- استفسار بشأن التصميم الداخلي -

[Naseem]

السلام عليكم ،
/
عندنا مجموعة استفسارات بخصوص هذا التخصص ،،
- سمعت كثيراً بأن التخصص مُكلِف ،
إن كانت بعثة مثلاً ،
كم راح يكلفني الفصل الواحد مثلاً ؟
الكتب والمشاريع / والأدوات نشتريها ف البداية .. ،
- أتمنى التفصيل من اللي يدرسون هالتخصص -
هل راح تكون المبالغ زيادة عن اللزوم؟

- هل المجال مُتعب زيادة عن اللزوم ؟!
سمعت عن " المعماري" إنهم يتعبون واجد لدرجة إن يفكرون يتراجعون ويغيرون التخصص! وبما أنه يشبه التصميم الداخلي ،
متعب طول الفصل ؟ / ولا أوقات تسليم المشاريع ؟ / تتعبون واااجد رغم تنظيم الوقت وأكثر من باقي الطلبة؟!!

- ما المجال الوظيفي ؟
لين درسنا وين ممكن نشتغل ؟ وشلون بيكون الدوام مثلاً ؟
هل هو مضمون ؟ ومطلوب في سوق العمل ؟؟
ويناسب البنت كـ " خصوص "
ومشكوورين
أتمنى سرعـة الـرد ..​

 

[رَحِيـــقْ !]

https://www.uob-bh.com/forum/showthread.php?t=23169
موضوع كتبته من شوي قد يفيدج


- سمعت كثيراً بأن التخصص مُكلِف ،
إن كانت بعثة مثلاً ،
كم راح يكلفني الفصل الواحد مثلاً ؟
البعثة بكون المواد مدفوعه من الوزارة .. وعندج 400 دينار للكورس تصرفينها لباقي الأشياء
بس صرف الكورس الواحد ما يتعدا ال200 .. في اول سنة .. و بالسنين الأخيرة يقل لان المواد نفسها تستغلينها

الكتب والمشاريع / والأدوات نشتريها ف البداية .. ،
نادرا تحتاج موادنا لكتب .. بالغالب عملية .. او بوربونتات تعطى من الدكاترة .. فبعني من هالناحية ما تكلف
لكن المشاريع بالنهاية مثلا الكورس اللي راح طبعت بحوالي 50 دينار .. للمشروع النهائي ..
الأدوات بالبداية ذكرت ما تزيد عن مئتين .. بس تشترينها متفرقه .. لأن كل سبوع يخلص شي او يطلبون شي
فبتصيرين زبونه دائمه للمكاتب

- أتمنى التفصيل من اللي يدرسون هالتخصص -
هل راح تكون المبالغ زيادة عن اللزوم؟
ذكرت المبالغ وانتي حددي .. زيادة عن اللزوم او اوك

- هل المجال مُتعب زيادة عن اللزوم ؟!
سمعت عن " المعماري" إنهم يتعبون واجد لدرجة إن يفكرون يتراجعون ويغيرون التخصص! وبما أنه يشبه التصميم الداخلي ،
متعب طول الفصل ؟ / ولا أوقات تسليم المشاريع ؟ / تتعبون واااجد رغم تنظيم الوقت وأكثر من باقي الطلبة؟!!
في هذي متعب متعب متعب .. يعني على طول الفصل نادرا بتنامين قبل 12 .. وتوصل لأيام تنعدم فيها النوم
والمشروع النهائي هطا بعد شي عجيب تركضين في البيت ما تتمشطين ولا تسوين شي غير الشغل حتى الأكل تنسينه
الغالبية جذي هذا حالهم سواء منظم الوقت او لا محد يقدر يقول انه مريح

- ما المجال الوظيفي ؟
لين درسنا وين ممكن نشتغل ؟ وشلون بيكون الدوام مثلاً ؟
شركه مثلا او محل خاص .. والدوام كحال الشركات الخاصة ممكن ل4 /5
هل هو مضمون ؟ ومطلوب في سوق العمل ؟؟
موجود في سوق العمل بس الابداع والاقناع له دور بالقبول
ويناسب البنت كـ " خصوص "
غالبية التخصص بنات الا ما ندر

​

 

[Naseem]

مشكورة على الإجابة .. ،
متشجعة ، ونوعاً ما مترددة..!
أبحث في التخصصات عن شيء أميل ليه.. وما أجوف شي أكثر من هذا ،
بسألش بخصوص إنه مُتعب واجد..، تخصصات باقي الناس مثلاً .. غير مُتعبة نسبياً ؟
وبالنسبة للهندسة المعمارية .. هل بينها وبين التصميم الداخلي فارق كبير ؟
من حيث طلب الدراسة ، وقيمة الدراسة نفسها .. وسهولتها ومتعتها وتَعبها ؟
خبريني عنش ، قبل لا تدشينه شلون كان تفكيرش ناحيته .. ؟ وليش اخترتينه تحديداً .. ؟
هل في ناس تندم على إنها دشته ؟!
وبخصوص التوظيف ، مافيه شيء حكومي مثلاً !
ما تعرفين أحد درس هالتخصص وتوظف وظيفة مناسب زمنها .. وحكومية مثلاً ؟
مسامحة أدري غربلتكم.. بس متحيرة نوعاً ما .. ،
وندري عنكم ما بتبخلون علينا ​

 

[رَحِيـــقْ !]

بسألش بخصوص إنه مُتعب واجد..، تخصصات باقي الناس مثلاً .. غير مُتعبة نسبياً ؟
كل تخصص تواجهه صعوبات وتحديات .. والانسان اللي يعايش التخصص غير عن انسان يحكم عنه بالظاهر
باقي التخصصات اذا ما كانت متعبه فتتطلع دراسه أكثر كم كونها عملية .. والتعب يكون في فترة الامتحانات بالغالب

وبالنسبة للهندسة المعمارية .. هل بينها وبين التصميم الداخلي فارق كبير ؟
العمارة دراستها 5 سنين .. التصميم الداخلي اربع .. التصميم الداخلي في تركيز على تفاصيل الأمور
العمارة .. يهتمون بطبيعه المناخ وكون وقوة البناء نفسه .. بس الفارق ماعتبره كبير

من حيث طلب الدراسة ، وقيمة الدراسة نفسها .. وسهولتها ومتعتها وتَعبها ؟
ممكن التصميم الداخلي يكلف أكثر .. التعب متقارب .. المتعبة والسهولة تختلف من فرد
الى اخر حسب مقدار محبته ورغبته بالتخصص

خبريني عنش ، قبل لا تدشينه شلون كان تفكيرش ناحيته .. ؟ وليش اخترتينه تحديداً .. ؟هل في ناس تندم على إنها دشته ؟!
قبل لا ادخل كنت بين عدة تخصصات ، ماكان عندي مشكله بأي تخصص أدرسه ,, لان عندي خلفيات وميول متعدده ،
وبكل فترة كنت أغير .. لكن قراري اللي حطيته بأيام اختيار التخصص كان التصميم الداخلي .. وكون معدلي في التسعين
فحصلت رغبتي الأولى .. اختياري لهذا التخصص كان بعد زيارة لجمعية المهندسين والاستماع لعدة اشخاص عن تخصصاتهم
فحبيت التخصص كتخصص عملي بالغالب ويناسب ميولي كوني أتحمل التعب لشي عملي ، أكثر من شي دراسي مكثف .. وهذا
كل شخص يقيس نفسه وقدراته ويحدد هل يتلاءم او لا
وبالنسبه لفي ناس تندم او لا .. فهذا شي أكيد وموجود بكل تخصص تسمعين " لا بارك الله في الساعه اللي دخلت فيها هالتخصص "
بس غالبية اللي يطلعون من أي تخصص او يندمون ، يكونون داخلينه وماعندهم خلفية كافية وما قارنو بين امكانياتهم ومتطلبات التخصص
فيتفاجؤون بان التخصص اللي دخلوه واقعًا غير عن التخصص المرسوم في مخيلتهم سابقا وللضغط دور كبير
بكل فصل اقول لو زين حولت .. لحظة الضغط بس ,, لكنها فترة وتعدي ويرجع الحب للتخصص

وبخصوص التوظيف ، مافيه شيء حكومي مثلاً !
ما تعرفين أحد درس هالتخصص وتوظف وظيفة مناسب زمنها .. وحكومية مثلاً ؟
حكومي في حالة وحدة [ مدرس ديكور ] اهمم بس لو بتتطلعين على المدارس
وتجوفين هالمادة ، أحس اي انسان مو جامعي عنده خلفية يقدر يدرسها !
​

 

[Naseem]

شي لطييف جداً ، أني بعد ما أبغي أخلي أي شي كـ رغبة أولى ومعدلنا زين ولله الحمد ،
" جمعية المهندسين " شكله شي مفييد .. نبي نزور ونجوف ، ؟!!
ما ودونا مكان مدرستنا >< !
خوفني كلامش في إنه يدشون ويطلع غير عن اللي رسموه في مخيلتهم هههه ،
نحتاج نعرف معلومات أكثرر .. من وين يا تُرى!
اللي حبيت فيه إنه عملي أكثر ، وأحس إنه شي تَجديدي ومو روتيني ..
- له له التدريس مو من صوبنا .. -
شغلات المجال هذا ، تسوى ؟

- مشكورة واجد أختي -​

​