مشكلة الترآكي ؟!

[تنآهيد]

سلآم الله عليكم جميعاً ،،

شَخبآركم عسآكم طيبين وبخير وصحة وسلآمة ،

الموضوع من عنوانه مبين ،

أني من يوم عمري 5 سنين وأني أعاني من مشكلة إذا حطيت ليي تركية في أذوني وإن لبست تركية وآويلآه وإن فصختهآ وآ ويلآه وتعقدت من الموضوع وتركت الترآكي لآزيد من جم سنة ، وماقمت أحط ليي ترآكي ولآ مرآكي ، المهم إن المشكلة من أحط التركية ، عقب ساعتين بس أحس بألم فضيع في أذوني عند الخرق وحوآلينه وإذا اطالعها أجوفها محمرة .. مادري اذا أحد منكم وآجه هالمشكلة أو لآ ، وألحين قررت أرد أحطهم أجيّك ورجع ليي الألم وصار ليي الحين تقريباً ثلآثة أيآم وأني لآبستنهم وما أفصخهم خير شر حتى لين بنآم ومع ذلك الألم لآ زآل يزدآد وساعآت أحس بحرارة في أذوني ، فَ إلي عندهآ حل تفيدني فضلاً وليس أمراً .. ومشكورين مقدماً ​

 

[XOX]

وعليكم السلام و رحمة الله

يصير ليي نفس الشي السبب إن عندي حساسية من المعدن الا مصنوعه منه التراكي(مو ذهب),, بس الذهب ما يسبب جذي
بس أني ألبسهم و حتى و هو يعور​

 

[AL alawia]

اني من قبل جديه بس بعدين قعدت احط كريم او فازلين
والحين عادي التركيه على طول في ادوني

 

[آفـاق]

هذي المشكلة تختفي بعد كم يوم من وضع التّركيّة
بالنّسبة ليّي في بعض الأحيان أعاني من هالمشكلة
لكن ما أحاول أحصّل حل لأنّي ما ألبس هالشّغلات إلّا نادرًا
عندي صديقة سوّت حقها في خشمها خرق
و كانت تتألّم في البداية واجد و خشمها يحمر لكنها اعتادت عليها و صار الوضع طبيعي عندها ​

 

[غصن شوك]

اني اذا البس ذهب تقب اذوني فيني حساسية منه
ومو اي نوع من التراكي تستحمله اذوني
فالبسهم 3 ايام متواصلة واقلعهم يوم واحد وهكذا علشان ماينسد الخرق هع

 

[أمواج]

سابقا من طفولتي كنت على طول ليل نهار التركية بأذوني
بس قبل جم سنة اتغير الوضع و ما قمت البس

الحين صرت أتأثر شوي من التراكي بسبب الفترة الي ما لبست فيها
بس بعد مو كل التراكي .. حسب نوعيتها

فالحل أتوقع التعود ​

 

[أمواج]

أنّي ماجربت أغير الأنوآع ، أنتين تتوقعين وش أفضل نوع إلي مايجيب حساسية أو ألم ؟

أما عن التعوّد صار ليي كذا يوم لآبستنهم ، ومادري إذا كانوا يحتآجون فترة أزيد أو لآ ،، إذا عندش فكرة عن الفترة إلي أحتاجها حق تتعود أذوني أفيديني

احس الي بدون " تريت" _ما ادري شنو تسمونه _ أخف .. يعني ينفتحون و ينصكون بالكبس << مسامحة ما اعرف شرح .. ان شاء الله وصلت
و كلما كان وزن و حجم التركية أخف تكون أفضل .. و طبعا الذهب معروف افضل شي

 

[قمَر]

اني امي عندها حساسية من المعادن - اللي مو ذهب -
اذا تاخذ مو ذهب ، تاخذ مطلي بـ ذهب
+
نوعيّة التركيّة & وزنها ليه دور كبير
+
تعودش على لبسها ، ما يحتاج 3 ايام بس

****

نصيحتي جربي كذا نوع من التراكي ، واستخدمي فازلين
وحزة النوم شيليها ..

****

عن نفسي ، تركيتي ذهب هديّة من عند اختي
ما اشيلها من اذوني بـ المرة ، وانسى انها موجودة اصلاً
بس التراكي اللي اكسسوارات عادية ، تتحسس منهم اذوني احياناً
لأن بعض المعادن قابلة لـ الصدأ
وبعض المعادن مو اوكي داك الزود
وبعض التراكي شكلهم ياخذ دور كبير بـ النسبة ليي

****

وبخصوص انش خايفة ينسد الخرق
اهلنا يستخدمون شي عجيب هههههههههههه
خيط ، عادي .. تدخلينه في اذونش بـ ابرة
اني احس يخوف الشي وما جربته من قبل
بس اذا انسدت عليش الطرق جربي ​

 

[قمَر]

كل الحجي الي أنكتب إستوعبت إلّا آخر فقرة :mellow: ، يعني نفس ألم الخرق الجديد ترى لأن الخرق بينسد وبرد أفتحه مرة ثانية وجان أنتون جت على أبر إحنا يحطون ليهم عود مخمّة يكسرونه ويخلونه يقولون حق لآ تنسد
عموماً مَشكوورة خَلَف جُبّيدتي وبحآول أجرب كذا نوع من الترآكي ، حالياً كل الترآكي الا جرّبتهم في نفس مستوى الألم << آخيرتي بخلي الخرق ينسد وبفك روحي

​

 

[♑•.мзŗмăįԀ]

اذا انتي عَوار انا اخر مرَه صارت حمره وتمت تنزف دم
محل الخَرق .. بالرغم الي لبَستها جدا جدا خفيفه
بالرغم من هذّا ما تحملت ..

رٌوحي الصيدلية .. وخبَريهم .. يمكن تحتاجين توسعه للخرق نفسه
لان لو كان صغير بيضغط على الاذون وبعورج ..

شٌوفي نسوان المنامه خرق اذونهم ههههههه متر
ويلبسون اثقل من الي نلبسهم ..

 

[A.H]

بل الله لا يراويش معاناتي عجل ..
اني خرقت اذوني فوق مكان العظم ..
و قالت حقي الصيدلانية ان "راح يعورج"
قلت اوك بتحمل اوريدي كم يوم و بروح الالم ..
الا عقب فتره يزيد .. ما اقدر ارقد من الالم و تميت ارقد و احط ايدي تحت راسي ..
قعدت يمكن اكثر من شهرين اعاني .. الكل عجز مني يبغوني اشيلهم و ما رضيت ..
و عقب توني من كم يوم شلتهم .. و حسيت براحة فضيغه ..
اذا يجيش الم حتى لو ما تحطينهم استخدمي مرهم او فازلين .. و اذا ما قدرتين روحي الصيدلية ..
و الثلج بعد واجد زين حق كل شي و خصوصا الالم ..
و مشكورة و سوري طولت ..

 

[توق]

انا بعد نفس مشكلتج ماقدر احط التراكي في اذوني لي درجه اني ماشتريهم اصلن ولين اروح محل اتحسر
امي تقول لبسي الذهب علشان تتعود اذونج وبعدين الذهب يسوي حرارة يوم و يومين ولاكن مفيد حق الاذون
انتي جربي واذا يعورونج اذونج ونتي حاطتنهم حطي فازلين واخذي مكعب ثلج وفركي اذونج فيهم
وان شاء الله تروح منج هالمشكلة

 

[درازية]

هههههههههههههههههه
حلو الموضوع
اني يوم صغيره خرقو اذوني خبركم اول مرة ماقمت البس تراكي كله دم وحرارة

يوم كنت في اعدادي فكرت احط لي ماتنحط امي قالت لي لانه انسدت شوف من كنتي دادوة للاعدادي؟
قمت رحت المستشفى فتحو الخرق بس كانت تعور وكله دم وحطيت فيها فازلين بعد مده راح الالم
تقريبا صار لي جم اسبوع مادري شهر كنت احاوس بها بعد
بس الحين اوووكي التراكي الطبيه 24 ساعه في اذني

 

[c o d e]

أني بعد مآ ألبس بِشكل متواصل بس خفت ينسد الخرق وآني ما ألبس تالي تصير ليي سآلفة واشوه أدوني أسوي ألف خرق فيها وصآر ليي أكثر من 3 أيّام لآبستنها ومآفصختهآ الا ساعتين بس .. حتّى أني رفيقتي اليوم سوّت ليها 3 خرق في أدونهآ سألتهآ تقول أول ماتسويه يعورها شوي وبعدين بالتدريج يبدأ يخف وينتهي الألم ، بس أني كل مآله ويزيد

سالفة الخروق الواجد في الأذون حليوة
بس اللي سمعته انها مو زينة والله العالم
لان الاذون فيها نقاط متصلة باعضاء معينة داخل الجسم , فيمكن تأثر عليه أو شي !

تقدرين تبحثين عن Reflexology , اعتقد نفس السالفة بس هذا حق الرجول

 

[درازية]

ايي وبقولج شي بعد
ادا بتحطين تراكي بالاول طبيه لمده طويلة لما يروح الالم
بعدين استخدمي التراكي الثقال ادا تبين مو تحطينهم في بدايه الخرق

هم جدي ولحد الحين ادا البسهم حس بثقل فيهم وحراره

 

[بحر الصفاء]

مرحبا اختي

اني بقول ليش طريقة و ان شاء الله تستفيدين
طريقة امي الغالية احم احم
بنت خالتي كانت تعاني مثلش
جربت الذهب و الفضة و التراكي الطبية و العادية و كلها مثل المشكلة حكة و الم و دم
و سوت هالطريقة و استفادت

المهم اخذي التراكي حطيهم في الفريزر ليلة كاملة (طول الليل) و اذا الثلاجة مو باردة واجد خليهم يوم كامل يعني اهم شي يبردون

بعدين يوم ثاني اذا بتلبسينهم البسيهم عقب ما تطلعينهم من الفريزر مباشرة مو تخلينهم يحرون

و بس
ان شاء الله تستفيدين​