ارجو المساعدة من طلبة الحقوق

[الاجنحة المتكسرة]

السلام عليكم ورحمة الله وبركاته

انا طالبة تخرجت حديثآ من المرحلة الثانوية قسم الادبي بمعدل 89،8 وسجلت في جامعة البحرين و خليت الحقوق رغبة اولى وبأنتظار نتيجة القبول

صراحة انا متخوفة جدآ من درا سة الحقوق خاصة في جامعة البحرين لان الكثيرين يذمون في تخصص الحقوق يقولون ان صعب و الاختبارات تكون حوالي 300 صفحة وان الكتب اشبه بدليل النلفون من ضخامتها و انا لمست من ردود اخواني الطلبة في المنتدى نفس الشعور فياريت تخبروني عن هذا التخصص بشكل اكبر و عن فترة التمهيدي شلون راح تكون و في الفترة الاولى في الجامعة هل بيلقون علينة محاضرة او شلون بتكون الاجراءات في الفترة الاولى ،،،اتمنى ان انكم تفيدوني لاني خايفة من المرحلة الجامعية خاصة اول فصل:tears::tears:

يعطيكم العافية جميعآ وجزاكم الله الف خير​

 

[سبط القصير]

اولا اختي الاجنحة المتكسرة صلي النبي واله
ولا تخافين ولا شي

المعدل تمام معناتها انت مقبولة 100-100 في كلية الحقوق لان في طلبة اقل منج بوااايد قبلوهم العام السابق .

بالنسبة الى التخصص ما في افضل من تخصص الحقوق
كلية الحقوق من افضل الكليات والمتخرجين منها عندهم خيارات عمل كثيرة عكس اللي يدرس في التربية او الاداب وحتى البزنز .

بالنسبة للتمهيدي تراااه كلش عااادي راح تدرسين انجليزي وتاخذين كتاب انج واحد بس
والناجح في التمهيدي مثل الراسب بمعنى اخر تضيع فصل (او تاخذينه راحة )ههه

في اليوم التمهيدي راح يشرحون ليكم عن الكلية وبعرفوكم على الاقسام في الكلية
هذا موضوع خليته في منتدى اخر من قبل ولكن لا ضرر ان انقله لك :
عندك دخولك الى الجامعة وفي الفصل الاول في كلية الحقوق ستدرس القانون بقسميه العام والخاص قد تشعر ببعض الخوف من الغموض والمستقبل الغير واضح الرؤية
وقد تشعر بالوحدة وتشتاق الى اصدقائك في المدرسة ولكن تذكر انك ستلتقي باشخاص جدد ايضا

في الكلية تذكر دائما ان المواد الان تختلف عن الثانوية وبالتالي فنظام المراجعة يجب ان يختلف
مواد القانون مواد دسمة وبحاجة الى المراجعة اول باول فالمراجعة قبل يوم او يومين لا يكفي لانهاء الكتاب
قد تعتاد على تقسيم الردجات وستكون 10 (حضور ومشاركة او بحث )+30(اختبار منتصف)+60(اختبار نهائي )
او 40 منتصف +60 نهائي

في اول فصل ستاخذ خمس مواد
المدخل الى القانون (101): وهو اهم مقرر لانه مثل الدليل الشامل لكل مقررات الكلية .
حقوق الانسان (103):وهو مقرر ممتع وجميل تحتاج الى فهم المقرر اكثر من الحفظ .
القانون الدستوري (106): مقرر سهل وتقدر تجيب فيه a براحه.
انج 191 : هو مقرر انجليزي اهم ما فيه حفظ الكلمات ومعرفة معناها عربي انجليزي.
تاريخ القانون : ستشعر في هذا المقرر انك تتصفح قصة جميلة في الماضي .

في اثناء دراستك في الجامعة اقرأ الاعلانات لان سيعلن عن تسليم البطاقة الجامعية والرقم السريا لذي سيمكنك مستقبلا
من الدخول الى موقع الجامعة والنظر الى درجاتك وتسجيل المواد ورؤية الجدول .

اما بالنسبة للدرجات فانها سترمز الى A-B-C-D-F ا...الخ
ماذا يعني كل من هذه الرموز وماهي النتيجة المقدرة لكل رمز؟

مثلا A: تعني الحصول على 90 فما فووق
-A:الحصول على 87-89
+B:الحصول على84-86
B:الحصول على80-83
-B:الحصول على77-79
+C:الحصول على 74-76
C:الحصول على 70-73
-C:الحصول على 67-69

+D:الحصول على 66-64
D:الحصول على 60-63
F:راااااااااااااااااسب (اقل من 60)

قد تسمع مع نهاية الفصل بالتسجيل المبدئي للصيف
هو تسجيل المواد للراغبين في الدراسة صيفا عن طريف موقع الجامعة
ثم تاتي فترة الحذف و الاضافة للتسجيل الحقيقي للذي يود الانتظام والدراسة (يدفع ويدرس)

منتصف الكورس + الاختبار النهائي ستكون الاسئلة مقالية
في اختبار المنتصف 3 اسئلة
الاختبار النهائي 4 اسئلة تنقسم الف وباء وتختار 3 اسئلة


واتمنى التوفيق للجميع

اتمنى ما اكون اطلت عليك واي خدمة حاضرين
وبالنسبة للكتب صحيح دسمة لكن فيها ملغي والدكتور يراعي الطلبة
ما عليش من كلام الناس كلام الناس لايودي ولايجيب

 

[سبط القصير]

حبيت اساعدك اكثر
لكن بكرة عندي اختبار منتصف
توبه اخذ صيفي

اذا كان عندج اي سؤال لا تترددين ما يردج الا كيبوردج واتاكدي انك راح جفوفين الرد السريع

اخوج الكبير
سبط القصير

 

[الاجنحة المتكسرة]

يعطيك العاافية اخوي بسط القصير على الدعم والتشجيع كلامك وايد ريحني

حبيت اتثاقل عليك بمجموعة من الاسئلة بالنسبة لفترةالتمهيدي جم بتكون فترة الكورس و الاختبار يعتمد على معدلنة التراكمي في الثانوية العامة او معدلنة في مادة الانجليزي ..!!يعني انا معدلي التراكمي 89 اقدم الاختبار اولا وحبيت اسألك عن المواد اللي بنأخذها الكورس الاول انت وضحت ليي المواد بس انا لاحظت ان لكل مادة اكثر من دكتور واكثر من سكشن فشلون تكون عملية الاختيار وشلون اعرف افضل استاذ للمادة اسفة اخوي اذا كثرت عليك بأسئلتي بس حابة اعرف من احين عشان بعدين تكون الامور اوضح واسهل بالنسية لي،،،يعطيك العافية وجزاك الله الف خير​

 

[سبط القصير]

هلا اختي لا ثقلين ولا شي
اولا البرنامج التمهيدي عبارة عن فصل دراسي واحد وتدرسين فيه بس كتاب انج واحد بس
اذا كان معدلش التراكمي من 90 فما فوق تعفين تلقائيا من التمهيدي
لكن اذا كان اقل من 90 ينظرون الى مواد الانج اللي اخذتيهم في الثانوي اذا كلهم في التسعين يعفونش بعد .
لكن اذا معدلش التراكمي في الثمانينات و درجاتك الثانوي بعد في 80 اذا تخضعين الى اختبار للاعفاء من الفصل التمهيدي اذا اجتزتينه تعفين واذا ما اجتزتينه راح تاخذين التمهيدي .
يعني لازم تقدمين الاختبار

خيو الفصل الاول احنا الحقوقين التسجيل هم من ينزلون لينا الجدول واحنا ما نقدر نغير لا الدكتور ولا المادة ولا السكشن عارفه شلون اختي
لكن الفصول اللي بعدها نقدر نحذف ونضيف مواد ونفاضل بين الدكاتره

 

[سبط القصير]

تأمرين على شي اختي ما يردج الا كيبوردج
ونرحب فيك في افضل الكليات في الجامعة كلية الحقوق

 

[الاجنحة المتكسرة]

اخوي سبط القصير اشكرك جزيل الشكر على المساعدة والتوضيح و عندي استفسار بسيط عن موعد اعلان نتائج القبول شلون نعرف النتيجة نتظر نشرها في الصحف اليومية او في طريقة تمكنة من معرفة النتيجة سلفآ و اذا تم قبولنة ان شاءالله في الجامعة هل تخصص الحقوق من ضمن التخصصات اللي تتطلب مقابلة شخصية..؟ وسمعت من فترة ان الجامعة تقبل الطلبة اللي معدلهم في ال 90 و ال 80 اول كورس اما اللي معدلهم في ال 70 يقبلونهم الفصل الثاني اذا كان هذا الشي صحيح هل يتم اعلان قبول اللي معدلاتهم في ال 70 مع اللي معدلاتهم في ال 80 او ال 90 او يتم تأجيل قبولهم للفصل الثاني..!!


يعطيك العافية اخوي على المساعدة و اسفة اذا تعبتك بأسئلتي ....دمت بحفظ الباري

 

[سبط القصير]

لا خيو القبول كله مرة وحدة مو مجزئ .

واذا على القبول اليوم القبول حطوه خيو في موقع الوسط اليوم
يللا بشرينا اختي

 

[سبط القصير]

وبالنسبة للحقوق ماكو اي مقابلة

يللا خيو بشرينا قبلوش ؟؟؟

اطالبش بالحلاوة اذا قبلوش خخخ

 

[الاجنحة المتكسرة]

الحمدالله الحمدالله قبلوووووووني في الحقووووووق

حابة اشكر جيمع الاعضاء على راسهم اخوي سبط القصير على الدعم والتشجيع وانشاءالله تكون الدراسة سهلة وتكون جامعة البحرين بوابة لتحقيق احلامنة و اذا ممكن توضحون لي اجراءات التسجيل وشنو لازم انسوي ومشكورررررين جميعآ واخوي سبط انشاءالله قريبآ في رمضان اجيب لك حلاوة القبول ههههههههه

 

[سبط القصير]

http://www.uob.edu.bh/news/Aug09/14.asp
هاي الوصلة اقريها موضح فيها المواعيد لكم

هههه الحلاوة وصلتني يوم بشرتني بالقبول
يللا شدي الهمة ونبي معدل فوق 3

 

[الاجنحة المتكسرة]

اخووي سبط شلونك شخبارك مبارك عليك الشهر

رجعت وفي جعبتي مجموعة من الاسئلة و انتظر الجواب منك

بالنسبة لتخصص الحقوق المواد تكون باللغة الانجليزية ولا العربية ؟

و عادة شنو يكون موضوع التخرج؟

والدراسة 4 سنوات صح ؟

و اذا رحنة يوم تثبيت القبول احنة نختار المواد ولا اول فصل مواد محددة كل الحقوقيين يلتزمون فيها؟


والكورس يكون جم شهر يعني شنو اهية المدة اللي نطلق عليها كوررس شهر شهرين اكثر اقل.؟

و المواد اللي نأخذها بعد الكورس الاول نقدر نختار مواد مشتركة معااها و لا لا؟

و كم الحد الاقصى للمواد في الفصل الواحد؟

وهل هناك اقسام في كلية الحقوق يعني مثل كليةالعلوم احياء فيزياء جدي ولا لا؟

وسؤال اخير انت حاليآ في اي سنة ومن خلال مشوارك في دراسة الحقوق شنو الصعوبات اللي واجهتك وبشنو تنصحني؟

ويعطيك العاافية اخووي سبط على المساعدة وعساك على القوة

 

[سبط القصير]

هلا خيو
الله يبارك في حياتك ويعودش ان شالله

اخذي راحتش بالاسئلة لان خلاص اليوم كان اخر يوم في اختبارات الصيفي


بالنسبة لتخصص الحقوق المواد تكون باللغة الانجليزية ولا العربية ؟

طبعا الدراسة راح تكون باللغة العربية بشكل عام لكن مناخذ كم مقرر بالانجليزي مثل القانون التجاري
تقريبا المواد اللي بناخذهم بالانجليزي بس 8 يعني تقريبا كل فصل كتاب انج قانوني والدكاترة يساعدونا كثير فيها يعني تيك ايزي .

عادة شنو يكون موضوع التخرج؟
مستعجلة على التخرج ههههه توش في بداية الطريق خيو بس تاخذين مادة اسمها البحث العلمي وتكون على فصلين وكل طالب ورغبة في البحث يعني البعض يحب المواضيع الجنائية والبعض الاخر يحب المواضيع المدنية ....الخ يعني انتي اللي تختارين وطبعا في احد الدكاتره يشرف عليش ويساعدش في الاعداد .

والدراسة 4 سنوات صح ؟
اي اربع سنوات = 8فصول

اذا رحنة يوم تثبيت القبول احنة نختار المواد ولا اول فصل مواد محددة كل الحقوقيين يلتزمون فيها؟
لا ما تختارون ولا تحذفون ولا تضيفون 5 مواد كل الحقوقيين ياخذونهم وهم الاساس لباقي المقرارات الي هم المدخل الى القانون -تاريخ القانون - حقوق الانسان-القانون الدستوري -انج 191

والكورس يكون جم شهر يعني شنو اهية المدة اللي نطلق عليها كوررس شهر شهرين اكثر اقل.؟
تقريبا 3 شهور من( نهاية 9شهر الى بدايات 1 )

وهل هناك اقسام في كلية الحقوق يعني مثل كليةالعلوم احياء فيزياء جدي ولا لا؟
لا . بس مقسمين موادنا قسم عام وخاص

و المواد اللي نأخذها بعد الكورس الاول نقدر نختار مواد مشتركة معااها و لا لا؟
اي نقدر نضيف من الفصل الاول مواد مشتركة بس اذا 6مواد بصير ثقيل عدل

كم الحد الاقصى للمواد في الفصل الواحد؟
اعتقد من تقل عن 9 ولا تزيد عن 18

وسؤال اخير انت حاليآ في اي سنة ومن خلال مشوارك في دراسة الحقوق شنو الصعوبات اللي واجهتك وبشنو تنصحني؟
هههه انا اول سنة ليي في الجامعة بس لان صادني الاورنتيشن ظلما فتوني مكمل اول فصل لكن عادلت مشواري بالصيفي .
خيو المراجعة اول بأول مهمة جدا والقانون ما يبيله بس حفظ هذا كلام خاطئ يبيله فهم وتركيز وحفظ ومعظم الدكاتره بتلاحظينهم يبون يكتشفون مدى ادراك الطالب للمادة فجدي واجتهدي وبالتوفيق وخلي معدلش فووق من اول فصل مثلي بس ما بقول ليش كم خخخ

يللا بالتوفيق بعد شنو اسالتش

 

[الاجنحة المتكسرة]

مبروك انتهاء الكورس الصيفي وانشاءالله تكون الدرجات مرضية

صراحة انا قرأيت اجوبتك وزادت الاسئلة عندي ههه يعني طلع جم سؤال في رأسي كأنك قاعد في تحقيق كلة اسئلة على راسك بس يلا اتحملني شوي واجرك على الله

اول شي حابة اعرف جم عدد المواد اللي لازم نجتازها عشان نحصل شهادة الدبلوم دبلوم اول شي صح بعدين بكالوريس مادري العكس المهم يعني عشان نجتاز اول 4 سنوات الاساسية وبعدين نقرر نكمل او لا؟

وثاني شي سمعت ان بعض الدكاترة يسسون up downما عرف شنو للدرجات يعني عقب انتهاء الاختبار يصححون عن طريق الكمبيوتر وهو يختار يخليك راسب او ناجح يعني نصف الطلبة ناجحين والنصف الاخر راسبين بغض النظر عن الدرجات و عقب ما تحتج يقول ليك والله هذا قرار من عميد الكلية هل هذه الطريقة مطبقة في كلية الحقوق او لا؟

و ثالث شي بعد ما نتخرج انشاءالله شنو مجالات العمل المفتوحة امامنا نفتح مكتب محاماة نصير قضاة نشتغل في النيابة العامة وشنو بعد...؟؟


و رابع شي ذكرت ليي في احد الاجوبة ان كلية الحقوق ما فيها اقسام بس فيها عام وخاص شنو يعني ممكن توضح ليي اكثر؟.

و خامس شي هالجملة ما فهمتها ممكن توضحها لي "انا اول سنة ليي في الجامعة بس لان صادني الاورنتيشن ظلما" شنو يعني الاورنتيشن؟.

و اخيرآ وليس اخرآ في المحاضرة شنسوي يعني نقعد نستمع للدكتور ونلخص وشلون نلخص يعني ممكن تفهمني شلون تكون طريقة المحاضرة لان هالشي جديد علينة ؟

ويعطيك العافية اخوي سبط ولا تخاف ما بحسدك على الدرجة هههه كل واحد واجتهادة ومشكور وجزاك الله الف خير على مساعدتي​

 

[متمردة]

أسئلة الحقوق يجاوب عليها سبط القصير


عن الدبلوم خبري مافي دبلوم حالياً إلا في كلية التعليم التطبيقي
يعني دايركت يدخلون بكالريوس الي هو 4 سنين أو 5 حسب الطالب :sly:

بالنسبة للـup و الـdown
كيرف آب و كيرف داون ينزلون الدرجات اذا كانت وايد مرتفعة و اذا نازلة يرفعونها
و الله على الظالم .. لو يعطون كل واحد حقه وايد زين .. بس يلا ربنا كريم
مادري اذا هالشي عندكم في الحقوق أو لا :mellow:
بس في بعض الكليات في و بشدة

الاورينتيشن .. كورس التمهيدي.. اللي معدلهم أقل من الـ90 ياخذون فصل تمهيدي
و اللي أعلى دايركت يدخلون تخصصاتهم :sly:
و في بعضهم يقدمون امتحان اعفاء من التمهيدي على حسب درجاتهم في مواد الانج

في المحاضرة على حسب الدكتور
مثلا عندنا في العلوم مسائل و تمارين قوانين دايما نكتب
مواد الحفظ مثل الهستوري الاسلاميات الأفضل ان الواحد يلخص الكتاب
لأن صعبة الواحد يكتب مع الدكتور في هالمواد
واااااااايد يتحجون و نص الحجي ماله دخل بالمقرر

بالتوفيق إن شاء الله

​

 

[سبط القصير]

اكي اختي متمردة كفت ووفت
ردت على كل شي بس للتوضيح ان القسم العام والخاص الكلية مقسمة الكتب لقسمين اللي ليها خص بالدول والحكومة عام واللي بس مواضيعها في نفس الدولة خاص وحنا نزلهم عااادي مو مال تخصص يعني
وبالنسبة للمحاضرة تسمعين وتكتبين اللي يقوله

 

[شيماء العبدالله]

موضوع مفيد ...
احنا بعد استفدنا من اسئلتج اختي الاجنحة المتكسرة ياريت يثبتونه حق الكل يستفيد ويضيف بعد من اسئلته واخونا سبط القصير ماقصر في اجوبته كفى ووفى

لانه عندي جم سؤال وخصوصا انه هاي اول سنه لنا وحيرانين ومتخوفين ...

 

[سبط القصير]

هلا اختي شيماء العبدالله
لا تترددين بأي سؤال كلنا خوانش وخواتش في المنتدى وما يردج الاكيبوردج

 

[شيماء العبدالله]

مشكور اخوي سبط القصير كثر الله من امثالك وايد استفدينا من خبرتك بس ياريت لو يكون في تفاعل من الاعضاء بعد
و
سؤالي هو عن التمهيدي هل استفاديتوا من التمهيدي او لا وهو نص فصل يعني بتصير لي بدال الاربع سنين بصير ونص فشنو الخطه الي انتوا مشيتوا عليها عشان تخلصون اسرع
الي ياخذ اكثر من خمس مواد تعب او لا ؟ وشنو طريقه الدراسة الي اتبعتوها ؟
وبشنو بتختلف الجامعه عن المدرسة من حيث الدراسة ؟

 

[سبط القصير]

هلا خيو شيماء
التمهيدي فيه فايدة للمقراتهم بالانجليزي بس اللي مققرراتهم اكثرها عربي ما يستفيدون منه .
اي يعني بدال الاربع سنين اصير 4 سنين ونص
يؤؤؤؤؤ خيو ما خلصت دراسة بعدي
بس اللي ياخذ خمس مواد ما يتعب وحتى ست مواد اذا كان الجدول مرتب عدل
الدراسة للقانون يبي ليها دراسة اول باول
اما اختلاف الدراسة من المدرسة الى الجامعة فكثيرة جدا
مثلا المدرسة حصص اما الجامعة محاضرات يجي الدكتور يقول المحاضرة ويمشي وانتون تكتبون كل اللي يقوله وفي دكاتره يقولون تابعوا من الكتاب .
الحضور 10 درجات
المنتصف 30 درجة
النهائي 60 درجة
اما المدرسة
الاعمال 30
المنتصف 20
النهائي 50

مسامحة اتاخرت في الرد لاني كنت مشغول خيو مو تجاهل مني اوكي ..... ومسامحة على التاخير