السلام عليكم ..
طبعا أني أول ما حطيت الموضوع ما حطيت تعليقي على أمل إني أفتح المجال للأعضاء إنهم يتفاعلون قبل وبعدين أشاركهم برايي..
ولكني قررت فيما بعد إني أحط رايي من البداية ربما يحفز بقية الأعضاء على النقاش في الموضوع
والحين جيت عشان أحط تعليقي على هذه المشكلة..
أولا: اعترف لصاحب المشكلة إن الأمر صعب
لأن الزواج بحد ذاته مسؤولية مو سهلة..
رغم إن الزواج عادة يبدأ بمسؤولية زوج ومنزل فقط
وأنت الحين عليك مسؤولية تربية قبل ما تتعود على تحمل مسؤولية الزوج والمنزل
أني ما أدري شنو جنس المرسل ولكني خمنت إنها فتاة
وأني أعترف مرة أخرى إني وللأمانة لو انعرضت عليي هذه المسؤولية ما كنت قبلت فيها مهما كانت مميزات الزوج
أعتذر، ما أقصد إني أقترح عليك التراجع عن الأمر
خصوصا إني ما أدري شنو هي الظروف اللي دفعتك للقبول بهذا الشيء
لكن قولي هذا لمجرد التعبير عن صعوبة الأمر بالنسبة لي
وقد سبق لي وقد وضعت في مثل هذا الموقف من قبل ولكني رفضت بلا تردد
ثانيا: في محاولة لاستيضاح جوانب المشكلة
في البداية الأمر يعتمد على الزوج، وعلى علاقته بك، أعني كيف سيعاملك أمام أولاده؟
بالعامي:
- لو أولاده غلطوا عليش، عاندوش، هل بينتصر لش أو ليهم؟؟
- لو مثلا قالوا ليه عنش شي جذب، مثلا إنش ضربتينهم، أو سبيتينهم أو أي شي آخر، هل بصدقهم بدون ما ينتاقش وياش في الموضوع وبعاتبش أو بيهاوشش قبل لا يتأكد أنتين ظالمة أو مظلومة؟
- هل هو تقدم لطلب الزواج منش لأنه يبيش كزوجة ومعجب فيش؟ أو لأنه يدور وحدة تربي أولاده وتقبل فيه وياهم؟؟
- يعني شنو المميزات أو الأسباب اللي خلته يختارش أنتين؟
طبعا قصدي من هالأسئلة هو إن أسلوبه ومشاعره تجاههش هي الخطوة الأولى لكل شي
شلون؟؟
لأنش طبعا ما بتقدرين تسوين شي لو كل ما زعلوا منش -وهم جهال وما يعرفون مصلحتهم- وراحوا يشتكون لأبوهم ووقف في صفهم بدون ما يفكر ليش أنتين سويتين هالشي، وهل انتين صدق سويتينه أو لا
ما بتقدرين تسوين أي شي إذا كانت نظرته تجاهش إنش بالنسبة لأولاده زوجة الأبو الشريرة
طبعا من جانب آخر ثقته فيش، والأسباب اللي دفعته لاختيارش، ونظرته لش، بتنعكس إيجابا على مدى سيطرتش على الأطفال والقدرة على تقويم أسلوبهم والأخطاء عندهم
الشغلة الثانية اللي لازم تنتبهين ليها هي: وين أمهم؟؟
هل أمهم موجودة؟ مهتمة لأمرهم أو لا؟
واذا كان المانع من تربيتها ليهم انفصال، ليش صار الانفصال؟
وإذا كانت متوفية -الله يرحمها- بكون موقفش أيسر على ما أعتقد
لأن إذا كانت الام موجودة فمن الطبيعي انهم بشوفونها وأكيد ما بتكون تحبش بما إنش ماخذة مكانها
فوارد جدا انها تحرضهم عليش وتشوه صورتش قدامهم أو ما شابه ذلك..
أما إذا كانت متوفية فأنتين بعد بتواجهين صعوبة والشي يعتمد على مدى تعلقهم فيها
يعني مو شرط إنهم يستسلمون بكل بساطة ويتقبلون فكرة انش الحين مكان امهم
خصوصا انهم مو صغار واجد والمفروض يفهمون انش مو امهم..
ولكن اللي أقدر أقدمه لش من نصيحة في الحالتين هو:
- إنش تحترمين أمهم قدر الامكان، لو قدامهم على الأقل، ولا تفكرين ابدا مهما كنتين متضايقة منهم او من تصرف منها انش تسيئيين ليها قدامهم.. حاولي اذا ما مدحتينها لا تذمينها، خصوصا اذا كانت متوفية
- لا تدشين بعنف وتبينين انش جاية بهدف تغيير حياتهم، حاولي تبدأين بكسب محبتهم لش، خليهم يثقون فيش ويرتاحون لش، وحاولي تغيرين الأشياء الا لا جدال فيها، واصبري لين يقدرون يتعودون ويتقبلون طبيعة الحياة الا تبينها أنتين.. وتأكدي إن الشي صعب عليهم ويمكن أكثر من صعوبته عليش، فتحمليهم قدر ما تقدرين
- طبعا اعتقد انش حطيتين هالشي في بالش من قبل، وهو انش ما تتوقعين انهم ملائكة، وتتوقعين الأسوأ، ولا تحطين في بالش انش بتسيطرين عليهن بسهولة.. الموضوع يحتاج وقت ويعتمد مثل ما قلت لش على أشياء مختلفة
- حاولي قدر الإمكان إنش ما تضرينهم لا بكلمة ولا بضرب، حتى لو عاندوش أو تعبوش، أدري الشي أحيانا بكون صعب خصوصا اذا طلعوا شياطين
بس حاولي.. والله يصبرش
- لو لا سمح الله حاولوا يأذونش لازم يكون لأبوهم موقف تجاه هالشي، لا تسمحين بأن يصيدش شي وهو ما يحرك ساكن، ولا تخلين صورتش قدامهم الشخص العاجز الا ما يقدر يسوي ليهم شي، وحاولي تبينين ليه هالشي من قبل او اشرطي في العقد بخصوص هالأشياء اللي تضمن سلامتش..
أني شخصيا أعرف إنسانة تضررت بسبب أولاد زوجها (ضرب لدرجة اسوداد البشرة) وبلغت عنهم ولكن زوجها اخر شي سحب البلاغ لجل خاطر أولاده وهي طلعت من الباب الشرقي
طبعا اني ما اقول هالأشياء عشان أخوفش
إن شاء الله ما تتعرضين لصعوبات والله يعينش على هذا الحمل
والله يوفقش ويكتب لش الا فيه الخير والصلاح
واتمنى اني أكون ساعدتش باللي قلته ..
.gif "AN(0) :AN0:")
