نقاش: خاطري أقول (ملل).. بس قاعد أحترم العطلة

[قمَر]

السلام عليكم شعب الـUOB
واللي بدأت إجازتهم تحديدًا
واللي ما بدأت إجازتهم، لين كملوا خل يجون

المهم..
الحين إحنا دايمًا نترقب الإجازة وننتظرها على أحر من الجمر
خصوصًا في فترة الامتحانات..
ومجرد تجي الإجازة نصير متمللين ومو داريين وش نسوي
مع إن المفترض كانت عندنا مخططات وأفكار وأشياء واااجد خاطرنا نسويها
زين ويين راحت؟؟
وتخلص الإجازة، وأحنا ما سوينا شي من اللي كنا نبي نسويه
ولين كلش كلش، نكون أنجزنا ما لا يتجاوز 10% من المخططات الكثيرة
طبعًا في ناس يعيشون إجازاتهم صح، لكني أتكلم عن الغالبية العظمى

# السؤال
- هل أنتون من النوع اللي يضيع الإجازة بدون فايدة، أو تعرفون تستغلونها بشكل صحيح؟
- وش هي الخطط اللي كنتون تفكرون تسوونها في الإجازة؟
- وهل فعلًا سويتون شي منها، أو بديتيون فيها؟
- وإذا ما بديتون، هل تعتقدون إنكم بتسوونها لو بتخلص الإجازة وما سوييتون شي؟

وإجازة سعيدة للجميع ​

 

[sanabsy 15]

والله بطرانين،

باقي 2 امتحان

قلبنا هندي والعوض على الله​

 

[قمَر]

والله بطرانين،

باقي 2 امتحان

قلبنا هندي والعوض على الله​

ويش بطرانين بعد ههههههه
الحالة مستعصية، هندي مرة وحدة؟ ​

 

[7aneen]

- هل أنتون من النوع اللي يضيع الإجازة بدون فايدة، أو تعرفون تستغلونها بشكل صحيح؟

اعتقد اي .. استغلها في القرءاة ازيد شي و اسوي لروحي برنامج عن قعده البيت
- وش هي الخطط اللي كنتون تفكرون تسوونها في الإجازة؟

الصراحة اول شي جى على بالي ان اتعلم الطبخ
و انظم وقتي بين التلفزيون / القراءة / رسم شوي على خفيف و لو ان اني ما اعرف / و الاشياء الثانيه الي تندرج تحت العباده / امارس رياضه بعد بس مو على طول /
يعني احاول اخلي يومي فل عشان ما احس بفراغ
جاي شهر رمضان بعد نظام سهر للظهر و نوم طول العصريه ما يمشي عليي .. احب انام بعد صلاه الفجر و اقعد اذا اذن الظهر ..
عندنا بعد المجلس القرءاني بعد الساعه 1 في الماتم


- وهل فعلًا سويتون شي منها، أو بديتيون فيها؟

توها جايه الاجازه ما مدانا نسوي شي

- وإذا ما بديتون، هل تعتقدون إنكم بتسوونها لو بتخلص الإجازة وما سوييتون شي؟

اي .. ​

 

[رَحِيــلْ ،]

مع إن المفترض كانت عندنا مخططات وأفكار وأشياء واااجد خاطرنا نسويها
زين ويين راحت؟؟

مُؤقتًا توفّيت قبل لا أجاوب
​

- هل أنتون من النوع اللي يضيع الإجازة بدون فايدة، أو تعرفون تستغلونها بشكل صحيح؟
- وش هي الخطط اللي كنتون تفكرون تسوونها في الإجازة؟
- وهل فعلًا سويتون شي منها، أو بديتيون فيها؟
- وإذا ما بديتون، هل تعتقدون إنكم بتسوونها لو بتخلص الإجازة وما سوييتون شي؟

أحس إنّي من النوع الأول..
يعني كل مرّة أضيّع نوعًا ما، أوْ حتّى ما يكون عندي أهداف من الأساس!
بَسْ عاد تَوْنا مبدين الإجازَة ما لحقنا شي حَقْ نبدِي في تخطيطاتنا..
عندي كذا شغلَة أفكّر أسويها.. ولكنّي ما أَرْغَب في كتابتها حاليًا،
يمكِن ما بديت.. أوْ أقدَر أقول إني بديت شِوي على خفيف في بَعَضها..
ومعزمَة أنفّذ تخطيطاتِي وأستَغِل وَقْتِي.. وإنْ شاءَ الله نثبَت!
​

 

[قمَر]

ترى هدفي من الموضوع عقد تحدي بين كل شخص وأهدافه
وأخلي كل واحد يسأل نفسه: هل بحقق اللي فكرت فيه أو لا؟
ونهاية الإجازة إن شاء الله بفتح موضوع ثاني حق نشوف وش سوينا كلنا ​

 

[رَحِيــلْ ،]

ترى هدفي من الموضوع عقد تحدي بين كل شخص وأهدافه
وأخلي كل واحد يسأل نفسه: هل بحقق اللي فكرت فيه أو لا؟
ونهاية الإجازة إن شاء الله بفتح موضوع ثاني حق نشوف وش سوينا كلنا ​

عَجَلْ إذا جِدي.. ما أقدَر أتهرّب أكثَر..
الأَهْداف اللي أسْعَى إليها حاليًا :

- أقرَأ فوق الـ 10 كتب..
- أحاوِل وأطوّر كتاباتِي
- أقْرَأ أكثَر فِي القَضايا الصّرفية، أوْ أحاول أبحَث فِيها.. خصوصًا اللي ما خذيناها..
- أتجهّز ولو بشكل بسيط لمقررات الفصل القادِم، أقلُّها بالقراءَة عن مواضيعهـا
- أسويّ الشغلة اللي اتفقت ويه ربعي عليها > عاد دي ما أقدر أشرَح!


اممم، إذا تذكّرت شي بعدّل المُشارَكَة وبضيفَه
​

 

[Al-Mosawi]

- هل أنتون من النوع اللي يضيع الإجازة بدون فايدة، أو تعرفون تستغلونها بشكل صحيح؟
​

نص ونص، ماعرف أستغلها بشكل صحيح بس أحاول كل يوم أسوي شي ماقدر أسويه أيام الجامعة

- وش هي الخطط اللي كنتون تفكرون تسوونها في الإجازة؟
​

أقرأ روايات، أطلع، أطبخ طبخات جديدة، أحفظ كلمات إنجليزي

- وهل فعلًا سويتون شي منها، أو بديتيون فيها؟
​

شوي ، من جت الإجازة ثلاثة أيام عندنا ناصفة
واليوم بس طلعت طلعة غير، وان شاء الله الليلة أبدي قراءة ..

- وإذا ما بديتون، هل تعتقدون إنكم بتسوونها لو بتخلص الإجازة وما سوييتون شي؟
إن شاء الله بسويها، أني ما يجي في بالي حزة لين أفكر فالإجازة أن بسوي شي مستحيل، يكفيني شي أقدر أسويه+ بستفيد منه وبينمي مني وبخلص من الإجازة بشي قيّم.​

 

[Jouan7]

# السؤال
- هل أنتون من النوع اللي يضيع الإجازة بدون فايدة، أو تعرفون تستغلونها بشكل صحيح؟
- وش هي الخطط اللي كنتون تفكرون تسوونها في الإجازة؟
- وهل فعلًا سويتون شي منها، أو بديتيون فيها؟
- وإذا ما بديتون، هل تعتقدون إنكم بتسوونها لو بتخلص الإجازة وما سوييتون شي؟

1- لا .. اعرف وش اسسوي ب الضبط .. صحيح اوقات اتملل بس عادي
2- حاليا افكر ف خطة كبيرة تساعد مستقبلي و افكر اتابع خطة الرياضة الي سويتها و اتابع هواياتي و اشيائي كلها ب الاجاززة
3- نص الخطط مشتغله عليها و وقفت بسبب الامتحانات و هالامور بس الخطة المستقبلية توي تناقشت مع كذا زميل و ان شاء الله نبدي ب العطله
4- اي ان شاء الله

 

[قمَر]

بالتوفيق جميعًا يا رب ​

 

[أمواج]

أغلب الأحيان العيارة تخلينا نتراجع بمخططاتنا

ان شاء الله صمود هالمرة

اليوم أول يوم اجازة وبدأت ارتب أموري واخطط

الأشياء الي في بالي

- أنزل ملفات في المكتبة الجامعية .. كل يوم بمعدل 5 ملفات عالأكثر
- أقرأ كتب .. ما حطيت معدل .. الي أقدر عليه كل يوم شوي
- خاطري أشوف شسالفة ساهر الليل .. فقلت بطالعه عاليوتيوب


ما أدري شنو بعد

اليوم بداية جيدة .. سويت شي مفيد
رتبت ملفات الجامعة عاللابتوب .. ونزلت 5 ملفات بالمكتبة .. وبعد شوي ببدأ أقرأ

 

[m.g.s]

- وش هي الخطط اللي كنتون تفكرون تسوونها في الإجازة؟
- وهل فعلًا سويتون شي منها، أو بديتيون فيها؟
- وإذا ما بديتون، هل تعتقدون إنكم بتسوونها لو بتخلص الإجازة وما سوييتون شي؟

مافي خطط
تريننغ شهرين + تخطيط و شغل على السينير بروجكت


بديت في السينير >>> Planning + Searching + Collecting
شهر 7 نبتدي تريننغ


الله يوفق الجميع ​

 

[ms.dalo0o3a]

ذيج الاجازة لعبت رياضة وضعفت وذي اهم شي ههههه مع اني مو متينة بس المهم سويت شي ..

بس هالاجازة مخططاتي اكبر:

1- قدمت وظيفة باشتغل ف الصيف بس
2- بادرس صصيفي
3- خاطري اقره كتب افكر اخذ رواية وكتاب

بس محتارة في وايد كتب في بالي منها كتاب اسمه نسيان دوت كوم و رواية احببتك اكثر مما ينبغي افكر اخذهم

4- حفظ سورة البقرة

وان شاء الله اقدر احقق كل هالاشياء

 

[عالي مستواي]

جدول عناية + رياضه بحاول امشي عليه
من دشيت الجامعه وايد هملت روحي
وان شاء الله راح انفذه

 

[أمواج]

الأشياء الي في بالي

- أنزل ملفات في المكتبة الجامعية .. كل يوم بمعدل 5 ملفات عالأكثر
- أقرأ كتب .. ما حطيت معدل .. الي أقدر عليه كل يوم شوي
- خاطري أشوف شسالفة ساهر الليل .. فقلت بطالعه عاليوتيوب

- الملفات مواصلة عالشغلة الحمد لله

- أقرأ كتب وأقطع بين فترة وفترة

- ساهر الليل شفت الجزء الأول على أساس هم 3 أجزاء
انصميت ان الأجزاء مو متتابعة أصلاً .. مصبرة روحي عالاول وبالأخير مو متتابعين :S !
قلت خلني أروح للجزء الأخير دايركت .. ما عجبتني أول حلقة وبس ما شفته


شهر رمضان ان شاء الله ألحين أمشي على نظام ..

 

[Narcissist]

- ساهر الليل شفت الجزء الأول على أساس هم 3 أجزاء
انصميت ان الأجزاء مو متتابعة أصلاً .. مصبرة روحي عالاول وبالأخير مو متتابعين :S !
قلت خلني أروح للجزء الأخير دايركت .. ما عجبتني أول حلقة وبس ما شفته

عاد ما حصلتين غير ساهر الليل!
اني جفت الجزء الثالث بس لأن سمعت انه عن غزو الكويت و تحمست اتابعه < لأن اخيرا فيه مسلسل فكرته جديدة
ما حبيته كلش لا من ناحية الممثلين و لا طريقة عرضهم للقصة و لا شي
بس جافوا ان صارت 2011 و صارت الثورات في الدول العربية جوا يبون يدخلون روحهم في السالفة و مو عارفين شلون
يعني غزو الكويت تقريبا ادا مو غلطانة قبل 20 سنة توكم متذكرين تسوونه الحين ​