دين علينا لهذا المنتدى أن نرد على الأعضاء الجدد بعدما قارب مشوارنا على الانتهاء
الأشغال:
- التدريس: في المدارس الحكومية والخاصة ابتدائي وإعدادي وثانوي - تدريس في الجامعات بس تحتاجين ماجستير على الأقل - تدريس خصوصي بالساعة (كادين هاي الأيام) - تدريس معاهد كل المراحل - ما أبي أكثّر في التدريس دام أنتي مو رغبانة فيه لكن لا تنخدعين باللي يدرسون ويتحلطمون في وايد منهم ملككين وعاجبهم الوضع وإن كان الأغلبية منزعج
- البنوك وشركات التدقيق وأقسام المحاسبة والمالية في الوزارات والهيئات - بس يفضل الواحد عنده خلفية تجارية بأخذ مواد بزنز اختيارية أو شهادات احترافية (برنامج تمكين قايم سوقه) - ويفضل بعد تدريب عملي مني مناك إذا أمكن يحصله طالب الرياضيات - وخبرة عمل جزئي خلال سنوات الدراسية - لا تتفاجئون أعرف ناس اشتغللوا محللين مالين وكانوا رياضياتيين بس يبي له هدف وتدردح.
- إذا تخصص فرعي كيمياء أو أحياء عندج المختبرات العادية والجنائية وعيادات صغيرة داخل أماكن عامة والعلاج الطبيعي والتغذية وغيره وشركات المواد الكيميائية والبتروكيماويات والمجاهر
- إذا تخصص فرعي إحصاء - جهاز المعلومات والمسح وباحث اجتماعي ويفضل مهارة العمل على الـsoftwares الخاصة بطلبة الإحصاء
- إذا تخصص فرعي cs - حدث ولا حرج من تصميم المواقع والبرامج وتصميم الواجهات الرسومية التفاعلية والـ Graphics والـ gaming والdatabases والشبكات وتوصيلها والاتصالات والبرمجة بشكل عام والتشفير والـalgorithms وأنظمة التشغيل وحتى الروبوتات ليش لا
- إذا تخصص فيزياء ممكن يركز الطالب على التطبيقات مثل الأشعة والرنين المغانطيسي وحتى شركات التوصيل والعزل الحراري أو الأرصاد والفضاء والمناظر والتليسكوبات
بس أغلب هاذي الأشياء موجودة بكثرة برع وإذا موجودة في البحرين مقصورة على طلبة التخصص فقط لكن برع طالب رياضيات مع مهارات متعددة وشهادات احترافية في مجال آخر يتوظف ويقدمونه على طالب التخصص إذا كانت مؤهلاته عالية - لأن يقولون عنده المهارة والتفكير المنطقي والمنطق ومهارة حل المشاكل وبفيدني أكثر من طالب التخصص حتى اهني يصير ذي الشي بس يبيله واحد صج حاب التخصصين مع بعض ومشتغل على روحه وقدمي وراويهم وما بيقدرون يرفضون
ألحين نيي حق الواقع - الواقع يقول أن التخصص الفرعي اهني يزيد الفرص بمقدار 20 - 40% حسب تقديري الشخصي يعني مب وايد - والشغلات اللي ذكرتها قبل مب مستحيلة حق طلبة التخصص بس يبيلها شغل ومؤهلات داعمة بكل الأنواع (الكلام أسهل من الفعل) يعني واحد تخصصه رياضيات وماخذ تخصص فرعي فيزياء ويبي يشتغل في الرنين المغناطيسي هذا شبه مستحيل لأن في تخصص فيزياء طبية أووردي بس ممكن إذا الطالب مشتغل على روحه وماخذ شهادات ومعدله عالي ودارس أشياء زود وماخذ مقررات في جامعات ثانية ومشلخ التخصص الفرعي عدل - واحد بيقول عيل ليش ما يدش ذالك التخصص أفضل له - المشكلة أن اهو حاب الرياضيات والتخصص الفرعي في نفس الوقت وما يبي ايصيرمدرّس وما يبي يحرم روحه من لذة دراسة الرياضيات - المشكلة اهني ما يقدرون طالب الرياضيات نفس برع - برع عندهم طالب الرياضيات جوهرة تتشكل بالتدريب وتعطي نتائج مثمرة والأشغال عندهم حق طلبة الرياضيات غريبة وعجيبة
الخلاصة باختصار: التخصص الفرعي يزيد الفرص بشكل ضئيل هنا في البحرين والأولى لطلبة التخصص وقليل من الطلبة يحصل على وظيفة في تخصصه الفرعي والأغلب يتجه حق التدريس واللي مو يستعد يدرّس وماخذ التخصص الفرعي كوسيلة للهرب من التدريس الأفضل أن يبتعد عن الرياضيات مولية ويغير ميوله أو يروح برع - ما أبي أحبط بس عشان محد يقول أن حاط لنا لستة من الشغلات كله شلخ ومو موجودة - اهيا موجودة بس يبي فيتامين واو وتدور عدل عنها - وعشان محد يتفاجئ وينصم بالتدريس ولا تنسون أن التدريس يحتاج له استعداد وتقبل نفسي وهاذي عملية بناء أجيال محتاجة اهتمام وبذل وعطاء وتضحية وليست ملجأ أخير وملاذ وتقزير لكل من هب ودب أو لمن لم يجد ما تمناه. تم
بالتوفيق - الخطة في القسم تحصلينها الطابق الثاني بداية الممر
