عندما تدرس المرأة مالهدف ...

[Blue Castle]

طبعا هالحجي اعيده للمرة الالف، المرأة يغلب على رايها العاطفة، خراااااااااااااااااااااااافة
لتبرير اضطهادها ومنعها من معظم الاشياء،
يعني الحين بتقنعني لو وحدة بتصير فقيهة واثبتت استحقاقها بيقولون ليها حياش؟ تفضلي؟

جنك تقول ليي الشيعة في البلد حظهم اقل في المناصب والمعاشات والوظايف لانهم مايعرفون يشتغلون وينتجون نفس الباقي، وهاده السبب مو ان السبب ظلم سياسي


المناصب السياسية موضوع ثاني بعد الي المرأة ماتشغل منها، وهالمناصب والمجالس تحدد قرارات مصيرية والمرة ماكلة تبن

المهم يعني، سواء مقتنع ولا مو مقتنع ان المرأة اكثر عاطفية من الرجل كيفك، اما استخدام هالعذر الخرافي لتبرير اقصاءها من معظم المناصب وتقول السبب "عاطفتها" مو قرون من الاضطهاد والتفضيل الجنسي فانته متوهم


وادا تؤمن بهالشي وبعدك تستخدمه كتبرير، قولي عقلانية الرجل الي مخلتنه ياخد كل المناصب العدلة السياسية والحكومية شجابت لينا، غير ظلم واضطهاد وحروب وقتل، بس لا سمح الله يوظفون وحدة يغلب على رايها العاطفة بينقلب سستم العالم الي هو ماشي صح الحين

مثل ما ذكرت سابقاَ اني رحت بعيد عن النقطة المذكورة بس مثل ما ذكرت اتكلمت حول اطلاعي البسيط عن الموضوع

بس حسب كلامش انا ما ذكرته خرافه ، فهل ممكن توضحين ليي الفكرة الصحيحة و من وين جت الخرافة ؟ و بالنسبة ان ما ذكرته يستخدمه الرجل بس عشان يضطهد المرأة و يمنعها من بعض الأشياء ؟ يضطهدها في اي شيء بالضبط ؟ و يمنعها من أي شيء ؟ ممكن تعطينا أمثلة عليهم ؟

بالنسبة لان لو المرأة لو اثبتت استحقاقها بقولون ليها تفضلي حياش ؟ أنا شخصياَ ما اعتقد ان بصير هذا الشي ، بس بغض النظر انه يصير او ما يصير يعني اذا بننظر الى الواقع الي يروح يدرس في الحوزات العلمية و يوصل الى مرتبة معينة و بعد بحث و إطلاع و فترة طويلة من الزمن يصير يعمل برأيه الخاص حسب علمه ، فهل تتوقعين المرأة و إنشغالاتها في الحياة سواءاَ كانت أم ، أو تشتغل أو تدرس ..إلخ ، بتترك حياتها الخاصة بالكامل ، و بتنتقل لبلد غربة و بتمر بكل ما ذكرت سابقاّ عشان توصل لمرتبة فقيه ؟

بالنسبة لشغل المرأة للمناصب السياسية ، اذا كنتين تقصدين مجلس الشورى و النواب ، كلامش صحيح ، صحيح ما أعطوا لها الفرصة دخول مجال السياسة ، بس لو نظرنا الى ارض الواقع من صار مجلس الشورى و النواب تقدرين تقولين شنو غيروا أصلاَ ؟ انا من وجهة نظري ما أتغير شي ، بالنسبة
للقرارات المصيرية الي المرأة ما أنعطت حقها في اتخاذها ، ممكن تذكرين لينا جم قرار منهم و توضحين شنو كانت بتغير المرأة في القرار المصيري الي صار لو كانت موجودة ؟

بالنسبة للنقطة الأخيرة ان لو المرأة هي الي تحكم الدول فما كان بكون هناك حروب و لا قتل و ظلم ، من وين جت الحروب و القتل الحرب و الظلم ؟ ببساطة من طمع المال و السلطة ، فهل هذا يعني ان المرأة خالية من هاذي الاشياء و اذا حكمت ما بتسعى اليها ؟

 

[زهَراء *]

خلَ أوضح لك جم شغلة يمكنَ أن مو حاطَ بالك ليهاَ كونكَ رجلّ ..
ولا ترى الأمور من منظار الأنثى نفسهاَ ( لان الشخص لما يحطَ روحه مكان غيرهَ بقدرَ )

أول شيءَ ، ليش المراة في المرتبة ثانيةَ - بشكل عامَ - مو بس بالبحرينَ ،
مو كل الاشغال يوظفونَ المراة فيهاَ ؟ صحَ ! يعني تجوف مرة تصلح سياراتَ أو مهندسة سياراتَ ؟
في الدول الاجنبية أيَ , عادي عندهمَ ولا يعلقون عليهمَ بعد .. بس هنيَ ؟
فدمتكَ لو وحدة درست هندسة ميكانيكية وين بتشتغلَ !!!
# فكر فيهاَ و بتفهم إن المراة عدنا مو نفس الرجل ، و دائماً يقولون المراة ناعمة و رقيقةَ ,
و هي اقوى من رجال بمليون مرة ، إلا تتحمل عملية الولادة ( بمعدل 30 عظم ينكسرَ ) ! ما راح تتحمل أن ترفعَ
معدات ثقيلةَ ؟ تفكير تافه جداً ..


ثاني نقطة ، يا اخي في الاسلام و في نفس التخصص - اني داخلة التخصص رغبة أولى
و معظم البنات الله يسلمكَ ينقطون في تخصصنا و هو يمكن رغبة رقم 6 أو 7 ، فشتتوقع ؟ يتمون مثلاً !!
و بزيدك من شعر بيتَ وش كثر صبيان يدخلون بعثة لتخصصنا و ينسحبون ما يتحملونَ ,
و ترا مو مقياس إن تطلع من الاب بعد لكويز أو الاسايمنت من وقت يعني أنت عبقري ؟ لا !
اني اكمل من وقت بس احب اجيك و اتاكدَ سواءاً في تست أو كويز أو فاينل أو اي شيءَ ، مقدر اطلع قبل الوقت
لازم اتاكد فوق 3 مرات من حليَ و حتى لو كنت حالتنه صحَ .. !!!!
و في بنات واجد مثل حالتيَ ، فلا تحكم على ظواهر الامورَ ، لان اني اشوف صبيان درجاتهم اخس من البناتَ
معنهم يتفلسفون ويا دكاترة فاللكجر و الا يجوفهم يقول دلين بجيبون A و اخر شيءَ !


و بخصوص الغلاء المعيشي ، أنت الحين تحت ظل أهلكَ ، لما تكون بيتكَ و تزوج و جيب ولادَ
بتحس بالحجي إلا قلته و إن معاش واحد ما يكفيَ و بتذكر كلاميَ ، راح اترك الايام تثبت لكَ هذا الشيء


و ترا المراة العاملة ( نصهم في بيوتهم خدمَ ) إذا مو كلهم بعد ، الحين إلا ما تشتغل عندها خدامة ..
المهم ما عليناَ ، ترا المدرسات حدهم مستانسينَ ؟ شعبالكَ متحاناتهم هي نفسها كل كور لنفس المقرر اللهم الفكرة غيرَ
أو تاخد السؤال من امتحانات المنتصف أو الفاينل اللهم تعدل و طاخ و طيخ و خلاصَ !
و جان على درجات الله يدنيا احنا كنا نصحح وياهم ( ساعات خدمة المجتمع ) و نحسب وياهم درجات ، خلني ساكتة بسَ
ما يسون شيء ، حتى معاشهم ما يحللونه ! مو الكل بس الاغلب فلا تقول انهم يتعبون داك الزودَ ..
و جان على شرح هذا شيء هم يحبونه و إلا يحب الشيء عبارة ما يشتغل فهمتَ ، جنه يمارس هوايته # مو عارفة اشرحَ
بس ان شاء الله توصل لك الفكرة ..

و بعيد و بكرر ، الدراسة أولى من كل شيء لانها سلاح المراة حتى تثبت مكانها في المجتمع
بشكل قوي بعد

​

 

[sanabsy 15]

ما شاء الله وصلنا صفحة (7)

ولا زالت المرأة (في البحرين) (في المرتبة الثانية)

والدليل:

ما أقدر أركب اللفت في الجامعة حتى اللفت كوّشتون عليه .. يلا الكثرة تغلب الشجاعة والدرج مفتاح الحل

طاحت ركبنا من زود ما نركب الدرج، الله (يزيدكن) ويبارك (ليكن) لا تنظرون لهذا الرد بنظرتكن ترى والله هالتفكير ما هو موجود في عقلي

لا وحاطين ليكن نون نسوة بروحكن بعد وبعد شسمه .. نطالب بحرف خاص للرجال وأقترح حرف الظاء لأنه (الأغلق والأدفش والألعن) كدفاشة صاحب هذا الرد .. معًا يدًا بيد لتحقيق مطلب (المجلس الأعلى للرجل) ههههه



خربانة خربانة
​

 

[Nadoy206]

اول شي العلم ماله علاقة بكون الشخص ذكر او انثى الاثنين من حقهم يتعلمون.. ثاني شي اسباب البنت او اسباب الولد تختلف من شخص لاخر.. في ناس تدرس عشان تبي وظيفة وفي ناس تدرس لانها تحب الدراسة...
عن نفسي .. ادرس لان مهما علمتني الحياة وعشت فيها.. الدراسة تبني شخصية واعية اكثر .. يعني حتى لو احد عنده شهاده ثنوي ومتثقف من الحياة ماتقدر تقارنة بشخص جامعي..وهالشي تقدر تجوفه فالحياة الواقعية اذا كنت فاهم بتحس ان الفرق موجود بين الاثنين يخليك تعرف ان هالشخص دراس وفاهم مقارنة مع الشخص الي مثقف نفسه بالحياة.. الدراسة تعلم الشخص مو بس معلومات .. اشياء كثيره منها شلون انك تتعامل مع الناس والضغوطات النفسية والجسمية + في رأيي عيب في حق المرأة انها تعتبر ك ربة منزل فقط, هالشي غلط بالعكس انا اشجع ان المرأة تدخل في جيمع انواع الوظائف وحتى الي تكون صعبه و شاقه. انا ادرس عشان نفسي, مو عشان وظيفة هذا مو همي.. بس حلو الواحد لما يحقق انجازات في حياته.. وحلو لما احد يسالك عن مستواك العلمي تقوله بدون اي خجل.. واما الوظيفة ان حصلنا عليها لا بأس وان لم نحصل هم بعد لا بأس.

#بغض النظر عن خلط اللغة العامة بالفصحى _اهم شي وصلت الفكرة

 

[قمَر]

عن نفسي هدفي من الدراسة مو الشغل بقدر ما هو الثقافة واكتساب العلم
شكثر أحس بالسعادة لما أسمع الخطيب في الماتم يخطب
وأحس روحي أفهم أشياء مو كل من يقدر يفهمها بحكم كون تخصصي لغة عربية
وحتى بعض الكتب، لما أقراها.. ما عادت قراءتي ليها مثل قبل لا أتخصص في اللغة
بالإضافة إلى أن تخصصي يخدمني في ديني..
ومن أحد أهدافي إني أدرس في حوزة يوم من الأيام
ودراستي الجامعية تقريبا نص اللي بدرسه في الحوزة من ناحية اللغة وغيره
ولما أكون مثقفة في لغتي وأقدر أفهم تعقيداتها
+ لما أتثقف في ديني وأقدر أعرف كل تفاصيله
هالشي يغنيني عن الشغل، وأمور الحياة المادية الرخيصة
هذا شي يخليني أقدر أسس أولادي مستقبلًا على أساس صحيح، قوي ومتين..
ذكور كانوا أو إناث..
المهم إني بقدر أعطيهم شي لو ما كنت متعلمة ودارسة ما بقدر أعطيهم إياه
أحب تخصصي، وأحب دراستي.. ومو مهم عندي إن أشتغل
وطموحي إني أبقى في بيتي أخدم عائلتي وأكون ليها أساس يقويها من جميع النواحي
وأتمنى إن زوجي يقدر يدعم العائلة من الناحية المادية وما يحتاج لمساعدتي فيها
عشان أقدر أتفرغ لخدمة عائلتي من الناحية المعنوية بكل طاقتي وقوتي وكل اللي أقدر عليه

الهدف من الدراسة مو ضروري يكون مادي عشان تدرس
وإن إذا ما كان عندك نتيجة مادية تقعد في بيتكم بجهلك!!
العلم نور، ومفترض إن الإنسان ما يكتفي من العلم أبدًا ​

 

[نجمة تشرين]

الدراسه تطوير ذات و ليس هدف
السبب الاةخله الرجال يتعلم نفسه بالضبط خله المرأة تتعلم
يمكن مع تطوير للذات تجي اسباب ثانيه تصنف من ضمن الكماليات
مثلا اطور نفسي و احصل وظيفه ارقی و معاش اقوی و ثقافه اقوی و تربيه جيل مثقف اكثر و بواكب الناس و الخ الخ
لكن كل هالاشياء مستتحيل تصير في اول مرتبه مع تطوير النفس

عن نفسي درست لاهداف شخصيه و غير شخصيه و عندي العمل من اهم هالاهداف و اسعی لتطوير نفسي دراسيا في المستقبل القريب ان شاءالله
و مستحيل اتنازل عن عملي الا هو لبابه حلمي و طموحي الا اذا تعارض بشكل كبيير و هدد حياتي الاسريه بشكل كبيير و انا ابغي المها و اقويها ممكن اتنازل مؤقتا بعد دراسه جدوی للموضوع دراسه مطوله ..

 

[أمواج]

مو كل الاشغال يوظفونَ المراة فيهاَ ؟ صحَ ! يعني تجوف مرة تصلح سياراتَ أو مهندسة سياراتَ ؟
في الدول الاجنبية أيَ , عادي عندهمَ ولا يعلقون عليهمَ بعد .. بس هنيَ ؟
فدمتكَ لو وحدة درست هندسة ميكانيكية وين بتشتغلَ !!!
# فكر فيهاَ و بتفهم إن المراة عدنا مو نفس الرجل ، و دائماً يقولون المراة ناعمة و رقيقةَ ,
و هي اقوى من رجال بمليون مرة ، إلا تتحمل عملية الولادة ( بمعدل 30 عظم ينكسرَ ) ! ما راح تتحمل أن ترفعَ
معدات ثقيلةَ ؟ تفكير تافه جداً ..

جربي بروحش .. أبسط شي تقدرين تبدلين تاير سيارة بروحش ؟
من تجربة شخصية .. مرة الوالد يبدل التاير للسيارة .. رحت أجرب أرفعه من الأرض .. جدًا ثقيل عليي ولا اتحرك بوصه ^^"
الله سبحانه وتعالى أعطى المرأة صبر أزيد من الرجل فتتحمل ألم الولادة لهالصبر ولأن الله سبحانه هيأ اليها هالمهمة فعطاها الأسباب اللازمة لأداءها
بس ما عندها البنية الجسمية الى تحمل الأعباء الي يتحملها الرجل

في الاسلام الجهاد في الحروب واجب على الرجل لكنه تكليف ساقط عن المرأة
هل في هذا تهميش الى قدرات المرأة ؟

الغرب ما عنده ضوابط أساسًا اسلامية عشان نقارن مجتمعنا بمجتمعه
الغرب يبيح للمرأة أمور كثيرة الاسلام يحرمها عليها أو يقيدها بشروط
هل هذا يعني ان المجتمع الغربي أفضل من مجتمع الاسلام وإن هو منفتح أكثر من الاسلام؟
أو ان المجتمع الغربي يعطي حقوق المرأة والاسلام يهمش حق المرأة ويعتبرها شيء سيء ؟

في رأيي عيب في حق المرأة انها تعتبر ك ربة منزل فقط, هالشي غلط بالعكس انا اشجع ان المرأة تدخل في جيمع انواع الوظائف وحتى الي تكون صعبه و شاقه.

أأيدش إن التفكير ان المرأة للبيت وبس في هذا الزمن تفكير غلط ويشوبه بعض التعصب بالغالب
بس بعد مو عيب بحق المرأة ان تختار من نفسها تكون ربة بيت وتكتفي بهالمهمة برغبتها
بالنسبة للأمور الشاقة ردي فوق عالأخت زهراء نفسه ردي اهني

+ أنصحكم تستمعون الى محاضرة الشيخ حسن العالي بهالرابط ..
http://www.youtube.com/watch?feature=player_embedded&v=aYNScAf3m3I
ردًا على بعض الأفكار الدخيلة على مجتمعنا بهالخصوص .. سواء أفكار رجولية أو نسوية

 

[Nadoy206]

بس بعد مو عيب بحق المرأة ان تختار من نفسها تكون ربة بيت وتكتفي بهالمهمة برغبتها
بالنسبة للأمور الشاقة ردي فوق عالأخت زهراء نفسه ردي اهني

+ أنصحكم تستمعون الى محاضرة الشيخ حسن العالي بهالرابط ..
http://www.youtube.com/watch?feature...&v=aYNScAf3m3I
ردًا على بعض الأفكار الدخيلة على مجتمعنا بهالخصوص .. سواء أفكار رجولية أو نسوية

اكيد الشي راجع للبنت نفسها,ولكن كان قصدي غلط المجتمع يعتبر او يقيد البنت في محيط البيت او ك ربة منزل فقط, يعني الي تبي تقعد هذا قراراها والي تبي تدرس او تعمل بعد هذا الشي راجع لها ومايحق لاحد ان يمنعها لانه هالشي لا حرام ولاعيب .

وبالنسبه للاعمال الشاقه في بعض البنات يحبون هذا الشي ويمكن يكونون في وضع جسدي يسمح لهم بان يمارسون هالعمل , مو جميع البنات بنفس المستوى, وماكو بنيه تختار هالمجال الا اهيه عارفه انه يصلح لها , وطبعا حتى لو اختارت هالشي ماننسى انه لازم يكون في له ضوابط الدين او المجتمع,وبدون التقليل من شأنها.

وراح اجوف الفيديو بعد ما اخلص دراسة ​

 

[موتو]

حالها حال اي انسان يبي يبني مستقبله وحياته ، في بنات يدرسون ويكملون جامعه بس مايشتغلون ، بس تظل الوظيفه من حق الجميع...

مافي احلا من انك تصرف على روحك بروحك

:mellow:
مافي احلى من انة الزوج يصرف على الزوجة


وهني تكون ربة منزل

 

[Mohammed_13]

:mellow:
مافي احلى من انة الزوج يصرف على الزوجة


وهني تكون ربة منزل

زين وإذا ماعرست ، من يصرف عليها؟

 

[أمواج]

وبالنسبه للاعمال الشاقه في بعض البنات يحبون هذا الشي ويمكن يكونون في وضع جسدي يسمح لهم بان يمارسون هالعمل , مو جميع البنات بنفس المستوى, وماكو بنيه تختار هالمجال الا اهيه عارفه انه يصلح لها , وطبعا حتى لو اختارت هالشي ماننسى انه لازم يكون في له ضوابط الدين او المجتمع,وبدون التقليل من شأنها.

باعتقادي ما فيه بنت مهما كانت بنيتها الجسدية ضخمة تقدر تمارس هالاشغال < إلا اذا مسوية ليها عضلات ^_^"
صعب عليها تحمل أثقال وتنزل تحت سيارة وغيره وفي نفس الوقت تحافظ على حجابها =)
اذا جبتين رجل وامرأة بنفس الوزن والطول والعمر .. أكيد قوة الرجل أكبر من المرأة وقدرته أزيد
تدرس هالمجال وتميل ليه ما يعني انها أكيد تشتغل فيه بشكل مباشر

 

[Nadoy206]

< إلا اذا مسوية ليها عضلات ^_^"
صعب عليها تحمل أثقال وتنزل تحت سيارة وغيره وفي نفس الوقت تحافظ على حجابها =)
اذا جبتين رجل وامرأة بنفس الوزن والطول والعمر .. أكيد قوة الرجل أكبر من المرأة وقدرته أزيد
تدرس هالمجال وتميل ليه ما يعني انها أكيد تشتغل فيه بشكل مباشر

في بنات من هالنوع ويتفوقون على الرجال بعد, وهالشي نادر عندنا نجوفه..وفي بنات تقدر على الاشياء الي يقدرون عليها الرجال هالشي ابدا مو مستحيل.
ماقارنت بين البنيه والصبي كل واحد طريقة جسمه تختلف عن الثاني .. الي كان قصدي ان البنات مو كلهم نفس بعض قدراتهم الجسمية تختلف, وطبعا اذا كانت البنت رياضيه هذا شي يزيد من قوتها من غير مقارنه مع الرجل.
لو افترضنا ان هالاشغال صارت شائعة بين البنات و صار في اماكن مخصصه بس حقهم لهل نوع من الاعمال , مايمنع ان البنيه تدخل في هالمجال اذا حابة, واذا كان على وضعنا الحالي هالاشغال مسيطر عليها الرجال ف صعب ان البنيه تخوض في هالمجال وهاي يمكن تكون المشكلة الاساسية لهل نوع من الاشغال ان الفرص تكون قليله بحق البنات.

 

[زهَراء *]

باعتقادي ما فيه بنت مهما كانت بنيتها الجسدية ضخمة تقدر تمارس هالاشغال < إلا اذا مسوية ليها عضلات ^_^"
صعب عليها تحمل أثقال وتنزل تحت سيارة وغيره وفي نفس الوقت تحافظ على حجابها =)
اذا جبتين رجل وامرأة بنفس الوزن والطول والعمر .. أكيد قوة الرجل أكبر من المرأة وقدرته أزيد
تدرس هالمجال وتميل ليه ما يعني انها أكيد تشتغل فيه بشكل مباشر
​

الناس تطورت ترا ،
في بنات الحين في الاولمبيات و ناس ترفع اثقالَ
و رياضيات واجدَ ، يمكن اقوى من لرجال بعدَ ؟

و ترا أن تبدل تايرَ أو تصلح اجهزة كهربائية و غيره ، كلش مو عيب ؟
احسن من تطلب المساعدة من احد و يدلها في الداخلة و طالعة ، بالعكس كلشَ مو استرجال هذاَ
في فرق بين انَ تكون مكتفي بذاتكَ و أن تكون الوحدة مسترجلة ..

للأسف مجتمعنا عنده فهم غلط لبعض المصطلحات و اجدَ يحبون يفسرون كل شيء على كيفهمَ ,
و ترا بنات الاجيال قادمة غير عن قبلَ 20 سنة - بعد 10 او 15 سنة راح تشوفون أن كلية الهندسة مثلاً
أو كليتنا الكشخة الاي تي نص طلبتها هم بنات مو صبيانَ ( قصدي إلا يتمون و يتخرجون منهاَ )
مو نفس الحينَ , كل شيء يتغير و المراة في هالوقت مكافحة و ما ترضى بالظلم و التفرقة كلشَ و اغلب البناتَ
يبغون يكونون مستقلينَ مو بحاجة لا لمساعدة أخ و لا أب و لا زوج

​

 

[Artist]

من حق المرأة التعلم وطلب العلم، ولكن في مجتمعاتنا غالباً مايكون هذا الأمر مثير للجدل والنقاش.
رأيي الشخص هو أني لا أمانع من أن زوجتي تعمل أو تتوظف ولكن بشرط أن تكون هاته الوظيفة
تتناسب مع طريقة الفكر والعيش التي أعيش بها.​

 

[Waffa]

مثل ما ذكرت سابقاَ اني رحت بعيد عن النقطة المذكورة بس مثل ما ذكرت اتكلمت حول اطلاعي البسيط عن الموضوع

بس حسب كلامش انا ما ذكرته خرافه ، فهل ممكن توضحين ليي الفكرة الصحيحة و من وين جت الخرافة ؟ و بالنسبة ان ما ذكرته يستخدمه الرجل بس عشان يضطهد المرأة و يمنعها من بعض الأشياء ؟ يضطهدها في اي شيء بالضبط ؟ و يمنعها من أي شيء ؟ ممكن تعطينا أمثلة عليهم ؟

في الي قلته؟ الحين لين قلنا المرأة عاطفية وتفكر بعاطفتها فقراراتها مو صائبة، يحتاج اشرح شالتأثير السلبي الي ينتج من هالشي؟ تجوف المجالات السياسية فيها نسوان؟ الحكومات؟ المناصب العالية؟ البنوك المؤسسات؟ فرص التوظيف؟
لا تجيب لي مثال مثالين لان احنا نتكلم عن مساواة مو عن وحدة موظفينها بالغلط في منصب عالي او منصب حكومي حق يقولون جوفوا احنا نوظف نسوان ونؤمن في حقوق المرأة.
اما التفكير من وين جه فمن انولدنا استضعاف المرأة موجود، ما اقدر اجيبلك حدث ابتدا منه هالتفكير، انته بس انظر لنفسك وحياتك وقول جم دليل عندك على هالتفكير؟ هل فيه شي مقنع استندت عليه قبل ماتقول هالحجي ولا بس لان من فتحت عيونك وانته تسمع هالحجي وهالافكار فثبت في عقلك.

بالنسبة لان لو المرأة لو اثبتت استحقاقها بقولون ليها تفضلي حياش ؟ أنا شخصياَ ما اعتقد ان بصير هذا الشي ، بس بغض النظر انه يصير او ما يصير يعني اذا بننظر الى الواقع الي يروح يدرس في الحوزات العلمية و يوصل الى مرتبة معينة و بعد بحث و إطلاع و فترة طويلة من الزمن يصير يعمل برأيه الخاص حسب علمه ، فهل تتوقعين المرأة و إنشغالاتها في الحياة سواءاَ كانت أم ، أو تشتغل أو تدرس ..إلخ ، بتترك حياتها الخاصة بالكامل ، و بتنتقل لبلد غربة و بتمر بكل ما ذكرت سابقاّ عشان توصل لمرتبة فقيه ؟
جميعنا عندنا انشغالات، ومن بلايين النساء في العالم مافي ولا وحدة ماتبي تصير ام ومستعدة تروح تجاهد عشان شي تبيه؟ ليكون الرجال مايصير ابو، ولا عنده مشاغل في الحياة؟
موضوعنا مو فيه ولا مافيه، موضوعنا ان حتى لو فيه الشي مابيصير، العالم يرفض، العالم ما مشى على اراء الرجال من قرون عشان يجي في يوم وليلة ويغير رايه، اني اتكلم هني وادافع عن حقوق المرأة وياكلوني والبنات نفسهم يقولون احنا مو مضطهدين لان مخلينا نروح الجامعة، وكأن هاده كل شي في الحياة، ما بالك وحدة بتطلع بتصير فقيهة؟ تنقلب قوانين الحياة عندهم. بس على قولتك، ادا المرأة تفكر بعاطفتها وهالنوع من التفكير يشاركونك فيه ناس واجد فاكيد الاعتقاد بعد انها ماتقدر تقرا كتب وتفسرها وتطلع منها احكام، تجوف هالشي يدش المخ؟

بالنسبة لشغل المرأة للمناصب السياسية ، اذا كنتين تقصدين مجلس الشورى و النواب ، كلامش صحيح ، صحيح ما أعطوا لها الفرصة دخول مجال السياسة ، بس لو نظرنا الى ارض الواقع من صار مجلس الشورى و النواب تقدرين تقولين شنو غيروا أصلاَ ؟ انا من وجهة نظري ما أتغير شي ، بالنسبة
للقرارات المصيرية الي المرأة ما أنعطت حقها في اتخاذها ، ممكن تذكرين لينا جم قرار منهم و توضحين شنو كانت بتغير المرأة في القرار المصيري الي صار لو كانت موجودة ؟
كل القرارات من سنين والى اليوم، بدون امثلة، كل شي ماشي عليه العالم، كل شي يصير ويتداول في المجالس كل يوم، ومايحتاج اجي اقول بيتغير جدي ولا بيتغير جداك، العالم مكون من نساء ورجال، فشي طبيعي لازم يكون صوتهم مسموع ورايهم داش في كل شي، هاي مو سبب كفاية؟

بالنسبة للنقطة الأخيرة ان لو المرأة هي الي تحكم الدول فما كان بكون هناك حروب و لا قتل و ظلم ، من وين جت الحروب و القتل الحرب و الظلم ؟ ببساطة من طمع المال و السلطة ، فهل هذا يعني ان المرأة خالية من هاذي الاشياء و اذا حكمت ما بتسعى اليها ؟
لا من قال؟ كل الي قلته ان احنا نحب نقص على روحنا ونقول ان المرأة ماتحكم لانها ماتعرف تفكر، مو لان العالم ذكوري والرجال المسيطر، وليش ننتقد طرق المرأة في اتخاذ القرارات واحنا اصلا ماعطيناها فرصة؟ كلمن عنده قابلية للخير او للطمع وهالشي مو الجنس الي يحدده

---

 

[Waffa]

- نقدر ندرس أو لا ؟ التخصص اللي نبيه في الجامعة اللي نبيها حالنا حال الصبيان > ممكن يمنعنا عائق مادي بس ما بيمنعنا كونا بنات

- نقدر نشتغل أو لا ؟ صحيح في أشغال تفضل الرجل صاحب معدل 2 على المرأة صاحبة المعدل 3.5 وأكثر لأن هذي الشغلة تناسب الرجال أكثر، وهذي الشي في طبيعة الاثنين في خلقتهم شلون نعترض عليه ؟ ولكن مع ذلك هذي فرصة للمرأة لتبدع وتتميز وتثبت وجودها واستحقاقها.

- نقدر نشارك في مختلف الأنشطة أو لا ؟ منو يقدر يمنعنا نشارك في نشاط أدبي / ثقافي / سياسي / ديني ( وعلى طاري الديني لا ما نبي مرأة تصير فقيهة خاصة على أيامنا، نقدر نقول نبي امرأة تصير نبية ؟ ) ما علينا.. مو المرأة البحرينية خاصة في الأزمة أثبتت قدرتها على المشاركة في جميع جوانب الحياة بل وتفوقت على الرجل، هل همشها المجتمع، لو همشها وعارضها أصحاب العقول المغلقة غير الواعية ؟

- نقدر نروح ونجي ونعيش حياتنا أو لا ؟ طبعا هالأشياء بتصير بضوابط، في أشياء تنمنع عنا لأنا بنات.. أني أساسا ما أرضاها على روحي، مثلا طلعة مكان عام ومفتوح بروحي، أو أماكن مو ملائمة، طلعات في وقت متأخر.. وغيرها.


- المرأة في البحرين ما تقدر تتزوج وتتدرس وتشتغل وتنجب وتشارك وتعطي وتقدم ؟ ترى حالها من حال الرجل.. وإذا شي ما قدرت تسويه مو من
المجتمع رفض إنها تسويه، لا.. مثل ما قلت الشي يتعلق بطبيعتها.

ولا عليش من كلام في منتدى، إذا جا وقت الصدق وتقدموا لوحدة لا تعتقدين بيختارون وحدة أمية.. بالعكس يبحثون عن المتعلمة، والبعض الحين يفضل اللي تشتغل أو الطالبة الجامعية اللي ليها فرصة أكبر في شغل.. إذا كان فاهم في الحياة، ويفكر زين في مستقبل أولاده، لأن يدري معاشه بروحه ما بكفي.

انتين تقدرين غيرش مايقدر بحكم الشرف
انتين تقدرين تتوظفين غيرش مايقدر بحكم ان لازم تصير زوجة زينة في نظر الناس، او مو مخلينها
ليش الكل يطالع روحه ويقول مافيني شي بس يلا العالم مافيه شي ؟؟؟
مو الاغلبية في الجامعة من البنات؟
تدرين نسبة البطالة في البحرين حوالي 76% نساء حسب احصائية 2013، ماتجوفين مشكلة في هالرقم؟
هاي كله وتجوفين مافيه مشكلة؟؟ الي يدرسون اكثر والي يشتغلون اقل بواجد، هاي وش اسبابه؟؟؟ مجرد ارقام مرتفعة بشكل خطير بس يلا، اهم شي اني اروح الجامعة وربعي يروحون الجامعة، وعندنا وظايف فخلاص مافي مشكلة.
لما جبت طاري المعدل ماكنت اتكلم عن الوظايف الي "تناسب الرجل"، اتكلم بشكل عام، واعتقد الاحصائية الي جبتها تثبت كلامي، وادا انتون تؤمنون ان في وظايف تناسب الرجل بس؟ جم وظيفة دلين؟ مصانع؟ بناء؟ انزين وباقي المجالات الي تارسة البلد؟ كلها بعد تناسب الرجل؟؟؟؟
المشكلة مو قاعدين نفهم روحنا ان تره قبل جم عقد الناس قالت نفس الشي عن مجال البنوك، هالشي مايناسب نساء يناسب رجال، ونفس الشي عن حقها في التعليم، ونفس الشي عن حقها في العمل بشكل عام
ما تحسون ان كلامكم واعذاركم مشابهة للي كانوا يقولونها؟

اليوم تقولون مابنخليها تشتغل في هالمجال المعين لان كرامة، شرف وعفة
وقبل سنين يقولون مابنخليها تشتغل خير شر عشان كرامتها وشرفها وعفتها، تره نفس السبب الي قاعدين تتعذرون فيه عشان تبررون منع القوة النسائية العاملة من معظم المجالات والمناصب هو الي استخدموه الي قبلكم عشان يمنعونكم في حقكم في الدراسة الي تتمتعون فيه اليوم

اليوم تقولون مابنخليها تشتغل في هالمجال لان ماتقدر وهالمجال رجالي
قبل يقولون مابنخليها تشتغل خير شر لان ماتقدر ومانخلقت حق بيئة العمل

كل واحد يبرر المشاكل المتأزمة بانها تقدر وماتقدر، هالشي يصلح ليها وهالشي مايصلح ليها، ناسين ان من الاخر كل واحد مفروض يكون عنده احقية تامة ان يقرر شلي يصلح له وشلي مايصلح له تحت فرص متساوية للجنسين

وادا هني بتتحججون بالحجاب تره في دول ثانية ماعندهم حجاب والنساء تعاني من نفس المشاكل

وكل الي معترضين على كلامي تعالوا جوفوا النسبة الي حطيتها وقولوا ليي للحين مصرين على رايكم ان المرأة عندها حقوقها ومافي مشكلة؟


-
Bahraini Women in Numbers 2013
http://www.scw.bh/UploadFiles/pdf/BahrainiWomen_inNumbers2013.pdf


وبليز لحد يجي ويقول ليش معصبة اعتقد كتبت كلام كفاية يستحق ينرد عليه بدل هالرد الي حفظناه
ومسامحة للاخت ادا بين لش ان الرد موجه لش بصورة شخصية لان كلش مو ده القصد

 

[Waffa]

جربي بروحش .. أبسط شي تقدرين تبدلين تاير سيارة بروحش ؟
من تجربة شخصية .. مرة الوالد يبدل التاير للسيارة .. رحت أجرب أرفعه من الأرض .. جدًا ثقيل عليي ولا اتحرك بوصه ^^"

القضية مو قضية اني اقدر احمل تاير ولا اقدر افتح غرشة المايونيز، القضية ان من بلايين النساء في العالم اصابع ايدش مو سوا، فيه بنات تقدر تثبت احقيتها بجدارة في هالوظايف الي تسمونها وظيفة رجال، وفيه رجال ممكن يكون بنيته ضعيفة، تره العالم مشحون ناس

سواء بشكل عام المرأة جسدياً أضعف من الرجل او لا مو هو القضية،
الموضوع ان لما وحدة تثبت جدارتها واحقيتها في وظيفة حتى لو كانت غالباً للرجال، المفروض يكون عندها الحق انها تحصل عليها، المفروض الفرص حسب الاحقية مو حسب الجنس،
مو لان اني ما قدرت ارفع التاير فلازم كل النسوان في العالم (حتى الي يقدرون) مايتوظفون في وظايف تتطلب جهد جسدي

هادي النقطة الاساسية

 

[Blue Castle]

---

كلامش صحيح و شكراَ على التوضيح

 

[Hanany]

باختصاار ..تدرس المراءة لتتعلم وتتثقف ونسبة وعيها عالية وجيدة ..
حتى لو ما تووضفت فاكتسبت اهي علم هاي من ناحية ..

الناحية الثانية اشتغلت وتوضفت بشغله مرموقة والزوج شغلته اوكي ..
اعتقد لا مانع ان تشتغل بعد مدام الوظيفة متوفرة وزيادة الخير خيرين .. مثلما يقال ..

فاعتقد عادي يعني تشتغل ومتزوجة ..
اكو ناس معانا تدرش ومتزوجة ؟؟
فلو نظرنا ان الدراسة اصععب وبتكون المسئولية صعبه بعكس الشغل ..

الطالبة الجامعيه اقصد طلبة جامعه البحرين من حقها البنت تقول ابي اشتغل ..
ليش .. ؟ لانه اهيا ما دفنت نفسها بهاي الجامعه وتعرضت للمذلة واخر شي ما تشتغل ..
اظن هاي من ابسط حقوقها ..

طرح ممتاز ..

صح لسانج

 

[я є ι α x є]

طـرحَ جميل ومناقشَـات مختلفة ووجهات نظر متعددةَ ، ناس تدرس حتى يقولون درستَ ، فتدرس علشان يقولون الناس انها دارسة وناس تدرس حباً للعلم وناس تدرسَ حتى تفكر في ظروف المستقبل وتشتغلَ لأن بهالزمنَ الانسان بحاجة لعلم يحارب به الجهل ، وناس تدرس اجباري ، ومع احترامي لكل اللي ما درسوا وتحية للناس اللي عمرهم 30 فما فوق ويدرسون في جامعتناَ وعلامة اكسَ × على اللي يحبطونَ الناس اللي تدرس ويتحججون لأنه ماكو وظايف بالبلدَ ويحبطون ويهدمون عزيمتهمَ !!

كل هالطلبة اللي في جامعة البحرين ما يدرون اننا عايشين ببلدَ ما يقدس العلم وماكو وظايف الا للأجنبي ، والأفضلية للأجنبي ، يدرون هالطلبة هذا الشي لكن الحمد لله مجتمعنا قاعد يصحى ويعرف قيمة العلم ويعرف انه سلاحنا العلم نواجه القمع بهَ ، وتحية للأمهات والآباء اللي يشجعون ابنائهم على العلمَ ، نسبة الأمية قاعدة تنخفض ونسبة المتعلمين ترتفع ، وهذا شي نفخر فيهَ . حتى ألاحظ نسبة البنات اللي يدرسون ف الجامعة تقريباً قاعدة تفوق نسبة الرجال ​

أمهاتَ يدرسون وقاعدين يروحون جامعات ويتركون أطفالهم وقادرين يوازنونَ بين الزواجَ والدراسة والرسول والأئمة حثوا على العلم والوصول لأعلى الدرجاتَ ، والزواج ما يمنع مواكبة العلم والدراسةَ ، أبـوي انسان مو متعلم وما كمل مدرسة للصف الثالث الابتدائي وطلع لظروف مادية لما كانوا صغار ولما كبرنا وفر لنا كل شي وكان أكبر حافز ومشجع لنا عالدراسة ويعلمنا كل يوم قيمة العلمَ واللي ما شافه من علم في حياته وتقصير من الناحية المادية قاعد يوفره لنا في سبيل الدراسـة .

العلم مب محصورَ على الرجل دون المـرأة ، بالعكسَ ، اللحين تستغرب لما تسمع بنت شهادتها بس ثانوية في عصرنا الحالي ، عنْ نفسي أستنكر هذا الشي شلون بدل ما نواكب التحضر ونواكب عصر التقنية بعلمنا نكتفي بمستوى معين من شهادة ثانوية !!


بالنهاية أختم " منْ لم يذق مر التعلمَ ساعةً تجرع ذل الجهل طول حياتهِ "

طرحَ شيق