سَنّور صغنّون مسكين :/

[رَحِيــلْ ،]

سلام عليكم شعب..

في حوش بيتنا بره يوم الخميس جفنا سنّور صغنون ولد جمن يوم وكان بروحه..
عاد بعدين اتحيرنا وياه وين أمه بالضّبط ولا جت إليه تشيله ولا جفنا ليها أثر وينه هي !
خفنا يموت أو يصير في ذمتنا شي فحاولنا طول هالجم يوم نقطّر ليه حليب..
اليوم - السبت - اكتشفنا مكان أمه موجودة ، وجفنا إخوانه الاثنين، فكنا نبيها تشيلهم كلهم وتوديهم مكان ثاني
حضرتها شالت السنورين وخلت هالوحيد المسكين ما شالته.. :sob::sob:
انجوفها ترجع تبسّط في المكان وتستريح فوق عتبة عندنا ولا حتّى تفتكر ليه وهو يصارخ ويماوي


انزين أحين ندوّر إذا فيه محلات أو أماكن أو جمعيات أو شي جدي مال حيوانات يقدرون ياخذونه ويتحمّلون إبه خصوصًا وإن احنا ما نعرف ليه عدل ولا ربينا سنانير من قبل، وحتى حليب خاص ما عندنا ليه وهو شكله مو حاب حليب نيدو < الوحيد اللي عندنا

لحد يقول ليي لأن جدي ولأن جدي، نبي حل لهالمسكين إذ فيه أحد منكم يعرف يفيدنا :sweat:

 

[purple.cs]

:cryingcat: شوفو احد من اهلكم او جيرانكم الا يقدر ياخذه و يكسب فيه اجر

 

[Mystro]

ما اعتقد ولدها ، يمكن أمها راحت مكان غير
الله سبحانه وتعالى بيتطلف فيه

 

[رَحِيــلْ ،]

ما اعتقد ولدها ، يمكن أمها راحت مكان غير
الله سبحانه وتعالى بيتطلف فيه

هي ولدت في البيت وإخوانه جفناهم
يوم حطيناه وياهم شمّته وخلته، يمكن لأنّ جودناه واتغيرت ريحته

كل يوم اتجي اتطالعه ولا كأنها تطالع..
كأنها تتطمّن عليه بس تتغلى

 

[Mystro]

يمكن بعد بس أنا بالنسبة ليي ما اقرب من الحيوانات بشكل عام ولا أحب ألمسهم
تخوفًا من الأمراض وفي نفس الوقت خصوصًا حديثي الولادة قد يتأثرون بمسك اليد بدون ما نحس

 

[رَحِيــلْ ،]

يمكن بعد بس أنا بالنسبة ليي ما اقرب من الحيوانات بشكل عام ولا أحب ألمسهم
تخوفًا من الأمراض وفي نفس الوقت خصوصًا حديثي الولادة قد يتأثرون بمسك اليد بدون ما نحس

احنا أصلًا مو كلش ويه السنانير ولا لينا بهم،
بس اضطرارًا إنَّ نشيله بقماش مع ذلك يصير ساعات تلامسات وبعد لا مفر..
من جدي ندور حقه أحد حاليًا يقدر يتولى شئونه ومتعوّد مو نفسنا
جربنا ندور في النت وهذا بس اللي حصلناهم ما منهم فايدة
والأشخاص اللي نعرفهم يعرفون للسنانير كلهم رفضوا لأسباب معينة خاصة
وهدحنا على بصيص أمل ، وإذا ما حصلنا قد نضطر نخليه ليما يكبر شوي تالي نباعده عنا

 

[إيقاع]

وإذا ما حصلنا قد نضطر نخليه ليما يكبر شوي تالي نباعده عنا

تعتقدون بيتباعد يعني بعدين ؟ كل يومين ما بتشوفونه الا رجع ليكم

 

[بنفسجيه.~]

هي ولدت في البيت وإخوانه جفناهم
يوم حطيناه وياهم شمّته وخلته، يمكن لأنّ جودناه واتغيرت ريحته

كل يوم اتجي اتطالعه ولا كأنها تطالع..
كأنها تتطمّن عليه بس تتغلى

سالفة بعد هالسنورة !
الحين اذا ولدش ليش ما تاخذينه ..عجل أُم بس جدي
هي المسؤولة عليه..مادامها للحين تجي تطل عليه معناتها ما بتخليه..جدي احس..

هم السنانير ما يرضون على ولادهم ..اذكر من زمان سنورة جت في الحديقة ويا ولادها و من تشوف احد يتقرب منهم تعصب..فهذي حالها غير السنانير

 

[Noise-X]

وإذا ما حصلنا قد نضطر نخليه ليما يكبر شوي تالي نباعده عنا

على هالنقطة .. السنانير نغويهم في عسكر وفي اقل من اسبوع يرجعون

بشكل عام السنانير حتى الصغار منهم يقدرون يعيشون بروحهم .. ما اعتقد يحتاج عناية خاصة لو شي

 

[رَحِيــلْ ،]

تعتقدون بيتباعد يعني بعدين ؟ كل يومين ما بتشوفونه الا رجع ليكم

لاا.. ما بنغويه في الديرة..
إذا وديناه ديرة ثانية وش جيّبه ديرتنا
أبويي يخطط يوديه تالي صوب سوق السمج في جدحفص بيحصل ليه ناس أحسن منا
إذا بيجي لينا ما ليه إلا يقطع شارع البديع كله تقريبًا

 

[بنفسجيه.~]

لاا.. ما بنغويه في الديرة..
إذا وديناه ديرة ثانية وش جيّبه ديرتنا
أبويي يخطط يوديه تالي صوب سوق السمج في جدحفص بيحصل ليه ناس أحسن منا
إذا بيجي لينا ما ليه إلا يقطع شارع البديع كله تقريبًا

هههه ترى فيه سنانير ما يضيعون!..عادي يغوونه و تالي يرجعون للمكان اللي تعودوا عليه..
خصوصا اذا هو صغير و متربي على واحد ما يهده على طول وياه

لا اذا سوق السمج ما بيرجع هههه بيستانس هناك..بس جان ما يبوق رزق خلق الله

 

[إيقاع]

لاا.. ما بنغويه في الديرة..
إذا وديناه ديرة ثانية وش جيّبه ديرتنا
أبويي يخطط يوديه تالي صوب سوق السمج في جدحفص بيحصل ليه ناس أحسن منا
إذا بيجي لينا ما ليه إلا يقطع شارع البديع كله تقريبًا

كائنات شريرة ذلين ومرعبة.. يودونهم السعودية يرجعون.
تقولين ليي شارع البديع
المشكلة حتى لو تخلونه جدي عشان يموت.. ما بموت من منطلق الأشرار لا يموتون سريعا.

 

[رَحِيــلْ ،]

سالفة بعد هالسنورة !
الحين اذا ولدش ليش ما تاخذينه ..عجل أُم بس جدي
هي المسؤولة عليه..مادامها للحين تجي تطل عليه معناتها ما بتخليه..جدي احس..

هم السنانير ما يرضون على ولادهم ..اذكر من زمان سنورة جت في الحديقة ويا ولادها و من تشوف احد يتقرب منهم تعصب..فهذي حالها غير السنانير

هذي غريبة أطوار..
أول ما جافه أبويي بره كان بروحه ويردح نشيط، والقصد يزاحف ويحاوي يتمشّى
ظل فترة ولا جت شالته، ولا ندري هل كانت تعبانة لو وش موضوعها

حتى أبويي استغرب، عادةً السنانير ما يرضون على ولادهم، يقول تهجم عليك إذا تقرب من ولادها!
وهذي عيني عينك نجود السنور قدامها وساعات يماوي ولا كأنها موجودة
إذا تجوفه نفس إلا تغمّض عيونها وتغاور!

ما ندري خل هي ما تعرفه ولدها لو يمكن مو ولدها يعني لو وش الموضوع!
يمكن مثلًا علقت فيه ريحتنا ومن جدي عافته لو وش..
المشكلة إنها من الأول عايفتنه من قبل لا نلمسه!

 

[رَحِيــلْ ،]

على هالنقطة .. السنانير نغويهم في عسكر وفي اقل من اسبوع يرجعون

بشكل عام السنانير حتى الصغار منهم يقدرون يعيشون بروحهم .. ما اعتقد يحتاج عناية خاصة لو شي

إذا رجع يصير خير عليه، يمكن ناس ياخذونه ونفتك من هالعبالة كلها..
لاا.. هذا رضيع عبارتن حتى بعده ما فتّح عيونه ولا يقدر يمشي، ما يعرف يتصرّف بروحه، ما يشرب حليب بروحه ولا يدافع عن نفسه ولا شي،
من جدي لازم نهتم فيه مو زين بعد نخليه يموت

 

[بنفسجيه.~]

إذا تجوفه نفس إلا تغمّض عيونها وتغاور!

هههههه تخيلت نظرتها:tearsofjoy: ..يعني ما يهمني:unamused:

 

[رَحِيــلْ ،]

كائنات شريرة ذلين ومرعبة.. يودونهم السعودية يرجعون.
تقولين ليي شارع البديع
المشكلة حتى لو تخلونه جدي عشان يموت.. ما بموت من منطلق الأشرار لا يموتون سريعا.

ما عليه إذا رجع هذي حالة ثانية..
مو شرير ولا يخوّف، مسكين لا يموت ، يكسر الخاطر ولا عاد إذا يماوي،..

 

[أمواج]

من جدي ندور حقه أحد حاليًا يقدر يتولى شئونه ومتعوّد مو نفسنا

لم يقبل بغير الله معيلاً وكافل