... مولتن كيك وايسكريم الفانيلا بكوليه الفراوله...
اولا:: ..ايسكريم الفانيلا..
المكونات:
1) 1 كوب حليب
2) 1 كوب كريمة خفق
3) نص كوب سكر ( 100 غرام )
4) 1 عود فانيلا
5) 4 صفار بيض
الخطوات:
نقسم عود الفانيلا بالنص بظهر السكين ونطلع البذور الي داخل
نحطهم مع الحليب والكريمة ونص كمية السكر في قدر ستيل مع العود نفسه ونسخنهم بس ما نخليهم يغلون .
نخلط صفار البيض مع بقية كمية السكر الين مايصير لونهم اصفر باهت.
نخلط كمية صغيرة من خليط الحليب والكريمة على صفار البيض ونحرك بسرعة ونسوي هل حركة على دفعات للين ما يصير خليط الحليب والكريمة ساخن
نرجع الخليط على النار ونحرك لين توصل حرارة الخليط 170 ف
بعدين نبرد الخليط فوق وعاء متروس ثلج وماي نغطيه ونتركه ليلة كاملة في الثلاجة
ونكون حاطين وعاء ميكنة الايسكريم داخل الفريزر
يوم ثاني نتاكد ان الوعاء مثلج زين ، نشغل المكينة ونحط الخليط تقريبا لمدة نص ساعة
لين ما يتكون عندنا خليط جامد وثقيل بس يضل نسبيا سائل
ونحطه داخل علبة لمدة 6 ساعات في الفريزر.
*الاسكريم هذا النكهة الاساسية فيه الفانيلا يعني عود الفانيلا مهم جدا وما نقدر نستخدم الفانيلا السائلة او البودرة لان نكهتهم جدا بعيدة عن النكهة الطبيعية ،، الفانيلا متوفرة في لولو وجيان ولو ان سعرها مبالغ فيه جدا .
*كل عود الفانيلا بعد ما تستخدمونه ارموه في علبة سكر وبعد مده بيصير سكر فانيلا وهذا السكر الي استخدمته حق الاسكريم.
*الناتج بيكون 1 لتر
ثانيا:: ..كوليه الفراولة..
المكونات:
1) 200 غرام فراولة مجمدة ( يفضل اسبانيه او امريكيه )
2) 100غرام سكر بودرة
3) 1 ملعقة طعام عصير ليمون
الخطوات:
نخلط الفراولة والسكر وعصير الليمون على قدر ستيل
ونخليهم يغلون لمدة 5 دقايق
نخلطه في الخلاط
ونصفيه ونحطه في علبة ونخليه في الثلاجة لين يثقل شوي.
ثالثا:: ..المولتن كيك..
المكونات:
1) 25 غرام سكر
2) 25 غرام طحين
3) 25 غرام زبدة
4) 25 غرام شوكليت 60%
5) 1 بيضة
*المقدار يسوي قالب مولتن كيك واحد
الخطوات:
ندهن الـ ramekin بالزبدة مرتين
ونغطيه ببودرة الكاكو ونخليه في الفريزر لين وقت الاستخدام
نسخن الزبدة والشوكليت في المايكرويف لين ما يذوب الشوكليت تقريباً
ونخليه على جنب 10 دقايق
نخلط البيضة والسكر الين ما يصير لونهم اصفر باهت
على دفعتين نضيف خليط الشوكليت والزبدة والطحين على البيض والسكر ونسوي فولد لين ما يختلطون بس
نطلع الريمكن من الفريزر ونصب الخليط فيه ونحطه في الثلاجة لمدة نص ساعة
نسخن الفرن على حرارة 350 ف او 180 درجة س وندخل الكيك لمدة 11 دقيقة بالضبط
نخليه دقيقة يبرد ونقلبه على صحن التقديم.
*استخدموا احسن نوعية شوكليت ، اذا من ضمن مكوناتها زبدة كاكو بتكون غالبا من نوعية جيدة ، المتوفر على طول هو نوعية lindt بس اقل نسبة عندهم 65 فبتحتاجون تزيدون كمية السكر اذا ما تحبون طعم الدارك شوكليت انا هني استخدمت Ghirardelli 60% .
*مقياس حرارة الفرن ضروري جداً لمعرفة حرارة الفرن الحقيقية وعدم التخمين اذا استوى او لا ، تقدرون تجربون لين ما تعرفون الوقت بالظبط لفرنكم اذا ماكان عندكم .
..الشكل النهائي..
