شبااااااااااب *إلي أخذ الليسن* تفضلوا ...

[لحظات انتظار]

 

[صاحبة الظل]

أنا قصتي غير عنكم كلكم
لحين ما تدربت كلما اتصل في مدربة تقص علي وما تدربني

لو سمحتوا اللي يعرف أرقام مدربات أوكي يطرش على الخاص ضروووري

+1
اتصلت لقروب مدربين الي ما يدرب بنات و الي من سنين ما درب اشوة بعد ما اتصلت حق واحد و طلع متوفي

 

[زهرة الأيام]

+1
اتصلت لقروب مدربين الي ما يدرب بنات و الي من سنين ما درب اشوة بعد ما اتصلت حق واحد و طلع متوفي

ههههههههههههههههه ضحكتيني
وان شاء الله تحصلين ليش ​

 

[m10essi]

ههههههههههه ذكرتيني بأكره ايام عشتها
حصلت مدرب بسهولة لأانه يعرف الوالد
لكن الله لايراويش مثل هذا المدرب
يوم يدرب و ثلاث اسابيع ما يجي
و المشكلة ما في مدربين غيره كله يقولون ما في جانس
ولا إذا يدرب طول الطريق يسولف في التلفون او ياكل حب و يشرب جقاير ولا مفتكر ويش اسوي
مرات اطلع بدون ما البس الحزام تالي إذا بنزل يقول ليش ما لبسته اليوم (صح النوم توه منتبه )
دربني بس 10 ساعات ووقع إليي الباقي قال ادخل التراي
المشكلة ما كنت جاهز
قلت إلى الوالد امبي واسطه قال إليي لا تعتمد على احد اعتمد على نفسك
دخلت اول تراي ، الحظ صادني مرور ابو الزفت (لعين)
من اول ما ركبت وياه وهو معصب ما ادري ليش ،، خطأت مره في المرتفع الكبير اللي تسحب الهاندبريك فيه ،، قمت ارفع ارجولي عن الكلج بمسافة النص لكن بندت ،، لأن كانت سيارة التدريب غير عن التراي ،، سيارة التدريب مسافة النص اوكي ،، وسيارة المرور للربع بس إذا زدت تبند
المفروض يعطيني فرصة ثانية المرور لكن قال إليي ارجع وكتب إليي راسب :tears:
تضايقت حديييي ، لأاني برد ارجع لمعاناة المدرب
المهم بعد ما لوع جبدي المدرب مره ثانية
دخلت التراي الثاني ونجحت الحمدلله وبدون اي واسطة ،، كان يوم حلو بالنسبة إليي




​

 

[حلم أنثى]

​

​

معاناتي بكتبها لكم تستاهلون ياأحلى اعضائ

قصيت الكجة يوم عيد ميلادي بالضبظ شهر 9 2009
وتدربت بعد معاناة طويلة جدا شهر 7 2010,,
المهم تدربت
اول تراي كان المرور ورسبت خخخخ شديد
التراي الثاني ناجحة والله وطلعت برة بس لما رحت برة بندت سيارة ورسبوني

المهم التراي الثالث شدينا الهمة والحمدلله ربي نجحت


وكان تاريخ 20-10-2010

بدات اروح الجامعة نهاية الفصل الاول
والفصل الاراح
الحين عندي اوكي بس معاناة شوية مع الجدد والباركات خخخخ

 

[صاحبة الظل]

ههههههههههههههههه ضحكتيني
وان شاء الله تحصلين ليش ​

ان شاء الله
ترى صارت خيو وحده اعرفها ايام ما كانت تدور مدرب اتصلت حق واحد وسالت عنة الة يقولون ليها متوفي من جم سنة

 

[وردة البحر]

+1
اتصلت لقروب مدربين الي ما يدرب بنات و الي من سنين ما درب اشوة بعد ما اتصلت حق واحد و طلع متوفي

ههههههههههههههههههههههههههه ضحكتيني صاحبة الظل

 

[بنوتة كيوت]

مشكورة خيووو على الموضوع
وبالتوفيق للجميع ​

 

[M.Matooq]

السلام عليكم
يوم اخذ الليسن كان شهر 6
الكجة انقصت شهر واحد في نصفه الاول ...و فترة انك تدور مدرب فترة تعيسة خسرت 50 دينار كردت ولا حد رضا يدربني كلمت خالي يشوف لي مدرب شاف لي واحد من ديرتهم وكان يدربني في الاسبوع مرة وساعات يطقع ... المهم السياقة كانت سهلة بالنسبة لي واول تراي رسبني المرور لانه نزر ورسبني لاني ما وقفت عند علامة ستوب مع انه ما في احد بالشارع ...وثاني تراي الحمدلله اخذت الليسن

 

[M.Matooq]

على طاري المدربين بقولكم بعض الاعذار الي كنت اسمعها

1- ما في جانس
2- انا مريض
3- اتصل الشهر الجاي ويطنش اذا اتصلت له
4- سيارتي خربانة
5- مادربت من سنين {{ يوم ثاني اشوف رقم سيارته بالششارع}}
6- ما ادرب صبيان
7- فيه واحد طلع متوفي من سنين الله يرحمه

 

[Wa7Eeda]

يسلمووو ع الموضوع
حده كيوت وعجبني


تدريب السيآقه ايام لا تنسى
شي عجيب هههه
كنت اتدرب الصبح وعقب التدريب عطول اروح الجامعه
وخذيت الليسن من التراي الثاني
اول مره نجحت داخل وثاني مره بالخارج
خخخخ كنت اول مره رسبت فيها بره ..سويت هوآآيل في الشاارع
بس والله كله من المروره لبكتني عدل وكآنت حدها مغروووره من قبل ونزره
وبسبتها خلت عقلي يطير...وجيت بدخل الدوار على باص ...ولفيت دبل يسار الاشاير ع القير ال3 هههههه
حتى هي انقهرت وفتحت بابها بتجي مكاني تسوق بدالي..بس اني منبطه جبدي منها...سيده شغلت السياره ومشيت
وخليتها غصبا عليها تصك بابها :sly:
والله بعد :sly:

وفي التراي الثاني مع مروره بعد بس كآنت طيبه وحبوبه وترتاج نفسيه الواحد وياها
والحمدلله نجحنا ..كآنت السآعه 3 ونص هع

والحين كملت سنه من شهر 5 كآنه

وعندي سيآره لانسر 2004

وعقبآآل الجميع يآرب نشوف عندهم الليآسن والسيآآير
وطن طن ططن ​

 

[vps]

​

متى أخذت الليسن وصار لك كم سنه ؟

أخذته تاريخ 9-2-2011 وصار لي الحين 7 شهور


من أي تراي نجحت؟

الثاني بعد الظلم فالتراي الأول


ويش نوع سيارتك؟

كورولا 2005
؛
القير العادي ، أول مثلما يسمونه manual gear
أبوي علمني عليه في باص كوستر 30 راكب وكان فلّه
بس ما أنكر إني أول ما مشّيته بند عليي لأني ما عرفت له وقلت لأبوي " ما أعرف خلاص ما أبي أتدرب عليه "
بس بعدين ولله الحمد عرفت له وقام يخليني أشاخط فالدفنة بالباص وصلت فيه للـ 5 هههههه

والحمد لله ماتعطلت فالمدرب وخلصت وياه 22 ساعة ودشيت تراي
خلصت داخل بنجاح ولله الحمد وطلعت برى وراسي مفتر لأن المرور كان يقولي
" يلا بدل 1 و 2 و 3 و 4 بسرعة " O,o ورسبت في دوار الفخار رجعتي لإشارة المدرسة

طبعا ما وقفت دموعي من عقب ما رسبت لاني مو متعود أخسر في شي ههههههه
ودشيت التراي الثاني عقب شهر وانا مصمم أنجح فالتراي ولله الحمد نجحت
والحين اعوذ بالله من كلمة أنا ، أقدر اطلع من الدواعيس بالريوس وانا أشرب بيبسي ههههههه

الحمد لله ربي ، شكراً على الموضوع
(F)

​

 

[وردة البحر]

هههههههه قصص حلوة

 

[the life]

على طاري المدربين بقولكم بعض الاعذار الي كنت اسمعها

1- ما في جانس
2- انا مريض
3- اتصل الشهر الجاي ويطنش اذا اتصلت له
4- سيارتي خربانة
5- مادربت من سنين {{ يوم ثاني اشوف رقم سيارته بالششارع}}
6- ما ادرب صبيان
7- فيه واحد طلع متوفي من سنين الله يرحمه

لا تقولون في ع المدرب اللي دربني في الشلخ
اول شي لاحقناه ملاحق من قبل سنه وابوي يقوله
تالي اختفى عن الانظار صار ما يشوفه يوم قصيت الكجه وبالغصب بالزور حصله حتى اني عصبت قلت ما بتدرب ولا شي هذا واحنا بنتدرب بفلوس
كان يجي لي متآخر ويقول انتين اللي متآخره لكن اني مااسكت عنه اعطيه لسان اقوله اني توني شايفتنك جاي يقول اموت واعرف وين برج المراقبه مالش هههههههه
كانو لما يتصلون له يشلخ يقول 280 واحد عنده ينتظرون التدريب وساعات يصيرون 300 في ثواني
وفوق هذا كله قبل التراي الاول كان يقولي كله بترسبين يبط الجبد كله يحبطني لان كله اناحسه طلعت له قرون
تالي دربني كم ساعه وقلت له باقي 10 ايام ع التراي بخليك تدربني قبلها بيوم او يومين ويصك التلفون ويعطيني طاف او اتصل وما يرد
دخلت التراي الثاني بواسطه ونجحت ويوم ابوي قال بودي له حلاوه قلت له لا تودي ما يستاهل ع اللي سواه

 

[نسيم الروح]

اكبر هم في حياة كان التدريب
لانه ما كان عندي احد اسوق في البيت فكان لازم ادرب وسوق وارتاح من هم المواصلات
قبل لا اتخرج من المدرسة بديت ادور مدرب وطبعا ما كان فيه
طلعت كجه 12-8-2009
وبعد معاناه ويا المدربين حصلت واحد واخذ دفتر التدريب من شهر واحد 2010
وما دربني الا تاريخ 8-6-2010
يعني 5 اشهر واني انتظر
و المدرب بزور اجي لازم ابويي يتصل له حتى يجي يدربني
وكان في الصيف واني مسجله صيفي وجى رمضان واني بعدي ادرب يعني الوضع ماساة
وكان ادربني 12 الظهر في عز الشمس والحر

التراي الاول كان اول يوم في رمضان والتراي الثاني قبل العيد بيومين ورسبت فيهم لانه المرور الي دخلت وياي لا تطاق نزره
في الترايين نفس المرور عقدتني

وبعد كل البلاوي الحمدالله نجحت في التراي الثالث
تاريخ 20-10-2010
وشتروا ليي سيارة مستعمله شهر 2

 

[طموح]

حضور رائع وتفاعل جميل ...
و الأجمل من ذلك أنها قصص وإن طالت بعض الشيء إلا أنها توجت بالنجاح ...
مبروك إلى إلي أخذ الليسن وعقبال الباقي إنشاء الله ...​

 

[Al_Nile]

يسلموا الموضوع كثير مرح وخفيف

بدايتاً أنا ما كنت حابة أتدرب بس الماما قالت لازم.. توكلنا على الله وتدربنا
بس !!
أنا مشكلتني كانت الكلش .. بل وهي عقدتي
ولله الحمد .. الله ستر ووفق
وبسبته تدربت عند مربين .. وبسبته بعد كنت وايد اقول هي وقفت بروحها !! ياسبحان الله
​

 

[نجمة تشرين]

امم انا قصتي قصة ويا الليسن
في البداية اصريت اني اتدرب عند مرة مراعاة للشرع و جدي و خصوصا ان يقول ان اذا تواجد النساء في المجال فالاحوط الخذ عندهم ما علينا
حصلت وحدة حجزت عندها 3 شهور قدام بس ما قصيت الكجة لان قلت اول تتصل فيني
و لما اتصلت تقولي برزي روحش عقب اسبوع بدربش
ثاني يوم شلت شلاتي و رحت قصيت الكجة و المحاظرة دشتها في نفس اليوم حظي قوي كان ذاك اليوم
و اتصل فيها قالت لي يومين و ادربش
و هاليومين صاروا سبوعين و بيتنا سافروا و خلوني عند اختي متزوجة و تميت اتصل ما ترد و اطرش مسجات اقول لها اذا ما بتدربيني خبريني ادور لي احد غير
و رجعوا الهل و جربنا على تلفونات غير و اخيرا ردت
لكن سبتني سب الا يقول تعرفني و اللي بيني و بينها اتصال تدريب ب
ما ظلت كلمة ما قالتها ياله ربها يتكفل فيها
ما علينا بعدين درت على مدربات البحرين كلهم الا تقولي انا دواركم ما ادرب منه و الا تقول لا انتي جامعية ما اقدر و اللي مغيرة تلفونها و اللي و اللي
لما استملييت خلاص و قامت دموعي تنزل
الوالد الله يحفظة قالي ما ليش الا فلان صديقي و هو اللي درب اخوانش و خواتش كلهم و مصير الحايل للقصاب
و هذا المدرب خوش واحد و زين لكن يعتبرنا مثل بناته اهو صديق الوالد من عمر يدربني ساعة كل اسبوع او 15 يوم
و تدربت عنده بس 15 ساعة
بس طولت بحكم الوقت و كان يسجل ليي ساعات زيادة بس جذي
و دخلت تراي و الله وفقني و نجحت كان ترايي المغرب الساعة 5 و شي و الدنيا ظلام و رجعت رحت الماتم اتسمعت و الساعة 2 الفجر قمت ادرس لامتحان مدتيرم كان عليي يوم ثاني و بركات الليسن جبت فيه فل مارك ههه

و بكمل السنة من اخذته في محرم الجاي ان شاءالله
و ناقصتني السيارة بس

و هذي قصتي مع الليسن

 

[Al_Nile]

ههههههههههههههههههههه
قصصنا بلاوي والله ويا هالليسن
عن جد موضوع حلو .. !ِ​

 

[math girl]

​

اخذت الليسن شهر 3 2008 ما تعبت على دواره المدرب لان كانمن اهل زوجي
بس ما كان تعليمه ذاك الزود خفايف لكن الحمد اعرف اشياء واجد لانه اول شي علمني زوجي
حتى على المشاكل الي تصير في السياره و الشغلات العميقه في المكينه وغيره اعرف شوي لهسوالف من زوجي الله يخليه
ولما بديت امشي جنه الذاكره انمسحت الطريق الي ولا الف مره طايفه عليه ولا جني ادليه وبلاوي واجد على ما تعودت وصرت خبره وحكات وضربات
فاحسن شي الواحد ما ياخذ ليه سياره جديده عشان عادي لو تكسرت وما يخاف انه يطلع عشان يصير عنده خبره وبروفيشنال وعادي حتى يتريق في السياره وهو رايحه الجامعه اكثر الاحيان احمل ريوقي والكوفي والعصير وعلى ما اوصل تريقت
وبالتوفيق للجميع و ان شاء الله الكل ياخذ الليسن ولا يتمنن لغيره وروح ويجي على كيفه
بقولكم شغله لاحظته الي يحن على الليسن نفسي ما ياخذه من اول تراي >> اخذته في الثاني
والي ما يفتكر ولا يحن وعادي السالفه من اول تراي ياخذه​