افيدونا بخبرتكم.....تخصص المحاسبه

[zannopo]

السلام عليكم

اني طالبه توجيهي سجلت طلب التحاق في جامعة البحرين وطلبت تخصص المحاسبه..............

اني الصراحه احب تخصص المحاسبه واحس روحي اعطي فيه بس اني ما اجيب فيه درجات في التسعين يعني عطونا مقررين محا وجبت فيهم واحد 85 واحد 80

اني الحين معدلي 82 وكله السبب العربي نزل المعدل ...

المهم تنصحوني ادخل التخصص دام اني احب الفهم وااجد لولا اني احس رووحي اووكي في الريض واحب الماحاسبه والرياضيات..

سمعت انه التخصص واجد صعب والكل ما يواصل في كل تخصصات الجامعه ..؟؟

التخصص له مستقبل لو لا..............؟؟

الأنج في التخصص واجد بعد اني اجيب في الأنج في حدود 77 هل اقدر اكمل..

وفي النهايه مشكورين

وتحياتي

zanooob

 

[zahra h]

اذا انتين حابه الشي تقدرين تواصلين فيه ماعليش من كلام الناس

اني عني ما احب الاكاونت كللش
بس ممشيه فيه الحمدلله
ما بالش لو رغبانه فيه انتين

بس

 

[zannopo]

مشكووره خيوو...

بس درجاتي في الماده مو كلش في الثمانين ...متحبطه منهم

ياريت اتقولين ليي جيه التخصص بالضبط والمواد وصعوبته وغيره .......لأني شفت الخطه ولا فهمت منها.......

وهل التخصص يحتاج الى جهد لدرجة انه الكثير ما يواصلون فيه وانه .........

هل الي يواصل مايمديه حتى يطلع ويشوف بيتهم كله مقابل الكتاب دراسه ...؟؟

اشرحي لينا الوضع خيووو لو سمحتين احس روحي اخطأت الأختيار عقب كأني مو فالحه في شي...........:tears:

 

[A.H.A.H]

الثنوي غير والجامعه غير
هالشي اكيد
انا في المحاسبه في الثنوي في المادتين 100
وكنت احب المحاسبه
دخلت الجامعه اسوأ درجات عندي في المحاسبه وحده منهم B والثانيه C
وفي نفس الوقت
معدلي كان 83 بس بدراسه قليله انا عيار ماحب الدراسه
بس ممعدلي الحين في الجامعه مرتفع الحمدلله وايد زين معدلي
بالنسبه حق ان يقولون الجامعه صعبه
والله الجامعه سهله وبالنسبه لي نظامها اسهل من الثنوي
وخصوصا البزنس بالذات
3 وحدات او 4 وحدات بس منتصف تخلصين منهم مايدخلون معاج في النهائي تمتحنين النهائي في وحدات ثانيه ويكونون بعد نفس العدد 4 وحدات او 3 او بالكثير بالكثير 5
وعن الانج
فيه عندي كذا صديق اضعف مني في الانجليزي بواايد واحد معدله 3.8 والثاني 3.7 والثالث 3.3 وواحد 3.1 صاير ان بينهم يعني احسن مني بعضهم وانا احسن منهم في الانجليزي
مايخصه في المعدل الثنوي ولا في الانجليزي
اللي براجع اول بأول بتصير الجامعه سهله عنده وبس
بالنسبه حق تخصص الاكاونت انا كرهته بسبب الدكاتره اللي درسوني اياه
وبالعكس يعني الاكاونت ازيد ماده تكون سهله للطلبه هذا اللي قاعد اشوفه انا
وما ادري شوفي اللي يريحج وسويه
بس لا تخافين من شي لأن الجامعه بأختصار سهله بالمراجعه وصعبه بدون مراجعه
وبس

بالتوفيق

 

[طيف الأمل]

اني عندش مثال حي متفوقة في الثنوي ودرجاتي في المحاسبة في الثنوي ما تقل عن 95 وبالجامعة الوضع مختلف للأسوء وبحول تخصصي اختاري التخصص الي انتين تقدرين عليه مو الي انتين تحبينه لانش تحبينه موكافي بينقلب هالحب لكره في ناس واجد يحبون الكمبيوتر ويدشون الايتي ويحولون التخصص واكثر شي يحولون لتطبيقي وما يقدرون يواصلون فيه والمحاسبة بشكل عام المادة تدرسينها تحسينها سهلة وتافهة بس يعتمد على الي يحط الامتحان يا يجيب امتحان تافه يا يجيب امتحان مثل داك الفصل محاسبة 113 نسبة الرسوب في الامتحان المنتصف 70 بالمية قدموا الامتحان 700 طالب (500 رسبوا ) و (200) نجحوا
بالتوفيق أختي اختاري التخصص الي تقدرين تواصلين فيه ومو فوق قدراتش

 

[طيف الأمل]

الرد بالاحمر
مشكووره خيوو...

بس درجاتي في الماده مو كلش في الثمانين ...متحبطه منهم


ياريت اتقولين ليي جيه التخصص بالضبط والمواد وصعوبته وغيره .......لأني شفت الخطه ولا فهمت منها.......
التخصص اول سنتين تاخذين مواد مشتركة بين كل التخصصات في البزنز وبعد في مواد مشتركة في السنوات 3 و4 .. طبعا أول فصل الواد تكون محاسبة 112 (نفس الثنوي بس أصعب بشوي) و ايكون 140 نفس القصد و ريض 103 و انج 145 ومنجمنت 131 مثل الادر
مواد أول كورس طبعا مو مقياس لان تكون سهلة بالمتابعة ان شاء الله

وهل التخصص يحتاج الى جهد لدرجة انه الكثير ما يواصلون فيه وانه .........
مافي شي بتحصلينه بدون جهد بس للأمانة يا اختي ناس واجد يحولون من البزنز لتطبيقي ولتخصصات ثانية
هل الي يواصل مايمديه حتى يطلع ويشوف بيتهم كله مقابل الكتاب دراسه ...؟؟
من قال عدد طلاب البزنز كبير جدا مثل مافي عدد يحول ويفشل انه يكمل في التخصص في عدد يقدر يواصل ناس واجد اعرفهم تخصصهم محاسبة مشين ويطلعون

اشرحي لينا الوضع خيووو لو سمحتين احس روحي اخطأت الأختيار عقب كأني مو فالحه في شي...........:tears:
اول سنتين مثل ما قلت مواد مشتركة بعدين تبدين مواد التخصص اذا انتين شاطرة في الفهم وفي الرياضيات دشي التخصص

 

[zannopo]

مشكورين شباب...............
اني الحين قررت ادش الجامعة التخصص دخل بالي عقب ما سألتكم....
بس ...هل غالبية الدكاتره في جامعة البحرين مايعرفون يشرحون يعني ادا جدي ما يصلح اكونت لأنه كله على الدكتور وشرحه ..لان الماده...فهم

وويش سالفة النوتات....متعودين احنا في المدرسه على الدفتر خخخ

ومشكورين اعزائي.............

 

[A.H.A.H]

النوتات هي تعني المذكرات او التلخيصات مثل مال الثنوي مذكرة اجتماعيات مذكرة دين وهالهرار
والدكاتره فيه زينين وفيه بعضهم يبطون الجبد

 

[the life]

النوتات يمكن تكون من عند الدكتور يعني ينزلهم في الموقع او تشترينهم حتى لو كانو لدكتور ثاني
وفي نوتات هي اللي تكتبينها ويا الدكتور في المحاضره

اني كان معدلي في التسعين لما كنت في ثنوي بس الانج ساعات فل مارك في المدتيرم و في الفاينل في الثمانين او السبعين ساعات
كان هو اللي مسبب لي عقده لاني مااحبه مو لاني مااعرف
بس الحين كل شي اوكي الحمدلله ، والله يخلي القواميس و مواقع الترجمه ما خلت شي صعب

مافي تخصص في الجامعه ما يبي له دراسه
وعلى قد تعبش ان شاء الله بتحصلين درجة زينه
وحطي في بالش المدرسه غير ـ يعني كنتين تقدرين تاخذين فل مارك بس الجامعه غير
تحصلينها بس مو بسهولة المدرسة
والدكاتره في زينين ولكن اكثرهم لش عليهم
وفي حل ثاني انش تحضرين عند دكتور زين وقت اللي عندش بريك ويسمّون هالشي (لسنر)
وفي معاهد بعد
الدنيا ما توقف على الدكتور
اذا هو مو اوكي الطالب يشجع روحه ويدرس ويحاول يسوي زين وما يعتمد عليه
الحين اشوف لوحة الشرف فيها بنات من اللي كانو في المدرسه متفوقات
مو شرط انهم ما يشوفون الدنيا ولا اهلهم :mellow:
هالشي يمكن يصير في اوقات الامتحانات لو كانو ورى بعض لانش ملزومه تدرسين وما عندش وقت
اما طول ايام الدراسه ترى الشي عادي

لا تخوفون روحكم من البداية قبل لا تجربون
بعدين بتشوفون الوضع ان شاء الله اوكي
والله يوفق الكل​

 

[zahra h]

مشكورين شباب...............
اني الحين قررت ادش الجامعة التخصص دخل بالي عقب ما سألتكم....
بس ...هل غالبية الدكاتره في جامعة البحرين مايعرفون يشرحون يعني ادا جدي ما يصلح اكونت لأنه كله على الدكتور وشرحه ..لان الماده...فهم

وويش سالفة النوتات....متعودين احنا في المدرسه على الدفتر خخخ

ومشكورين اعزائي.............

النوتات مثل المذكرات مال المدرسه
تقديرن انش تنزلينهم من الموقع اهني من مكتبة الجامعه
وتقدرين تطبعينهم
وتقدرين تكتبين وي الدكتور


هي كلهم نوتات للدراسه
كل واحد في الجامعه يتعب ع روحه يعني في المدرسه يجيش كل شي جاهز مجهز
يلاحقون وراكم ع الدفتر عشان كامل او لا
اهني لا انتين مسؤووله عن روحش انتين تهتمين تكتبين اول باول لان محد براقبش بس بتحسين باهمية اللي تكتبيه في الكويز او المدتيرم او الفاينل

والدكاترة معظمهم مو اوكي
بس الدنيا مو واقفه ع دكتور واحد تقدرين تحضرين عند غيره
تقدرين تخلين احد يشرح لش اذا تبين
وفي النهايه اذا دخلتين بزنز اول سنتين تقريبا مواد مشتركه والتخصص اللي تحبينه روحي فيه او اذا حبيتين الاكاونت تمي عليه

 

[D31]

انا بقول جمله وحده بس

(( حابب الشيء يتقنه ))


ولك الخيار في اختيار التخصص ..

 

[zannopo]

مشكورين .......ما تقصرون

بس بغيت اسأل بخصوص امتحان القدرات.....

مال العلمي يعطونهم امتحان غير عن مال التجاري ....لو الأمتحان كله نفس الصعوبه والأسلوب....

وهل هوو صعب واااجد... اني ترى نسسيت مال الأعدادي



ومشكورين اعزائي ادري دوختكم

 

[the life]

ما اتوقع غير:mellow:
مو صعب هو
بس شوي عربي وشوي رياضيات
يعني مايدشون في مواد التخصص
لا تفكرون بيجيبون اعراب لو شي من هالنوع
اغلبه اختياري
​

 

[zannopo]

امبيييي.....

رحنا فيها .................

شفت مراجعه للأختبار القدرات في الملتقى الطلابي صعب ما عرفت فيها شي......

بس شكله مال العلمي يعطونهم الرياضيات غير عنا احنا مال التجاري ..... .... ممكن تشوفون ليي ,,,,,,, ؟؟


متعودين على الأله ...يعني رحنا فيها..

 

[zannopo]

اكو بعد تخرجنا وافتكينا معدلي 83.5

 

[تأمل]

مبرووك التخرج زنووب ..
و مبروك لي بعد
عقبآل التخرج من الجآمعة ​

 

[hlwlw]

امتحان القدرات هرار ! واذا خلصت الاشياء اله تحتاتينها عقب حاتي امتحان القدرات
وتخصص المحاسبة صعب لانه اله تاخذونها في المدرسة عبارة عن جبترين من اول مقرر يعني بتنصدمون بشي اسمه اكاونت

 

[..Ruqaya]

والله احترنااا!!
وش ندخل يعني
ناس تقول الاكاونت صعب وناس سهل
وش نسوووي!!
وناس يقولون لاتدخلين جامعة البحرين
بس تعبت :tears: