.. تَجهِيزَاتكُم الجَامِعِية ..

[M7MDOGRAPHY]

مساء الخ ير ..

ما اعرف اذا بكون الموضوع مكرر او لا ، بس من باب طفولي حبيت اشارككم فيه ..

في داخلي أطفال يبون يروحون المدرسة ، وفي منهم توهم متخرجين هههه و على أبواب جامعية ، ف حبيت نتفاكر وياكم ونتبادل مشاعر وأفكار بعض ..

لما كنا صغار ونجهز أغراض المدرسة ( ثياب / فانيلات / أقصمة / صراولة / جواتي / شنط / دفاتر / اقلام /..الخ )..

وقتها كنت اكتب الاغراض اللي ابيها ، وطووول ١٢ سنة ارسم لي لووك اطلع فيه ف المدرسة
"كانت دراستي لهالموضوع شاملة، العن يومي بس "، اذكر بصف سادس ..
كنت "ما البس الا اقمصة وعليها السير اللي حرف x على الظهر وبنطلون رصاصي ،ويوم اللي علينا رياضة البس فانيلة و برمودة بيضة " وما اذكر بأي سنة خديت الجوتي اللي فيه ليتات تحت ، ..

واذكر بصف ثالث اعدادي ، كان مزاجِ البس نظارة طبية ، لوازم الكراكتر الجديد ..
واشياءات يعني حسبي ع ابليس بس ههههه ..
وف شغلات كنا نقعد نحن ونصيح على اشياء نشوفها الحين تافهة بس لما كنا بوقتها نتمنى نحصلها لو على حساب اشياء ثانية ..

وننتظر أول يوم .. ولأن ما فينا صبر فما كان يجينا نووم عشان بكرة أول يوم ،
بس عشان نلبسهم
.. وبعد ما نكشخ فيهم ..
نسوي إعلانات ودعايات عرض أزياء في البيت أنا وأخواني ..

ف أتنمى مشاركة مشاعركم الطفولية والمدرسية ، و تشاركونا تجهيزاتكم الجامعية ، خصوصاً الدفعة الجديدة والدفعات القديمة .. نترقب إبداعاتكم ..

موفقين
#دراما_زمان​

 

[إيقاع]

ههه روح طفولية جميلة، وعادي الموضوع متكرر لازم يتكرر كل سنة..
عن نفسي هالفصل الصيفي دمّر النفسية التجهيزية ، كلما يجون أخواني: " منروح نشتري أغراض المدرسة " بمعنى تعالي اشتري للجامعة... " توكلوا وخلوني في سبيلي لطفا يعني "
غير ذا أنتظر التجهيز الفعلي الوحيد كالعادة: يجيني خلق أفصل عبايات بس أساسا عباية مفصلتنها من شهر رمضان للحين ما رحت جبتها .. أيضا بسبب الصيفي.
أصلا كل خمول وكسل ولا مبالاة السبب الصيفي
على الأغلب بنتظر تفتح المدارس.


- قرأت الدفعة الجديدة، وحسيت بإحساس مهيب لم نعد هذه الدفعة بعد اليوم. #انتهى_زمن_السنفرة #ارجعوني

 

[NoOony.A]

مآجهزت ولشي
كله طلعات مطاعم و هياتة ما افضي اتسوق تسوق فعلي
يبيلي افصل عبايتين
و شنطة
و جواتي
اصلا توني معطلة مافكرت ف الجامعة و اغراضها
ورايي اشيا وايد
احس نفسي مزحومة من داخل عليي اشياءات بس يبي ليها وقت و مزاج و اشوف ربعي

 

[المهندس عبدالله]

ما اجهز شي اقلام زرقان دفتر أبو 5 مواد

 

[بنفسجيه.~]

"كانت دراستي لهالموضوع شاملة، العن يومي بس "، اذكر بصف سادس ..
كنت "ما البس الا اقمصة وعليها السير اللي حرف x على الظهر وبنطلون رصاصي ،ويوم اللي علينا رياضة البس فانيلة و برمودة بيضة

ههههه واني عبالي بس الاجانب اللي يلبسون جدي..بس زين ستايل ههه

ف أتنمى مشاركة مشاعركم الطفولية والمدرسية ، و تشاركونا تجهيزاتكم الجامعية ، خصوصاً الدفعة الجديدة والدفعات القديمة .. نترقب إبداعاتكم ..

- تجهيزات المدرسة ليها نكهة خاصة...خصوصا سوالف القرطاسية ..للحين اخواني الصغار اذا يشترون ليهم يذكروني بايام الطيبيين..
و ليلة اول يوم اخس من ليلة العيد كانت..اقعد انتظر النومة لمدة طويلة #ارق_عبارة_من_كثر_الاشتياق_للمدرسة ههههه..و من يجي الصبح احس هم و انزاح "اخيرا جى الصبح"..
- اما الجامعة ..اذكر لما كنت توني بادخل و شفت موضوع مشابه لهالموضوع ظليت اتابعه و اشوف ويش يجهزون "عن يفوتني شي و منها نزيد الحماس"...حاليا صرت من الدفعات القديمة بس ما احب اقول ما ليي خلق اجهز..سوالف التجهيزات و التشري ما امل منها ..و منها اخلي نفسيتي متهيئة ازيد للدوام

يعني 75% تم التجهيز...و للحين باقي بعد

 

[royal-rose]

اخذت أقلام ملونة ، من باب التغيير
اشجع روحي عن ي زعم

و ماركرات فلاش

ابي اخذ دفتر حليو

كل م اجوف دفتر اقول لا م باخذه بجيبون احلى منه

لكن تجهيزات المدرسة بعد كانت غير
ايام فن كانت

 

[رَحِيــلْ ،]

ما جهزت شي للحين، بس على هالأسبوع أو الأسبوع الجاي - بإذن الله - أبدي تجهيز.
يمكن شي واحد برّزته وهو تخطيطي متى بنام كل يوم أيام الدوام حسب جدولي


لحظة صحي اتذكرت..
صار إن رحنا السعودية فخذيت جوتي ودفتر مذكرات صغير..
جان بشتري أقلام ونجفت عنهم.
بس ده على ما أذكر،

شغلة مهمة بعد مجهزتنها وهي نفسيتي..


على أيام المدرسَة ما عندي ذكريات واجد في عملية الشراء يمكن لأن أكثر شي الأهل ياخذون القرطاسية وهالسوالف بناءً على خبرتهم في الأفضلية، ومع ذلك كان فيه فرص لاختيار أشياء إضافية وشرائها..
كنت أتحمّس لاستخدام الأشياء الجديدة على كل حال
في أول يوم دراسي أسجّل وش يبون المعلمات وأرجع أتخيّر، وطبعًا أكون جاية بالمقلمة الجديدة والأشياءات..
وفيه شغلة ما كنت أحبها وهي شراء الثياب وتفصيل المراييل.. كنت أتملل فيها ما أدري ليش.. يمكن مرحلة الجواتي كانت أهون!

 

[بنفسجيه.~]

في أول يوم دراسي أسجّل وش يبون المعلمات وأرجع أتخيّر، وطبعًا أكون جاية بالمقلمة الجديدة والأشياءات..

هههه ذكرتيني و الله ايام راحت...من تجي المعلمة نقعد نستلمها: معلمة تبغين دفتر ابو كم؟..و الملف معلمة تبغين لو لا؟..انزين معلمة شلون شكله واي لون ؟
و تالي نقلب على الاقلام...معلمة عادي نكتب باي لون؟
طبعا المعلمات انواع ..بعضهم هم بنفسهم بدون ما نسال تصف لينا طلباتها..و بعضهم من نقوم نسالهم هالاسئلة يعطونا هالنظرة و تقول عادي! على راحتكم "يعني شفيكم منزهقين ههه"
الحين الجامعة اول يوم يصمونا بمتطلبات المادة من تستات و اسايمنتات ...و نستانس اذا رضوا ما يدرسونا اول محاضرة

 

[كادي]

ابي دفتر مميز هذي السنة ،، مادري اسوي ديزاين معين او اشتري جاهز
حتى فايل ابي حليو
اذا تعرفون مكانات يبيعون اشيا كيوت خبرونا

 

[أمواج]

بالنسبة ليي ما أهتم الى اللبس لأن متعودة كل فترة لين نقصني شي أو في المناسبات آخذ ثياب ممكن تناسب الدوام
خصوصًا أول فصل محرم وصفر أغلبه والثياب كل أسود .. يمكن الشنط والجواتي أعطيهم اهتمام أزيد بشوية
و طبعًا باخذ عباية جديدة

القرطاسية اذا خذيتها أعتبر روحي دخلت على mode الدوام
وأهم شي دفتر ومقلمة بأدواتها وفايل وفيهم شيء من التناسق وأرتاح ليهم
عبارة القرطاسية أصدقائي الدراسيين

 

[الألماسة]

وييي التجهييز للمدارس غييير صدق اياااام و طلبات المعلمات بعد ما نداوم الي ما تخلص

صارلي من اسبوع اسال الربع اذا جهزوا لو لحين و اني اتخااايب عددل ما اجهز الا حزة الحزة
هالكورس اشوف بديت شوي من وقت مقارنة بسنوات الي فاتت بجم غرض ف هالاسبوع
فصلت لي عباية
الجواتي حصلت لي بس صندل
بقى اخذ بعد لي جوتي و شنط
و القرطاسية من قلم و دفتر حزة الحزة طبعا

 

[M7MDOGRAPHY]

فن اجواءكم .. بس ودي اشتري ثياب واداوم بالمدرسة جمن يووم عن خاطري

بالنسبة لي ، للحين ما جهزت ولاشي .. حتى النفسية للحين متعلقة بالعطلة وعليّ الطلاق اذا ضيعت شي منها وبأعيشها لآخر لحظة

وان شاء الله في جمن اليوم المقبلين يتعدل مزاجي شووية واشتري الاغراض

ووبس​

 

[purple.cs]

الاااااه على ايام المدرسة و زهقة اول يوم
كنت اهتم دائما بشراء اقلام ملونة و طبعا مو اقل من ٢٤ لون
غير التناسق الا يضحكني على روحي لما اتذكر الحين ،، لازم الشنطة و المقلمة و الدفاتر كلهم متناسبين ويا بعض

طبعا ايام الجامعة كنت افتر و افتر و افتر لازم ابي دفتر سبشل محد عنده نفسه و لين صادف و شفت احد ف الجامعة نفسي اتغبن

اما السنة تجهيزاتي غير ، رحت ويا اختي و اخوي ياخذون ليهم ثياب و التركيز كان على الحلو الحبوب السنفور الجديد لان ذوقه المصبنجي يقهر ما ينفع للجامعة
قاموسه التسوقي ما فيه اختراع اسمه قميص الا في عيد الفطر ،، خليته يشتري ليه كم واحد عن خاطري يعني و جوتي عشان ما يلبس الزنوبة الكشخة حدها ف الجامعة

 

[M7MDOGRAPHY]

الاااااه على ايام المدرسة و زهقة اول يوم
كنت اهتم دائما بشراء اقلام ملونة و طبعا مو اقل من ٢٤ لون
غير التناسق الا يضحكني على روحي لما اتذكر الحين ،، لازم الشنطة و المقلمة و الدفاتر كلهم متناسبين ويا بعض

طبعا ايام الجامعة كنت افتر و افتر و افتر لازم ابي دفتر سبشل محد عنده نفسه و لين صادف و شفت احد ف الجامعة نفسي اتغبن

اما السنة تجهيزاتي غير ، رحت ويا اختي و اخوي ياخذون ليهم ثياب و التركيز كان على الحلو الحبوب السنفور الجديد لان ذوقه المصبنجي يقهر ما ينفع للجامعة
قاموسه التسوقي ما فيه اختراع اسمه قميص الا في عيد الفطر ،، خليته يشتري ليه كم واحد عن خاطري يعني و جوتي عشان ما يلبس الزنوبة الكشخة حدها ف الجامعة

هههههه ، عادي ياما صارت ورحنا الجامعة بثياب نوووم :mask:

 

[المهندس محمود]

اما السنة تجهيزاتي غير ، رحت ويا اختي و اخوي ياخذون ليهم ثياب و التركيز كان على الحلو الحبوب السنفور الجديد لان ذوقه المصبنجي يقهر ما ينفع للجامعة
قاموسه التسوقي ما فيه اختراع اسمه قميص الا في عيد الفطر ،، خليته يشتري ليه كم واحد عن خاطري يعني و جوتي عشان ما يلبس الزنوبة الكشخة حدها ف الجامعة

شوي شوي على الشيخ، لازم تجرحون مشاعره

 

[مارد المصباح]

الاااااه على ايام المدرسة و زهقة اول يوم
كنت اهتم دائما بشراء اقلام ملونة و طبعا مو اقل من ٢٤ لون
غير التناسق الا يضحكني على روحي لما اتذكر الحين ،، لازم الشنطة و المقلمة و الدفاتر كلهم متناسبين ويا بعض

طبعا ايام الجامعة كنت افتر و افتر و افتر لازم ابي دفتر سبشل محد عنده نفسه و لين صادف و شفت احد ف الجامعة نفسي اتغبن

اما السنة تجهيزاتي غير ، رحت ويا اختي و اخوي ياخذون ليهم ثياب و التركيز كان على الحلو الحبوب السنفور الجديد لان ذوقه المصبنجي يقهر ما ينفع للجامعة
قاموسه التسوقي ما فيه اختراع اسمه قميص الا في عيد الفطر ،، خليته يشتري ليه كم واحد عن خاطري يعني و جوتي عشان ما يلبس الزنوبة الكشخة حدها ف الجامعة

 

[7aneen]

الله على ايام المدرسه ، كنت اول وحده ف الطابور >> طبعاً لاني اقصر وحده ف الصف شكله هههه
و كنت اول وحدده ف المجموعات ف حصه الرياضه
و صار عندي جوتي الا يطلع ليتات :hearteyes:
و صارت عندي المسطره الي داخلها ماي و زري لماعي :fearscream::hearteyes::hearteyes::hushed:
كانت ايام جميله :smirkcat:

و الحين كبرنا و صرنا جامعيات
و الصراححه للحين ما جهزت و لا شي للجامعه
من فتره بسيطه رتبت ثيابي و قطيت واجد منهم لان صارو قديمين عباره و ما البسهم .. و صفيت ع جم بدله بس :expressionless:penmouth:
فاحتاج ثياب و عبايه و دفتر جميلون و اقلام ملونه و اشيا بعد
حماسي للرجوع للجامعه ضعيف هالكورس و اعتقد ان هناك 3 اسباب .. سببين خاصين .. و السبب الاخير ان اني تعودت ع الكسل و ع النوم المخربط و الريوق وقت الغدا و الغدا وقت العشا و العشا نص الليل
ف مو متحمسه حق اكسر روتيني الكسول حالياً
لكن اكيد بس اشتري قرطاسيه بيرجع الحماس بقوة

 

[سرآب الروح]

عن نفسي ولا مرة في حياتي اتحمست للمدرسة الحين بتحمس للجامعة ؟!
ولكن ما يمنع ان نشجع روحنا ونجدد نفسيتنا بأغراض جديدة لكسر الروتين وفي نفس الوقت التركيز ما يكون على المظهر فقط وننسى
او نتجاهل التركيز على الدراسة والتخطيط ليها

اتمنى للكل فصل جديد وحياة جامعية بالتفاول والصبر والعمل باجتهاد وانسوا الماضي احنا ولاد اليوم وابتعدوا عن اللي يحبطونكم ​

 

[M7MDOGRAPHY]

لأول مرة ف رحلتي الجامعية ، مهتم أكثر عن الكورسات الا طافت :sweatsmile:
بس مادري اشوف هالاهتمام جاي كلش متأخر .. الحين سنة ثالثة وتقريبا تجاوزت نص الرحلة :smilecat:
لكن مو غلط انه يجي متأخر :grin: .. احسن من ما يجي بالمرة :wink:

ف اشياءات وطقوس جديدة حاب امارسها .:sunglasses:. بالأحرى نازل فيني آبديت جديد ابي أعاينه و أستخدمه :smilingimp:

والله يوفق إن شاء الله :innocent:

​

 

[روح فاطمة]

اشتريت بس دفتر
بالنسبة للعبايات و الثياب اشتري اي وقت مو بداية كل فصل او سنة

بالنسبة للتجهيز المعنوي كلش مو جاهزة
الجدول دمار