فَضّفَضة جَامِعِية ..

[رَحِيــلْ ،]

طبيعي الوضع ومشى كالعادة..

أبرز شي صار اليوم جفنا روحي فاطمية في الحقوق


​

 

[قيد الأمل]

اليوم غبت خسارة ههههه يوم اللي ابغي اروح اتصير أمراض

 

[UOB-DESIGNER]

اليوم فقدت تلفوني
ودموع انثى كان باقي شوي وبتاكلني بنظراتها

 

[روؤحي فاطمية]

طبيعي الوضع ومشى كالعادة..

أبرز شي صار اليوم جفنا روحي فاطمية في الحقوق

كل يووم تعاااالي ..

​

اليوم فقدت تلفوني
ودموع انثى كان باقي شوي وبتاكلني بنظراتها

يؤؤ انتبهو للاغراضكم السرقة زاايدة هالايام بهالجامعه ..
أمس باقو اقلامي ونوتاتي انززين شلون ادرس ..
ما سرقتون الا دفتري انزين ليش ؟؟؟
كل شسمة وكلبي وروحي فية ححيااتي فية ليش ؟؟
طلاب جاامعه وحرااامية ما ادري متى بتنزل عليهم وشسمة .. استغفر الله ​

 

[M7MDOGRAPHY]

اليوم حليو حده

اول شي : كنت مفجر النووم كله "12 ساعة " نايم قعدت فل جارج
ثاني شي : ريوق يعدل المزاج وبعدها تجهزت وطرت الجامعة

ما عندي محاضرات الصبح .. اول محاضرة تبدي اليوم ساعة 12 "ستات" كانت حليوة ومهضومة

خلصنا وقعدنا بالمسجد لين المحاضرة الثانية وبعدها رحت محاضرة الإنج إلا صاحبنا يقول اللي كمّل رايتنغ ماله بقدر يمشي ، 5 دقايق مَ صار لي أستلمت ورقتي شلت قَشّي وطلعت ..

بعدها الفن بدأ .. انا مو لهناك بالسياقة وأقدر أقول أول مرة أسووق هالمسافة .. طلعت السيارة من باركها ولين وصلنا الشارع العام ، حزة الحزة خفت وانا اشووف السيارات يهجموون علينا ، بدلت وية صاحبي وقلت له كمل الطريق ، قريب الديرة بكمل سياقة عنك

وصلنا كركّنا ورجعنا ..

 

[دموع أنثى]

ودموع انثى كان باقي شوي وبتاكلني بنظراتها

شقصدك غريب ؟؟!!
بعطيك إياها من الآخر اذا انت تقول انك رجال تعال اوقف ليي , وسمعة بنات الناس مولعبة عندك وقد أعذر من أنذر

 

[UOB-DESIGNER]

شقصدك غريب ؟؟!! بعطيك إياها من الآخر اذا انت تقول انك رجال تعال اوقف ليي , وسمعة بنات الناس مولعبة عندك وقد أعذر من أنذر

اسف مو قصدي اضايقش

 

[UOB-DESIGNER]

اليوم قدمت كوز إن شاء الله درجتي ما تقل عن 8

اليوم محاضرة الستات حليوة وخفيفة

 

[♥ Smile]

فكرة الاسايمنتات على البلاك بورد جيدة ولكن تتخللها بعض العيوب البعض عنده مشاكل في الحساب يصير للاسايمنت شد داون على كيف اهله افضل بالورقه والقلم بدلاً من الاون لاين

 

[رَحِيــلْ ،]

أول محاضرة عفر مكنسلة..
صار بريكي الأول أطول وشرحت فيه لصديقة..
امم حضرت ستات المحاضرة كانت مراجعة
الحمد لله ما فيها شي يعني..
البريك الثاني لاقيت " قيد الأمل " فيها.. وشسمه واجدات استانست بالقعدة وياها، من زمان كنت على أمل نقعد مثل هالقعدة هههه
واتغذيت عقب، ووراها المحاضرة الأخيرة.. كانت بعد أوكي..
مبسطة ويّه " دموع أنثى " حاليًا.. =)

 

[M7MDOGRAPHY]

اليوم عادي جداً

- أول محاضرة مكنسلة
- ثاني محاضرة كانت خفيفة
- الفالفة والأخيرة بسيطة ومرت

الأهم الا صار يوم ، فِ كذا نقطة ببالي تمّـت

ودعواتكم باليُسر والتوفيق لي ولكم ..

 

[مارد المصباح]

اول محاضرة كويز بس جبنه فيه درجة حلوة نفسي -سو روحكم ما قريتون اخر كلمة-
بعدين محاضرة عادية والاخيرة كويز ثاني الا دشيت وانا داخل بقوة وطلعت وما ادري جم بجيب بس ان شاء الله درجة تسوى هالتعب

 

[UOB-DESIGNER]

محاضرة الستات الحمدلله رب العالمين

محاضرة 2 ونص إن شاء الله الدكتورة ما تجي

 

[روؤحي فاطمية]

اليوم اجازة بس بتكلم عن امس ..

- طبعا امس اول محاظرة كنت الدكتورة احبها دكتورة حنان بس ما ادري وش قلبني عليها
وصرت اكرة المادة واكرة الدكتورة مو لانه المادة بالانج استصعبتها لا الدكتور تبط الجبد كلش ما حبيتها ...

- المحاظرة الثانية كانت حليوة عبد الحكيم المالية فن عججيب هالدكتور لو من الصبح للعصر يشرح ما استمل
لانة يشرح بضمير وهذا اللي يعجبني فيه ويحب الطالب الفاهم الي يعرف وش صاير بالسكشن وهيج يعني
اتوقعت يوزع علينا اوراق المدتيرم بس كال يوم الثلاثاء واحس مسوية زين بس الله يستر من تصحيحة ...

- المحاظرة اللي عقبها شحاااته لو اتكلم عنه يعجز الكلام والوصف عنه دكتور فن يراعي الطالب ويحسسة كانة من مستوها
ما يحسس الطالب انه الدكتور اعلى منه منزلة وهيج يعني وزع علينا الاوراق المدتيرم والحمد لله درجة كنت مو متخليتنها كلش
اتوقعت يعني شسمة شيسمونه توقعي كلش غلط والحمد لله لو كمل معروفة وعطاني 25 مو احس >> يكول لي طماااعه

- المحاظرة الاخيرة الدكتور استغفر الله ما يعرف يشرح اهم شي اللي حافظتنه طول الفصل ابن الابن حجب حرمان وحجب نقصان
والمراءة لها نص وما ادري شنهو ما يعرف يشرح شي >> كلت له دكتور شرايك تطلعنا وطلعنا فعلا
لاني ما استفيد من المحاظرة اي شي بس شكلي بتوهق بالمنتصف لانة الامتحان بيكون معظمة مسائل واني مييح في هالاشياء
فلازم اعود روحي من له الربع ومن له النص والشروط >> هالميراث حالته حالة ..


استانست يوم كلت لدكتور الغي المحاظرة ولغاها جاني شعور عجيب
بعدها رحت الكفتريا وكنت اهذر مع صديقة من صديقاتي لين خلص الوكت ومشينننا ​

 

[قيد الأمل]

اليوم كان اختبار الساعة 11
2 ونص محاضرة خيفة
عقب مكنسلة ورحنا نسلم البحث وانجان يتحجج خمس مرات اطبع ليه

 

[رَحِيــلْ ،]

رحت نقعت شوي في الكلية.. وساعتين وأني أحوم هني وهناك هههههه

جه وقت النحو، حضرت المحاضرة وخلّصت..
استانست بوجودي

انزين، عقب رحت أتغذى واتأخرت الطلبية ، وأني كنت جوعانة من الصبح لـ 2 وأني مو ماكلة أي أدناة شي..

بعدين رحت قلت ما بحضر الصرف.. هجيت للاستراحة.. أنتظر ناسات حق متفقة وياهم على الشي اللي بنسويه بعد الدوام..
أكلت هناك، وأصلًا طلعت المحاضرة مكنسلة ههههه وطوفتي إلا لمحت محطوط ورقة مكنسلة عاد مو على باب سكشننا إنما بيت الجيران

ومشيت ويّ الناسات وبس ههههه استمتعت بوقتي عمومًا..
أحس بصقل لشخصيتي بشكل تدريجي، ما كنت في السّابق بهالجرأة..
​

 

[UOB-DESIGNER]

اليوم رحت اشوف سكشن الستات وهم يقدمون الإمتحان يطيحون القلب حسسوني كأن الإمتحان فلم رعب ضريبة الحضور امتحان خاص ليي

 

[مارد المصباح]

خمس مرات اطبع ليه

اما صدق متحجج هالدكتور بس صدق البحوث من اتعب الامور للطالب
الله يكون في عونش

 

[رَحِيــلْ ،]

اليوم رحت اشوف سكشن الستات وهم يقدمون الإمتحان يطيحون القلب حسسوني كأن الإمتحان فلم رعب ضريبة الحضور امتحان خاص ليي

سهل كان ما فيه شي
​

 

[قيد الأمل]

اما صدق متحجج هالدكتور بس صدق البحوث من اتعب الامور للطالب
الله يكون في عونش

المفروض يقول من البداية مو كل مرة أطبع يغير رايه عاد اليوم جفت ناس حاطين بحثهم من تحت الباب يستاهل وكل من جا سوى نفس الحركة