ويع ما عجبني !

[Jouan7]

بسم الله الرحمن الرحيم
اللهم صل على محمد و ال محمد




ويع ما عجبني !
واجد نسمع هالكلمه في حياتنا و يمكن منا و من ناس قريبه منا و من ناس مانعرفها اساسا ..

الكلمات دي ما فيها شي ..
صح
بس!!!
لما احد يتدخل بحياتك ب اختياراتك ب لمساتك
و يقول لك ويع ما عجبني ..
ثيابك .. ويع ما عجبتني
شعرك .. ويع ما عجبني
شريك حياتك .. لا ما يناسبك
تخصصك .. الا هالتخصص وش داش انته
تلفونك .. مادورت الا هالتلفون
و غيييره من الامور ..
سواء كان من احد اقربائك او من ناس غير ..


وش تسوي في ناس جدي !!
علما انك ما تبي تعور راسك و ترد عليهم و بنفس الوقت ما تقدر تسكت ..
و تعرف انك اذا جادلت الاحمق بتكون احمق ..

غير انهم ع انهم يفلتون اراءهم الا انهم يسعون الى تخريب ما تعمل لاجله لكي لا تصل الى ما تريد
بحجه
#نخاف عليك
من انتون حق تخافون عليي *-*
هذي حياتي هذا الي ابيه انا

خصوصا لما يجي هالكلام من ناس فعلا مالها بحياتك شي غير انهم معارف و انت في حياتهم ولا شي
بس في الامور الي ما تخصهم يحطون خشمهم بحجه الخوف و غيره ..


اراءكم للنقاش
# اختلاف الرأي لا يفسد للود قضية ..
​

 

[royal-rose]

فعلًا
انا هالشي يضايقني هالفترة ع سالفة التخصص
ليش داشة تمريض ؟
مو صاحية ؟
ويع كلش كريه التخصص و الشغل
زين شعليكم ؟؟؟
انتو حت تتحجون بدون م تعرفون ش عن التمريض و مستقبله !
ساعات يعني اوادم استغفر الله
و مثل م قلتين اوادم كلش م ليهم دخل و مجرد معارف​

 

[بنفسجيه.~]

اهلا
لفت انتباهي موضوعش قلت لازم اعلق

"الناس"..باختصار كلما عطيناهم اكبر من حقهم بيركبون فوقنا!
و لو تابعناهم ما راح نستفيد شي و مستحيل يكون شي يخصش سواء تخصصش او لبسش او حتى شخصيتك تكون عاجبة كل الناس..فلازم بيطلع اللي يتفلسف و يقول ما يعجبني فيك هالشي...!

لذلك لا تعيرين اهتمام للناس حتى لو ظلوا يتكلمون ..اهمشي انش واثقة من نفسش و مقتنعة بالشي اللي مو عاجبنهم...و اصلا اذا بتعطينهم وجه بتسمحين اليهم يتكلمون اكثر...
مع هالفئة من الناس :" طنش..تعش...تنتعش".. التطنيش افضل حل

 

[royal-rose]

اهلا
لفت انتباهي موضوعش قلت لازم اعلق

"الناس"..باختصار كلما عطيناهم اكبر من حقهم بيركبون فوقنا!
و لو تابعناهم ما راح نستفيد شي و مستحيل يكون شي يخصش سواء تخصصش او لبسش او حتى شخصيتك تكون عاجبة كل الناس..فلازم بيطلع اللي يتفلسف و يقول ما يعجبني فيك هالشي...!

لذلك لا تعيرين اهتمام للناس حتى لو ظلوا يتكلمون ..اهمشي انش واثقة من نفسش و مقتنعة بالشي اللي مو عاجبنهم...و اصلا اذا بتعطينهم وجه بتسمحين اليهم يتكلمون اكثر...
مع هالفئة من الناس :" طنش..تعش...تنتعش".. التطنيش افضل حل

نفس الجملة اللي جت ف بالي عقب م قريت
طنش تعش تنتعش​

 

[نجمة تشرين]

ويع ما عجبني موضوعش

ههه امزح تری
يا ماما خلهم يولون
قولي ليهم اني عاجبني وش حارنكم
و بس
الا يقول هالكلمه و ياثر فيش قدامه اربع طوف الا تعجبه يختارها و يكمل شغله

 

[حلم مذبوح]

رضا الناس غاية لا تدرك

 

[Blue Castle]

بشكل عام هذا الشي موجود و تختلف الطريقة من شخص الى اخر حسب طريقته في التعبير عن الشي ، بس مو دائماً يكون الكلام الموجه كمحاولة تغيير في الشخص ، ممكن انه يكون انتقاد ، لفت انتباه لشي الشخص غافل عنه ، نصيحة ... إلخ ، بعض الأمثلة من حياتي الشخصية ، لتوضيح الفكرة :

الموقف الاول :
لما تخرجنا من الثنوي كنت ابي ادخل كلية المعلمين و شاءت الاقدار اني ما اسجل و يطوف موعد التسجيل مال كلية المعلمين ، و كان تسجيل جامعة البحرين بعد مفتوخ ، بس انا حاط في بالي انه يا كلية المعلمين و إما فلا ، واحد من الي يصيرون ليي من بعيد كلش كلمني بحكم معرفته بي يقول ليي سجل انت الحين في جامعة البحرين في تخصص تحبه و يناسبك و بعدين يمكن يصير تحول من جامعة البحرين ، انا عاندت و سويت روحي انا ادرى بمصلحتي ، النتيجة في النهاية كانت بهذا الشكل ، خسرت فصل دراسي على قلة الفايدة ، و في نفس الوقت اكتشفت بعدين اني لو كنت دخلت عادي احول كلية المعلمين بعدين ، لو كنت أخذت رايه و فكرت فيه كانت بتكون هاذي النتيجة ؟

الموقف الثاني :
اول ما دخلت الجامعة كنت البس عادي مثل ما البس في البيت في الفريق أو اي مكان أروحه بإختصار ( ما أحب اكشخ و جدي ) ، عاد داك اليوم راجع من الجامعة العصر مخلص متأخر الا واحد من لصبيان أصغر مني بسنة وشوي كان اتوقع في ثاني ثنوي او ثالث ثنوي ، يقول ليي جيفه تروح الجامعة جدي ، اقوله جيفه يعني :mellow: الا يقول احد اروح الجامعة بهالثياب قلت له ويش فيهم ؟ اقول ما فيهم شي ، اقول له عجل ويش ؟ اقول ان خبري الا في الجامعة يكشخون و جدي ، قلت له انا البس الي يرحيني ، يعني ما اصير في الجامعة الا لازم اكشخ و ما ادري ويه ، و في نفس الفترة كنت اتدرب المدرب كان تمام يسولف و جدي الا يقول ليي مرة انت جيفه تروح الجامعة جدي ؟ اقوله جيفه ؟ عادي تقريباً نفس الكلام يقول ان لصبيان الي في الجامعة الي يتدربون عندي قبل لين يجون شعرهم ما ادري جيفه و كشخة و جوتي و ما أدري ويه ، الا انت اشوف تلبس عادي و جدي ، قلت له انا طبيعتي جدي ما احب اكشخ ، تشوف يعني لبسي فيه شي غلط قال لا ، بس يعني في الجامعة كلهم لبسهم كشخة و و ، فأنت تظهر بصورة كأنك أقل منهم ، ما اقولك اكشخ نفسهم بس يعني حاول ان تكون في الشغل أو مكان الدراسة بمنظر أفضل من الاماكن العامة ، و في البيت و فريقك و جدي البس الي يريحك ، و فعلاً قمت أسوي جدي ، في النهاية الاول انتقد بس كلامه مو مقنع ، و الثاني انتقد بس عنده وجهة نظر مقنعة تستحق انه انظر للشي نظرة ثانية .

و المواقف واجد عن التخصص و غيره من المواقف الي ما أتخلص ، بس الفكرة الي امبي اوصلها مو بالضرورة الي ينتقد انه يمبي يغير شي في الشخص ، ممكن تكون نصحية ، او مجرد كلام بدون فايدة أو انتقاد... إلخ ، فيعني مهما كان المتكلم و لو ان الكلام مو عاجبنه أو الشخص الي يتكلم علاقتنا به مو ذاك الزود ، او نسيبنا من بعيد .. إلخ ، يتسحق ان نفكر بكلامه شوي مهما كان غرضه الظاهر أو الباطن من كلامه .

 

[glamor]

اني وحده ما اسكت

ليش اسكت اذا الشي يضايقني واعور قلبي

لا اتكلم واقول انتون ويش يخصكم من انتون اصلا حق تحكمون وش خبراتكم في هالأمور بتعيشون حياتي الباقيه ؟

لما اتكلم واسكتهم ارتااااح

طبعا ما اتكلم بوقاحه بس اتكلم بشي مقنع ويخلي هالطرف مايرد يتكلم وياي بهالأسلوب او يتدخل في اختياراتي او اموري الخاص اقوله ستووب وفي خط احمر حق كل شي ...

مثل ما انت اخترت طريقة حياتك ,اخترت اسلوبك اشيائك اني بعد ليي حق اختار مثل ما الله عطاك عقل تفكر فيه اني بعد عطاني

واللي يتكلم بقصد نصيحه وبطلف ينعرف واللي عكس هذا الشي ينعرف

وبس

 

[akahah]

رضا الناس غاية لا تدرك ..



برأيي أنا مقتنع باللي أسويه و اللي يقولي ويع و موعاجبه أقوله مو شغلك ولا لابس عشان أفرحك و أرضيك
و في النهاية هو ماله شغل فيك و انا ما علي منه و أسوي اللي عاجبني.
​

 

[غريبة الدار]

بالمختصر مظرين نحقر وانطنش الفضولين اللي ماليهم خص في حيتنا ولا يعرفونه واللي لو لعقب سنة اتقول ليه ما طلبت رايك ما بينفع فيه واذا ما جا لينه بدور غيرنا وانرد على الأوادم اللي يفهمون ويستحون اتقول ليهم ما يخصكم ما طلبت رايكم يستحون وما يجون يتدخلون

وما نسد أذونه عن المقربين ( الأب و الأم والأخوان والخوات والأصدقاء ) اللي يعرفونه ويحبونه وعندهم خبره في بعض الأشياء والمجلات

 

[7aneen]

يعني احين صق تقولون ليهم مو شغلكم و انا كيفي و جدي ؟
اني ما اقول ( ما ادري لاويه ) ..

اني اذا مريت بوقف جدي .. اسكت و اضحك
بس مو معناتها ان اني راضيه بالنقد ..


​

 

[Prince.11]

جميل جداً ..


سأبدأ حديثي بعبارة ولا ترد على السفيهِ جوابا

ربما العبارة تحمل في معناها الخارجي شيئاً من القوة ..
وتحمل في منظرها الخارجي شيئاً من الاهانة للآخر ..

ولكن.. هو فعلاً سفيه من يأتي بهذه العبارات ..
هو فعلاً سفيه وأحمق من يأتي ل تدمير الان ..

عبارات ، كلمات ، أسلوب أقدر ان اصفه بالتحطيمي ..
قد يصنفه البعض بأنهُ انتقاد في مصلحة الاخر ونصيحة ..

ومثل ما نسمع وااايد " الي ينصح ما تبونه " ..
ولكن هؤلاء لا يدركون حقيقة النصيحة وحقيقة التحطيم ..

عندما أأتي واطلق عبارة " تخصصك فاشل، ليش داخله " على سبيل المثال ..
هي عبارة ليست نصيحة بقدر ما هي تحطيمية للشخص المتلقي ..

أسلوب قبلِي متحجر قديم ,, لا يحمل أي معنة من النصيحة والرحمة ..
اطلق عليه اسلوب تحطيمي ساقط ..

ثم أن يجب على الشخص أن يكون مقتنع تماماً باعماله ..
أن كان تخصص أو حتى في اعماله الحياتية اليومية ..

يجب ان يعملها ويدخلها ويبدأ بها بقناعة تامة ..
لكيّ لا يفسح المجال لهؤلاء لتخريب بنيانه الذي بناه لربما على قناعة ..


و شُكراً !!

 

[Jouan7]

فعلًا
انا هالشي يضايقني هالفترة ع سالفة التخصص
ليش داشة تمريض ؟
مو صاحية ؟
ويع كلش كريه التخصص و الشغل
زين شعليكم ؟؟؟
انتو حت تتحجون بدون م تعرفون ش عن التمريض و مستقبله !
ساعات يعني اوادم استغفر الله
و مثل م قلتين اوادم كلش م ليهم دخل و مجرد معارف

ههه بالضبط .. كل واحد له ميوله ..
محد له شغل

 

[Jouan7]

الناس"..باختصار كلما عطيناهم اكبر من حقهم بيركبون فوقنا!
و لو تابعناهم ما راح نستفيد شي و مستحيل يكون شي يخصش سواء تخصصش او لبسش او حتى شخصيتك تكون عاجبة كل الناس..فلازم بيطلع اللي يتفلسف و يقول ما يعجبني فيك هالشي...!

لذلك لا تعيرين اهتمام للناس حتى لو ظلوا يتكلمون ..اهمشي انش واثقة من نفسش و مقتنعة بالشي اللي مو عاجبنهم...و اصلا اذا بتعطينهم وجه بتسمحين اليهم يتكلمون اكثر...
مع هالفئة من الناس :" طنش..تعش...تنتعش".. التطنيش افضل حل

ايه صح ..
هذا الحال جدي بس من داخلش تحسين تبين تكفخينهم او تقصفين جبهتهم ..
بس ما تبين تعورين راسش او بالاحرى حفاظا ع مستواش

 

[Jouan7]

ويع ما عجبني موضوعش

ههه امزح تری
يا ماما خلهم يولون
قولي ليهم اني عاجبني وش حارنكم
و بس
الا يقول هالكلمه و ياثر فيش قدامه اربع طوف الا تعجبه يختارها و يكمل شغله

هههه .. ايي هذا هو ..
بس اذا جاش نا تخرب عليش اشياءش و بعدين تقول لش لان الشي ما يناسبش *-*
انتو شكو يناسبني ما يناسبني

 

[Jouan7]

رضا الناس غاية لا تدرك

فعلا *-*

 

[Jouan7]

و المواقف واجد عن التخصص و غيره من المواقف الي ما أتخلص ، بس الفكرة الي امبي اوصلها مو بالضرورة الي ينتقد انه يمبي يغير شي في الشخص ، ممكن تكون نصحية ، او مجرد كلام بدون فايدة أو انتقاد... إلخ ، فيعني مهما كان المتكلم و لو ان الكلام مو عاجبنه أو الشخص الي يتكلم علاقتنا به مو ذاك الزود ، او نسيبنا من بعيد .. إلخ ، يتسحق ان نفكر بكلامه شوي مهما كان غرضه الظاهر أو الباطن من كلامه .

صحيح كلامك و عين العقل
غير لما احد يفرض رايه عليك بطريقه او اخرى
و السبب لانه ماعجبه او لانه ما يناسبك
لكن كلامك سليم

 

[Jouan7]

اني وحده ما اسكت

ليش اسكت اذا الشي يضايقني واعور قلبي

لا اتكلم واقول انتون ويش يخصكم من انتون اصلا حق تحكمون وش خبراتكم في هالأمور بتعيشون حياتي الباقيه ؟

لما اتكلم واسكتهم ارتااااح

طبعا ما اتكلم بوقاحه بس اتكلم بشي مقنع ويخلي هالطرف مايرد يتكلم وياي بهالأسلوب او يتدخل في اختياراتي او اموري الخاص اقوله ستووب وفي خط احمر حق كل شي ...

مثل ما انت اخترت طريقة حياتك ,اخترت اسلوبك اشيائك اني بعد ليي حق اختار مثل ما الله عطاك عقل تفكر فيه اني بعد عطاني

واللي يتكلم بقصد نصيحه وبطلف ينعرف واللي عكس هذا الشي ينعرف

وبس

تعجبيني ..
اوقات احس اني امتلك هالجرأه
بس بنفس الوقت احس نفسي لا مو اني
ف اسكت احسن *-*
يبي لي اتعلم
مع اني اعطي في الوج بس مادري في هالمواقف اسكت و اعطي ظهري و امشي

 

[Jouan7]

وما نسد أذونه عن المقربين ( الأب و الأم والأخوان والخوات والأصدقاء ) اللي يعرفونه ويحبونه وعندهم خبره في بعض الأشياء والمجلات

صح

 

[Jouan7]

يعني احين صق تقولون ليهم مو شغلكم و انا كيفي و جدي ؟
اني ما اقول ( ما ادري لاويه ) ..

اني اذا مريت بوقف جدي .. اسكت و اضحك
بس مو معناتها ان اني راضيه بالنقد ..

ههه نفسي ,, بس ما اضحك