صَدِيقَتِـي تُهِينُ كَرَآمَتِـي ؟!

[Jouan7]

بسم الله الرحمن الرحيم
و الصلاة على اشرف الانبياء و المرسلين
سيدنا محمد و على اله و صحيه اجمعين
اللهم صل على محمد و ال محمد


هالموضوع من زمان ابي افتحه و كنت متردده و هيك يعني ..
او بالاحرى ما اعرف شلون اطرحه ..


ممم
القصصة باختصصار

اعرف بنت و وياها اوكي .. و وايد اشوفها في جمعات البنات و كذا
المهم .. موضوعنا مو هني
الموضوع .. طول الوقت من اتكلم تسكتني و تفشل ف حبايبي ..
و بس حاطة علي
اي شي ما عندها االا جستوو .. الا اني جدي و الا اني جداك

مررة جت لي وحده من البنات و كذا مرة يكلموني ..
انتي شلون تسكتين عنها .. احنا كلنا نحبش و نشوف الي تسويه فيش صراحة مو عدله و انتي استغرب منش ليش ما تردين عليها
- قلت لها اني انسانة ما احب المشاكل و ادري اني ام لسان لا عطيتها ذاك اللسان بتزعل ..
و اني ماابي ازعل احد و لا احب ان في احد يحط خاطرة عليي و يحمل عليي

المهم ..
جتني فترة خلاص ما قمت استحمل احد ..
و لا لي مزاج احد
و بس هالادمية ما عندها الا اني
و بس من اخر فترة للحين صرت نفس الي ما اسكت عن حقي .. عاد بتسبب بمشااكل او ما بتسبب
الي يعطيني كلمة اعطيه عششر
خلاص زمن الطيبة راح .. و خلاص ما ينعطون وج اصلا ..
و فعلا ههه من ذاك اليوم خفت عن قبل ,,
هذي مو ضعف في الشخصية ,, لا .. يعني شخصيتي مع الي حواليي مرحة و الفكاهية ب القروب و باي قروب ادشه تكون شخصيتي جدي
و مو ضعيفة ,, بس من النوع الي ما احب ادش في مشاكل ,, خصوصا بين الاصدقاء
من جدي كنت اسكت و ما اعبر
و الحين تغير الوضضع الف

+ صادكم موقف جدي في حياتكم ؟
+ لو صادكم شلون تتصرفون ؟
+شنو الاهم .. الصداقة ام الكرامه ؟

بعيدا عن الاسئلة اترك لكم التعليق ع الموضوع بشكل عام
​

 

[♥ Smile]

+ صادكم موقف جدي في حياتكم ؟
+ لو صادكم شلون تتصرفون ؟
+شنو الاهم .. الصداقة ام الكرامه ؟

تاريخي مع الصداقات فاشل
12 سنه مدرسه طلعت ابـ 0 صديقات "" صفففر"""

ان بغيت صديقه فـ امي خير صديقه

 

[Jouan7]

تاريخي مع الصداقات فاشل
12 سنه مدرسه طلعت ابـ 0 صديقات "" صفففر"""

ان بغيت صديقه فـ امي خير صديقه

هل كانت خياراتش فاشلة لو شنو بالضضبط ؟

اني طلعت بصديقات وايد .. بس قليل الي حق صديقات صديقااات ,,
و هالادمية مدري من وين طلعت لي و تصرفت وياها

 

[silver box]

لفتني ردة فعلك, شفتها حواليني بكثرة للاسف شديدة, وهي طبعا خاطئة, و واضح هذا الشي مثلما اتصور...
للاسف الانسان ما ادري حق ويه دائما بين افراط وتفريط !, ممكن لانه ينصدم من الواقع..!

طبعا نحن نعرف ان الحياة دائما فيها البعض اللي يحب يستضعف او يهين الشخص اللي يتلمس فيه السكوت او عدم الالتفات للاهانة او التغاطي بشكل مفرط, هؤلاء الذين يعانون من نزعة غرور ودناءة في نفسهم, فيتحتم على الانسان, وبالاخص اللي ما يحب المشادات واللغط, يعني بطبيعتة لين في كل المواقف وما تتولد عنده مشاعر سوء النية بسرعة, انه يطور في نفسه حب معاندة هذه الفئة من الناس ومواجهتها بقليل خشونة حتى ترتدع, هذه الفئة فقط لا غير, لا اني انقلب تماما مع كل من يوجه لي نقد او توجيه على طول اواجهه بخشونة, حتى لا اتحول من شخص مسالم تماما الى انسان غظ فظ !, وطبعا اهني لازم ايضا اطور مهارة استشعار هذا النوع من الناس, وهذا الشي ممكن مثل ما لاحظت, يعني من الفاظه ونبرة كلامه, ممكن يتلاحظ انه يحاول يوجه طعنات او اهانات.....الخ

 

[رَحِيــلْ ،]

أني أقول.. أعرض عن الجاهلين،
يمكن صدق مع مرور الوقت يضيق خلقي بسببهم وچدي، بس بحاول أتصبر..
ما فاد بروح لمرحلة ثانية وهي إني ألمح ليهم شي أنغز المهم أوصل رسالة ترا أني أجوف وأسمع ومو غافلة عن اللي حواليي وترا مضايقني هالشي!
المرحلة الأخيرة المواجهة وبقولها في الوجه ترا كذا كذا وعيب اللي تسوونه..

على الأقل احترام شوي

ما صادني موقف بالضبط نفس الشي يعني بحيث دائمًا حجي عليي وموضوع الحوار اني، لاا.. مرت عليي مواقف ومن ربعي بعد،

شيء صعب إنه واحد يطلّع مواضع الضعف عندك أو يتلمّس جروحك قدام ربعك! أو حتى مو حليو يكون شغله الشاغل انته بطريقة يحرجك ابها قدام الآخرين..

اما عن السؤال الأخير.. بالنّسبة ليي إذا شخصة فعلًا أعتبرها رفيقتي أشيلها على عيوبها، وأتصبّر وأتحمل، وعادي أدوس على كرامتي بعد إذا لزم الأمر، بس في نفس الوقت إذا طفح الكيل وهانت المعزة خلاص، ما بفرّط في كرامتي عشان شخصة ما تستاهل ^^

 

[Jouan7]

لفتني ردة فعلك, شفتها حواليني بكثرة للاسف شديدة, وهي طبعا خاطئة, و واضح هذا الشي مثلما اتصور...
للاسف الانسان ما ادري حق ويه دائما بين افراط وتفريط !, ممكن لانه ينصدم من الواقع..!

طبعا نحن نعرف ان الحياة دائما فيها البعض اللي يحب يستضعف او يهين الشخص اللي يتلمس فيه السكوت او عدم الالتفات للاهانة او التغاطي بشكل مفرط, هؤلاء الذين يعانون من نزعة غرور ودناءة في نفسهم, فيتحتم على الانسان, وبالاخص اللي ما يحب المشادات واللغط, يعني بطبيعتة لين في كل المواقف وما تتولد عنده مشاعر سوء النية بسرعة, انه يطور في نفسه حب معاندته هذه الفئة من الناس ومواجهتها بقليل خشونة حتى ترتدع, هذه الفئة فقط لا غير, لا اني انقلب تماما مع كل من يوجه لي نقد او توجيه على طول اواجهه بخشونة, حتى لا اتحول من شخص مسالم تماما الى انسان غظ فظ !, وطبعا اهني لازم ايضا اطور مهارة استشعار هذا النوع من الناس, وهذا الشي ممكن مثل ما لاحظت, يعني من الفاظه ونبرة كلامه, ممكن يتلاحظ انه يحاول يوجه طعنات او اهانات.....الخ

فعلا .. اوافقك الراي ..
و صح كلامك .. ان مو اي احد نفس الي تقوم عليه و بس هاي النوع..
عن هالكلام ,, اني ما تغيرت بس ع الاوادم الي جدي و احس خلاص ما ينفع وياها الا الاسلوب الي تستحقه ​

 

[Jouan7]

أني أقول.. أعرض عن الجاهلين،
يمكن صدق مع مرور الوقت يضيق خلقي بسببهم وچدي، بس بحاول أتصبر..
ما فاد بروح لمرحلة ثانية وهي إني ألمح ليهم شي أنغز المهم أوصل رسالة ترا أني أجوف وأسمع ومو غافلة عن اللي حواليي وترا مضايقني هالشي!
المرحلة الأخيرة المواجهة وبقولها في الوجه ترا كذا كذا وعيب اللي تسوونه..

على الأقل احترام شوي

ما صادني موقف بالضبط نفس الشي يعني بحيث دائمًا حجي عليي وموضوع الحوار اني، لاا.. مرت عليي مواقف ومن ربعي بعد،

شيء صعب إنه واحد يطلّع مواضع الضعف عندك أو يتلمّس جروحك قدام ربعك! أو حتى مو حليو يكون شغله الشاغل انته بطريقة يحرجك ابها قدام الآخرين..

اما عن السؤال الأخير.. بالنّسبة ليي إذا شخصة فعلًا أعتبرها رفيقتي أشيلها على عيوبها، وأتصبّر وأتحمل، وعادي أدوس على كرامتي بعد إذا لزم الأمر، بس في نفس الوقت إذا طفح الكيل وهانت المعزة خلاص، ما بفرّط في كرامتي عشان شخصة ما تستاهل ^^

لو هي تستاهل بحق .. بتسوي جدي فيش ؟
و تجرحش و تتمسخر عليش قدام باقي ربعش ؟
و لا ,, و تعرفين و الكل عارف انش احسن منها بكل شي !!

بيني و بينش اني استعمملت اسلوب النغزات قبل لا اهجم الهجمة المرتدة ,, شوي نفع بس ما أثر داك الزود
​

 

[رَحِيــلْ ،]

تاريخي مع الصداقات فاشل
12 سنه مدرسه طلعت ابـ 0 صديقات "" صفففر"""

ان بغيت صديقه فـ امي خير صديقه

مو دائمًا ننجح في كسب الأصدقاء بواسطة الزّمالة في المدرسة.. لسبب أو لآخر،

ممكن نرافق بشر واجد في الحياة، وما عندنا إلا صديق حقيقي واحد!

وما يحتاج أي شخص يتعلّم ( كيفَ أُحافظ على أصدقائي )
فقط كوني على سجيّتش وطيبتش، والمودة والإخاء طبيعة في النّفس ^^
النّاس معادن، ابحثي عن اللي يطابق معدنش أو على الأقل يتلاءم ويّاه..

ولا بأس في كون الوالدة صديقة
ولكن العزلة مو حليوة ما أنصح بها أي شخص

 

[Jouan7]

مو دائمًا ننجح في كسب الأصدقاء بواسطة الزّمالة في المدرسة.. لسبب أو لآخر،

ممكن نرافق بشر واجد في الحياة، وما عندنا إلا صديق حقيقي واحد!

وما يحتاج أي شخص يتعلّم ( كيفَ أُحافظ على أصدقائي )
فقط كوني على سجيّتش وطيبتش، والمودة والإخاء طبيعة في النّفس ^^
النّاس معادن، ابحثي عن اللي يطابق معدنش أو على الأقل يتلاءم ويّاه..

ولا بأس في كون الوالدة صديقة
ولكن العزلة مو حليوة ما أنصح بها أي شخص

فعلا ,,
كلام سليم ..
اني ما عمري دورت ع صديقات اساسا ..
صديقات هم بجون بروحهم و بشكل عفوي و بتحبينهم و حبونش ع سجيتش ..
محد يحتاج يتصنع حق يحصل اصدقاء ..​

 

[رَحِيــلْ ،]

لو هي تستاهل بحق .. بتسوي جدي فيش ؟
و تجرحش و تتمسخر عليش قدام باقي ربعش ؟
و لا ,, و تعرفين و الكل عارف انش احسن منها بكل شي !!

بيني و بينش اني استعمملت اسلوب النغزات قبل لا اهجم الهجمة المرتدة ,, شوي نفع بس ما أثر داك الزود
​

إذا هي رفيقتي وقريبة مني بتعرف إني زعلت، وهذا قلت ( إذا ) ..
بالنسبة ليي - شخصيًا - ما أحب أفرّط في ربعي، إذا أني فعلًا جايفتنهم ربعي حقًا حقًا ما بشيل عليهم، وبواجههم إذا أمكن حفاظًا على اللي بيننا..

بس إذا صديقة بالاسم فقط، بدون معنى حقيقي لهذي الكلمة، أكيد إني ما بهتم راحت أو جت، بالعكس كلما كانت بعيدة أفضل.. ^^

 

[Jouan7]

بس إذا صديقة بالاسم فقط، بدون معنى حقيقي لهذي الكلمة، أكيد إني ما بهتم راحت أو جت، بالعكس كلما كانت بعيدة أفضل.. ^^

هذا الي اتكلم عنه .. بالاسم بس
اسم انها معاي ب القروب

 

[وينك يا حنون]

اني عندي صديقة جدي تحب تحسسني اني اقل منها و ان هي صاحبة الشخصية القوية و دائمآ تنتقدني و نادرآ ما تذكر محاسني او تقدر مشاعري اللي احملها لها لين قلت لنفسي مااحد احسن من احد و مثل ما تعاملني اعاملها الكرامة فوق كل شي .. ليش نقلل من قيمة نفسنا عشان فلان و لا علان و هم ما يحسون فينا

 

[Jouan7]

اني عندي صديقة جدي تحب تحسسني اني اقل منها و ان هي صاحبة الشخصية القوية و دائمآ تنتقدني و نادرآ ما تذكر محاسني او تقدر مشاعري اللي احملها لها لين قلت لنفسي مااحد احسن من احد و مثل ما تعاملني اعاملها الكرامة فوق كل شي .. ليش نقلل من قيمة نفسنا عشان فلان و لا علان و هم ما يحسون فينا

فعلا ترا ..
الاصدقاء يستحقون ان نتغاضى عن تصرفاتهم ..
لكن مو ع حسساب كرامتنا بهالشكل ,,

و الي تحس ان نيته مو طيبة وياك بالطقاق يطقه

 

[a1b2c3]

زين سويتين فيها
بس ساعات نغيرش على الكل اضر
مو كل ناس نفس شي .
صداقه موضوع صعب :tears:

 

[Jouan7]

زين سويتين فيها
بس ساعات نغيرش على الكل اضر
مو كل ناس نفس شي .
صداقه موضوع صعب

لالا ,, اني م تغيرت ع احد حته عليها هذي اني
بس من تعطيني كلمة اعطيها عششر بس ..

لو احد غير بعطيه جم محاوله بعدين بهجم لو حسيت ان م يستحي ع ويهه

 

[XOX]

عندكم طولة صبر اني اذا بنت لازم بتعامل وياها مثلا في مشروع و تعاملني هالمعاملة أرد مو شرط بالكلام بس بطريقة تحسسها ان اني أرفض تصرفاتها! و اذا بنت ما بتعامل وياها واجد أنقطع عنها أو أعاملها برسمية

​

 

[Jouan7]

عندكم طولة صبر اني اذا بنت لازم بتعامل وياها مثلا في مشروع و تعاملني هالمعاملة أرد مو شرط بالكلام بس بطريقة تحسسها ان اني أرفض تصرفاتها! و اذا بنت ما بتعامل وياها واجد أنقطع عنها أو أعاملها برسمية

و ان كانت بقروب الاصدقاء ,,
يعني هالحركات مو بس ب الفيس .. حته ب القروب و بكل مكان ..

 

[Jouan7]

مرة ضربتها
كانت تضربني و لما اقول لها لا تضربيني ما تسسمع و يوم كفختها
الا تسوي عورتينييي
قلت لها نفس احساسسي
الا تسوي لا انتي فيش عضلات ما تتعورين اني مافيي

قلت فيي بس مو مافيي احساس
و قلت لها ان الشي يضايقني و لا عاد تجيسيني

 

[بنفسجيه.~]

اممم..قروبات المدارس ..اني ما عشت جدي بالضبط انه قروب من المدرسة بس اشوف هالشي ويا اختي هي قروب ويا ربعها في صف ..صحيح انهم رفيقات و كل جمعات ويا بعض ..بس يعني عادي تطلع وحدة منهم تنتقد الثانية من وراها ! ...
علشان جدي اني دائم اقول انه اذا تبغين تعرفين اصدقائش الصدقيين شوفي من اللي تبقى على حالها بعد المدرسة و من اللي يتغير للافضل و من للاسوء...بنات واجد تطلع من المدرسة بصديقاات واجد و اخر شي تفرقهم الجامعة او يكونون نفس المكان بس شخصياتهم اللي تغيرت!! ..

عن نفسي عندي صديقة وحدة مقربة "هي اللي اعتبرها الصديقة الحقيقة" ... اني مو انطوائية عن الباقي البنات..يعني لو وحدة اعرفها من المدرسة او حتى في الجامعة صارت ويايي في سكشن معين و تعرفت عليها وصار انه من زماان ما شفتها فاستانس اذا التقيت ابها بصدفة.. اعاملهم باحترام و اسال عنهم و جدي ..يعني احب و ارتاح ويا البنت اللي ما تتغير و تحترم الباقي و تلتزم بحدودها مع الاخرين و تسال على طول " هادي زين تتحصل في هالايام فما احب اني احقرها بعكس اتواصل وياها على طول"
بس اذا اشوفها هي ما تعطيني وجه على الرغم من اني ما اسئت اليها !! مرة مرتيين !!..خلاص

كانه وااجد تكلمت
في النهاية اني اكيد افضل كرامتي على صداقاتي


​

 

[the life]

مهما يكون
مرة صادني موقف ويا وحده ويايي ف المدرسه
وبعد ما تخرجنا توفت عمتي الله يرحمها
عاد هي سوت روحها ام السنع وبتجي ليي
وهي جايه وقصدها تجي بس بتطلع وبتروح مكان ثاني
> لاحد يروح باله بعيد بتروح مكان ثاني واهلها ما يدرون مو معناته تسوي شي غلط

اني للحين مو داريه وش قصتها الله يستر عليها ولا فكرت اكلمها واسألها بعد
واني مادري ، ف أهلها جو شافوها محد وصارت سالفه واني اصلا ماليي خص في الموضوع:mellow:

وتدخلت اختها وصارت سالفه واني حزتها مو مزاجي لهوشه
عطيت اختها كم كلمه وقلت ليها احكمو ع اختكم اول بعدين تعالو حاسبوني ! وش دخلني اني فيها وين راحت ووين جت
واصلاً اني منو اسألها ؟ عبالي جايه ليي وصارت عندها شغله وطلعت
المهم خلصت السالفه وكل شي
وطلعت من البيت ويا اختها واني من ذاك اليوم مادري عنها شي
ولا حتى اتصلت وقالت لي مسامحه شي مني مناك أبد
ومرت الايام قمت اني غيرت رقمي وقطعت علاقتي فيها خير شر مع انها كانت من اكثر البنات اللي وياهم ف المدرسه
و يجي ذاك اليوم كنت في ماكدونالدز للحين اذكر ، رقم غريب وأرد الا هذي هي
وسوت فيها ليش ما تسألين ومغيره رقمش ولا تقولين وكأنه اني الغلطانه
ومشيت السالفه وياها اني ولا جبت طاري و صرت اكلمها بدون نفس
خلاص احنا متخرجين ومحد يشوف الثاني
وليومش هذا ما رجعت علاقتي فيها مثل قبل ، لانها استغفلتني
و حسستني انها مو جايه ليي عشانها تبي تجي ولكنها جايه عشان تطلع بدون ما يدرون اهلها


مشيت الحركه والدنيا حلوه
صدق للحين ماخذه بخاطري انها شلون سوت جذي لكن ما كبرت الموضوع وخليته لوقت اللي احسه مناسب افتحه حقها


الغرض من الهذره هذي كلها ان مو كل شي يصير نكبره ونحط له اعتبار
ما اهتمت لش لا تهتمين ليها
ومثل ما تسوي لش سوي حقها
او كل ما تحاول تتفلسف عليش جعميها أو فشليها قدامهم لا تعطينها فرصه
تغذي فيها قبل لا تتعشى فيش
مثلاُ اذا جت تتكلم قولي لها هالكثر اني مهمه عشان تعرفين عني كل هذا ؟
او من متى كانت علاقتش قوية عشان تعرفين عني جذي ؟
او اي شي من هالنوع \\ فشليها
تستصغرش قدام الناس والقهر هالناس يعرفونش عدل ما يحتاج تتكلم هي
أو لا تتكلمين وتحتكين فيها ، كأنها مو موجوده او خلي علاقتش فيها سطحيه جداً جداً جداً
اعتذري عن بعض الطلعات مو لازم تكونين وياهم وهي موجوده
صكيها بلوك عشان ما تشوفين شي من اللي تكتبه ف القروب
في حلول واجد

الصراحه اني من دخلت المدرسه لما تخرجت ما عندي صديقه تستاهل كلمة صديقه
زماله لا أكثر ،
ولو كانت العلاقات طيبه بس ما احط ثقتي في احد 100%
واللي مو عاجبتنها تروح دربها خضر ماني مجبوره عليها ولاهي مجبوره عليي

بعض الناس ما يستاهلون تمشين وياهم بحسن نيه
ولا انش تكونين وياهم طيبه
عبالهم بس هم عضلات ونفخه :sly: راويهم عضلاتش عدل​