ما موقفكم؟ وما ردكم موضوع للنقاش

زينات

Well-Known Member
تاريخ التسجيل
19 يناير 2020
المشاركات
987
العمر
38
المجموعة
أنثى
الدفعة الدراسية
قبل 2005
الكلية
كلية التربية
التخصص
علم النفس التربوي _فئات خاصة_
السلام عليكم

لو كنتين معلمة جديدة وجت ليش معلمة عندش عداوة شوي اياها وقالت لش أكو الطالبات لما شافوش قالوا ويش هالشكل؟ ويش رايكم؟ وويش الرد عليها؟
علما ان المعلمة الجديدة شكلها مألوف ومقبول والمدرسة في وسط قرية يعني شيعة مثلها.
 
سبق وعلقت على الموضوع في موضوع الأسئلة
بس كتبت هني مرة ثانية لأن حسيت الموضوع شوي ليه أهمية بالنسبة لش أو شي جدّي أكثر
فلذلك حبيت أتعمق في الرد شوي

طبعًا أني حسيت إن هالشخصة قاصدة الاستفزاز
يعني تبي تضايق الإنسانة الثانية بطريقة غير مباشرة
وفي احتمالية أصلا إن محد قال شي ولا شي بس تبي تهر 🤭
فأني أول شي أكره الناس الا ينقلون السوالف التافهة الا جذي
لأنها ما تفيد بشي..
يعني الشي الوحيد اللي بتسويه هو إنها بتضايق الطرف الآخر
ولو كانوا الأشخاص الا تقصدهم مو طالبات كنت بحط احتمالية إنها تحاول تتبع سياسة فرق تسد
إن كل الناس أشرار وما يحبونش ويحاولون يأذونش وبس أني الزينة
بس مدام هم طالبات ومع ذكر إن العلاقة بين المعلمتين مو زينة فما عندي تفسير غير إن هالشخصة تحاول تضايق أو تستفز الطرف الثاني

وطبعًا في هالحالة الشي يعتمد بالدرجة الأولى على شخصية هالإنسانة
أني عن نفسي عادة أكون بين خيارين
أما أحقر وأسوي روحي ما سمعت
أو أرد بطريقة تفشلها 😆
وفي هالموقف عادة برد أتوقع 🤔

مثل ما قلت في المرة السابقة
ممكن أسألها: أنتين وش قلتين ليهم؟
غالبًا يا أما بتقول انها ما قالت شي
فبقول ليها يعني أنتين حالش حالهم في الجهالة 😝
أو بتقول انها زفتهم وقالت ليهم عيب وجذي
فبقول ليها عجل ليش جاية تقول ليي مدام أنتين تصرفتين؟ 😆
أو ممكن من البداية أقول ليها يعني أني وش استفدت من هالخبرية بالضبط؟ 😆

على أي حال
في أشياء ممكن تأثر على ردة فعلي
مثلا: سبب العداوة بيني وبينها؟
شلون شخصيتها بالضبط؟
هل عندها أشياء تخليها أقوى مني؟
مثل منزلتها في المدرسة ومكانتها
بعد عمرها شي مهم جدًا
وهكذا
لأن في ناس واجد النقاش وياهم تضييع وقت
يعني حتى لو رديتين ما بيفرق شي أبدًا
عكس في ناس ممكن اذا رديتين عليهم يعرفون انش ما بتسكتين عنهم فيحاسبون عقب
والناس الا ما منهم رجا، أني أختار أحقرهم لأن ما يسوى أعور مخي وأفكر في ردود عشانهم 🤣
 
السلام عليكم

لو كنتين معلمة جديدة وجت ليش معلمة عندش عداوة شوي اياها وقالت لش أكو الطالبات لما شافوش قالوا ويش هالشكل؟ ويش رايكم؟ وويش الرد عليها؟
علما ان المعلمة الجديدة شكلها مألوف ومقبول والمدرسة في وسط قرية يعني شيعة مثلها.
طنش تعش تنتعش
مو شرط كل الناس تحبني وتحترمني
يعتمد في النهاية على ثقافة الناس ، والدنيا دوارة
مثل ما الدنيا فيها بلايا فيها جبران للخاطر
 
مو كل شي يستاهل نوقف عنده بالحياة ونعطيه من تفكيرنا ومشاعرنا وطاقتنا
 
عودة
أعلى أسفل