..أتومآ..
Well-Known Member
- تاريخ التسجيل
- 27 أكتوبر 2009
- المشاركات
- 945
- المجموعة
- أنثى
- الدفعة الدراسية
- 2009
- الكلية
- كلية ادارة الاعمال
- التخصص
- 3> Banking & Finance
سلام عليكم ..
]ترددت أحط الموضوع
،بس في الأخير قررت أنزله عشان تشاركوني فيه
اللعام في نفس هاليوم ، 21-7-2010 م
تحديداً كنا في كورس صيفي ،
طلعتنا من الجامعه أني وثنتين من ربعي "في سياره وحده"
تعرضنا لحادث
،شلون صار ؟!
صديقتي كانت تمشّي السياره وأني قاعده صوبها وصديقتي الثالثه ورى ،
شوي كنت أحاتي إختي لأنها كانت بتسافر وما كنت متعوده على عدم وجودها
فكنت متضايقه وربعي كانوا يخففون عني
وكنا نضحك ونسولف ومو حاسين لشي أبداً :mellow: ،،
المهم إني دائماً أول ما أركب السياره صديقتي لازم تقوليي ألبس "السير" ،
بس في ذاك اليوم هي نست وأني كنت بلبسه بس خيابه ومن السوالف خليته يولي
..كنا على الهايوي في الخط الوسط جت لينا سياره سريعه وضربت السياره من ورى جهة اليمين ،
فالسياره "إنعوجت" وكانت بتدش في سيد اليمين "جهتي" ، وإللي كان في السيد اليمين تيلر
فكنت خلاص بروح فيها
، التيلر قدام دريشتي وأني بدش فيه ، وفي لحظه لفّت صديقتي السكان كامل على جهة اليسارعشان ما نضرب في التيلر ومن قوة اللفه صرنا في "الإتجاه المعاكس" < مو إللي في قناة الجزيره
المهم صرنا في الإتجاه العكس في السيد اليسار بعد ماجهتي ضربت "الفنس" ،
الغريب إن حزتها ما كان فيه سياره في السيد اليسار "جان تضاربنا في الوجه" :tears: ،
وبعدها السياره إنفلتت في التراب على جهة اليمين .
^ هالقصه كلها صارت في ثواني بس
! المهم الحمد لله ، طلعنا منها بسلامه ما عدا بعض "لرضوض"
المهم يا حبايبي ..
إللي خلاني أكتب هالسالفه إني أبغي أقوليكم إني قبل هالحادث حلمت حلمه عجيبه ،
صديقتي كانت جايه من العراق فعطتني تربة الإمام الحسين سلام الله عليه ،
وإتعودت أخلي التربه دائماً في شنطتي ، بس جت أوقات إذا أحمل شنطه صغيره ،
أخلي في الشنطه الأشياء إللي أستخدمها فما قمت أحمل التربه ،
وفي الليل حلمت إن مرّه ورجال عليهم أخضر وما كان يبين منهم أي شي
جايين ليي وكانوا يوصوني إني أخلي ويايي التربه دائماً في أي شنطه أحملها .
قعدت من النوم وعلى طول خذيت التربه وخليتها في الشنطه ،
وما قمت أطلع بشنطه إلا والتربه تكون فيها ،،
بعد ما تقرر سفر إختي ولأني كنت واجد أحاتيها قررت أعطيها التربه
بس سبحان الله ، في نفس الوقت إللي كنت بروح آخذ التربه وأعطيها إياه نسيت أمرها كلش ..
ويوم الحادث كانت التربه في الشنطه
،الكل كان مستغرب من الحادث إللي صار وإن ما صادنا شي ،
حتى هندي وقف وكان حاط إيده على راسه وكان يسألنا إذا ما فينا شي ،
ويوم جافنا بخير كان يقول إن جاف الحادث بعيونه وكان يصارخ "YOU R LUCKYYYY"
حتى إللي راحوا جافوا "الفنس" وهو مخفوس قالوا لينا "كسرتوا شووراع البحرين" <
أني خفت على روحي حزتها لأني كنت دايماً أقول إني ما بموت إلا في حادث
وكنت مستغربه إني ما مت مع إن كلشي كان صوبي وما كنت لابسه السير
،، بس تربة الحسين كتبت لينا عمر جديد ..ـــــــــــــــــــــــــــــــــــ
هاذي سالفتي حبيت أكتبها ليكم ،
لسببين ، الأول عشان أبين ليكم كرامة الإمام الحسين سلام الله عليه في موالين أهل البيت
والثاني ، لأني ماحب أحط مواضيع منقوله ، أحب أحط سوالفي والأعضاء يشاركوني فيها
فأتمنى إن هالقسم كان مناسب لموضوعي
..وسلامتكم ..
