الإهْتِمَـآم الزّآئد يَقْتِلُ الحُب !

[Jouan7]

الاهتمام الزائد يقتل الحب ..
كثير ما نسسمع .. اهتم ما يهتم فيني ..
اهتم ما يفتكر .. ما يبادلني نفس الاهتمام .. يحقرني ,, و غيره

و دايما نعنّف الي عندهم اشخاص يهتمون فيهم ب شكل مو طبيعي و هم يتشكون ما يبونهم .. و نقول لهم حرام يضيعون من يدينكم .. و بنفس الوقت لما يجينا شخص جدي .. احنا بعد نضضيعه ..
او نصمد وياه جم يوم اسبوع شهر بعدين نتملل او بالاحرى نحس بانه الشخص الغير مناسب او نعاتب انفسنا ان احنا مو الناس المناسبين له لان اهتمامنا اقل و كذا !

طبعا مو قاعدة اتكلم عن علاقات الحب بس .. كل العلاقات .. بشكل عام ..
صداقة .. و غيره

بالنسبة لي تركت ناس كثير بسبب اهتمامهم الزائد
و بنفس الوقت بعد خسرت كثير بسبب اهتمام زائد

و اكتشفت ان الاهتمام حلو ب حدود
و يوم جيت اكتب الموضوع رحت قوقل كتبت اهتمام زائد ..
اكثر الكلمات الي شفتها
خسارة .. فقد كرامة ..
و قريت ان الاهمال الزائد و الاهتمام الزائد نفس النتيجة ..
ف الزبدة
ان كل شي يزيد عن حده ينقلب ضده ..
حتى لو تعز شخص بشكل كبيير و تحبه لا تحسسه بالحب و الاهتمام الزائد
لان الي تعطيه اكبر من قدره دايما بيخليك اقل من قدرك



+ قط مرة صادكم موقف من الناحيتين ؟
+ شنو كان تصرفكم ؟؟
+ رايكم ف الموضضوع ؟
​

 

[رَحِيــلْ ،]

هههه يالسذاجة الأفكار اللي تنتقل بين المجتمع..

يعني ويش إذا اهتميت بشخص بيزعل وإذا اهتميت إبه بينزعج من اهتمامي، وإذا اهتميت إبه راحت الكرامة وإذا وإذا..؟!

نتوقّف لحظة ننصف..!
أحين الأم لما تهتم بأولادها بيتضايقون؟!
لما الأبو يراعيهم مثل الشي؟!
لما الأخوان يهتمون لبعض يزعلون من بعض؟!
لما الربع يهتمون لبعض يزعلون؟!
لما الزوج يتحمّل بزوجته والعكس بينزعجون؟!
كل هذا وغيره.. كله إجابته وحدة ( لا ) !

وبعد.. بشكل عام، احنا ما نحتاج لمبرّر وسبب يدفعنا للاهتمام بأي شخص في هذا الكون، وما نحتاج للعلاقات بعد.. كونه شخص من أصل واحد يكفي،


نقطة ثانية.. تبادل الاهتمام،
قد يعتقد البعض إنه يقدّم الكثير لشخص، والطرّف الثاني ( ما يقدره، ما يهتم فيه بمثل ما هو عليه من الاهتمام، ما يبادله مشاعره و...إلخ ) لمجرّد غفل عنه، ما سأل عنه، ما عطاه...وغيره
يعني باختصار يبيه يقوم بدوره الحقيقي كصديق أو أخ أو والد مثالي، أو مثل ما هو يتصوّر، أو مثل ما هو يفترضه..
دائمًا هالأشخاص يقولون : المفروض كذا وكذا، المفروض يعاملني كذا، المفروض يهتم فيني بكذا...

أذكر شكوى من وحدة من البنات اللي عرفتهم على شخص، كانت دائمًا تقول عنه ما يهتم إبها، ولا عاطنها اهتمام، ودائمًا تقول أني ما أعرف مكانتي عنده، ولا أدري أني أعني ليه ويش بالضبط! ومن الصوب الثاني كان الشخص الثاني معروف عندي، ويشتكي يقول هي ما تبادلني الاهتمام، ولا تقدرني، وما تفهمني..
واتورطت لأن كل واحد كلمني خاص ومكتوم ويلاا عاد جيفَه أقول ليهم اثنينهم إنه هذا الأمر مشترك ههههه بس بصراحة كنت أقول وألمح،
طالعوا الناس بمرايا أنفسكم..

ولكن أحيانًا.. تهتم بشخص فعلًا وواقعًا هو ما يهتم، ولكن ويش بيضرك دام إنك ما قاعد تضره، ما فيها شي.. ولا فيه تنقيص من الكرامة، ولا يحتاج شسمه..
نفرض إنه شخص عزيز ورافقته، ويومًا ما اتغير عليك، قد يقول البعض اتباعد عنه لأنه ما يستاهلك، ومن باب ثاني تجوف المعزة والعشرة أقوى وتدفعك لتعذيره وفهم ظروفه وموقفه وتدفعك بعد للاهتمام به تلقائيًا!

في المقابل بعد أقول كلشي لا زاد عن حده انقلب ضده، لا إفراط ولا تفريط، مهما يكون بعض الأشخاص لو تملي عيونهم ذهب ما اهتموا فيك..

يعني الموقف، قوة العلاقة، قوة المشاعر الرابط اللي يربطكم، المكان والزمان، طريقة الاهتمام طباع الشخصين، تفكيرهم في قضية الاهتمام، وغيره كلها عوامل تساعد على تحديد قرار..

 

[Jouan7]

في المقابل بعد أقول كلشي لا زاد عن حده انقلب ضده، لا إفراط ولا تفريط، مهما يكون بعض الأشخاص لو تملي عيونهم ذهب ما اهتموا فيك..

يعني الموقف، قوة العلاقة، قوة المشاعر الرابط اللي يربطكم، المكان والزمان، طريقة الاهتمام طباع الشخصين، تفكيرهم في قضية الاهتمام، وغيره كلها عوامل تساعد على تحديد قرار

رأي سَليم ..

لي رأي تجاه الموضوع .. بس مدري كيف اطرحه


تسسلمي ع المششاركةة
نورتي خية

 

[بنفسجيه.~]

لان الي تعطيه اكبر من قدره دايما بيخليك اقل من قدرك

^ +1
اتفق وياش...فعلا هادي حقيقة اثبتتها تجاربنا و علاقاتنا بالناس

 

[علي البلادي]

أعتقد المقصود هو الشخص الي حديثه ممل و 24 ساعة يبي يسولف وزعول رد او بزعل منك هذا عينة فقط بس صراحة يعلون الجبد

 

[مارد المصباح]

طريقة الاهتمام تختلف ما بين الجنسين ، فحواء تعتبر بعض الامور اهتمام ومحبة وعند ادم تعتبر ازعاج وتدخل،والعكس صحيح

الاهتمام شي جميل ولكن لما شخص مثلا يحاسبك على كل صغيرة وكبيرة كأنك أسير بين يديه تحت مسمى -المحبة والاهتمام- ردة فعل طبيعيه ان هذا الشخص بينفر !

ومثل ما يقول المثل ... لا تكن ليناً فتعصر ولا تكن يابسا فتكسر ،فإن خير الامور اوسطها
​

 

[Jouan7]

أعتقد المقصود هو الشخص الي حديثه ممل و 24 ساعة يبي يسولف وزعول رد او بزعل منك هذا عينة فقط بس صراحة يعلون الجبد

ههههه ,, يلوعون الجبد قليلة عفر

 

[Jouan7]

طريقة الاهتمام تختلف ما بين الجنسين ، فحواء تعتبر بعض الامور اهتمام ومحبة وعند ادم تعتبر ازعاج وتدخل،والعكس صحيح

الاهتمام شي جميل ولكن لما شخص مثلا يحاسبك على كل صغيرة وكبيرة كأنك أسير بين يديه تحت مسمى -المحبة والاهتمام- ردة فعل طبيعيه ان هذا الشخص بينفر !

ومثل ما يقول المثل ... لا تكن ليناً فتعصر ولا تكن يابسا فتكسر ،فإن خير الامور اوسطها

صحيح كلامك ..

 

[3looy2jz]

الإهتمام الزائد عن اللزوم يعتبر سذاجة وماله داعي, كل شخص لازم يبني له حدود ويوقف عندها
مو كل شخص مستعد انه يسمع مغامرات وقصة حياتك كل يوم ومو كل شخص يستانس
لين تسأله شنو اكلت عشرين مرة فاليوم ووين رحت ووين ييت.

الإهتمام جميل في حدود المعقول, قد مايقدر لازم الشخص مايكون عبئ على الناس.

~إظهار التجاهل المبالغ حب.​

 

[Jouan7]

الإهتمام الزائد عن اللزوم يعتبر سذاجة وماله داعي, كل شخص لازم يبني له حدود ويوقف عندها
مو كل شخص مستعد انه يسمع مغامرات وقصة حياتك كل يوم ومو كل شخص يستانس
لين تسأله شنو اكلت عشرين مرة فاليوم ووين رحت ووين ييت.

الإهتمام جميل في حدود المعقول, قد مايقدر لازم الشخص مايكون عبئ على الناس.

~إظهار التجاهل المبالغ حب.

اييي ..
التجاهل المبالغ حب ؟
وضضضح

 

[وينك يا حنون]

الاهتمام لازم يكون بحدود عشان ما ينفر الطرف الآخر و يحس ان الاهتمام مبالغ فيه او ان في تقييد لحريتة .. اضافة الى امكانية ان الاهتمام الزائد ممكن يجعل الطرف الآخر يحس ان هالانسان دائم الوجود في حياتة و خلاص لا يمكن يخرج من حياتة فيبدأ يهملة و يقصر في حقة خاصة اذا الطرف الآخر مغلوب على امره و يفضل الصمت على جرح مشاعر المتعمد عدم الاهتمام فيه

الحل ان تعطي بحدود و تأخذ بحدود عشان ما تتعود على تواجد شخص دائم بحياتك لان بلحظة ممكن يختفي من حياتك اما بإرادته و اما بخارج ارادته

 

[3looy2jz]

اييي ..
التجاهل المبالغ حب ؟
وضضضح

هاي مثل ما ينطبق على الكل ومو منطقي عند البعض ولكن بشرحه.

المقصود فيه انه في ناس يهتمون ولكن مايظهرون الإهتمام عشان الشخص الآخر ماينزعج.

 

[Jouan7]

المقصود فيه انه في ناس يهتمون ولكن مايظهرون الإهتمام عشان الشخص الآخر ماينزعج.

يسمونه تجاهل ..
ممم
يمككن بعد ..

 

[Jouan7]

الحل ان تعطي بحدود و تأخذ بحدود عشان ما تتعود على تواجد شخص دائم بحياتك لان بلحظة ممكن يختفي من حياتك اما بإرادته و اما بخارج ارادته

ايي صح ..
احسن شي يسسويه

 

[Dr.Hakim]

من أقوال الأمام علي (ع) للأهل الي يبالغون في الاهتمام بأبنائهم .....

" اشفق على اولادكم من اشفاقكم عليهم "


​

 

[Jouan7]

من أقوال الأمام علي (ع) للأهل الي يبالغون في الاهتمام بأبنائهم .....

" اشفق على اولادكم من اشفاقكم عليهم "

كل شي بحدود تمام

 

[نونوتكعيب]

+ قط مرة صادكم موقف من الناحيتين ؟
حمدلله ماحب اهتم وايد ههههه <<بارده اتذكر صادني من ناحيه ، كانت عندي صديقه ايام الابتدائي مثل ظلي لكن والله بزوووود ، مو ظل الا لزقه الله يذكرها بالخير ههههههه وين ما اتحرك بالصف وراي وراي :mellow:


+ شنو كان تصرفكم ؟؟
كلمتها مره مرتين لكن مادري يمكن السبب في جاذبيتي هههههه اتغشمر لا بس اكلمها ماينفع وخب كنت ياهل ف كلمت امي عنها وجذي
وماتذكر فچت عني الا عقب ماتفرقنه بالصفوف


+ رايكم ف الموضضوع
موضوعج حلو و احسه صار شي اساسي وايد نسمع عن مشاكل سببها قله او زياده الاهتمام
لكن ما قول الا يازين راحه الباااال و دع الخلق للخالق

 

[Jouan7]

+ قط مرة صادكم موقف من الناحيتين ؟
حمدلله ماحب اهتم وايد ههههه <<بارده اتذكر صادني من ناحيه ، كانت عندي صديقه ايام الابتدائي مثل ظلي لكن والله بزوووود ، مو ظل الا لزقه الله يذكرها بالخير ههههههه وين ما اتحرك بالصف وراي وراي :mellow:


+ شنو كان تصرفكم ؟؟
كلمتها مره مرتين لكن مادري يمكن السبب في جاذبيتي هههههه اتغشمر لا بس اكلمها ماينفع وخب كنت ياهل ف كلمت امي عنها وجذي
وماتذكر فچت عني الا عقب ماتفرقنه بالصفوف


+ رايكم ف الموضضوع
موضوعج حلو و احسه صار شي اساسي وايد نسمع عن مشاكل سببها قله او زياده الاهتمام
لكن ما قول الا يازين راحه الباااال و دع الخلق للخالق

اي و الله.. دع الخلق للخالق و دع الناس و شأنها..

 

[يوزرسيف]

الحب الحقيقي ..
هو الحب ذا الطابع الإلهي ..

أما هذا النوع برأيي حب وهمي ..

نعم الحب في الله والبغض في الله ..
من قال إن المؤمنين لا يحبون بعض ؟
لعلهم يحبون غيرهم أكثر من أخوانهم وأخواتهم ..
ذلك هدى الله يهدي به من يشاء والله ذو الفضل العظيم ..

ما أجمل علاقة الحب عندما ينتهي أمرها إلى تقوى ومخافة من الله عز وجل ..

 

[إعلاميه*]

+ قط مرة صادكم موقف من الناحيتين ؟
* أي وحدة كاانت تملل لدرجة مو طبيعية وتبرر هالشي بانه حب واهتمام وصداقة وبالفعل هي تحبني وانه بعد كنت أحبها -شوي-
بس الوضع صار -ويع- ! تغار علي وما تبيني أماشي حد غيرها ولا تبي تجوف تلفوني بزي - تنتحر -
مطيحة الميانة من كل صوب بمسمى الصداقة !
+اذا دقت عليها تغيب أيام المدرسة , لازم انه بعد اغيب ولا تزعل وتهاوشني!
+تجي بيتنا آي وقت وتقعد مددة طوييييييييلة, هذا الشي كان يضاايقني عدل لان كان وقت اختبارات نهائية!!

+ شنو كان تصرفكم ؟؟

أحياناً أبين إني متضايقة من الوضع واكلمها بأسلوب حلو, بس هني أكون جنيت على روحي!
تبرره داااايما بانها تحبني وصديقتي ..
+ رايكم ف الموضضوع ؟

جميل صراحة , فضفضت شوي وأرتحت .. #كلام المفروض من زمان يطلع

شكرا عالطرح والسموحة عالأطالة .