هل (الخيّاط) كائن حقيقي؟

[إيقاع]

السلام عليكم..
عنوان عبقري للجذب كالعادة.. عدل له؟ يسسسسس
عاد أتمنى يجذب البنات فقط لأن الموضوع خاص بهم. (بهنّ) بس معليش ما بكتب نون النسوة في الموضوع.

أسمع ناس يتحجون عن (الخياييط ~ جمع خياط) بس أحسه كائن وهمي وأخاف حتى من الاقتراب منه. طبعا ما أقصد الجلابيات.. دلين منتشرين بكثرة. ولا أقصد فساتين السهرة.. دلين بعد موجودين إلى حد ما. أقصد الفساتين الناعمة إللي ممكن لبسها في الحياة اليومية.. الأقمصة والبنطلونات.. موجودين؟ بناتج مرتب يعني وملائم وينافس الملابس الجاهزة؟ أو إن يكون بمستواها؟


للمشاركة:
اسم الخياط:
الموقع:
وصف الموقع:
حدود الأسعار:
التجربة الشخصية:


^في التجربة الشخصية تكتبون مثلا فصلت عنده كذا وطلع مرتب وطلع نفس الا ابيه وهيك يعني وكم استغرق أيضا ممكن بعد.. يُفضل تكون التقييمات لنتائج إيجابية عشان نستفيد.


أفكر نضيف نقطة للموضوع تتعلق بالموديلات الجميلة والصالحة للتفصيل < معليش مو قاعدة أحصل كلمات مناسبة.. بالإضافة لتفاصيل عن أنواع (الخَلَق) والألوان *الترند* في هالفترة.. بس مادري إذا هالشي مقبول اهني مجتمعيا أو لا .


بس لا صدق يعني إذا تعرفون خياييط/ خياطين زينين شاركونا بمعلوماتكم.

 

[G h a i d a]

عليكم السلام
جذبني العنوان صراحةً ودخلت
بالنسبة ليي ما أتعامل الا ويا خياط في سوق واقف اسمه "المضاوي"
اول ما تدشين من عقب دوار ١ تاخذين الاشارة يمين وتمشين شوي تلاقينه في نهاية صفة المحلات اللي على ايدش اليسار "قبل الدوار الصغير"
اني وامي نتعامل وياه من زمااان ، اسوي عنده جلابيات وفساتين يومية وحتى اللابكوت اخيطه عنده وخياطته بيررفكت
اسعاره للفستان تتراوح بين ٥ الى ٨ دينار

وبالنسبة للموديلات بس كتبي في قوقل long summer dress
وبيطلع لش اشكال والوان وشوفي اللي يعجبش ويناسبش ، او short اذا تحبين القصير

 

[بَتُول]

عليكم السلام ..

عادةً ما أفصل إلا للأعراس و من زمان ما فصلنا .. فما أدري وش آخر الأخبار
بالنسبة للفساتين و الأقمصة تعاملنا من قبل مع خياطة ( أم نواف ) لها محلين في نفس الشارع ، على ما أظن المحلات ف توبلي ( بتأكد ليش )
هو الخياط يزعم مال فساتين سهرة ، فلما تفصلين فستان ناعم يكون سعره مرتفع مقارنة بموديله البسيط ..
أذكر فصلنا مرة فستان ناعم حده و خلقه ساتان وياه جاكيت كان ف حدود ١٨ على ما أظن

الخلق ..
عادة ناخذ من محلات في الرفاع صايرين ثلاثة أو أربعة صوب بعض ، يجيبون خلق حليو و زين
ما أعرف وصف الطريق بس بجوف ليش بعد
بس أذكر اسم واحد منهم ( القلعة للأقمشة )
و ف مجمع العالي في محلين مال خلق حليوين و كشخة بس يجون أغلى
في محل بعد اسمه تاج المملكة على ما أظن ف بوكوارة بعد يجيب أشياء حليوة و متنوعة

الموديلات..
النت ما يقصر ، كتبي وصف للفستان الا ف بالش بس و بتطلع ليش موديلات واجد

Pinterest بعد تحصلين فيه أشياء متنوعة أكثر و أحدث
ف search كتبي dresses و بيطلع ليش خيارات واجد

بالنسبة للبناطيل ع ما أذكر ما يرضون يفصلون بس يمكن الحين غير أو فيه محلات تخيط

بالتوفيق ..

 

[غريبة الدار]

اسم الخياط: أزياء حريم السلطان
الموقع: إذا مو غلطانه اعتقد انه في باربار
وصف الموقع: ما أعرف أوصف وداني أبوي واذكر بعد ضيعنا شوي
هي حسابهم على الأنستقرام

https://www.instagram.com/h.s.fashions/

حدود الأسعار: بعد نسيت / بس حسيت أسعارهم زينه واعتقد بعد يعتمد على الموديل أو الشغل اللي تبونه
التجربة الشخصية: اممم كان عندي قماش مال جلابيه وفيه شوي تطريز أو نقشه وديته ليهم وكان شغلهم زين ومرتب في هناك مره تشتغل و تأخذ القياسات رغم صغر المحل بس بعد عدهم غرفة قياس لما كملوا ورحت استلم الجلابيه خلوني أجرب قياسها إذا كان زين أو محتاجه تعديل