوفيق

وردة البحر
18-09-2011, ( 18:29)
أنا قصتي غير عنكم كلكم :bleh:
لحين ما تدربت كلما اتصل في مدربة تقص علي وما تدربني :nosweat:

لو سمحتوا اللي يعرف أرقام مدربات أوكي يطرش على الخاص ضروووري :RpS_tongue:

m.g.s
18-09-2011, ( 18:33)
نسيت مااقول لكم اخذت الليسن من الترااي الرابع هههههههه
:bleh:
الثالث داخل المدرسة نجحت ورسبتني بره


:RpS_lol::RpS_lol::RpS_lol:

يَـآقـوتَ
18-09-2011, ( 18:52)
قصيت الكجه شهر سته يوم الاثنين وبعدي ماحصلت مدرب ولحسن حظي كنت متصله لمدربي يوم السبت الساعه 12 وبعدي قال لى بشوف اذا عنده مجال ومااشوف الا مكالمه منه الساعه2 ردت يقول لي باجي ادربش الحين عندش مانع قالت اكيد لا عـــادي (ماهقت احصله) .
وطبعا جننته هههه يقول لي دوسي عل البترول اقول ليه اكوا ادوس له والسرعه 40 :whistling: او عند اشاره قف مااوقف يقو لي الاااوي ماوقفتين!! اقول مافي سياره :RpS_sleep:
او اقول ليه بعرف اسوق عدل لين كملت الساعات يقول انتين !! لا مابتعرفين انسحبي افضل ليش:RpS_blink:
وقبل يوم من لتراي اقول ليه بنجح ف لتراي يقول لي اذا هي اخطاءش اكيد مابتنجحين:RpS_blink:
والحمدالله نحجت ف لتراي الاول

Saheb Al Qrar
18-09-2011, ( 19:29)
السلام عليكم ورحمة الله وبركاته
من احلى الفترات بعد الثنوية ,كانت فترة التدريب ..
بالنسبة لمدربي كان مسوي لي ازمة يوم الساعه 6 الصبح ,ويوم 4 العصر ويوم 5 المغرب ,,فعذبني شوي ,لكن الحمدلله المدرسة مهب بعيدة علي لأني في المدينة ..
وطبعاً ماكنت محصل مدرب بأول أسبوع من الكجه ,لكن الأسبوع اللي وراه دخلت واسطة وحصلت.
التدريب بالغير العادي كآن ممتع لي ولله الحمد ,والسياقة كآنت امر عادي وقتها لأني كنت اسوق قبل الليسن بسنة تقريباً ..
تبديلاات الغير كآنت روعه ,لكن اللي كرهته هي الإشارات والدوارات في المدرسة وإشارات قف الحمره
هذولي اللي يقهرون ,اما غير جذي فكل شي تمام

تدربت فترة بسيطة ,قدمت امتحاني يوم الخميس الساعه 5 ,على نهاية الدوام والأسبوع ,ودشيت على مرور حليو وكآنت لايعه جبده ويبي يخلص الدوام ويطلع ونصيبي بأني كنت آخر واحد عنده .
فخذ فيني فرات ع السريع وطلعنا برع أذكر كنت امشي على راحتي عشان اراويه أني ملتزم فقال لي (عطه عطه روح) فعقبها شفته بأنه من ربعنا زقرت والحمدلله نجحت من اول تراي.

صار لي سنتين تقريباً من خذت الليسن ..
عندي هوندا أكورد 2007

شاكر لك موضوعك التفاعلي ..

نغمة الحياة
18-09-2011, ( 20:06)
اي انه بعد تعبت ع ماحصلت مدرب المدرب صدفة ان درب نسيبتي او صديقتي
اممم ايام التدريب صج كان فن ع انه تعب شوي كل تبديلات
او ريوس كريه :RpS_glare:
ف تراي الاول رسبت لاني كنت متورترة او نسيت كل شي
ف لمرتفع نسيت ان لازم ارفع ريولي عن الكلج او سيارة كل ساعه ترجع ورا :nosweat:
بس تراي ثاني حسيت اني بنجح :bleh:
حمدالله الحين صار لي 4 اشهر :smile2:

sabeel
18-09-2011, ( 20:48)
اللهم صل على محمد و آل محمد

الموضوع في وقته :RpS_love: اخذت الليسن تاريخ 6/9


او عند اشاره قف مااوقف يقو لي الاااوي ماوقفتين!! اقول مافي سياره
كأني سويت هالحركاة بعد + طفت اشارة حمرا:RpS_lol: الظاهر انتي مثلي
اني من النوع اللي يفهي يعني السياقة ماتصلح لي

الله يسلمكم السالفة من أول كان المفروض اتدرب عن وحدة من اهلي
و تدربت كم مرة بس و بعدين ماعطتني موعد و خليتها و رحت إلى مدرب
احيانا انفخ وجهي عليه بس يتصبر خخخ
و لما اخذت موعد للامتحان كنت شبه واثقة اني برسب أصلا و فعلا رسبت :whistling:
اللي اعرفه و اللي مااعرفه ماسويته عدل
مع اني ماكنت خايفة و المرورة كانت طيبة

و قبل التراي الثاني يسألني المدرب شنو الصعوبات عندج ؟ قلت له الدوارات :RpS_crying:
و دخلت الامتحان يقول لي المرور لا تخافين و مادري شنو و يتكلم حتى اهدأ مع اني من أصل ماكنت خايفة واجد :RpS_huh:
بس زين يفكرني خايفة هذا من صالحي حتى اذا في خطأ يفكر من الربكة هع
و نجحــت في التراي الثاني :eek: و قال لي في شوي اخطاء تجاوزها

و مع اني نجحت لكن للحين ماعرف للدوارات
مثلا : كنت بدخل الدوار و اني عاليسار و في تيلر على يمني في الدوار
انتظرته يطلع من الدوار و بعدين دخلت و الناس وراي تضرب هرانه :blushing:
غير طلعتي من الديره اروح للسيارة اللي على يمين و المفروض يسار :RpS_scared:

و مره بعد مانزلت الهاند بريك و اشوف السيارة تطلع اصوات و الحمد لله التفت بعد :nosweat:

و مرة بعد حكيت سيارة :whistling: كل هذا في أقل من شهر

شكرا نغمة الحياة خليتينا نطلع الفضايح

اللهم صل على محمد و آل محمد

XII
18-09-2011, ( 20:51)
إن شاء الله باجر رايح اطلع الكجة ..
و إن شاء الله حصلنا المدرب ..
ادعوا لينا بالتوفيق ..

زهرة الأيام
18-09-2011, ( 21:13)
:RpS_lol::RpS_lol::RpS_lol:

ههههههه خجالة

نغمة الحياة
18-09-2011, ( 21:17)
عفووووا :RpS_tongue:
بعد فيه فضايح بس خلوها مستورة :whistling:

moto l6
18-09-2011, ( 21:25)
ما في سالفة للاسف
حصلت مدرب , اسرع من الخباز لين يسوي خبز
10 ساعات تدربت قصيت تراي
نجت من اول تراي ’ حتى اقول لمدربي لا تخاف انته تدرب نابغة
صار لي واجد
بس تسلفت من المدرب فلوس الليسن :nosweat:

لحظات انتظار
18-09-2011, ( 21:37)
:nosweat::nosweat:

صاحبة الظل
18-09-2011, ( 21:38)
أنا قصتي غير عنكم كلكم :bleh:
لحين ما تدربت كلما اتصل في مدربة تقص علي وما تدربني :nosweat:

لو سمحتوا اللي يعرف أرقام مدربات أوكي يطرش على الخاص ضروووري :RpS_tongue:

+1
اتصلت لقروب مدربين الي ما يدرب بنات و الي من سنين ما درب اشوة بعد ما اتصلت حق واحد و طلع متوفي

زهرة الأيام
18-09-2011, ( 22:01)
+1
اتصلت لقروب مدربين الي ما يدرب بنات و الي من سنين ما درب اشوة بعد ما اتصلت حق واحد و طلع متوفي

ههههههههههههههههه ضحكتيني
وان شاء الله تحصلين ليش

m10essi
18-09-2011, ( 22:05)
ههههههههههه ذكرتيني بأكره ايام عشتها :whistling:
حصلت مدرب بسهولة لأانه يعرف الوالد
لكن الله لايراويش مثل هذا المدرب
يوم يدرب و ثلاث اسابيع ما يجي:no:
و المشكلة ما في مدربين غيره كله يقولون ما في جانس
ولا إذا يدرب طول الطريق يسولف في التلفون او ياكل حب و يشرب جقاير ولا مفتكر ويش اسوي
مرات اطلع بدون ما البس الحزام تالي إذا بنزل يقول ليش ما لبسته اليوم :nosweat:(صح النوم توه منتبه :RpS_tongue:)
دربني بس 10 ساعات ووقع إليي الباقي قال ادخل التراي:RpS_blink:
المشكلة ما كنت جاهز
قلت إلى الوالد امبي واسطه قال إليي لا تعتمد على احد اعتمد على نفسك
دخلت اول تراي ، الحظ صادني مرور ابو الزفت (لعين) :schmoll:
من اول ما ركبت وياه وهو معصب ما ادري ليش ،، خطأت مره في المرتفع الكبير اللي تسحب الهاندبريك فيه ،، قمت ارفع ارجولي عن الكلج بمسافة النص لكن بندت ،، لأن كانت سيارة التدريب غير عن التراي ،، سيارة التدريب مسافة النص اوكي ،، وسيارة المرور للربع بس إذا زدت تبند
المفروض يعطيني فرصة ثانية المرور لكن قال إليي ارجع وكتب إليي راسب :tears:
تضايقت حديييي ، لأاني برد ارجع لمعاناة المدرب
المهم بعد ما لوع جبدي المدرب مره ثانية
دخلت التراي الثاني ونجحت الحمدلله وبدون اي واسطة ،، كان يوم حلو بالنسبة إليي :smile2:

حلم أنثى
18-09-2011, ( 22:10)
معاناتي بكتبها لكم تستاهلون ياأحلى اعضائ

قصيت الكجة يوم عيد ميلادي بالضبظ شهر 9 2009
وتدربت بعد معاناة طويلة جدا شهر 7 2010,,
المهم تدربت
اول تراي كان المرور ورسبت خخخخ شديد
التراي الثاني ناجحة والله وطلعت برة بس لما رحت برة بندت سيارة ورسبوني:no::no::no:

المهم التراي الثالث شدينا الهمة والحمدلله ربي نجحت:smile:


وكان تاريخ 20-10-2010

بدات اروح الجامعة نهاية الفصل الاول
والفصل الاراح
الحين عندي اوكي بس معاناة شوية مع الجدد والباركات خخخخ

صاحبة الظل
18-09-2011, ( 22:11)
ههههههههههههههههه ضحكتيني
وان شاء الله تحصلين ليش


ان شاء الله
ترى صارت خيو وحده اعرفها ايام ما كانت تدور مدرب اتصلت حق واحد وسالت عنة الة يقولون ليها متوفي من جم سنة

وردة البحر
19-09-2011, ( 00:11)
+1
اتصلت لقروب مدربين الي ما يدرب بنات و الي من سنين ما درب اشوة بعد ما اتصلت حق واحد و طلع متوفي

ههههههههههههههههههههههههههه ضحكتيني صاحبة الظل:RpS_lol:

بنوتة كيوت
19-09-2011, ( 00:42)
مشكورة خيووو على الموضوع
وبالتوفيق للجميع :shiny:

M.Matooq
19-09-2011, ( 01:00)
السلام عليكم
يوم اخذ الليسن كان شهر 6
الكجة انقصت شهر واحد في نصفه الاول ...و فترة انك تدور مدرب فترة تعيسة خسرت 50 دينار كردت ولا حد رضا يدربني كلمت خالي يشوف لي مدرب شاف لي واحد من ديرتهم وكان يدربني في الاسبوع مرة وساعات يطقع ... المهم السياقة كانت سهلة بالنسبة لي واول تراي رسبني المرور لانه نزر ورسبني لاني ما وقفت عند علامة ستوب مع انه ما في احد بالشارع ...وثاني تراي الحمدلله اخذت الليسن

M.Matooq
19-09-2011, ( 01:06)
على طاري المدربين بقولكم بعض الاعذار الي كنت اسمعها

1- ما في جانس
2- انا مريض
3- اتصل الشهر الجاي ويطنش اذا اتصلت له
4- سيارتي خربانة
5- مادربت من سنين {{ يوم ثاني اشوف رقم سيارته بالششارع}}
6- ما ادرب صبيان
7- فيه واحد طلع متوفي من سنين الله يرحمه

Wa7Eeda
19-09-2011, ( 01:08)
يسلمووو ع الموضوع
حده كيوت وعجبني


تدريب السيآقه ايام لا تنسى
شي عجيب هههه
كنت اتدرب الصبح وعقب التدريب عطول اروح الجامعه
وخذيت الليسن من التراي الثاني
اول مره نجحت داخل وثاني مره بالخارج
خخخخ كنت اول مره رسبت فيها بره ..سويت هوآآيل في الشاارع
بس والله كله من المروره لبكتني عدل وكآنت حدها مغروووره من قبل ونزره
وبسبتها خلت عقلي يطير...وجيت بدخل الدوار على باص ...ولفيت دبل يسار الاشاير ع القير ال3 هههههه :RpS_lol:
حتى هي انقهرت وفتحت بابها بتجي مكاني تسوق بدالي..بس اني منبطه جبدي منها...سيده شغلت السياره ومشيت
وخليتها غصبا عليها تصك بابها :sly:
والله بعد :sly:

وفي التراي الثاني مع مروره بعد بس كآنت طيبه وحبوبه وترتاج نفسيه الواحد وياها
والحمدلله نجحنا ..كآنت السآعه 3 ونص هع

والحين كملت سنه من شهر 5 كآنه

وعندي سيآره لانسر 2004

وعقبآآل الجميع يآرب نشوف عندهم الليآسن والسيآآير
وطن طن ططن :RpS_sleep:

vps
19-09-2011, ( 01:35)
متى أخذت الليسن وصار لك كم سنه ؟

أخذته تاريخ 9-2-2011 وصار لي الحين 7 شهور


من أي تراي نجحت:whistling:؟

الثاني بعد الظلم فالتراي الأول :RpS_tongue:


ويش نوع سيارتك؟

كورولا 2005
؛
القير العادي ، أول مثلما يسمونه manual gear
أبوي علمني عليه في باص كوستر 30 راكب وكان فلّه
بس ما أنكر إني أول ما مشّيته بند عليي لأني ما عرفت له وقلت لأبوي " ما أعرف خلاص ما أبي أتدرب عليه "
بس بعدين ولله الحمد عرفت له وقام يخليني أشاخط فالدفنة بالباص وصلت فيه للـ 5 هههههه

والحمد لله ماتعطلت فالمدرب وخلصت وياه 22 ساعة ودشيت تراي
خلصت داخل بنجاح ولله الحمد وطلعت برى وراسي مفتر لأن المرور كان يقولي
" يلا بدل 1 و 2 و 3 و 4 بسرعة " O,o ورسبت في دوار الفخار رجعتي لإشارة المدرسة

طبعا ما وقفت دموعي من عقب ما رسبت لاني مو متعود أخسر في شي ههههههه
ودشيت التراي الثاني عقب شهر وانا مصمم أنجح فالتراي ولله الحمد نجحت
والحين اعوذ بالله من كلمة أنا ، أقدر اطلع من الدواعيس بالريوس وانا أشرب بيبسي ههههههه

الحمد لله ربي ، شكراً على الموضوع
(F)

وردة البحر
19-09-2011, ( 01:42)
هههههههه قصص حلوة :bleh:

the life
19-09-2011, ( 02:01)
على طاري المدربين بقولكم بعض الاعذار الي كنت اسمعها

1- ما في جانس
2- انا مريض
3- اتصل الشهر الجاي ويطنش اذا اتصلت له
4- سيارتي خربانة
5- مادربت من سنين {{ يوم ثاني اشوف رقم سيارته بالششارع}}
6- ما ادرب صبيان
7- فيه واحد طلع متوفي من سنين الله يرحمه

لا تقولون في ع المدرب اللي دربني في الشلخ
اول شي لاحقناه ملاحق من قبل سنه وابوي يقوله
تالي اختفى عن الانظار صار ما يشوفه يوم قصيت الكجه وبالغصب بالزور حصله حتى اني عصبت قلت ما بتدرب ولا شي هذا واحنا بنتدرب بفلوس :RpS_glare:
كان يجي لي متآخر ويقول انتين اللي متآخره لكن اني مااسكت عنه اعطيه لسان اقوله اني توني شايفتنك جاي :RpS_blink: يقول اموت واعرف وين برج المراقبه مالش هههههههه
كانو لما يتصلون له يشلخ يقول 280 واحد عنده ينتظرون التدريب :nosweat: وساعات يصيرون 300 في ثواني
وفوق هذا كله قبل التراي الاول كان يقولي كله بترسبين :RpS_glare: يبط الجبد كله يحبطني لان كله اناحسه طلعت له قرون
تالي دربني كم ساعه وقلت له باقي 10 ايام ع التراي بخليك تدربني قبلها بيوم او يومين ويصك التلفون ويعطيني طاف :RpS_huh: او اتصل وما يرد
دخلت التراي الثاني بواسطه ونجحت ويوم ابوي قال بودي له حلاوه قلت له لا تودي :RpS_glare: ما يستاهل ع اللي سواه

نسيم الروح
20-09-2011, ( 16:50)
اكبر هم في حياة كان التدريب
لانه ما كان عندي احد اسوق في البيت فكان لازم ادرب وسوق وارتاح من هم المواصلات
قبل لا اتخرج من المدرسة بديت ادور مدرب وطبعا ما كان فيه
طلعت كجه 12-8-2009
وبعد معاناه ويا المدربين حصلت واحد واخذ دفتر التدريب من شهر واحد 2010
وما دربني الا تاريخ 8-6-2010
يعني 5 اشهر واني انتظر
و المدرب بزور اجي لازم ابويي يتصل له حتى يجي يدربني
وكان في الصيف واني مسجله صيفي وجى رمضان واني بعدي ادرب يعني الوضع ماساة
وكان ادربني 12 الظهر في عز الشمس والحر

التراي الاول كان اول يوم في رمضان والتراي الثاني قبل العيد بيومين ورسبت فيهم لانه المرور الي دخلت وياي لا تطاق نزره
في الترايين نفس المرور عقدتني

وبعد كل البلاوي الحمدالله نجحت في التراي الثالث
تاريخ 20-10-2010
وشتروا ليي سيارة مستعمله شهر 2

طموح
20-09-2011, ( 17:12)
حضور رائع وتفاعل جميل ...
و الأجمل من ذلك أنها قصص وإن طالت بعض الشيء إلا أنها توجت بالنجاح ...
مبروك إلى إلي أخذ الليسن وعقبال الباقي إنشاء الله ...

Al_Nile
20-09-2011, ( 21:43)
يسلموا الموضوع كثير مرح وخفيف

بدايتاً أنا ما كنت حابة أتدرب بس الماما قالت لازم.. توكلنا على الله وتدربنا
بس !!
أنا مشكلتني كانت الكلش .. بل وهي عقدتي
ولله الحمد .. الله ستر ووفق
وبسبته تدربت عند مربين .. وبسبته بعد كنت وايد اقول هي وقفت بروحها !! ياسبحان الله
:RpS_lol:

نجمة الليل
20-09-2011, ( 21:52)
امم انا قصتي قصة ويا الليسن
في البداية اصريت اني اتدرب عند مرة مراعاة للشرع و جدي و خصوصا ان يقول ان اذا تواجد النساء في المجال فالاحوط الخذ عندهم ما علينا
حصلت وحدة حجزت عندها 3 شهور قدام بس ما قصيت الكجة لان قلت اول تتصل فيني
و لما اتصلت تقولي برزي روحش عقب اسبوع بدربش
ثاني يوم شلت شلاتي و رحت قصيت الكجة و المحاظرة دشتها في نفس اليوم حظي قوي كان ذاك اليوم:RpS_lol:
و اتصل فيها قالت لي يومين و ادربش
و هاليومين صاروا سبوعين و بيتنا سافروا و خلوني عند اختي متزوجة و تميت اتصل ما ترد و اطرش مسجات اقول لها اذا ما بتدربيني خبريني ادور لي احد غير
و رجعوا الهل و جربنا على تلفونات غير و اخيرا ردت
لكن سبتني سب الا يقول تعرفني و اللي بيني و بينها اتصال تدريب ب:RpS_blink:
ما ظلت كلمة ما قالتها ياله ربها يتكفل فيها:no:
ما علينا بعدين درت على مدربات البحرين كلهم الا تقولي انا دواركم ما ادرب منه و الا تقول لا انتي جامعية ما اقدر و اللي مغيرة تلفونها و اللي و اللي
لما استملييت خلاص و قامت دموعي تنزل :RpS_crying:
الوالد الله يحفظة قالي ما ليش الا فلان صديقي و هو اللي درب اخوانش و خواتش كلهم و مصير الحايل للقصاب:nosweat:
و هذا المدرب خوش واحد و زين لكن يعتبرنا مثل بناته اهو صديق الوالد من عمر يدربني ساعة كل اسبوع او 15 يوم
و تدربت عنده بس 15 ساعة :whistling:
بس طولت بحكم الوقت و كان يسجل ليي ساعات زيادة بس جذي
و دخلت تراي و الله وفقني و نجحت كان ترايي المغرب الساعة 5 و شي و الدنيا ظلام و رجعت رحت الماتم اتسمعت و الساعة 2 الفجر قمت ادرس لامتحان مدتيرم كان عليي يوم ثاني و بركات الليسن جبت فيه فل مارك ههه:RpS_lol:

و بكمل السنة من اخذته في محرم الجاي ان شاءالله
و ناقصتني السيارة بس:msn-wink:

و هذي قصتي مع الليسن

Al_Nile
21-09-2011, ( 02:35)
ههههههههههههههههههههه
قصصنا بلاوي والله ويا هالليسن
عن جد موضوع حلو .. !ِ

math girl
21-09-2011, ( 18:58)
اخذت الليسن شهر 3 2008 ما تعبت على دواره المدرب لان كانمن اهل زوجي
بس ما كان تعليمه ذاك الزود خفايف لكن الحمد اعرف اشياء واجد لانه اول شي علمني زوجي
حتى على المشاكل الي تصير في السياره و الشغلات العميقه في المكينه وغيره اعرف شوي لهسوالف من زوجي الله يخليه
ولما بديت امشي جنه الذاكره انمسحت الطريق الي ولا الف مره طايفه عليه ولا جني ادليه وبلاوي واجد على ما تعودت وصرت خبره وحكات وضربات
فاحسن شي الواحد ما ياخذ ليه سياره جديده عشان عادي لو تكسرت وما يخاف انه يطلع عشان يصير عنده خبره وبروفيشنال وعادي حتى يتريق في السياره وهو رايحه الجامعه اكثر الاحيان احمل ريوقي والكوفي والعصير وعلى ما اوصل تريقت
وبالتوفيق للجميع و ان شاء الله الكل ياخذ الليسن ولا يتمنن لغيره وروح ويجي على كيفه
بقولكم شغله لاحظته الي يحن على الليسن نفسي ما ياخذه من اول تراي >> اخذته في الثاني
والي ما يفتكر ولا يحن وعادي السالفه من اول تراي ياخذه

بســــــكوتــــــة!
21-09-2011, ( 19:03)
ان شاء الله تحصلون الليسن ويالسيارة :smile2: