رسالة إيجابية ~

[بنفسجيه.~]

السلام عليكم و الرحمه،،
تشجعت اكتب هالموضوع لسبب ما...
​

مع احتكاكي مع طلبة السنوات الاولى في الجامعة ..اللي للحين عندهم مشكلة في الثبات على تخصص معين او البقاء في الجامعة....يمكن ما قدرت اوصل ليهم التالي بصورة اوضح..علشان جدي قررت انزله اهني كموضوع بما نه نتائج التحويل قريبا..

تعلمت من جامعة البحرين بالتحديد..
انك اذا تبغي شي و تبغي توصل اليه لازم تتحمل خصوصا في البداية..لانه اكثر فترة بتحس فيها بصعوبات ..بعدين لما تعتاد الشي بيصير اسهل..اعني بهالشي طلبة سنة اولى و ثانية..فيه نسبة ليست بقليلة من الطلبة اللي تغير تخصصها او تطلع من الجامعة لما تشوف نتايجها اول كورس ..فينصدمون انه ليش مستواهم جدي و يحسون باحباط و انه الهروب هو الحل الوحيد اليهم!..

انزين انت اذا غيرت تخصصك و رحت لتخصص ثاني "على قولتهم بنروح للاسهل" >يعني تخصص في كلية الاداب حيث المعظم يكون مصيره الى هالكلية بعد التحويل"...اذا حولت و بدأت تدرس اكيد راح تواجهك مشاكل دراسية ثانية بعد بترد تقول انا ما اقدر اتحمل انه درجات والمعدل يقل او ما اقدراتحمل الضغط!...اللي اقصده انه لازم الواحد يغير قناعاته من الداخل فهذا الاهم ...اذا فشلت في انك تكمل تخصص يمكن لانه تفاجئت فيه مع طريقة الدراسة في الجامعة...لكن لازم تتعلم من هالتجربة و انك تتغير من الداخل علشان تقدر تمشي في التخصص الجديد..و الا فانه المصير بيكون واحد!...

لا تدرس الشي بس علشان انا ابغي ادرس و او علشان اسمها شهادة جامعية...بالعكس سهل عليك الوضع ..تقبل التخصص اللي تدرسه و ما عليك من الكلام اللي يقولونه..في كل شي لازم بتحصل ناس تنتقد!...لانه مو شرط يكون عاجب الكل و مو شرط الشي اللي تحبه يرضى الكل...

في ناس تغير تخصصها على انه رغبتها و تتمنى تواصل فيه ..بس من تشوف درجاتها نازلة ما تتحمل " منها تخصصات كلية العلوم" ينفرون من النظام المتبع فيه و ما يتحملونه..لكن اذا يحسون انه في امل انهم يقدرون يتحملون المفروض يعطون لروحهم فرصة مو مباشرة انسحاب..و مع التعود كل شي صعب يهون...

-عن نفسي..ما كانت بدايتي احسن من غيري ..رتبة التفوق ما حصدتها من البداية!...دخلت الجامعة و تفاجئت كاي طالب ثاني "بنظام الجامعة + بنظام كلية العلوم و طريقة الدراسة فيها "... حاولت قد ما اقدر انه اصمد اول كورس بس جاءت النتيجة "انه احد المواد رسبت فيها + مادة التخصص كنت دارستنها ذاتي و نجحت فيها بدرجة متدنية + وباقي المواد ما كانوا اعلى منها فالمعدل انقصف عدل " ..فجاني احباط + غير الكلام الناقد اللي ما يخلص حتى ما اذكر اني سمعت كلام يشجعني كثر الكلام المحبط..معظم اللي حولي كانوا يحسون اني ما بقدر اواصل و نصحوني و ظلوا يشجعوني انه اغير التخصص!.. بس من داخلي فيه شي دفعني انه اواصل "كلامهم خلق في داخلي تحدي ..اني ادري من داخلي اني اقدر و باثبت اليهم اني اقدر اواصل "..و هالشي نفسه اللي وصلني الى ما عليه اليوم وما كان طبعا سهل... إلا ما يصير انه بكل كورس مريت عليه فيه مادة دسمة او صعبة او جدول مزدحم او دكتور ما عنده مؤهلات! لكن بفضل ربي و ثقتي به قدرت في كل كورس انه ارفع المعدل بنسبة معقولة الى انه وصلت الى معدل ال3 و اعلى..و للحين احاول انه ارفعه اكثر و اصمد ازيد وللحين قدامي جزء من الطريق لازم اشد فيه ازيد ..

اللي ابغي اقوله انك اذا تبغي شي و من داخلك عندك ارادة اليه راح تقدرتحصل عليه..سوي اللي عليك و توكل على الله..

الى كل طالب سنة اولى او ثانية..و الى كل طالب بيتجه لتخصص جديد ..يمكن ما تحصل التخصص اللي يناسبك من البداية و تتطر تحول التخصص..لكن الشي الاهم انك تكون مقتنع فيه من الداخل و مستعد تكمل فيه..لا تخلي داخلك رسائل سلبية " مثل اللي يقول انا ما أقدر ..او بكمل هالتخصص و انا ما احبه ..هالتخصص ما منه فايدة..ما وراه مستقبل..كل ربعي تخصصاتهم احسن مني..الخ". هالشي واجد ياثر على الشخص والمفروض يستبدله برسائل ايجابية..يعني انت المفروض تشجع نفسك و لا تنتظر احد يشجعك و لاتخلي احد يأثر على قرارتك..
حطوا ببالكم انه مافيه شي خال من الصعوبة حتى لو كان تخصص اسهل من تخصص..لازم تتحملون اكثر علشان تقدرون تواصلون في " جامعة البحرين بالتحديد"... وتفائلوا انه الله اكيد راح يعطيكم على قد تعبكم

و بالتوفيق جميعا

 

[مارد المصباح]

كلام جميل ومهم فعلا لاغلب الطلاب الجدد في الجامعة ..

حبيت اضيف شغلة بسيطة وهي ان في مشاكل جماعية يعانون منها اغلب الطلاب في بداية مسيرتهم الدراسية الجامعية واهمها هي تدني وضعف اللغة الانجليزية -وهذه مشكلة عامة- ،والشغلة الثاني او الواحد يضيع ويتيه في المصطلحات الجامعية وانظمة التسجيل والحضور وو

في اختلاف في عدة امور بين نظام المدرسة والجامعة لذلك حاول قد ما تقدر ان تسال وتتبحث ،واعرف شنو الحلول ونقاط الضعف الا تعاني منها شخصيا

لا تعتقدون انكم فاشلين ،او من كثر ما تسمعون كلمات سيئة عن الدراسة في جامعة البحرين فتعتقدون انكم غير مؤهلين للنجاح والتخرج منها !


لكل مشكلة حل ،وكثييير كثير من الطلاب اتخرجوا من الجامعة رغم مشكلة الانجليزية الا واجهتهم في البداية او مشكلة انظمة التسجيل او الدكاترة السيئين او او


اخلق لنفسك هدف من دراستك حتى تتحفز وتتحمس للوصول له



لا تستلم ... انت تقدر ... انت ناجح ... انت مميز
​

 

[Prince.11]

يمكن كانت لي ردود كثيرة حول هذا الموضوع ..
وهذ المشكلة مستمرة عام بعد عام ..

أتوقع المشكلة الرئيسية تكمن في ..
عدم معرفة الطالب المقدّم على دراية كافية ..

يعني الطالب المدرسي عند انهائه الدراسة المدرسية ..
المفروض يكون مهيأ 100% للدراسة الجامعة ..

مهيأ من ناحية علمية ومو من ناحية نفسية ..
يعني شلون من ناحية علمية ؟ ؟

يعني الطالب المدرسي على أي أساس راح يختار تخصصه ..
اغلب الطلبة في المدرسة لأخر الأيام ما يدرون وين يروحون ..

ياخذون ورقة التخصصات من جامعة البحرين ..
و يكونون متحيرين أوّ يروحون بناءًا على رغبات الاهل او او ..

المشكلة ان المدرسة ما تهيأ الطلبة تهييء مناسب ..
و لا ندري ما السبب ؟ هل من المدرسة او من الوزارة او الجامعة ..

كنا في المدرسة نطالب ان نزور جامعة البحرين ونتعرف عليها ..
كان رد المشرف الاجتماعي علينا.. ان جامعة البحرين غير الجامعات الباقية ..

انزين النتيجة شنو؟ الطالب يروح تخصصات ..
ما عنده خلفية عنها ولا بأي نسبة ..

البعض يقولك أسأل الى أكبر منك ..
فعلًا السوال مهم.. ولكن هل تعتقد ان السؤال راح يغطي المهم ؟!

مثلًا طلبة التجاري في المدرسة ..
اغلبهم يكونون في البسنز الأقرب لهم طبعًا ..

لكن اذا يروحون الجامعة يتفاجئون بوضع الكلية ..
وضع الدكاترة مثلًا، او حتى بالمنهج و الصعوبة ..

و يظضر الى التحويل او الى الانسحاب ..
فالمشكلة أتوقع من البداية ما كانت صحيحة ..

 

[بنفسجيه.~]

كلام جميل ومهم فعلا لاغلب الطلاب الجدد في الجامعة ..

حبيت اضيف شغلة بسيطة وهي ان في مشاكل جماعية يعانون منها اغلب الطلاب في بداية مسيرتهم الدراسية الجامعية واهمها هي تدني وضعف اللغة الانجليزية -وهذه مشكلة عامة- ،والشغلة الثاني او الواحد يضيع ويتيه في المصطلحات الجامعية وانظمة التسجيل والحضور وو

في اختلاف في عدة امور بين نظام المدرسة والجامعة لذلك حاول قد ما تقدر ان تسال وتتبحث ،واعرف شنو الحلول ونقاط الضعف الا تعاني منها شخصيا

لا تعتقدون انكم فاشلين ،او من كثر ما تسمعون كلمات سيئة عن الدراسة في جامعة البحرين فتعتقدون انكم غير مؤهلين للنجاح والتخرج منها !


لكل مشكلة حل ،وكثييير كثير من الطلاب اتخرجوا من الجامعة رغم مشكلة الانجليزية الا واجهتهم في البداية او مشكلة انظمة التسجيل او الدكاترة السيئين او او


اخلق لنفسك هدف من دراستك حتى تتحفز وتتحمس للوصول له



لا تستلم ... انت تقدر ... انت ناجح ... انت مميز
​

بالضبط..
اللغة الانجليزية مشكلة يمكن المعظم يعاني منها..خصوصا البداية " دائما الطلبة الجدد يسألون :هالتخصص دراسته بالعربي لو بالانج؟...كلشي بالانج؟..الكتب بالانج؟.." ..اللغة الانجليزية صارت لغة مهم و اساسية لازم نتقبل وجودها في الجامعة لانه بتكون شرط اساسي للقبول في مجال العمل بعدين...
و هي ما تعتبر عائق كبير يعني المفروض الواحد ما يخيلها عائق قدامه علشان يقدر يواصل...في البداية يمكن نتفاجأ بان كلشي بالانج ..بس بعدين مع التعود بتصير اسهل و بتتيسر

- نقطة انه يضيعون على نظام الجامعة +التسجيل >هذا حلها بانك تسأل..و الموقع مع برامج تواصل الاجتماعي الثانية من انستا او توتير في طلبة الله يجزيهم خير ما يقصرون..فالواحد يسال علشان يعرف و يتعلم الانظمة ...و حتى اللي يضيعون و هم يدورون السكاشن او مكان في الجامعة عادي اسالوا اي احد تشوفنه في طريقكم و بيدلونكم

 

[بنفسجيه.~]

يمكن كانت لي ردود كثيرة حول هذا الموضوع ..
وهذ المشكلة مستمرة عام بعد عام ..

أتوقع المشكلة الرئيسية تكمن في ..
عدم معرفة الطالب المقدّم على دراية كافية ..

يعني الطالب المدرسي عند انهائه الدراسة المدرسية ..
المفروض يكون مهيأ 100% للدراسة الجامعة ..

مهيأ من ناحية علمية ومو من ناحية نفسية ..
يعني شلون من ناحية علمية ؟ ؟

يعني الطالب المدرسي على أي أساس راح يختار تخصصه ..
اغلب الطلبة في المدرسة لأخر الأيام ما يدرون وين يروحون ..

ياخذون ورقة التخصصات من جامعة البحرين ..
و يكونون متحيرين أوّ يروحون بناءًا على رغبات الاهل او او ..

المشكلة ان المدرسة ما تهيأ الطلبة تهييء مناسب ..
و لا ندري ما السبب ؟ هل من المدرسة او من الوزارة او الجامعة ..

كنا في المدرسة نطالب ان نزور جامعة البحرين ونتعرف عليها ..
كان رد المشرف الاجتماعي علينا.. ان جامعة البحرين غير الجامعات الباقية ..

انزين النتيجة شنو؟ الطالب يروح تخصصات ..
ما عنده خلفية عنها ولا بأي نسبة ..

البعض يقولك أسأل الى أكبر منك ..
فعلًا السوال مهم.. ولكن هل تعتقد ان السؤال راح يغطي المهم ؟!

مثلًا طلبة التجاري في المدرسة ..
اغلبهم يكونون في البسنز الأقرب لهم طبعًا ..

لكن اذا يروحون الجامعة يتفاجئون بوضع الكلية ..
وضع الدكاترة مثلًا، او حتى بالمنهج و الصعوبة ..

و يظضر الى التحويل او الى الانسحاب ..
فالمشكلة أتوقع من البداية ما كانت صحيحة ..

لا انكر انه اللي تقوله صحيح...
هم فعلا انه ما يقدمون اليهم التهئية الصحيحة و يحتاج انه يعطون الموضوع اهمية اكبر...بس سنة احسن من سنة ..يعني على الاقل حاليا موجودة رحلات للجامعة " اشوف انه كل سنة فيه طلبة ثانوية يودونهم و يعرفونهم بالتخصصاتبصورة عامة في محاضرة داخل الجامعة".. اذكر سنتنا 2011 كانت اسوء سنة مع تضاربها مع الاحداث آنذاك فما كانت عندنا خلفية و لو بالقليل عن حياة الجامعة..الحين اللي اشوفه انه يحاولون يطورون هالشي قدر المستطاع و يمكن مو كل المدارس!..
- بس الواحد المفروض ما يحكر روحه على ويش راح تقدم اليه المدرسة عن الحياة الجامعية..مثل ما قلت في ردي السابق قد ما بحث الواحد و سأل في اكثر من مكان و اكثر من مصدر راح تزداد خلفيته اكثر "يعني الواحد لازم يشتغل على روحه بعد مو بس يعتمد على غيره"

و صحيح انه اذا عرف بالسؤال راح توضح ليه الفكرة ..لكن مو معناتها انه خلاص ما بتواجهه صعوبة كلش...يعني التهيئة مهمة لكن ليست الحل الوحيد ...فانه اذا جرب بنفسه الحياة الجامعية بعد بيكتشف اشياء ثانية ...كدكاترة او منهج صعب ..و هالشي اللي لازم يتقبله و يحاول يتأقلم وياه ولازم يصمد في البداية..