|* تجاربكم مع التريننغ ... كلية إدارة الأعمال |*

[bohussain]

بسم الله الرحمن الرحيم
السلام عليكم ورحمة الله وبركاته

حبيت نشوف تجاربكم مع التريننغ الخاص بكلية إدارة الأعمال .. وهذي بعض النقاط اللي في بالي ...

* الشركة
* المنطقة
* الشغلة
* الراتب (إن وجد)
* كمية الشغل
* المعاملة
* الالتزام بالوقت

بانتظار مشاركاتكم ...



​

 

[سحابة صيف]

ننتظر التجارب

 

[احمد فتيل]

السلام عليكم

التريننغ اخدته في الصيفي اللي طاف

شركة نبيل الساعي ( محاسبون قانونيون )
المكتب في منطقة السيف بس الشغل في كل محل لأنها شركة اودت و الشغل يكون في شركة الكلاينت

شغلونا كـ مساعد اودتر
علمونا الشغل وقعدنا نروح معاهم للكلاينتس ويعطونا اشغال
في بعض الاحيان يخلونا نتولى امر احد الشركات بروحنا

لا راتب

كمية الشغل مو واجد عدل بس متعبة و اللي جيك شغل الاودت بيعرف القصد

معاملتهم ممتازة
بس الشركة فيها قليل بحرينيين ف كنا نتعامل طول الوقت ممع الاجانب
لغتي الانكليزية ما كانت داك الزود فواجهت مشاكل في التفاهم وياهم في البداية

الالتزام بالوقت اممم دوامهم يبدي سبع ونص على ما اظن بس النهاية تعتمد على الشركة اللي نشتغل فيها



بالتوفيق للجميع

 

[the life]

* الشركة*: وزاره العمل
* المنطقة : م عيسى
* الشغلة*: في قسم الخدمات المالية والإدارية
نصدر جيكات
نستلم جيكات
نطلع كشف حساب للمراجعين
نطلع فواتير
نسلمهم جيكاتهم
ندخل بيانات ف الكمبيوتر
* الراتب (إن وجد) : بلووشي
* كمية الشغل: على حسب المراجعين والشغل الموجود بس بشكل عام مو واجد
* المعاملة*: الحمدلله تمام
* الالتزام بالوقت*: كنت عادي اتاخر نص ساعه / ساعه إلا
اطلع قبل بربع ساعه
يعني مو لازم بالضبط

 

[bohussain]

للـــرفـــع .. ​

 

[x0x0x]

أبي اجوف تجارب البنكنق والفاينسس

 

[a-ssel]

للرفع

 

[المهندس عبدالله]

ليش بس كلية ادارة الاعمال خل نشوف تجارب الطلاب في مختلف التخصصات :sly:

 

[Gαмяα]

شاركوناا نستفيد

 

[سحابة صيف]

* الشركة: يوسف من أحمد كانو
* المنطقة: المنامة
* الشغلة: محاسبة
* الراتب (إن وجد): 100 دينار
* كمية الشغل: قليلة جدا وبعض الأيام معدومة .. الموظفين يشتغلون بس ما يعطوني أي شغل بس الأشياء السهلة اللي في اوراق .. السستم علموني عليه لكن ما خلوني اشتغل فيه
* المعاملة: تمام والموظفين متعاونين وخلوقين
* الالتزام بالوقت : الصبح حتى لو اتأخر مافي أحد يحاسب .. لكن في الرجعة لو بطلع قبل ب5 دقايق لازم استأذن

بيئة العمل في الشركة بشكل عام عجبتني مع ان الموظفين في عندهم بعض المشاكل وية الادارة بس ما ليي خص فيها

 

[غريبة الدار]

ليش بس كلية ادارة الاعمال خل نشوف تجارب الطلاب في مختلف التخصصات :sly:

لأن هالموضوع خاص بطلبة كلية ادارة الأعمال

 

[مناجاة المحبين]

السلام عليكم

التريننغ اخدته في الصيفي اللي طاف

شركة نبيل الساعي ( محاسبون قانونيون )
المكتب في منطقة السيف بس الشغل في كل محل لأنها شركة اودت و الشغل يكون في شركة الكلاينت

شغلونا كـ مساعد اودتر
علمونا الشغل وقعدنا نروح معاهم للكلاينتس ويعطونا اشغال
في بعض الاحيان يخلونا نتولى امر احد الشركات بروحنا

لا راتب

كمية الشغل مو واجد عدل بس متعبة و اللي جيك شغل الاودت بيعرف القصد

معاملتهم ممتازة
بس الشركة فيها قليل بحرينيين ف كنا نتعامل طول الوقت ممع الاجانب
لغتي الانكليزية ما كانت داك الزود فواجهت مشاكل في التفاهم وياهم في البداية

الالتزام بالوقت اممم دوامهم يبدي سبع ونص على ما اظن بس النهاية تعتمد على الشركة اللي نشتغل فيها



بالتوفيق للجميع

عجيب .. تكلم بعد عن الشغل أكثر .. ​

 

[نور الليل]

* الشركة : عقارات ماجد الفطيم - ادارة السيتي سنتر
* الشغلة : مافي شي معين كل مرة كنت اسوي شي واشتغلت داخل المكاتب وفي الرسبشن
* الراتب : 100 دينار شهريا يعني كامل 200
* كمية الشغل : متوسطة
* المعاملة : ممتازة
* الالتزام بالوقت : مرن

كنت مترددة بس بعد ما رحت استانست لان خياري كان صائب شركة قوية حتى رواتبها عالية وموظفينها من احسن ما يكون استفدت واجد حتى نظرتي للمجمع اختلفت من بعد ماعرفت تفاصيل شغلهم طبعا الشغل في المجمع نفسه في المكاتب فوق فكنت وقت بريكي اطلع اتسوق هههه

الوقت من 10 ل2 في رمضان و ل4 بعد رمضان

بس وقتهم الاصلي من 8 ل 5 ونص

 

[هلاك البحرين]

الشركة : شركه الخليج لصناعه البتروكيماويات GPIC
* المنطقة سترة
* الشغلة التدريب والتطوير
* الراتب (إن وجد) 200 كل شهر
* كمية الشغل كان في شات داون في الفتره اللي اشتغلت فيها ف كان الشغل جدا قليل ومعظمه ان ادخل بيانات وساعات اذا صار في شغل يعطوني اسوي فورمات حق التريننغ الجدد اللي بيدخلون الشركه في الفتره القادمه وكان شي حلو
* المعاملة شووي واجهت صعوبه في التعامل لان بيئه يديده علي وماتعودت بسرعه وكانو وايد يدقوون في كلشي بس الناس اللي كانوا معاي تريننغ ويشتغلون في الاداره يقولون ان كان كلشي تمام
* الالتزام بالوقت اللي كانت مسوولتي كانت تهددني ان بيقصون من المعاش اذا تاخرت لكن في النهايه كانوا يعطوني بالضبط لكن بعد ينتهبون على الوقت

 

[nicegirl]

في احد اخذ تريننق بالجامعة ؟؟

و اي قسم ودوكم؟

 

[A7medi~6]

بعد نبغي تجاربكم يا جماعة

الي راحو عند اماكن فيها رواتب ياريت تفيدونا

 

[Mahmood1]

الانترشب/التريننغ في البحرين ومع الأسف ، يُعطى "كمجاملة" للجامعات. المتدرب فعلياً مو قاعد يسوي مهام حقيقية. هو مجرد "مساعد" يتفضلون عليه بمهمات بسيطة وقليلة.

 

[هازارد]

شكراً ما قصرت

 

[غريبة الدار]

اللهم صل وسلم على محمد وآل محمد
يرفع للأفاده

خبرونا في وين صرتون وتجاربكم

 

[غريبة الدار]

Microsoft Forms

forms.office.com

على جميع طلبة كلية ادارة الاعمال المسجلين للتدريب العملي للفصل الثاني 2020 ملئ هذه الاستمارة مع ارفاق السيرة الذاتية في اسرع وقت ممكن خلال هذا الاسبوع مع الشكر

على pdf لن يقبل على word