رايكم يهمني ~ تخصص الدراسات الاسلامية

[ms.dalo0o3a]

السلام عليكم ..

انا باتخرج ذي السنة باذن الله ..

حبيت استفسر عن تخصص الشريعة الاسلامية .. انا محد نصحني بالتدريس بس انا اخترت الشريعة لان ما احب الانجلينزي وابي اشرد منه ..

وابي اعرف الشريعة لازم ادرسه بس في جامعة البحرين عشان اصير معلمة ؟

وكلية البحرين للمعلمين سمعت ان ادرس فيها واصير معلمة ابتدائي بدون لا اعدادي ولا ثنوي .. وانا ما ابي ابتدائي فما عندي الا جامعة البحرين عشان اتوظف كمعلمة ؟! يعني ايصير ادشها الكلية ولا ما ينفع ؟

فحبيت اسال عن التخصص ومجالاته وانتو اذا احد من معارفكم مدرسات او شي شرايهم .. لاني محتارة وافكر في ادارة اعمال واكونت والباقي اقول ذلين وايد اكتفاء .. وناس وايد قبلي متخرجين وما لقو وظايف يعني انا بالقه !

ما ابي اوهق روحي وادش تخصص ماله مجال ..

والشريعة بيفيدني دنيا وآخرة واهم شي اجر الآخرة .. بس ابي آراء مجربين اذا عندكم تجارب ربع او احد دخل ذي التخصص من قبل ..

وشنواحسن جامعة ادرس فيها شريعة غير البحرين ؟ وابي اعرف مجالاته وشلون الدراسة ؟

فاتمنى تساعدوني .. وبعد ابي عن تخصص الديكور في شي جنه ديكور داخلي بس ماعرف اهوه عن شنو ؟ ودراسته بالعربي لو بالانجليزي ؟ وشنو مجالاته ؟

والديكور اي جامعة تنصوحني فيها حق الديكور ؟

يعني فكرت يا ديكور اذا له مستقبل او شريعة واصير معلمة وفي نفس الوقت قاعدة افكر في ادارة اعمال بس المشكلة الانجلينزي وانا ما احب ابطل كتاب انجليزي واقعد اترجم وحاله ..


وحبيت اقول انا متفوقة بس الانج اييب فيه في 88 او كلش 90 او 91 بس موفلته وذي كله بالحفظ الرايتنغ .. ومستوى المدرسة ما يقيس مستوى الطالب .. يعني انا حته لو متفوقة بس بعد احس الانج بيعيقني لاني ما احبه .. تخصصي تجاري بس مااحب الاكونت احسه صعب في الجامعة واكتفاء والفايننس ما احبه وما احب شي تبع الكمبيوتر وهالسوالف .. وياريت تساعدوني لان باسجل في جامعة البحرين اخر يوم اودي طلب الالتحاق يوم الثلاثه .. ولازم ارتب التخصصات حسب الرغبة .. فابي رايكم في هالتخصصات اللي ذكرتها ..

ومشكورين وجزاكم الله الف خير ..

 

[PeaCe RoSe]

بالنسبة لتخصص الدراسات الاسلامية
ممكن تصيرين معلمة لكن كأن لازم عقب ماتخلصين دراستش
تاخذين كورس تربية

ؤ بالنسبة للتصميم الداخلي اتوقع انه يتدرس بالانجليزي
عموما مواد الجامعة كلهم بالانجليزي ماعدا العرب والدين الهيستوري

 

[m.g.s]

مثل ما قالت الاخت peace rose

اللي اعرفه ان كل شي انجليزي الا العرب + الدين + الهيستوري

الانجليزي مال الجامعة غير و فرق عن المدرسة

بالنسبة للتدريس مادري
​

 

[تأمل]

الدين إذا انتي شيعية ما بوظفونج
قالولي عن كذا وحدة مكملين دراستهم و الحين مقعدين ف بيوتهم !
و زوجة صديق ابوي مكملة دراسة من 9 سنين تقريبا و كل سنة تروح الوزارة و للحين مب راضين يشغلونها ..
و بالاخير سوا لهم امتحان للي يقدوم ع الوظيفة و هي كانت معاهم عطوهم كم يوم يراجعون مقررات الدين كامل من ابتدائي لـ مقررات الجامعة
و طبعا محد نجح لان شي تعجيزي ​

 

[jacksparrow]

نفس ماقالوا ادا انتي شيعيه صعب تتوظفين كا مدرسه دين ! خاصتنا في هالاوقات مستحيل يعني

ادا سنيه روحي وتوكلي على الله ...

 

[ms.dalo0o3a]

اشكر كل اللي درو علي..

والحمدلله انا سنية طبعا .. ما في شيعية بتدرس دين !

بس ابي اعرف شنو مجالات الشريعة غير اني اكون مدرسة .. فكر تفي وزارة العدل والشؤون الاسلامية .. بس ابي احد يعطيني فكرة ..

 

[yagmur]

التصميم داخلي وايد وايد انجليزييي ...
ادا لغتج ضعيفة او ماتحبين اللغة انصحج لا تضيعين ع عمرج سنوات ...

اخدي تخصص يناسبج
اما الدراسات الاسلامية تخصص جدا حلو ..
اعرف بنات يدرسؤونة ومرتاحين وؤوإأيد بالتخصصص ... و بالعربي راحة نفسية صرإأحة هههـ

 

[Narcissist]

برايي الشخصي لو انتين مصرة على دراسة الشريعة الاسلامية
درسيه برا يعني في جامعة مختصة بهالشي و تكون متخصصة بالشريعة
و دامش متفوقة جوفي في خطة البعث و المنح في كل سنة لاحظت يحطون بعث للاسلاميات و اتوقع بتحصلينها دايركت لو حطيتينها اول رغبة لأن التخصص ما عليه اقبال واجد
و عندي نقطة ان سمعت شي (مادري اذا صح او لا ) أن الشريعة الاسلامية في جامعة البحرين كل كورس يقبلون جنس معين مثلا هالكورس بس بنات و الكورس الثاني بس صبيان و جذي < عاد انتين اسألي عن هالنقطة لأن مو متأكدة منها
و الشريعة الأغلب انش تكونين مدرسة شي ثاني للأسف ما أعرف


و بالتوفييق ان شاءالله
​

 

[yagmur]

بالتـــؤوؤفــــيييق

 

[أمواج]

بالنسبة للغة الانجليزية
معظم التخصصات في الجامعة باللغة الانجليزية
و دام مستواش اوكي لا تحاتين هالنقطة حتى لو ما حبيتينه لابد و تتعودين
عموما الانج ما يشكل عائق كبير خصوصا و ان الدكاترة عدد كبير منهم عرب فيشرحون و اوضحون بالعربي
بس مواد الحفظ بالانج شوي بتكون متعبة اذا ما حبيتينه

بالتوفيق ,,