جديده في هالسوالف D:

[aL7§йa2]

السلـآم عليكؤؤم
شخباركؤؤم؟
الله يسلمكم السالفه ومافيها انه قبلوووني بكليه الهندسه "عماره" عااد اني حدي نيوو في هالسوالف ماعرف شي وماعندي اي فكره عنه هالتخصص .. اقصد يعنوو مو ماعندي فكره بالمره .. يعني ممكن تعطووني شويه معلوومات عن الدراسه بجامعه البحرين وبلييز لا تقولين ليي صعب سهل مادري شنوو .. لانه الكل قااعد يحبطني ويقول صعب ومخوفيني وااجد ...
ووبعد لما طلعت رساله القبول من الموقع كاتبين لي فيها ان موعد المقابله سوف يحدد لاحقا ..يعني في مقابله ؟؟ وش سالفه هالمقابله وو شنو بيكوون مضمونها ؟؟ اخاف اعفس فيها ويطردووني بره الجامعه

وواخر سؤال كليه الهندسه حسب ما سمعته للحين في مدينه عيسى موو؟؟ لو نقلووها صخير ؟

ووبس .او ع الاقل هذا اللي اتذكره من قااائمه الاسئله اللي براسي

يلا سي يووو

 

[Biology boy]

كلية الهندس (العماره) تخصص يهتم بالمباني وتشييدها والمنازل ونوعية البناء والمواد المستخدمه والتصميمات المعمارية للمباني والمنازل

كلية الهندسه تتصف بدسومة مقرراتها ويحتاج اليها متابعة شديده >>>ماكو شي صعب (لم تلدنا امهاتنا ونحن نعرف القراءة)

اول فصل راح تاخذين مقررات عامه مثل عربي دين تاريخ انجليزي بالاضافة الى مادة تخصصيه في الهندسة المعماره (مبادئ عامة)+مادة علمية مثل الرياضايات1رقم او الفيزياء رقم 1

الفصل الثاني فيزياء رقم2+رياضيات رقم 2+يمكن كيمياء +مادة تخصصية +انجليزي

باقي الفصول مواد هندسة تخصصية بس لازم تجتازين كل المواد العلمية في الفصلين بنجاح لكي تجتازي مرحاة الدبلوم


بالنسبة الى المقابله اسئله عامه لماذا اخترتي هاتخصص +ما هي هواياتش+وش تعرفين عن العماره+اسئلة كانهم يسولفون معاش

اذا لم تجتازي المقابله سوف تنتقلين تلقائيا الى الرغبة الثانية حسب ملئك لاستماة التسجل وحسب متطلب الجامعه والاكتفاء في الكليات

بس اطمأني سوف تقبلين ان شاء الله ضعي في جدول اهتماماتك انك :
1- غير مرتبكه تجاه المقابلين
2-تستطيعين ان تجيبي على كل الاسئله (ماراح يجيبون اسئله من المريخ) عارفتنها زين وراح تجاوبين عليها
3-الثقة في النفس والقوة

كلية الهندسة في مدينة عيسى
تحياتي

 

[dim]

هل

اتصلت لهم وقالوا لي ماكو مقابلة ولا اختبار في العمارة

صراحة شي يحير

 

[aL7§йa2]

مشكووور ماتقصرر بصرااحه كفيت ووفيت Biology boy بصرااحه عطيتني معلوومات جدن جدن بطلت عيني لانوو كنت عميه وماعرف مشكووور

ووو dim شلوون مافي مقابله ؟؟ اهما كاتبين برساله القبول انه المقابله بتتحدد لاحقا يعني اكييد في ... المهمز بتصل فيهم يوم الاحد بسألهم .. خوب لاعت جبدهم مني من كثر ما اتصل فيهم خخخخ

 

[UOB-BH]

خوب لاعت جبدهم مني من كثر ما اتصل فيهم خخخخ

وأنا أشوف مو لاقي خط .. كل ما أتصل فيهم مشغول

+++++++++++++++++++++++++++++++++++++++++++

عموما أختي .. مبروك على القبول في كلية الهندسة والله يكتب لج التوفيق في المرحلة القادمة ونشوفج اكبر مهندسة .. أما عن موضوع المقابلة فهي من الشكليات، سواء توجد مقابلة او لا توجد فـ بإذن الله راح يجتازها الجميع حتى لو معظم الأسئلة ما جاوبتوها ..

 

[aL7§йa2]

وأنا أشوف مو لاقي خط .. كل ما أتصل فيهم مشغول

ايييي ايي مني صدقني كل ما يخطر ع بالي سؤال اتصلت فيهم استفسر .. اخر شي متصله اسألهم عن الامتحان مال الاعفاء من البرنامج التمهيدي مادري شنوو واني ادري من الاساس اني معفيه منه لانه معدلي بالتسعين بس يعني اتاكد يازعم .. اخرتها بيقولون لي انقلعي رووحي دوري لش جامعه غيرر ماتسوى علينا قبلناش

وثااانكس من قلللب عشان الكلام اللي قلته عن المقابله لانه حدي متخوفه منهاا اخاف اعفس مناك وارتبك وماعرف اتكلم ذيك الحزه وواعفس الاولي والتالي :thumbdown:

يسلمووووو