تجاربكم مع التوظيف ومقابلات العمل

أمواج

ll Super Moderator ll
طاقم الإدارة
تاريخ التسجيل
17 يناير 2010
المشاركات
14,631
العمر
31
الإقامة
البحرين
المجموعة
أنثى
الدفعة الدراسية
2010
الكلية
كلية تقنية المعلومات
التخصص
Computer science
السلام عليكم

شخباركم ؟

:)

حبيت أفتح الموضوع لعرض تجاربكم و ذكرياتكم مع مقابلات العمل والتوظيف

وبذلك نستفيد من تجاربكم

المساحة مفتوحة لكم

بالتوفيق :FF:
 
ببدأ مع تجاربي مع مقابلات العمل الي دخلتها

* أول مقابلة عمل كانت في أحد المعاهد .. كانت لوظيفة معلم حاسوب .. كانوا دقيقين بالاختيار .. المقابلة انقسمت إلى 3 مقابلات

- الأولى كانت عامة: كانت الأسئلة عامة عن التخصص الجامعي ،وشلون اخترت التخصص ،والمعدل وهل انت راضي عنه ،وشنو سويت في فترة تعطلك،
وعن الهوايات ،وعن الدراسة الثانوية ،وشنو شغلة ولي أمرك ،ونقدر نقول انها كانت سوالف خفيفة بس هم عندهم ورقة يقيمون فيها بعض النقاط الي تهمهم.

- بعد اجتياز الأولى كانت المقابلة الثانية العملية: كان مطلوب منا ان نحضر برزنتيشن في حدود 10 دقائق عن موضوع نختاره من عده مواضيع
الواضيع كانت تتعلق ببرامج المايكروسوفت أوفس و الوندوز ،واخترت البوربوينت وسويت برزنتيشن عن نبذة عامة عن البرنامج.
وطبعا نفس الشي كان فيه مقيمه للعرض عندها ورقة تقيم بعض النقاط.

- بعد اجتياز المقابلة الثانية كنت أتصور انها كانت الأخيرة فلما اتصلوا ليي للمرة الثالثة اتوقعت ان للتوظيف وجهزت اوراقي كلها ^^"
لكن لما رحت كانت مقابلة ثالثة مع المدير: هذي المقابلة كانت عشان تبين نفسك أي قد مؤهل للشغل وياهم
مثلا: بشنو المميزات الي تخلينا نقبل فيك ..شنو الفائدة الي بتقدمها للمعهد اذا قبلناك .. اذا قبلناك بكون ساعات دوامك كذا هل تقبل؟
شلون بتقدر تجي بدون تأخير ومكان سكنك بعيد؟ .. كم المعاش المتوقع؟ .. اذا درست أشخاص أكبر منك شلون بتتعامل وياهم ؟ .. شلون بتتصرفين اذا كان بالكلاس شخص من الجنس الآخر غير مؤدب ؟ .. حسيت اني ما سويت زين هالمرة وكانت اجاباتي واجد منها مو مقنعة حتى ليي


وبالنهاية ما انقبلت ^^
 
التعديل الأخير:
* المقابلة الثانية ليي كانت من طرف وزارة العمل (بدل التعطل)

كانت المقابلة في مركز تعليمي .. كانت الوظيفة هي "موظف تسجيل" .. وطالبين خريجين آيتي
كان المكان جميل .. و شفت حسابهم في الانستقرامهم برامجهم أيضا جميلة .. وهو كان مخصص للفئات العمرية الصغيرة

رحت قبل وقت المقابلة وكانت الي بتقابلنا للحين ما وصلت فانتظرنا مده على ما وصلت وكانت متأخرة
بعد شوي دخلنا وحدة ورا وحدة للمقابلة .. كانت المقابلة قصيرة يمكن ما اتجاوزت 5 دقايق

كنا أول شي نعطيها السيفي .. تسألنا اسئلة محددة وتكتب نقاط معينة على السيفي
من الأسئلة عن منطقة السكن .. هل انتين ممتازة في المايكروسوفت اكسل .. شنو تقييمش الى انجليزيتش .. شلونش مع التعامل مع الأرقام والحسابات
هل عندش خبرة في هالشغلة

يعني كأن كان عندهم نقاط معينة يبونها في الي بوظفونه يقيمونها اقتصروا عليها

مشكلتي ما أعرف أمدح روحي وأبين روحي أعرف كل شي .. يعني مثلا الاكسل أدري ان أعرف ليه وأدري سستمهم اذا اكسل سهل بتعامل معاه
بس ما أعرف أقول اني بروفيشنال في الاكسل .. لان أدري أكيد فيه نقاط معينة ما أعرفها فيه لأن ما مرت عليي .. فأقدر اقول اني اوكي فيه مو أكثر
ما أدري هل هي دقة بالتقييم الذاتي أو تعبرونها نقص بالثقة بالنفس :th:

بالنهاية ما انقبلت أيضًا =)
 
التعديل الأخير:
* المقابلة الثانية ليي كانت من طرف وزارة العمل (بدل التعطل)

كانت المقابلة في مركز تعليمي .. كانت الوظيفة هي "موظف تسجيل" .. وطالبين خريجين آيتي
كان المكان جميل .. و شفت حسابهم في الانستقرامهم برامجهم أيضا جميلة .. وهو كان مخصص للفئات العمرية الصغيرة

رحت قبل وقت المقابلة وكانت الي بتقابلنا للحين ما وصلت فانتظرنا مده على ما وصلت وكانت متأخرة
بعد شوي دخلنا وحدة ورا وحدة للمقابلة .. كانت المقابلة قصيرة يمكن ما اتجاوزت 5 دقايق

كنا أول شي نعطيها السيفي .. تسألنا اسئلة محددة وتكتب نقاط معينة على السيفي
من الأسئلة عن منطقة السكن .. هل انتين ممتازة في المايكروسوفت اكسل .. شنو تقييمش الى انجليزيتش .. شلونش مع التعامل مع الأرقام والحسابات
هل عندش خبرة في هالشغلة

يعني كأن كان عندهم نقاط معينة يبونها في الي بوظفونه يقيمونها اقتصروا عليها

مشكلتي ما أعرف أمدح روحي وأبين روحي أعرف كل شي .. يعني مثلا الاكسل أدري ان أعرف ليه وأدري سستمهم اذا اكسل سهل بتعامل معاه
بس ما أعرف أقول اني بروفيشنال في الاكسل .. لان أدري أكيد فيه نقاط معينة ما أعرفها فيه لأن ما مرت عليي .. فأقدر اقول اني اوكي فيه مو أكثر
ما أدري هل هي دقة بالتقييم الذاتي أو تعبرونها نقص بالثقة بالنفس :th:

بالنهاية ما انقبلت أيضًا =)
الأحسن ما تبالغ في تصوير نفسك..
أنا في المقابلة عطيتهم كاش.. صار لي فترة ما مشيت.. ولا يبوني امشي بيكب قير عادي..
لكن في النهاية وقعو العقد وياي :rolleyes2:
 
انا دخلت مقابلة في مدرسة خاصة
وكانت الأسئلة كالتالي:

تحدث عن نفسك اول شي

شلون ممكن تضبط الصف؟

لو جو صف مشاغبين ويش بتسوي؟

هل تعتقد انك قادر على ضبط الصف؟

أي فئة تفضل تختار حق تدرس
ابتدائي اعدادي ثنوي؟

ويش تعرف عن هالفئات العمرية؟

عندك سيارة؟

هل سبق ودخلت مقابلة؟

هل سبق واشتغلت في مكان آخر؟

شنو هواياتك؟

لو كنت انت مدير المدرسة شنو تحب في المتقدم الجديد للعمل؟

شنو تعرف عن قانون العمل البحريني؟

شلون تقدر توصل المعلومة للطلبة؟

شلون تقيم لغتك الفسحى؟
اختار موضوع وتكلم عنه بالفسحى

في غرفة المدرسين ممكن تتعامل وي مدرسين آخرين من تخصصات ثانية شلون بتكون علاقتك وياهم؟
 
الأحسن ما تبالغ في تصوير نفسك..
أنا في المقابلة عطيتهم كاش.. صار لي فترة ما مشيت.. ولا يبوني امشي بيكب قير عادي..
لكن في النهاية وقعو العقد وياي :rolleyes2:

صح، في بعض المؤسسات بحاسبونك على الأشياء الي قلتها في المقابلة، يعني مثلا أنت ادعيت انك جيد في شغلة معينة او مهارة معينة وبعدين عقب ما وظفوك تبين أنك ما تجيدها وتفتقر إلى هذي المهارة، هذا الشيء بحاسبونك عليه لذلك الأفضل تكون عند الشخص شفافية قدر الإمكان في المقابلة
 
موضوع جميل

أني عن نفسي دخلت مقابلة وحدة بس لأن هدفي كان واحد وحيد متوحد :RpS_lol:
وهو وزارة التربية والتعليم..

طبعا اتوقع الكل يعرف طريقة التقديم عندهم بس بقول يمكن في أحد ما يعرف
1. شهر 2 يعلنون عن فتح باب استقبال المقدمين
2. بعد فترة مو محددة ينادون اللي قدموا (اتوقع كلهم) حق امتحان
3. بعد فترة بعد مو محددة ينادون مجموعة من المقدمين حق المقابلة
4. بعد فترة بعد مو محددة ههه ينادون اللي انقبلوا حق استكمال اجراءات التوظيف
5. بعدنا ما خلصنا :hff: عقب هالإجراءات لازم تنتظر رسالة التعيين، قبل رسالة التعيين ما تعبتر انك انقبلت لأن ممكن ما تجتاز خطوة الإجراءات
6. الحين عطوك الرسالة، تداوم أول يوم دوام تودي هذي الرسالة لمدير أو مديرة المدرسة وإن شاء الله وظيفة مباركة عليك ويعطيييك العافية :RpS_thumbsup:

زين أني من تخرجت للحين صادف سنة 2017 و2018، وطبعا قدمت في المرتين
المرة الأولى وصلت لمرحلة تقديم الامتحان بس وما نادوني بعدين
طبعا محد يعرف وش السبب أو المعيار لأني ما احس اني رسبت في الامتحان ما كان صعب، بس بعد ما يندرى شسالفة :Ninja:

المرة الثانية عن نفسي أشوف ان الامتحان كان أصعب من المرة الأولى بمراحل، تقريبا استغرقت ال3 ساعات كاملة واني أحل فيه
ولكن المفاجأة انهم اتصلوا ليي لمقابلة :eek:
الحمد لله، جهزت نفسي للمقابلة من خلال كلام ناس عن شلون بتكون
جمعت ليي معلومات وحاولت قدر الإمكان إني أكون مستعدة لكل مصيبة :detective2:
وجا يوم المقابلة وقابلنا..

طبعا مكان المقابلة كان صف، لكنهم مرتبينه بطريقة ان تكون لك طاولة ويقابلك 5 أشخاص، كل شخص فيهم ليه وظيفة معينة
1. الأول يسألك في سيرتك الذاتية (كأنها مقابلة عمل عادية)
2. الثاني يسألك في الأمور التربوية وطرق التدريس ومهارات المعلم
3. الثالث يتم قاعد ساكت ويراقبك (يكون قاعد قبالك بالضبط) حسب اللي فهمته إنه يدرسك من ناحية نفسية ويحلل تصرفاتك وردات فعلك وأشياء من هذا القبيل
4. الرابع يسألك في الأمور الوطنية، عن البحرين، أسئلته عبارة عن ثقافة عامة
5. الخامس يسألك أسئلة تخصصية

بالنسبة ليي ما حسيت المقابلة أقنعتني، وتوقعت إنهم ما راح ينادوني، وشلت الموضوع من بالي كليا :sadwalk:
ولكنهم نادوني :RpS_huh:
شلون شصار مادري بس بحاول أحلل المقابلة من منظوري الشخصي
# الإيجابيات:
- كنت هادئة جدا، ما حسيت نفسي متوترة وأني أتكلم رغم إني ما عرفت أجاوب على بعض الأسئلة، وصراحة مادري من وين نزلت عليي السكينة حزتها، يمكن لأني دعيت إن إذا كنت قد الوظيفة ربي يسهل عليي أموري ويوفقني :rolleyes2:
- مشيتي + جلستي كانت مستقيمة، وقت الجلوس ما كنت شابكة أياديي (حسب علمي إن شبك الإيد يدل على الانغلاق على الذات أو ماشابه)
- كنت أطالع كل واحد يكلمني باهتمام
- حاولت أجاوب على كل الأسئلة
- كنت أبتسم في بعض المواقف، مثلا لما سألوني سؤال وما عرفت أجاوبه واضطريت أقول اني ماعرف، قلت هالشي واني ابتسم
# السلبيات:
- عن نفسي ما حسيت أسئلتهم ساعدتني في إثبات نفسي وقدراتي
- الأسئلة الوطنية ما جاوبت على ولا واحد منهم، لأن كانوا صعبين رغم اني راجعت بس ما راجعت هالأشياء بالذات ولا مريت عليها
- لما قال ليي قولي سيرتش الذاتية، حسيت روحي ما تكلمت عن نفسي بشكل مقنع، وحسيت روحي مادري وش أقول

حاليا أني كملت إجراءات التوظيف وانتظر رسالة التعيين
طبعا اجراءات التوظيف عبارة عن استمارات (قد الدنيا) تمليهم، وتودي ليهم بعض الأوراق، هي:
كشف درجات وافادة الجامعة، افادة تخرج من الثانوية، عقد زواج اذا كنت متزوج، كشف حساب البنك، الجواز والبطاقة، صور شخصية
+ تسوي الفحص الطبي، والبصمات في مركز الشرطة

والحين ننتظر الرسالة اللي حسب الا سمعته نستلمها نهاية هذا الشهر
وحسب كلام البعض (واللي مو متأكدة من صحته أو أسبابه) إن ممكن تكمل هالإجراءات وما تتوظف بعدين :RpS_blink:
منطقيا (اذا ما كان عندي مشكلة صحية أو في البصمات) ما اعتقد في سبب ممكن يخليهم بعد كل هذا ما ياخذونا
ولكن كل شي جايز في هالبلد :bye1:
لذا، ادعوا لينا بالتوفيق وتيسير الأمور
والله يرزق الجميع من أوسع أبوابه وتتوظفون كلكم يا رب :yahoo:

ملاحظة: حسب اللي لاحظته، القبول والرفض مو معتمد كليا على الاجابة الصحيحة فقط، يعني ممكن تجاوب خطأ ويمشونها لك، المهم تكون لك شخصية ويكون لك حضور، وتصرفاتك تقنعهم :cupidarrow:

بالتوفيق للجميع :fruits_cherry:
 
نصايح ممكن تفيد أحد

1. قبل تروح المقابلة خلك محضر نفسك، ابحث عن المؤسسة اللي مقدم فيها واعرف أشياء عنها، عشان يحس اللي يقابلك إنك مهتم فعلا
2. لا تتكلم واجد، اختصر كلامك، ولا تقول شي بدون ما يسألونك عنه، يعني رد على قد السؤال عشان ما يقدر المقابل يصيدك
3. تدرب تتكلم عن نفسك، شلون تقول سيرتك إذا سألوك عنها وتذكر أهم مميزاتك، حاول تجهز لك كلام مسبقا ومرتب عشان تعرف تتكلم بسلاسة بدون تكرار وغيره
4. الشخص اللي يقابلك بيتعمد وبيحاول يسألك عن أشياء ما تعرف جوابها عشان يشوف ردة فعلك إذا انسألت في شي ما تعرفه
5. لا تتصنع ولا تمدح نفسك واجد، خلك طبيعي وهادئ، وتكلم عن نفسك بشفافية مثل ما قالوا أولا العم فوق :bleh:
6. انتبه للغة جسدك، لا تمشي وانت محندب، او تقعد بطريقة توحي انك دايخ، او تشبك أياديك، وطالع اللي يكلمك بانتباه، وحاول ما تنشغل بشي غير وقت المقابلة
7. تلفونك خله سايلنت او بنده بالمرة عشان لا تتعرض لموقف محرج لو احد اتصل أو شي

بس هذا الا في بالي الحين :biggthumpup:
 
شكراً على طرح الموضوع

عن نفسي أول تجربتين كانوا فشل في فشل

اةل مقابلة ما كنت افهم في شي و رايح بدون ما يكون عندي شي اتكلم عنه لان ببساطة اول مقابلة
غير اني كنت متخزبق و وقلبي يرقع

أول مقابلة كانت مع مدير الشركة مباشرة ، حسيت ان المقابلة كانت اوكي مع اني ما عرفت اتكلم عن نفسي عدل
وسووا لي نوع التست ( يبون يجوفون اعرف استخدم برامج الاوفيس او لا ) و كان تافه
بس عقب ما كلموني

المقابلة الثانية انا الي ما رديت ..
كان صاحب المكان ما عنده ذوق فالتعامل أبداُ ، و لا كلام عدل كلش
كان أغلب الوقت يبي يطلعني ان مافهم شي و أن هو الي متكرم علي وقاعد يساعدني
مثال: انت تشجع من ؟
ريال مدريد.
زين على الأقل الحين في شي يشفع لك اني اوظفك !
طلعت من المقابلة ولا كلمته

المقابلة الثالثة كانت في مختبر طبي
مدير المختبر كان واضح وضوح جليّ انه يدور اخصائي نظم معلومات (تخصصي)
وكان يبين عليه ان يبي واحد يكون فاهم لنظام المعلومات بشكل كامل ، ولله الحمد هذا الشي انا كنت واثق منه
وفهمته ان من هالناحية فهذا مجالي و عارف فيه كل شي ، بس بنفس الوقت كنت واضح وياه ان من الناحية البرمجية انا ما راح أقدر أساعده
بس رغم هذا الحمدلله توفقت و حصلت الوظيفة وللحين ماشي فيها

مقابلة رابعة كانت في بنك
بنك جديد فرعه الاصلي المغرب ، مكان مرتب بصراحة
عجبني نظامهم بروفيشنال ، قعدت و تكلمت وياهم
كان في اشياء يبونها معقولة ، انا سالتهم شنو الي انتون تحتاجونه بالضبط و خليتهم يعطوني تفاصيل الوظيفة
رديت عليهم بخصوص الي طلبوهم وقلت ليهم ان هالاشياء اقدر عليها وما في مشاكل

قدموا لي عرض بس كلش ما ناسبني
يبون واحد يشتغل بدون اوفرتايم ، عادي يتصلون فيك نص الليل بدون ما تقول شي
باختصار ، عرض قرمبع ( يمكن هم متعودين على هالنظام فالمغرب )
للمعلومية الي قابلتهم جنسيتهم مغربية ، مو بحرينيين

الزبدة ان هالشي تجربة ، و كلما انت خضت هالتجربة اكتسبت خبرة اكثر
وهالشي بيخليك تكون اقوى وتعرض نفسك بشكل اقوى فالمستقبل
بالتوفيق للجميع
 
* المقابلة الثالثة كانت لوظيفة "مبرمج" .. كانت في شركة تختص بالآلات وهالسوالف .. كانت أيضا من صوب وزارة العمل

أول ما وصلت المكان كنت أحسه كراج كبير .. كنت أقول بخاطري وين جايبيني شكله المكان كله رجال
المهم دخلت المكان عند المكاتب وما كان فيه أحد غيري يقابلونه حزتها
قال لي المقابل شنو محتاجين .. حسيت مو مهم سنوات الخبره عندهم بس المهم شخص عارف بالشغلة
بعدين عطاني اوراق وسألني في كودات الديتا بيس والكويريز والاج تي ام ال
كانت الأسئلة مو صعبة وأغلبها مشابهة لاسئلة امتحان وزارة التربية ولكن حزتها ما كنت أتذكر كودات ولا مراجعة كودات وما كنت متوقعة اختبار
بعدين جاب السيفي مالي وقعد يسألني عن المهارات الي موجودة ومستواي فيها
وسألني عن مشروع التخرج عن شنو كان وبأي لغة و شنو المشاريع الثانية الي سويتها في الجامعة وطلب ان يشوف مشروع التخرج بس ما كان عندي حزتها
كان أدائي متوسط واتوقعت من لغة الجسد في الأخير للمقابل ان ما بيقبلوني
 
* المقابلة الثالثة كانت لوظيفة "مبرمج" .. كانت في شركة تختص بالآلات وهالسوالف .. كانت أيضا من صوب وزارة العمل

أول ما وصلت المكان كنت أحسه كراج كبير .. كنت أقول بخاطري وين جايبيني شكله المكان كله رجال
المهم دخلت المكان عند المكاتب وما كان فيه أحد غيري يقابلونه حزتها
قال لي المقابل شنو محتاجين .. حسيت مو مهم سنوات الخبره عندهم بس المهم شخص عارف بالشغلة
بعدين عطاني اوراق وسألني في كودات الديتا بيس والكويريز والاج تي ام ال
كانت الأسئلة مو صعبة وأغلبها مشابهة لاسئلة امتحان وزارة التربية ولكن حزتها ما كنت أتذكر كودات ولا مراجعة كودات وما كنت متوقعة اختبار
بعدين جاب السيفي مالي وقعد يسألني عن المهارات الي موجودة ومستواي فيها
وسألني عن مشروع التخرج عن شنو كان وبأي لغة و شنو المشاريع الثانية الي سويتها في الجامعة وطلب ان يشوف مشروع التخرج بس ما كان عندي حزتها
كان أدائي متوسط واتوقعت من لغة الجسد في الأخير للمقابل ان ما بيقبلوني
اتصلتين ليهم او رديتين راجعتينهم؟

لأن أنا ما ردو علي اله عقب ما راجعتهم..
1. انتين في آخر اهتماماتهم..
2. يبون يشوفون واحد يتحرك مو هم يحركونه.
3. عدهم يحارسون كذا شخص حق يختارون الافضل.. راجعيهم حق تسرعين العملية وتقلصين الخصوم..
 
اتصلتين ليهم او رديتين راجعتينهم؟

لأن أنا ما ردو علي اله عقب مت راجعتهم..
1. انتين في آخر اهتماماتهم..
2. يبون يشوفون واحد يتحرك نو هم يحركونه.
3. عدهم يحارسون كذا شخص حق يختارون الافضل.. راجعيهم حق تسرعين العماية وتقلصين الخصوم..

لا ما راجعتهم لأن قالوا ليي هم عندهم سيفيات بعد وما خلصوا مقابلات والاسبوع الجاي اذا بيقبلوني بيتصلون عليي
فاعتمدت ان هم بيتصلون مثل كلامهم

المقابلة كانت من شهر رمضان أعتقد قريب العيد .. يعني من زمان
 
لا ما راجعتهم لأن قالوا ليي هم عندهم سيفيات بعد وما خلصوا مقابلات والاسبوع الجاي اذا بيقبلوني بيتصلون عليي
فاعتمدت ان هم بيتصلون مثل كلامهم

المقابلة كانت من شهر رمضان أعتقد قريب العيد .. يعني من زمان
انا بعد قالو لي جدي لكن ما سكت.. وكان في واحد حتى مقابلته ما سووها شكله كان مرشح نفسي.. او يمكن يصير زميل عمل في شغلة ثانية.. بس أنا كنت محظوظ في للأمانة:RpS_tongue:
 
موضوع جميل و ما ادري ليش احس الاخت @أمواج محبطة شوي او تبغي نهاية او حل لصراعات و تحديات الوظيفة :nosweat:

عن نفسي دخلت مقابلة مع احدى الشركات الخاصة (start up) و كانت جميلة و في النهاية تواصلوا معاي لبدا التدريب (اسبوع) و من ثم تثبيت الوظيفة
طبعا الرفض صار من طرفي بعد ما رجعت من المقابلة و اخذت فترة للتفكير في كل الكلام الا صار بيني و بينهم

الاشياء الا ما ارتحت لها هي 3 نقاط :
- لما سالته كم راتبي - رد عليي بسؤال "كم تبغي راتبك؟" حزتها ما كنت ادري عن الرواتب و رديت عليه 400 الى 450 كحد ادنى و كانما كنت قابل بال 400 و هالشيء غلط كبير
- الشيء الثاني تكراره لكلمة "شغلنا متعب" و سالني هل انت مستعد تسوي شغلات غير شغلتك الاساسية (كنت مقدم على ويب/موبايل ديزاينر) بحيث راح نعلمك بعض الشغلات الجديدة عليك و هالشيء حسسني ان مهما كان شغلي خفيف فراح اشتغل اشغال ثانية و ثالثة و رابعة.
- الشيء الثالث و الاهم هو فترة العمل (من 8:30 الى 6) مع اني جيت المقابلة على اساس دوامي بكون من 8 الى 3 حسب المكتوب في موقعهم الالكتروني و هالشيء بالذات هو سبب الرفض بغض النظر عن التعب و الصعوبات.

ساعات احس باني تسرعت بالرفض لكن ساعات احس اني مو مستعد اشتغل 10 ساعات (اروح الصبح و ارجع الليل انام) و ربما حتى راتبي ما يكون اكثر من 450 بحسب ردي وياهم لما سؤلوني عن الراتب الا ابغيه
 
موضوع ممتاز @أمواج ومفيد جدا. قاعدة أقرأ الردود بحماس وخوف وقلق وأنتظر النتيجة النهائية كأني أتابع متسابق أأيده وأتمنى فوزه :RpS_lol:.

بالتوفيق @قمَر فرحت لش :FF:.
 
موضوع جميل و ما ادري ليش احس الاخت @أمواج محبطة شوي او تبغي نهاية او حل لصراعات و تحديات الوظيفة :nosweat:

عن نفسي دخلت مقابلة مع احدى الشركات الخاصة (start up) و كانت جميلة و في النهاية تواصلوا معاي لبدا التدريب (اسبوع) و من ثم تثبيت الوظيفة
طبعا الرفض صار من طرفي بعد ما رجعت من المقابلة و اخذت فترة للتفكير في كل الكلام الا صار بيني و بينهم

الاشياء الا ما ارتحت لها هي 3 نقاط :
- لما سالته كم راتبي - رد عليي بسؤال "كم تبغي راتبك؟" حزتها ما كنت ادري عن الرواتب و رديت عليه 400 الى 450 كحد ادنى و كانما كنت قابل بال 400 و هالشيء غلط كبير
- الشيء الثاني تكراره لكلمة "شغلنا متعب" و سالني هل انت مستعد تسوي شغلات غير شغلتك الاساسية (كنت مقدم على ويب/موبايل ديزاينر) بحيث راح نعلمك بعض الشغلات الجديدة عليك و هالشيء حسسني ان مهما كان شغلي خفيف فراح اشتغل اشغال ثانية و ثالثة و رابعة.
- الشيء الثالث و الاهم هو فترة العمل (من 8:30 الى 6) مع اني جيت المقابلة على اساس دوامي بكون من 8 الى 3 حسب المكتوب في موقعهم الالكتروني و هالشيء بالذات هو سبب الرفض بغض النظر عن التعب و الصعوبات.

ساعات احس باني تسرعت بالرفض لكن ساعات احس اني مو مستعد اشتغل 10 ساعات (اروح الصبح و ارجع الليل انام) و ربما حتى راتبي ما يكون اكثر من 450 بحسب ردي وياهم لما سؤلوني عن الراتب الا ابغيه
1. 450-500 هي الراتب المعتاد..
2. في شغلات الدوام مو مهم.. اهم شي تخلص شغلك..
3. ويب دفلوبر مو شغلة.. الكل يقدر يتعلمها ويشتغل..
4. كل الشركات تقول الشغل عندهم ضغط.. والشغلة الفانسي اله بتقعد في مكتب وما تسوي شي غير تطقطق بالتلفون مي موجودة علي الاقل في القطاع الخاص..
5. واجد من الشركات الصغيرة يكون طاقمها صغير وبتالي كل واحد بكون ليه عدة وظائف.. كل ما كبرت الشركة كل ما زاد التخصص فيها..
6. الشركة تخسر مبلغ الدعم ادا عطتك اقل من 450.. فلا تحاتي هذلين يزحفون ورا الفلوس :smile:
** صح 450 قليل ولكن لا يحلمون اضل واجد وياهم :smile:
 
موضوع جميل و ما ادري ليش احس الاخت @أمواج محبطة شوي او تبغي نهاية او حل لصراعات و تحديات الوظيفة :nosweat:

عن نفسي دخلت مقابلة مع احدى الشركات الخاصة (start up) و كانت جميلة و في النهاية تواصلوا معاي لبدا التدريب (اسبوع) و من ثم تثبيت الوظيفة
طبعا الرفض صار من طرفي بعد ما رجعت من المقابلة و اخذت فترة للتفكير في كل الكلام الا صار بيني و بينهم

الاشياء الا ما ارتحت لها هي 3 نقاط :
- لما سالته كم راتبي - رد عليي بسؤال "كم تبغي راتبك؟" حزتها ما كنت ادري عن الرواتب و رديت عليه 400 الى 450 كحد ادنى و كانما كنت قابل بال 400 و هالشيء غلط كبير
- الشيء الثاني تكراره لكلمة "شغلنا متعب" و سالني هل انت مستعد تسوي شغلات غير شغلتك الاساسية (كنت مقدم على ويب/موبايل ديزاينر) بحيث راح نعلمك بعض الشغلات الجديدة عليك و هالشيء حسسني ان مهما كان شغلي خفيف فراح اشتغل اشغال ثانية و ثالثة و رابعة.
- الشيء الثالث و الاهم هو فترة العمل (من 8:30 الى 6) مع اني جيت المقابلة على اساس دوامي بكون من 8 الى 3 حسب المكتوب في موقعهم الالكتروني و هالشيء بالذات هو سبب الرفض بغض النظر عن التعب و الصعوبات.

ساعات احس باني تسرعت بالرفض لكن ساعات احس اني مو مستعد اشتغل 10 ساعات (اروح الصبح و ارجع الليل انام) و ربما حتى راتبي ما يكون اكثر من 450 بحسب ردي وياهم لما سؤلوني عن الراتب الا ابغيه

حاول قدر الإمكان انك تبحث عن المكان قبل لا تدش مقابلة
يعني بالنسبة للراتب مثلا اني أحس المفروض تحاول تعرف جم رواتب الموظفين عندهم بشكل عام من قبل لا تدش المقابلة
حزتها لو كنت تدري بتعرف وش الإجابة المرضية أكثر
أو لو ما حصلت الإجابة عن هالسؤال من قبل أحس كان الأفضل انك تسأل كم رواتب الموظفين عندكم بدل ما تسأل كم بتعطوني :th:

عادة اللي يخلونهم يقابلون يكونون عندهم طرق في الكلام بحيث يخلونك تقول شغلات ما تبي تقولها ويوترونك يلعبون بأعصابك شوي
لأن هم يبون أشخاص أقوياء ويعرفون يتصرفون في المواقف الصعبة
لما تكون عندك معلومات كفاية عن الشركة بتقدر تتجنب هالشي وما بتضطر تتكلم واجد وتسأل، من ناحية أخرى هو بيرتاح لما ما يحس نفسه مضطر يشرح لك اشياء واجد وانك جاي وعندك معلومات ومو كل شي بتسأل فيه

موفق :AN0:
 
موضوع جميل و ما ادري ليش احس الاخت @أمواج محبطة شوي او تبغي نهاية او حل لصراعات و تحديات الوظيفة :nosweat:

لا أبدًا، للحين ما وصلت لمرحلة اليأس أو الاحباط وإن شاء الله ما أوصل لها أبدًا
هذي أرزاق والواحد يسوي الي يقدر عليه ومحد بفوته رزقه
والمقابلات بالنسبة لي تجارب أتعلم منها

- لما سالته كم راتبي - رد عليي بسؤال "كم تبغي راتبك؟" حزتها ما كنت ادري عن الرواتب و رديت عليه 400 الى 450 كحد ادنى و كانما كنت قابل بال 400 و هالشيء غلط كبير
- الشيء الثاني تكراره لكلمة "شغلنا متعب" و سالني هل انت مستعد تسوي شغلات غير شغلتك الاساسية (كنت مقدم على ويب/موبايل ديزاينر) بحيث راح نعلمك بعض الشغلات الجديدة عليك و هالشيء حسسني ان مهما كان شغلي خفيف فراح اشتغل اشغال ثانية و ثالثة و رابعة.
- الشيء الثالث و الاهم هو فترة العمل (من 8:30 الى 6) مع اني جيت المقابلة على اساس دوامي بكون من 8 الى 3 حسب المكتوب في موقعهم الالكتروني و هالشيء بالذات هو سبب الرفض بغض النظر عن التعب و الصعوبات.

- سؤال كم تبغي راتب أو كم توقع الراتب ينوجد بالمقابلات بس ما يعني ان الي بتطلبه هو الي بيعطونك اياه .. ممكن أقل و ممكن أكثر
أحيانًا أتصور السؤال عشان يعرفون مدى ثقتك بقدراتك بحيث انك بتعطي راتب يكافئها
أو ان يتأكدون ان الراتب الي بتطلبه مو أكثر من الي هم حاطينه
كان الأفضل تعرف المعاش قبل لا ترفض

- التعب بالشغل موجود في كل مكان .. تعلم أشياء جديدة أشوف انها positive point لأن بتكتسب معارف ومهارات جديدة
وأغلب الأشغال فيها شي اساسي واشغال اضافية فرعية .. حتى المعلم مثلًا مو بس يجي يعلم يعطونه أشياء ثانية .. الممرض مو بس يمرض يعطونه مهام غير بعد
وعموما الآيتي شغله متعب بطبيعة الحال

- ساعات العمل هذي لك حق فيها .. اذا ما تقدر على ساعات طويلة ترفض أفضل
 
التعديل الأخير:
من فترة بسيطة دخلت مقابلة عمل
كان الشغل في احد المعاهد لوظيفة تسجيل
كانت الوظيفة بارت تايم

المقابلة كانت مباشرة مع المدير و جدا قصيرة
طلب مني المدير ان اتكلم عن نفسي و ابين هواياتي و نقاط قوتي
ما كنت عارفة ويش اقول بالضبط
اتكلمت شوية و سكت و كان ينتظرني اواصل
بعدين سألني شلون تجين المعهد وسألني ابوش ويش يشتغل

قال لي بنتصل ليش بس محد اتصل فعرفت ان مو مقبولة
 
عودة
أعلى أسفل