عندي انذار :( الي عنده خبرة افيدني

[s only s]

يرجى الإحاطة بأنه بناءً على تدني مستواك الأكاديمي في الفصل الدراسي الأول من العام الجامعي 2012/2013م فقد تم وضعك على الإنذار الأكاديمي الأول، لذا يتوجب عليك رفع معدلك التراكمي خلال الفصلين الدراسيين القادمين.

وبناءً عليه يتوجب لإرشادك في تجاوز مرحلة الإنذار الأكاديمي ورفع معدلك التراكمي مراجعة مرشدك الأكاديمي



سوالي: لازم ارفع معدلي خلال كورسين. وهذا الكورس الاول من الانذار. لو اسجل صيفي يعتبر الكورس الثاني ؟؟؟؟؟!!!!!؟؟؟
وشكرا

 

[أمواج]

مثل ما اعرف ان الصيفي ما ينحسب عالانذار
لو نزل المعدل فيه ما ينعطى الطالب انذار ثاني
ان شاء الله احد غير يأكد لش

 

[التماس دعا]

عندج الصيفي..
عيدي المواد الي جايبه فيهم مو زين او لا سمح الله F...
عندج صيفي فيعني عندج فرصه ترفعين المعدل من ال2 ...

لاتاخذي واااجد ف الصيفي اذا جفتي المواد الي جايبه فيهم مثلا F او D ..واااجد مواد ...لاتنزلين لج اكثر من 2 مادة ...عشان تسوين فيهم زين قد ماتقدرين ومايصير عليج ضغط ..

واختاري 2 مادة انج حقا تقدرين تبدعين فيهم وتسوين زين ..

وفي الاخير اذا إن شاء الله اجتزتي ال2 ... مابروح عنج الانذار..بكون وياج الى نهاية الفصل الأول من بعد الصيفي ..فادا كان معدلج للحين اكثر من 2 ...بشيلون عنج

موفقين

 

[s only s]

ثانكس
امممم
حاليا اعيد مادتين مال الكورس الي طاف F+D
والصيفي باخد مادة econ 140

 

[سونيك]

الإنذار ما له علاقة بارنفاع أونزول المعدل
الإنذار يرتبط بمقدار المعدل
إذا أقل من 2 يعطى الطالب إنذار
في الصيفي إذا ارتفع فوق 2 الإنذار يبقى
لكن الأهم يبقى فوق 2 في الفصل بعد الصيفي
بعدها يحذف الإنذار

 

[التماس دعا]

لا حجیه...نصیحتی لچ...
خدی الحین مادتین اف و دی
وعقب عیدی ایکون


موفقین

ثانكس
امممم
حاليا اعيد مادتين مال الكورس الي طاف F+D
والصيفي باخد مادة econ 140

 

[yagmur]

اني عندي اندار اول ....

وهالكوري اتوقع بوصل 1.57
بالصيفي اقدر اوصله 2
لان مادة جايبه فيها اف بعيدها ....
ومادة دي ... فاكيد بيرتفع انشاء الله

ﻻ تحاتين ركزي ع المواد اللي نازلة فيهم وبتمشين ،
اني مشكلتي الكورس الجاي مابي ... 4 مواد
ابي 5
هاي اللي مضايقني ف الموضوع كامل لان بتاخر

 

[Bent Madrid]

اني مريت بمرحلة الانذارات اذا عندك سؤال طرش ليي في الخاص بس الصيفي ماتنحسب الانذارات فيه
اني اول مرة حصلت انذار كان التراكمي 1.67 وبعدين رفعته ل 1.8 وحصلت الانذار الثاني وبعدين صار 1.98 وحصلت الانذار الثالث وفصلوني فصل نهائي بس رحت ليهم وعطوني فرصة اخيرة كطالب خاص لان كنت جايبة الفصلي 2.22 والحمد لله الحين ماعندي ولا انذار
بس الحين مادري تغيرو القوانين لو لا هالسالفة قبل كأنه فصلين من الحين ماذكر

 

[BUS. Girl]

الصيفي ماينحسب عليه انذار

حاولي قد ماتقدرين تسوين زين فالكورس الجاي

عشان يرتفع ولو لا سمح الله ماوصل الـ2 , خلي الفصلي يكون 2 وازيد

في هالحاله يعتبرونش سبشل ستيودنت ويخلونش تواصلين لان الفصلي 2 وفوق

وبالتوفيق

 

[roger]

أعتقد الفصل الصيفي أفضل وقت لرفع المعدل
ونفس ماقالوا الأخوان تقدرين تاخذين مواد f من جديد وتعيدينهم
نصيحة لا تنزلين ولا مادة جديدة , فقط ركزي على المواد اللي جبتين فيهم f وان شاء الله المعدل بيرتفع
الفصل الصيفي لا يتعبر فصل في الأساس يعني بتكون عندش فرصة قوية جدا لرفع المعدل وتدارك الأخطاء وتصحيحها من جديد ​

 

[Sara.s]

اني عندي اندار اول الحين

ويمكن ما اقدر اوصل الى 2 هل الكورس

لو في صيفي وصلت الى 2 ما بينشال الاندار ؟

يعني ما يروح الاندار لا نهاية الكورس الاول صح ؟

 

[Narcissist]

في الكوسات العادية اذا نزلتين عن ال 2 تحصلين انذار اول
و ما قدرتين ترفعينه اكثر من ال 2 الكورس الي عقبه تحصلين انذار ثاني
و الثالث اعتقد الطالب ينفصل من الجامعة
بس في حالة جبتين اعلى من ال 2 حتى لو كنتين انذار ثاني ينشالون عنش الانذارات كامل
يعني مثلا لو لا سمح الله في الكورسات الجاية حصلتين انذار جديد بيعتبر كأنه انذار اول يعني كأنه ما كان عليش انذار من قبل

بس في الصيفي ما ينحسب من الاساس
يعني لو الحين انتين رفعتين المعدل لفوق ال 2 ان شاءالله
بعد ما بينشال الانذار
و لو ما قدرتين ترفعينه بعد ما بينحسب عليش انذار ثاني

اني نصيحتي من نصيحة الاعضاء الي قبلي
اخذي صيفي في المواد الي راسبة فيها مو مواد جديدة
اولا لأن في الصيفي عندش حرية في المعدل و ما بتتوترين انه بيصير عليش انذار او لا
و ثانيا بتكون مادتين بس و بتركزين عليهم عدل و لو جبتين فيهم درجات عالية يرتفع المعدل فووووق
و خصوصا لو كنتين عايدتنهم المعدل بيرتفع
صدق الانذار ما بينشال بس بتكونين في السيف سايد و بتكونين مرتاحة الكورس الجاي و بيكون دورش ان بس تحافظين على المعدل مو تعانين لين ما ترفعينه
و منها بعد توفرين على روحش وقت و ما تقعدين تعيدين في الكورسات العادية عشان ما تتأخرين

بالتوفيق ان شاءالله​

 

[منتسب جديد]

لو كان عندي مادة جبت فيها D وعدتها وجبت فيها F يحسبون الجديدة لو الأحسن

 

[roger]

^
إذا كانت المادة d وعدتها وجبت فيها f تعيدها ويعتبر رسوب في المادة ​

 

[منتسب جديد]

انا جايب في الماث D+ تنصحوني اعيدها لو اخليها بس

 

[Nerd]

الصيفي ما يتعبر فصل ( اهو فرصتج لرفع المعدل)
الفصل الاول السنة الياية اهني يعتبر الفصل الثاني
بس بعد نهاية هالفصل إذا ما ارتفع المعدل بتاخذين انذار ثاني
روحي التسجيل حق الاخت سعاد بتفيدج اكثر

 

[s only s]

شكرا جميعا
بالتوفيق:tears: