أفيدوني .. لو سمحتم

[الله معي]

السلام عليكم

أنا طالبة حديثة بالجامعة قبلوني تخصص هندسة معمارية


ما مصداقية التالي من وجهة نظركم ؟

الأهل و الاقارب يقولون الهندسة المعمارية فيه تشبع في سوق العمل
قالوا ليي الهندسة المدنية و الكهربائية و الإلكترونية فيهم نقص فاختاري لش واحد منهم

أني ما أحب الرسم واجد فقط التخطيط
قلت أغير لهندسة مدنية لان فيه بعد تخطيط بس اني مو كلش في الفيزياء
و سمعت يقولون الطالب لازم يحط على روحه لان الدكاتره ما يشرحون كل شي لينا مع أني ما افهم ألا من الشرح
فهل هذا الكلام صحيح ؟ و هل راح يناسبني الهندسة المدنية؟

 

[G h a i d a]

وعليكم السلام . .

أني مو طالبة هندسة ، بس بقولش بشكل عام

أني من رايي ، الشخص إذا بيدرس شي يروح يدرس تخصص يحبه ويشوف نفسه فيه
مو شرط يكون مطلوب في سوق العمل عشان يروح يدرسه
انتين شنو ميولش ؟ في أي مجال تحسين تقدرين تعطين أكثر ؟

نصيحة : لا تبنين مستقبلش على آراء اللي حواليش .. تقدرين تسمعين منهم بس اتبعي ميولش وقدراتش .. لأن هالشي انتين الوحيدة الأدرى فيه . .

قالوا ليي لا تدشين أحياء .. صعب .. ثقيل .. مافي له مجالات .. وغيره .. ورغم كل هذا دشيته .. ليش؟
لأني ببساطة ما شفت نفسي في مكان غير .. الأحياء مجال أحبه وأقدر أعطي فيه ..

وكطالبة في الجامعة ، أي تخصص بتدشينه لازم تبذلين فيه جهد .. ولازم تحطين على روحش
مافي شي يجي بالساهل .. "والتوفيق بقدر الجهد"

أتمنى باقي طلبة الهندسة يفيدونش .. بس أني حبيت أسدي نصيحة بشكل عام

موفقة عزيزتي

 

[عبقري]

سلااام عليـــكم أختي ,,

أولاً أهــلاً وسهلاً فييج في الجامعة وبالتحديـــد في قسم الهندســـة ..

طبعاً بالنسبة للموضع وسؤالج أحب أقول لج ان الكلام مالهم غر صحيح ومو مبني على دراسة وأرقام ,, ثاني شي سوق العمل ما يوقف على عدد .. يعني أنا شخصياً اجووف مئات الطلبة اللي يدرسون هندسة مدنية أكبر مني وبيتخرجون قبلي لكن هل هذا يعني ان خلاص اوقف دراسة لانهم بخلصون فرص العمل عني !!

طبعاً لا !!

ثانيــاً .. أختي لازم ما تختارين تخصص بناء على دراسات فرص عمل ولا آراء ولا اختيارات الغير ولا المزااج .. اذا كنتي تبين وظيفة مرموقة وكبيرة مثل ما تحلمين فيها لازم تستحقينها ولازم تكونين مبدعة حتى توصلين لها .. وعشان تبدعين لازم تختارين التخصص اللي أنتي مهيئة أنج تبدعين فيه واللي انتي تبين تكونين مبدعة فيه فعشان جذي لازم تختارين التخصص اللي يناسبج واللي يناسب ميولج وتجوفين مستعدة تعطين فيه .. لا تمشين على أهواء الغير لان اليوم بتقولين اوكي بس يوم من الايام بتجوفين روحج مو قادرة تعطين فيه والسبب انج ما تحبينه , وممكن تعطين فيه وعلى أكمل وجه ولكن ما راح تبدعين لأن لمسة الإبداع تخرج من القلب اللي يحب مو من العقل اللي يحفظ

لج كل التوفيق وإذا أحتجتي شي , إخوانج

والسمووحة على الإطاالة

 

[الله معي]

اشكركما أخوي الكريمين على نصيحتكما و أقدر ردكما

اتفق معكما أن الشخص يختار بميوله ولكن المستقبل المهني في البحرين صعب
و الأنسان يحدد خياره من البداية حسب الظروف و المعطيات المستقبلية عشان ما يكون محط رحاله مكتب العاطلين عن العمل مستقبلا

 

[G h a i d a]

اشكركما أخوي الكريمين على نصيحتكما و أقدر ردكما

اتفق معكما أن الشخص يختار بميوله ولكن المستقبل المهني في البحرين صعب
و الأنسان يحدد خياره من البداية حسب الظروف و المعطيات المستقبلية عشان ما يكون محط رحاله مكتب العاطلين عن العمل مستقبلا

خيو ، حطي كل الخيارات قدامش . .
وشوفي أي واحد يناسبش من جميع الجهات بشكل عام . .
يعني شوفي التخصص وش متطلباته ، وش مستقبله
واختاري اللي ترتاحين له
واذا احترتين سوي خيرة وتوكلي على رب العالمين
وان شاء الله ما بيصير إلا كل خير
والله يوفقش وييسر لش كل أمورش