متحير.. جامعة البحرين أو بوليتكنيك؟؟

[~{Messi ALmadridy}~]

السلام عليكم ورحمة الله وبركاته

انا متحير لاني مقبول في جامعة البحرين وبولتكنيك.. و للأسف انا من دفعة 2010 الي راحت عليهم سنة بسبب الاحداث..

لكن سجلت في بولتكنيك لاني صراحة ماتوقعت يرجع كل شي مثل ماكان في جامعة البحرين وحسيتها الجامعة الانسب من بعد البحرين.. واصلاً ماتوقعت يقبلوني في بولتنكنيك.. بس لما قبلوني تحيرت وين اروح..
بس حاليا عقب مارجعوا المفصولين(ربعي كلهم) تحيرت اكثر واكثر..

انا اعرف مستوى الجامعتين من حيث الدراسة والتعامل وكل شي..
بس انا متحير لاسباب ثانية..
وطبعا كل جامعة ليها سلبياتها وايجابياتها~>

بولتكنيك..
انا اجوف انه من حيث التعامل والدراسة افضل بكثيررر وراح تهيأني افضل للشغل..وهي اقرب ليي من الصخير, وانا كنت اتمنى من اول ماتخرجت ادرس في بولتكنيك وللحين اتمنى هالشي..
ولكن.. المشكلة هني اني راح ابدأ من جديد في بولتكنيك وفوقها ببدأ تمهيدي
وغير هالشي.. اني مااعرف احد في هالجامعة..

جامعة البحرين..
طبعا هذي الجامعة من اولها لاخرها كلها سبليات.. بس مغصوبين عليها

في هالجامعة ربعي كلهم الي اعرفهم والي تعرفت عليهم وهالربع واجد غاليين عليي,وصراحة تعودت على الدوارة في الجامعة من مبنى لمبنى

.. يعني الراحة النفسية اكيد راح تكون هني.. وفوق هذا انا الفصل الجاي راح ادرس دايركت تخصصي لاني مخلص التمهيدي هني

الحيرة ذابحتني.. والي عنده اي شي يقدر ينصحني او يساعدني فيه لا يبخل..
​

 

[bent alahmed]

امم صح كلامك الشي محير
الي اجوفه انا
انجامعه بوليتكنك وايد زينه ودرستهم اوك
ليش؟ لان جامعه البحرين فيها سلبيات والوضع فيها صاير متوتر وعلى الربع بيصير عندك ربع غيرهم"والله يخليكم الى بعض"
اهو الشي الوحيد الي راح يخلي جامعه البحرين افضل انك راح تدرس دايركت ومابتضيع عليك كورس بعاد "كفايه ان راحت من عمرك سنه"
بعطيك مثال وحده اعرفها درست في بوليتكنك تمهيدي بعدين تركته ودخلت جامعه البحرين تخصص لاكن في النهايه انسحبت من جامعه البحرين ورجعت بوليتكنك
بس في نفس الوقت انا اجوف انك حاب جامعه البحرين وما ودك تتركها
الله يوفقك اخوي

​

 

[بســــــكوتــــــة!]

لو كنت مكانك جان رحت بوليتكنك وبالنسبة للتمهيدي؟ عادي!! بالعكس احسن لك!! تقوية لغة لا!! مو معناته انه دروسهم سهلة!! لا لكن عدد الطلبة اقل في الصف الواحد, وعندهم التطبيق العملي اهم من النظري عكس جامعتنا, ودام تتمنى تدرس اهناك ادرس ولا تيي جامعة البحرين ويطيع المعدل وعقب ما تعرف مصيرك مطرود لو لا او ما تقدر عليها و عقب تروح جامعة ثانية وموادك كله D ومايعادلون اقل من C ولازم عقب تعيد كل شي مرة ثانية.. انه تجربتي معاناة مع الجامعة واتعب وايد وساعات احصل درجة زينة وساعات ما احصل ومعدلي طايح على ويهه توه مرتفع شوي يعني ليحين على الحافة

وتره جامعتنا بعد فيها تمهيدي الحين (عاد) غيرو الاسم وخلوه سنة تأسيسية يعني سنة كاملة بس تمهيدي!!

مادري هاي رايي يعني والقرار في النهاية لك

 

[UM SAYED 7AYDER]

عليكم السلام والرحمه ..

انه مريت بنفس الظروف ..
واخترت جامعه البحرين علشان ان ربعي فيها ..
اول كورس بس جفتهم ..
وبعدها الي طلعت من الجامعه والي راحت جامعه غير والي حولت تخصص ثاني ..
والنتيجه خسرت كل شي ..

ولان طلبه البوليتكنك كانو بعد التخرج لازم يوثقون شهاداتهم في وزاره التربيه .. فشويه كان في تردد فالموضوع
بس حاليا وبعد ما صارت تابعه للوزاره ..
صارت بوليتكنك اهي الافضل من كل النواحي ..

وغير هذا
اهناك الطلبه مرتاحين اكثر من ناحيه التسجيل والدراسه والعلاقات مع الدكاتره والطلبه ..
ونظام دراستهم يخلي الطلبه كلوز مع بعض ويتعرفون على بعض من اول يوم ..
فما احس في مشكله فالسالفه ..
لان مافي احد دايم لاحد .. والمستقبل اولى ..

هذا رايي ..
والقرار راجع لك

 

[asairy]

آنه ولله أقولك رايي ..
بولتكنك أفضل من كل النواحي .. ومثل ماقالو الاعضاء انشاءلله بصير عندك أصدقاء واهم شي المستقبل

موفق إنشاءلله ​

 

[~{Messi ALmadridy}~]

شكررا لكل الي ردووا... كلكم متشجعين على بولتكنيك مثلي.. بس والسنة الي بتضيع من عمري؟؟؟؟:tears:
​

 

[asairy]

شكررا لكل الي ردووا... كلكم متشجعين على بولتكنيك مثلي.. بس والسنة الي بتضيع من عمري؟؟؟؟:tears:
​

اخوي ماتدري يمكن هذي خيرة لك ..
كل تأخيره فيها خيره .. والله سبحانه وتعالي مايختار الشي الا فيه الصلاح انشاءلله ​

 

[بســــــكوتــــــة!]

شكررا لكل الي ردووا... كلكم متشجعين على بولتكنيك مثلي.. بس والسنة الي بتضيع من عمري؟؟؟؟:tears:
​

يعني لو درست في جامعة البحرين بتتخرج في 4 سنوات مثلا؟ هه

إ

 

[~{Messi ALmadridy}~]

شكررا اخواني لكل واحد رد.. كلامكم جدا فادني، والله يجعله في ميزان حسناتكم بسكوتة.. بس بعد نفس الشي بالنسبة لبوليتكنيك، بقدر اخلص في 4 سنين؟*

 

[بســــــكوتــــــة!]

شكررا اخواني لكل واحد رد.. كلامكم جدا فادني، والله يجعله في ميزان حسناتكم بسكوتة.. بس بعد نفس الشي بالنسبة لبوليتكنيك، بقدر اخلص في 4 سنين؟*

مناهجهم غييير عن جامعتنا! مو اسهل لكن كلها تطبيقية!! درجاتهم كلها على واجبات و بروجكتات ونظامهم غير عنا فما تدري!! انا اعرف 2 اهناك ومرتاحين الحمد لله! على العموم القرار لك في الاخير وان شاء الله تتوفق في خيارك

 

[روح المحبين]

عن نفسي افكر اني احول الى بولتكنك احسن فانصحك اوردي فيها

 

[اليازيه]

نظام جامعة البحرين امتحانات ادرس احفظ افهم بتتيب
نظام جامعة بولي تكنك assigments ابحث وحلل قارن ودايما لازم تكتب 1000 1500 كلمة بشكل مرتب وقليل الامتحانات فيها ويعتمد عالتخصص

اللي تحسه انسب لك دشه وصل استخاره احسن ،، اكا انا جدامك ضاعت علي سنه في الاهليه وييت البحرين المفروض اكون من دفعة 2009 بس هاي المكتوب وهاي قدري

السنه مب مهمه اذا ضاعت اهم شي نفسيتك وانك مرتاح عشان تقدر اتييب

بالتوفيق

 

[~{Messi ALmadridy}~]

شكراً لكل الي شاركوا وعطوني ارائهم ونصايحهم.. شكرا للجميع
صراحة كلامك جداااا فادني واثر فيني وخلاني احسب حساب اشياء ماكنت افكر فيها
وفي النهاية انا قررت قراري خلاص.. بولتكنيك

احس ومتاكد اني راح ارتاح فيها.. خصوصا انه التعامل افضل, وطريقة تدرسيهم اصلا احلى بمليون مرة من جامعة البحرين فاحس انها بتكون باللنسبة ليي من الحفظ هناك
وبالنسبة للربع.. هو صح فراقهم بكون صعب, بس بظل على اتصال وياهم وبجوفهم برى الجامعة,وثانيا مايصير اتبع ربع كل مكان يروحونه,لازم اجوف مستقبلي وين واتبعه حتى لو كان بعيد عن ربعي..وكيد بكون صداقات داخل بولتكنيك

واما السنة الي بتضيع مني..

للحين وللابد بظل اصيح عليها
.. بس, لا انا اول ولا اخر واحد تضيع سنة من عمره عشان الدراسة.. والتوفيق من الله
شكرررررررررا من اعماق قلبي لكل الي شاركوا.. صراحة كنت متحير وماعندي احد يقدر يساعدني وانتوا ساعدتوني واجد.. شكررا​