موضوع نقاشي : ليش نعطي الناس بلوك ؟

[S p y e r]

السلام عليكم و رحمة الله ..


إستوقفني برودكاست أتوقع إنشهر بين الناس عنوانه ( تخيلوا حياتنا بدون مجاملات )

..--..--..

نبي نزوركم اليوم ؟ - لا والله مشغولين
ليش مشغولين ؟ - كيفنا ما نبيكم ‹☺›

..--..--..


ما أتوقع أن في أحد فيكم ما إستعمل البلوك في يوم من الأيام
بس السؤال الي يجرّ نفسه هني ، ويطرح أبواب الفضول ..
يقول شنو هي الأسباب الي تدفعنا أن إحنا نعطي شخص معين بلوك على شبكة التواصل الإجتماعية ؟
ليش إحنا نفعّل هالخيار ( لحد يمزح ويقول جزر ) ضد أشخاص معينين ؟
هل هالشي يكون سببه نقطة وحده بس أن هالأشخاص ضايقونا وبالتالي نعطيهم بلوك ؟
هل في أسباب ثانية ممكن تدفعنا نعطي الناس بلوك حتى لو ما سووا لينا شي يضرنا ؟
هل في إحتمال إحنا نضرب ناس بلوك عشان أنه هالناس ممكن يكونون أصدقاء حق ناس ما نحبهم ؟

مسآحة أتركها ليكم ، راووني إبداعكم و إطرحوا كل الإحتمالات الي مرت عليكم وأدت إلى البلوك ..
إطرحوا رأيكم في البلوك نفسه ، هل هو إهانة ؟ وسيلة للهروب ؟ وسيلة لتفادي الإزعاج ؟ وسيلة لحجب أشخاص عن معرفة تفاصيل حياتنا ؟

لو كلمكم شخص وقال: " ليش عاطني بلوك ؟ " شنو بيكون ردكم على هالشخص ؟


أنتظر تفاعل في الموضوع ​

 

[NoOony.A]

يقول شنو هي الأسباب الي تدفعنا أن إحنا نعطي شخص معين بلوك على شبكة التواصل الإجتماعية ؟

شخصيا اي شخص يزعجني او يضايقني بلوك ع طول ما اعور راسي
ليش إحنا نفعّل هالخيار ( لحد يمزح ويقول جزر ) ضد أشخاص معينين ؟
لانهم يستاهلون البلوك و مو عاجبينه او نحصل منهم مضايقات او مانحبهم

هل هالشي يكون سببه نقطة وحده بس أن هالأشخاص ضايقونا وبالتالي نعطيهم بلوك ؟
كل شخص و مزاجه , عني شخصيا اي , لان الناس الحين صارو لايطاقون و ماينعطون وجه

هل في أسباب ثانية ممكن تدفعنا نعطي الناس بلوك حتى لو ما سووا لينا شي يضرنا ؟

لا هاي يسمونه مرض ,او ممكن في اسباب ثانية ليش لا,عدم الارتياح و الخ

هل في إحتمال إحنا نضرب ناس بلوك عشان أنه هالناس ممكن يكونون أصدقاء حق ناس ما نحبهم ؟

شدعوة! هذا مرض و يبي ليه علاج

هل هو إهانة ؟
يمكن يكون اهانة لناس نعرفهم اما ناس مانعرفهم ما اعتقد


وسيلة لتفادي الإزعاج ؟ وسيلة لحجب أشخاص عن معرفة تفاصيل حياتنا ؟
اي ممكن

لو كلمكم شخص وقال: " ليش عاطني بلوك ؟ " شنو بيكون ردكم على هالشخص ؟
احراج , اكيد مابتكون عندي الشجاعة ارد لان الشي يبي له جرئة ,فبتهرب من الاجابة و مابعطي الجواب الصحيح او يمكن شي ب الغلط



شكرا ع الطرح

 

[S p y e r]

[MENTION=30296]NoOony.A[/MENTION] شكرا على المرور الجميل

ليش إحراج ؟ هل انتين مسوية شي غلط ؟ ما تحسين ان لش الحق أنش تضربين أي شخص بلوك سواء تعرفينه أو ما تعرفينه ؟
عشان نتذكر بس ، المطورين خلوا هالخيار Blocking تحت قائمة إسمها Privacy وللي ما يعرفون معناتها إسمها ( خصوصية )
معناته ان احنا هني نتحكم بخصوصيتنا وما نتدخل بخصوصيات غيرنا --> الي ابي اوصل له أن البلوك ما يعتبر إهانة للغير ، توافقيني ؟

 

[royal-rose]

عن نفسي أستخدم البلوك ف حالة وحدة

يعني مثلًا من فترة تجيني مسجات وتس اب من ارقام غريبة و ارقام من خارج البحرين ، ف عشان اتفادى أي مشكلة ممكن تجي من وراهم ، و عشان م أعور راسي وي ناس فاضية م عندها شغل و لا مشغلة الحل الأمثل هو البلوك ​

 

[Prince Mna7y]

انا اي واحد اسلوبه غلط بلوك

 

[NoOony.A]

@NoOony.A شكرا على المرور الجميل

ليش إحراج ؟ هل انتين مسوية شي غلط ؟ ما تحسين ان لش الحق أنش تضربين أي شخص بلوك سواء تعرفينه أو ما تعرفينه ؟
عشان نتذكر بس ، المطورين خلوا هالخيار Blocking تحت قائمة إسمها Privacy وللي ما يعرفون معناتها إسمها ( خصوصية )
معناته ان احنا هني نتحكم بخصوصيتنا وما نتدخل بخصوصيات غيرنا --> الي ابي اوصل له أن البلوك ما يعتبر إهانة للغير ، توافقيني ؟

احراج مو لان الشي غلط
بس الصراحة يبي لها جرئة , و ف نفس الوقت ممكن تجرح مشاعر البعض فنتفادها احيانا كذوق و اسلوب مننه

بقية الكلام اي اتفق و صح
بس بعض العقول ماتفهمها ب الاسلوب الي احنه نفهمه
و ف الاخير ارضاء الناس غاية لاتدرك

 

[النجم الزاهر]

ما عمري استخدمت لبلوك الا في شي واحد

لين واحد سوا ليي منشن في الانستغرام وانا لانا ضايفنه ولا اعرفه

اهي استخدم لبلوك

ما في طريقة غير حق نتخلص من هالاوادم

 

[CS55]

-

يقول شنو هي الأسباب الي تدفعنا أن إحنا نعطي شخص معين بلوك على شبكة التواصل الإجتماعية ؟
ممكن لأنه مزعج و كومنتاته بايخة أو ممكن لأنه stalker .. أو ساعات شخص بيني و بينه شغل رسمي
فأعطيه رقمي عشان نتواصل بشأن هالشغل يقوم يدخل لي الواتساب و كل يوم يدز لي برودكاستات مالها علاقة بالشغل
فأضطر أعطيه بلوك و اكتفي بالمكالمات معاه


ليش إحنا نفعّل هالخيار ( لحد يمزح ويقول جزر ) ضد أشخاص معينين ؟
كل ما كان الشخص مزعج و غثيث و فضولي بتضطر تحط حد لعلاقتك معاه

هل هالشي يكون سببه نقطة وحده بس أن هالأشخاص ضايقونا وبالتالي نعطيهم بلوك ؟
اي

هل في أسباب ثانية ممكن تدفعنا نعطي الناس بلوك حتى لو ما سووا لينا شي يضرنا ؟
طبعا لا ! ماله داعي تعطي شخص بلوك بدون سبب ! حزتها بتكون مو طبيعي

هل في إحتمال إحنا نضرب ناس بلوك عشان أنه هالناس ممكن يكونون أصدقاء حق ناس ما نحبهم ؟
لا ! ليش هالتعقيد . . ماله داعي

مسآحة أتركها ليكم ، راووني إبداعكم و إطرحوا كل الإحتمالات الي مرت عليكم وأدت إلى البلوك ..
إطرحوا رأيكم في البلوك نفسه ، هل هو إهانة ؟ وسيلة للهروب ؟ وسيلة لتفادي الإزعاج ؟ وسيلة لحجب أشخاص عن معرفة تفاصيل حياتنا ؟
إذا شخص عطيته بلوك و اعتبره إهانة ! ليش ما يراجع تصرفاته قبل عشان يتجنب يحصل إهانات من الناس؟
البلوك وسيلة لتفادي الإزعاج لا أكثر و لا أقل

لو كلمكم شخص وقال: " ليش عاطني بلوك ؟ " شنو بيكون ردكم على هالشخص ؟
أيي عادي ليش لا ! صارت لي . . و قلت أنكم مضايقيني و عادي تصارحنا و انتهت المشكلة
الشخص لازم ما يآخذ تصرف إلا أهو قده .. يعني مو فن تعطي أحد بلوك و عقب تقول بالغلط
لأن حزتها بتكون مو قد قراراتك و منافق . .
الصراحة أهم شي في أي علاقة
​

 

[7aneen]

السلام عليكم و رحمة الله ..

عليكم السلام و الرحمه

إستوقفني برودكاست أتوقع إنشهر بين الناس عنوانه ( تخيلوا حياتنا بدون مجاملات )

..--..--..

نبي نزوركم اليوم ؟ - لا والله مشغولين
ليش مشغولين ؟ - كيفنا ما نبيكم ‹☺›

..--..--..



ما أتوقع أن في أحد فيكم ما إستعمل البلوك في يوم من الأيام
صحيح
بس السؤال الي يجرّ نفسه هني ، ويطرح أبواب الفضول ..

يقول شنو هي الأسباب الي تدفعنا أن إحنا نعطي شخص معين بلوك على شبكة التواصل الإجتماعية ؟

لان هالشخص اكيد يضايقنا بشكل او بآخر .. او عدنا وياه مشكله .. المهم البلوك باختصار : لا تكلمني و لا اكلمك , خلك في حالك و خلني في حالي

ليش إحنا نفعّل هالخيار ( لحد يمزح ويقول جزر ) ضد أشخاص معينين ؟

تجنباً لهالشخص / هروب من هالشخص

هل هالشي يكون سببه نقطة وحده بس أن هالأشخاص ضايقونا وبالتالي نعطيهم بلوك ؟

اعتقد اي لان اذا شخص اني عادي وياه و كل شي ليش اعطيه بلوك ؟

هل في أسباب ثانية ممكن تدفعنا نعطي الناس بلوك حتى لو ما سووا لينا شي يضرنا ؟

يمكن

هل في إحتمال إحنا نضرب ناس بلوك عشان أنه هالناس ممكن يكونون أصدقاء حق ناس ما نحبهم ؟

ع حسب الموقف .. بس اعتقد في احتمال


إطرحوا رأيكم في البلوك نفسه ، هل هو إهانة ؟ وسيلة للهروب ؟ وسيلة لتفادي الإزعاج ؟ وسيلة لحجب أشخاص عن معرفة تفاصيل حياتنا ؟

كل ما سبق صحيح

لو كلمكم شخص وقال: " ليش عاطني بلوك ؟ " شنو بيكون ردكم على هالشخص ؟

اكيد ما بعطي احد بلوك بدون لا اقول ليه وش السبب , او بدون ما يعرف هالشخص شنو السبب الي يخليني اعطيه بلوك
رده فعلي : بقول ليه : انت تعرف السبب ..

....​

 

[7aneen]

الصراحة أهم شي في أي علاقة

+1

 

[Prince.11]

بالنسبة ليي أرى ان البلوك يعود الى عدّة أسباب ..
و على فكرة قد يكون استخدام البلوك مفيد للشخص ..

بمعنى بعض الأمور فعلًا تحتاج الى بلوك للراحة منها ..
مثل المسجات الغريبة او الكلام المعسول الغلط او غيره من هذه الأمور ..

ذكرت احدى الاخوات قبلي ان توصلها مسجات غريبة على الواتس اب ..
هذِ الشغله منتشرة هالايام والهدف منها الهكر بالدرجة الأولى ف الحل هو البلوك ..

امّا الطريقة الثانية لأستخدام البلوك وهو الاستخدام العادي ..
مثلًا لتفادي شخص ، او عدم السعي وراء محادثته ..

في نفس الوقت الشخص القائم ب البلوك ما يبي يتطرق الى القول مباشرة للشخص ..
لربما تفاديًا من مشاكل معيّنه أو أي ردة فعل من الشخص المقابل ..

مثلًا نحن كشباب أو هُنْ الشابات يستخدمون البلوك في الحياة التكنولوجية اليومية ..
لأسباب قد تعود الى " ما اكلم فلان أو فلانه - ابي اتهرب من هالشخص - هالشخص مزعج - ما عنده سالفه - وايد يتكلم " ..

في الحقيقة أن اغلب استخدامات البلوك في النوع الثاني لهذه الأسباب ..
تعود الى تهرّب صاحب البلوك من مواجهة الطرف الاخر يتطرق الى البلوك و السلام ..

طبعًا انا اشوف استخدام البلوك متفاوت بين الشباب و الشابات ..
بعضهم يقدر يواجه الشخص ويقوله لا تكلمني أو انا ما عندي الاستعداد للمحادثة معاك ..

والبعض الاخر يرى في البلوك الراحة ..
سوّ بلوك و ارتاح من هالشخص و خلاص ..

لكيّ لا يفوتني .. لربما البلوك كذلك يثير شيئًا من المشاكل ..
ليش فلان سوّا لي بلوك ؟ ما يبي يكلمني ؟ شنو بيني وبينه ؟ ..

فعلًا هذ الأمور تكون في وسط المجتمع الشبابي الناشئ ..

فخُلاصة الحديث .. أرى استخدام البلوك في بعض الأحيان يجب ..
و في البعض الاخر لربما تدور عليه العيون و الكثير من الحديث ..

#وجهة نظر

 

[Jouan7]

للأمانه جذبني الموضوع ..
و من قريته جو ع بالي الناس الي صخيتهم بلوك .. مو نفر و لا 10


شنو هي الأسباب الي تدفعنا أن إحنا نعطي شخص معين بلوك على شبكة التواصل الإجتماعية ؟

من وجهة نظري ممكن يكون هالانسان فضولي و متطفل


ليش إحنا نفعّل هالخيار ( لحد يمزح ويقول جزر ) ضد أشخاص معينين ؟

مثل ما قلت ف السوال ال سبق ,, في ناس معينين الواحد ما يتحمل تطفلهم

هل هالشي يكون سببه نقطة وحده بس أن هالأشخاص ضايقونا وبالتالي نعطيهم بلوك ؟

لا ,,بالنسبة لي ما اعطي بلوك الا بعد ما خلاص نفسي تنسد و ما تنفع كل الحلول لابعادهم

هل في أسباب ثانية ممكن تدفعنا نعطي الناس بلوك حتى لو ما سووا لينا شي يضرنا ؟

م اعتقد .. لا

هل في إحتمال إحنا نضرب ناس بلوك عشان أنه هالناس ممكن يكونون أصدقاء حق ناس ما نحبهم ؟

لا .. اني مو من النوع الي جدي ..!

مسآحة أتركها ليكم ، راووني إبداعكم و إطرحوا كل الإحتمالات الي مرت عليكم وأدت إلى البلوك ..
إطرحوا رأيكم في البلوك نفسه ، هل هو إهانة ؟ وسيلة للهروب ؟ وسيلة لتفادي الإزعاج ؟ وسيلة لحجب أشخاص عن معرفة تفاصيل حياتنا ؟

ممم .. صراحه .. البلوك هو احسن شي يستوي في البرامج .. مع اني مو ع طول اطخ الناس بلوك بس ما استعمله الا اذا صق صق جززت نفسي من الي يصير ..
ماهو اهانه ,, يعني اني ما استعمله وقت الي اتهاوش مع شخص .. بس هو وسيلة للهروب و تفادي الاشخاص ,, خصوصا اللفدين و الي يبون يكونون في كل تفصيل من حياتك .. و بشكل ممل و ثقيل دم .. و غصبا عنك ..

لو كلمكم شخص وقال: " ليش عاطني بلوك ؟ " شنو بيكون ردكم على هالشخص ؟

على كل الي يصير بعد ما احب اجرح و اقول انت جدي و انت جدي ..
بس اقول كنسلت البرنامج او اني مثلا غيرت رقمي ..
و افتك من الطحنه بعد مرة وحده

 

[_ALI_]

معنى البلوك بالنسبة لي ؟
- انت غير مرغوب فيك نهائيا (ابتعد عني)
لكن ممكن اتراجع عن قراري اذا حسيت الشخص تغير مثلا

متى استخدم البلوك للناس ؟
- استخدم البلوك وفق حدود صارمة ، اذا تجاوزها الطرف الآخر اكثر من مرة ممكن اعطيه البلوك بدون تردد
- امر آخر جعلني اعطي اكثر من نصف رفاق المدرسة بلوك بمجرد فتحي للانستغرام هو تحملي الشديد عليهم طوال فترة المدرسة "مثلا : يلقبني بلقب لا احبه ، يضربني ، ينزل من قيمتي امام الآخرين" ، و السبب الاساسي لهذا الفعل لاني ما ابغيه يفسد باقي حياتي بتفاهاته (كفاية المدرسة)

ماذا اشعر اذا اكتشف الشخص باني عطيته بلوك و كلمني مباشرة عبر الواتس اب ، او مكالمة ، او وجه بوجه ؟
- اذا حسيت كلامه ما يعجبني و قاعد يهددني مثلا ، بدون تفكير "بلوك" في الواتس اب بعد. و اذا كان يكلمني بالصوت ، عادي جدا اقطع الخط في وجهه. اما اذا وجه بوجه "فهذا الشيء مستحيل لاني ما راح اعطيه وجه من اساس و بعامله مثل الغريب او اكثر في بعض الاحيان"

اما بالنسبة الى اصدقائهم او اشخاص ما اعرفهم
- يعتمد على الشخص و نوع اصدقائه ، مثلا اذا ضايفني علشان يكلمني من طرف رفيقي (الا عاطنه بلوك) او يبغي يوصل كلامه لي ، فعادي اعطيه بلوك هو الآخر

 

[المهندس عبدالله]

السلام عليكم و رحمة الله ..


إستوقفني برودكاست أتوقع إنشهر بين الناس عنوانه ( تخيلوا حياتنا بدون مجاملات )

..--..--..

نبي نزوركم اليوم ؟ - لا والله مشغولين
ليش مشغولين ؟ - كيفنا ما نبيكم ‹☺›

..--..--..


ما أتوقع أن في أحد فيكم ما إستعمل البلوك في يوم من الأيام
بس السؤال الي يجرّ نفسه هني ، ويطرح أبواب الفضول ..
يقول شنو هي الأسباب الي تدفعنا أن إحنا نعطي شخص معين بلوك على شبكة التواصل الإجتماعية ؟
اذا شخص نرفزني وجوده، ما ابغيه يراقبني او ما ابغه يعلق على صور، او اعلانات تجاري xD
ليش إحنا نفعّل هالخيار ( لحد يمزح ويقول جزر ) ضد أشخاص معينين ؟
احيانا الخوف، ييني في ناس من اهلي مسوين لي بلوك ليش لا تسئلني لحد احين ما اعرف ليش بس مو مهتم ليش (ممكن يطون صور خاصة ما يبوني اشوف)
هل هالشي يكون سببه نقطة وحده بس أن هالأشخاص ضايقونا وبالتالي نعطيهم بلوك ؟
اي عادي على المزاج، حتى اذا ما عجبني شكله اسوي بلوك
هل في أسباب ثانية ممكن تدفعنا نعطي الناس بلوك حتى لو ما سووا لينا شي يضرنا ؟
اي، ما سته لايك على صورة معينة متهاوش وياه وما ابغي اشوف شكله
هل في إحتمال إحنا نضرب ناس بلوك عشان أنه هالناس ممكن يكونون أصدقاء حق ناس ما نحبهم ؟
اي ممكن، ليش تماشي ناس منحرفين انته من طختهم وانا ما اتابع ناس منحرفة
مسآحة أتركها ليكم ، راووني إبداعكم و إطرحوا كل الإحتمالات الي مرت عليكم وأدت إلى البلوك ..
إطرحوا رأيكم في البلوك نفسه ، هل هو إهانة ؟ وسيلة للهروب ؟ وسيلة لتفادي الإزعاج ؟ وسيلة لحجب أشخاص عن معرفة تفاصيل حياتنا ؟
وسيلة لحجب اشخاص معينين انا مو مهتم اب وجودهم
لو كلمكم شخص وقال: " ليش عاطني بلوك ؟ " شنو بيكون ردكم على هالشخص ؟
من أنت ما ابغيك تشوف حسابي

أنتظر تفاعل في الموضوع ​

 

[Zerra]

يقول شنو هي الأسباب الي تدفعنا أن إحنا نعطي شخص معين بلوك على شبكة التواصل الإجتماعية ؟
ماكون مرتاح

هل هالشي يكون سببه نقطة وحده بس أن هالأشخاص ضايقونا وبالتالي نعطيهم بلوك ؟
أكيد ، وممكن ما ترتاح ادا تتكلم وياه ، أو تحسّ انه مو من النوع الى تبي تبني وياه علاقة

هل في أسباب ثانية ممكن تدفعنا نعطي الناس بلوك حتى لو ما سووا لينا شي يضرنا ؟
في أسباب تعلّ الجبد وتجبر روحك تعيطه بلوك

هل في إحتمال إحنا نضرب ناس بلوك عشان أنه هالناس ممكن يكونون أصدقاء حق ناس ما نحبهم ؟
لا تعليق @@

مسآحة أتركها ليكم ، راووني إبداعكم و إطرحوا كل الإحتمالات الي مرت عليكم وأدت إلى البلوك ..
أنا شخصيًا ، أي منشن من شخص ما اعرفه أعطيه بلوك ، واعطي راعي الحساب وراه بلوك ،
وبعض الاشخاص الي يسوون فولو ، وما تقبل ويرجع أكثر من مرة يسوي لك فولو ، أعطيه بلوك

 

[Maram.]

وعليكم سلام موضوع جميل ويستحق الرد

شنو هي الأسباب الي تدفعنا أن إحنا نعطي شخص معين بلوك على شبكة التواصل الإجتماعية ؟
اذا كان مافي امل انه يتعدل او مامنه خير بختصار بلوك من نفس البرنامج واذا جفت من غلط بعد ف برنامج 2 عطه بلوك اهيه فرص مثل ماتقول ولي يعطي بلوك فبرنامج يلحق ويعطيه بلوك ف برنامج 2 حق ترد الحركه =)) انه انا بعد مابيك حبيبي=))

هل هالشي يكون سببه نقطة وحده بس أن هالأشخاص ضايقونا وبالتالي نعطيهم بلوك ؟
أي اكيد البلوك يدل ع انه كلش ماتبي هلانسان خير شي والبلوك حلو لان يبين الأشخاص الي يبونك لي مايبونك

هل في أسباب ثانية ممكن تدفعنا نعطي الناس بلوك حتى لو ما سووا لينا شي يضرنا ؟
لا بس حق الي يضرونا شخصيا
هل في إحتمال إحنا نضرب ناس بلوك عشان أنه هالناس ممكن يكونون أصدقاء حق ناس ما نحبهم ؟
لا كلش

 

[وحيد كالقمر]

انا من احس الشخص يستغلني مباشرة اعطيه بلوك واللبيب بالاشارة يفهم

اخر وصلوا ثلاثة اخر فصل ضربتهم بلوك
يمكن انا كنت مضغوط بسبب الدراسة ويجيبونك ناس يرفعون ضغطك زيادة
اوكي اذا انا اقدر اساعد واعلم ماببخل بس مو لدرجة الاستغلال

 

[علي البلادي]

ذكرتني بواحد من فقراء الأدب لخيته بلوك عقب رحت بسطت وي الشباب الا يقول لي ما اشوف حسابك الحين ما يطلع لي ! فقلت ليه بكل برودة أعصاب لخيتك بلوك

 

[غريبة الدار]

شنو هي الأسباب الي تدفعنا أن إحنا نعطي شخص معين بلوك على شبكة التواصل الإجتماعية ؟
تختلف الأسباب ممكن يكون شخص مزعج في (شبكة التواصل الأجتماعي )

ليش إحنا نفعّل هالخيار ( لحد يمزح ويقول جزر ) ضد أشخاص معينين ؟
تجنب ل الدخول في نقاش أو كلام مع أشخاص غرباء أو أشخاص سيئين أخلاقيا وتعريض النفس لكلام ومشكلات احنا في غنى عنها....الخ

هل هالشي يكون سببه نقطة وحده بس أن هالأشخاص ضايقونا وبالتالي نعطيهم بلوك ؟
ممكين اي ممكن لا

هل في أسباب ثانية ممكن تدفعنا نعطي الناس بلوك حتى لو ما سووا لينا شي يضرنا ؟
اعتقد أي في السوشل ميديا وكثير الأشخاص اللي تستخدمه من البلد وخارج البلد ومن العائلة وخارج العائلة ومن الجنسين ومن ثقافات وديانات .......الخ عادي بكل بساطه يجي شخص يطلب أضافة نرفض لأنه غريب ويرد يطلب قبول متابعة ونرفض .........الخ هو صح يمكن ما سوو شي يضرنا بس ....
شي ثاني بجي شخص من الجنس الثاني وما نعرفه وبس جدي من الفضاوة أو الملل أولأنه ما في أحد يتكلم وياه أوضايق خلقه يجي يبي يتكلم ويدردش لحظة انزين هو ما قاعد يضرنا بس غلط نقعد نتكلم وندردش ونسولف وي شخص غريب
هل في إحتمال إحنا نضرب ناس بلوك عشان أنه هالناس ممكن يكونون أصدقاء حق ناس ما نحبهم ؟
هههههههه بالنسبه لي ما اعتقد أسوي هالشي

مسآحة أتركها ليكم ، راووني إبداعكم و إطرحوا كل الإحتمالات الي مرت عليكم وأدت إلى البلوك ..
إطرحوا رأيكم في البلوك نفسه ، هل هو إهانة ؟ وسيلة للهروب ؟ وسيلة لتفادي الإزعاج ؟ وسيلة لحجب أشخاص عن معرفة تفاصيل حياتنا ؟
إحدى الزميلات اللي ما أعرفها ولا أدري من هي على أرض الواقع جايه تكلمني على الخاص بخصوص انتخابات الجامعة والترشيح الشي ازعجني وبلوك خصوصا أنه كذا شخص قاموا يكلموني في الجامعة في الوتساب وه الأدمية طلعت لي من الأنستا واني ما أعرفها
أحدى الحسابات التجارية والأعلانات يطلب قبول بالمتابعة أرفض ويرد يطلب أرفض ويرد يطلب لين صار مصدر أزعاج طفشت منه وبلوك
أشخاص من الجنس الثاني يجون يبون يدردشون ويسولفون ويتعرفون بعد أعطي بلوك
أشخاص يجون يتكلمون بدون أسلوب محترم ويتجاوزون حدودهم وما يكونون محترمين ويعرضون أشياء خادشة للحياء بعد بلوك
وهالفترة رقم من تركيا للمره الثانية يجينا اتصال وفي حال تكرر للمره الثالثة بعد بسوي بلوك
إذا ما كان فيه سبب مقنع أو مبرر والسالفة سالفة مزج ممكن تعتبر أهانة ونقدر نعتبرها بعد وسيلة للهرب وبعد لتفادي الأزعاج وبعد نفس ما قلت لحجب أشخاص عن معرفة تفاصيل حياتنا أو خل أقول بدل تفاصيل حياة طريقة تفكير وثقافة وآراء واهتمامات

لو كلمكم شخص وقال: " ليش عاطني بلوك ؟ " شنو بيكون ردكم على هالشخص ؟
اممم على حسب من هالشخص اعرفه لو لا من الأهل لو لا .....الخ اعتقد أني بكون صريحة واضحة أزعجتوني ضايقتوني وأسلوبكم مو محترم ........الخ

 

[c o d e]

يستاهلون ,,
تجنبا للمزعجين وللعيش بسلام ..