استفسارات حول تخصص علوم الحياة

[أحْمَدْ آل عَبُودْ]

بسم الله الرحمن الرحيم
السلام عليكم ورحمة الله وبركاته

أنا من دفعة هذه السنة 2012 والتخصص الي اخذته كرغبة أولى هو علوم الحياة {تمهيدي علوم الحياة } وما عندي إمتحان الإفاء {الأورونتيشين }
أخذت هذا التخصص لأني أنا أحب الإطلاع والإستكشاف ودائماً أشاهد القناة المشهورة قناة ناشونال جيوغرفيك أبو ظبي
فأحببت هذا التخصص للعلم أني كنت بالثانوية العامة في كيمياء أحياء


وأنا الآن أحس بالتردد وذلك لأني عندما شاهدت بعض المواضيع المتعلقة بالتخصص من إستفسارات الأعضاء والردود فكنت اشعر بالإحباط واليأس وخصوصاً اللغة الإنجلينزية ومالها في هذا التخصص فأنا ضعيف باللغة الإنجليزية
فوجدت نفس بين خيارين إما تغيير التخصص إلى تخصص آخر أو البقاء في التخصص
وكذلك هل التمهيدي إني أدرس هذا التخصص مع مواد فرعية مثل Arab إلخ
فلا أعلم إلى من ألجئ في هذا الموضوع {التخصص } فحبيت أن تفيدوني في هذا الموضوع

دمتم بود

المصدر: :: UOB-BH :: منتديات طلبة جامعة البحرين - من قسم: كلية العلوم

[math lover]

وعليكم السلام
بما انك تحب الاحياء فخلاص توكل على الله يا اخي
اني كانت رغبتي الاولى احياء وكنت مثلك احب برامج اللي تتعلق بالاحياء وكنت كيم وحيا وعطوني رغبتي الاولى لكن احباطات الناس وصعب وصعب ويبليه انجليزي واني ميح في الانج فحولت الى رياضيات وهي رغبتي الثانية بس يوم اخذت بيو 102 ( اول مقرر بايلوجي وهو مطلوب علينا في تخصص الرياضيات ) استمتعت فيه وقلت لوزين ما غيرت التخصص ولا سمعت الى كلام الناس لان اللغة مستحيل تكون عقبة شوي شوي الواحد بيتغلب على مشكلة اللغة فاخذت الاحياء كتخصص فرعي ولكن ما قدرت اواصل فيه مو لانه صعب لا بس لانه يبليه مجهود كبير والرياضيات يبليه مجهود فماقدرت اوازن بين الاثنين فحذفت الماينر وظليت على تخصصي الاساسي رياضيات

المهم الهدف من كل هالقصة اللي قلتها فوق
ان ماعليك من كلام الناس اللي تحبط لو تقول ويش بتاخذ تخصص لازم بيطلعون ناس بحبطونك لان باختصار مافي تخصص سهل
كل تخصص ولابد انك تواجه الصعوبات فيه بس بالدراسة الدائمة كل شئ يصير سهل

اني ما بجي وبقص عليك وبقول ليك الاحياء سهل
لا لكن اذا كنت تدرس اول باول والكلمات اللي ماتعرفها تقعد تترجمها وتهتم فصدقني ببتعود واصلا كلمات الاحياء كله تتكرر فاللغة كلش ما بتاثر يعني ما انكر ان يمكن اول مادة احياء بتواجه صعوبات في اللغة لكن صدقني بتتعود تالي

وعلى العموم اللي بيدخل هالتخصص لازم يحط في باله ان يبليه دراسة عدلة واهتمام اول باول

موفق اخي

[math lover]

وبالنسبة للتمهيدي
اي تقدر تاخذ واياه مادتين من هالمواد ( hist 121 - arab 110 - islm 101 )

[أحْمَدْ آل عَبُودْ]

شكراً جزيلا على هذا الرد الذي اثلج صدري صراحة

ما ادري شنو اقول ليش
ما اقول الا الله يوفقك في دراستك

شكراً وما راح ننساكم من الدعاء دمتم

[math lover]

العفو
وحاضرين لاي استفسار
موفق

[وطن الاحرار]

بالنسبه ليي اني نفس التخصص اول ماكنت بدخل التخصص .! كلمن يقول ليي احياء وبال وشنوو هذا وصعب
واني صراحه طول الوقت تفكير وخايفة
بس حط ف بالك اي شي بتاخده صعب وبي ليه دراسه
يعني الحمدلله .. الكلمات اترجمها اول باول ... وتقدر تمشي ..

بالتوفيق

[عين الحق]

+1

طبعا اختي وطن الاحرار و ماث لفر ما قصروا


يكفي انه انت تحب التخصص واهم الشيء الدراسة اول باول وتنظيم الوقت مهم جدا جدا جدا راح تلاقي صعوبة بالاول عادي كل طالب جامعي يحس به الشيء سواء التخصص سهل او صعب لانها مرحلة جديدة ودائما خلي في بالك ان كل شيء بالدراسة يكون سهل واذا اي شيء مو متأكد منه اسأل الدكاترة والطلبة وان شاء الله تحصل اعلى الدرجات وتتيسر امورك ...

والتوفيق للجميع ان شآء الله

[القمر المضيء]

اخوي ما عليك من كلام الناس .. اني سمعت كلام الناس وغيرت رايي قبل لا اجرب .. وفي الاخير التخصص اللي رحت ليه ما واصلت فيه وحولت احياء .. والحين مرتاحة في تخصصي لانه شي احبه .. اعتقد انه الانجلينزي مو رئيسي للتخصص مثل ما الاغلب يقول اول شي بتحس كلمات جديدة بعدين الكلمات نفسها نفسها تتكرر و تنحفظ اللي عليك انك تخصص لك يوم او يومين تقعد تجوف الاشياء الجديدة و خلاص بعدين حتى بتحس الدراسة للامتحان سهلة و ما يبي لها شي .. بعدين نظام المواد العلمية وخصوصا الاحياء ما يضيع الدرجات لانهم يعطون تستات واجد فتضمن درجات حلوة وكل تست من خمسين ياخدون منه 10% فقط هاي غير اللاب و النهائي حده 40% فتحس ان عندك فرص واجد

بالتوفيق .. وأي سؤال احنا موجودين

[Ghaiidoona]

كل شي في البداية صعب ويبغي ليه جهد
والأحياء مثله مثل باقي التخصصات كلها
محتاج لجهد في البداية ، وبعدين تتعود على المصطحات والكلمات لأنها تتكرر واجد
اللغة أبدا ما كانت عائق
بس يبغي لك دراسة متواصلة عشان تقدر تمشي في التخصص
الشي يعتمد على الشخص نفسه وإصراره وقوة عزيمته

وإذا بغيت مساعدة ترى ما بنقصر وياك
والدكاترة بعد طيبين ويساعدونك في اي وقت

welcome 2 biology department

[وردة البحر]

في البدايه راح تشوفه صعب ودسم بس بعدين بتتعود
ونفس ما قالت صديقتي غيدوونه كل شي في بدايته صعب
بس بعدين بتتعود على الكلمات لأنها بتتكرر معك وما بتنساها

الله يوفقك