عـالم الكـيمياء..~

[بنفسجيه.~]

"كيفية كتابة تقارير التجارب -الريبوتات- على حسب اختلاف اللفل"​

-الريبوتات هو تقرير يسلمه الطالب عن كل تجربة يسويها.. وهو من اكثر الاشياء المهمة في التخصص وهو بعد من اكثر الاشياء اللي يستصعبونها الطلبة في البداية و ما يعرفون لاساسها او شلون تنكتب..
-شي معروف.. انه اللي ياخذون 101 و 102 "خصوصا الطلبة اللي من تخصصات ثانية"..عندهم الريبوت شي لا يُطاق..لولا وجود الريبوتات السابقة ما راح يعرفون يكتبون بروحهم...
- من لفل 1" CHEMY101 & CHEMY102"..الى لفل 4 "CHEMY499"..راح تزيد التشديد و الدقة على الريبوت و بيطلبون منا نضيف فيه اشياء اكثر "معتمد على نوعية الدكتور"...فـ مهم وضروري انه طريقة كتابتنا للريبوت تتطور كلما صعدنا في التخصص..

الاشياء الاساسية في الريبوت :

كل تقرير مطلوب من انه نضيف هالاشياء :
1-الغلاف "على انه بعض الدكاترة يتجاوز عنه في اللفلات الاولى"..بس احس وجوده افضل و بيرتب شكل الريبوت ..يحتوي على عنوان التجربة + اسم الطالب+رقمه الاكاديمي+ رقم سكشنه "خصوصا ل 101 لانه فيه سكاشن واجد"...و بعضهم يطلبون نضيف تاريخ التسليم و تاريخ اللي سوينا في التجربة...

2- الاهداف/objectives: يعني شنو الهدف -او الاهداف- من التجربة اللي سويناها...وينكتبون بهالصيغة:

...to determine-
...to calculate-
...to compare-
...to analysis-
​

3-المقدمة/introduction:
"طبعا نحن شغالون على الكوبي بست من النت "...
المقدمة من اسمها..نذكر فيها مقدمة عن الموضوع اللي تتناوله التجربة..
مثلا:
-لو كانت التجربة حساب تركيز عن طريق جهاز..فبتكون المقدمة عن الجهاز وو مبدأه و تطبيقاته...
-لو كان عن تفاعلات عن مجموعة وظيفية في الاورقانق ..فتكون المقدمة عنها ...و هكذا ...
طبعا هو اكثر بارت مسموح فيه انه ناخذ الشي نسخ..بس مو اي نسخ يقبلونه و مو من اي موقع يرضون انه ناخذ منه.. و يصير انه ننقل المقدمة من المينوال مع ذكر المصدر..و ذكر المصدر المقدمة بشكل عام شي مهم..

4- خطوات العمل/procedure:
"هالبارت مو الكل يطلبونه عليهم"..يعني ما اتوقع لاب 101 يطلبون عليهم يكتبون خطوات التجربة...و حتى مواد لفل 2 و3 بعد في لابات مو مطلوبة او ما عليه درجات ..
فيه بنكتب خطوات التجربة اللي سويناها بصيغة المبني المجهول "passive"..يعني لازم نشغل القرامر مال المدرسة
يعني مثال توضيحي :
الخطوة الي تكون معطاة في المينوال"add 5ml of HCl to the mixture"...
فنحولها الى "5ml of HCl was added to the mixture...."

5-صور المركبات الناتجة و الاجهزة المستخدمة/ instruments and photos for the experiment"
"هالجزء بعد مو ضروري "...اذا كان فيه صور مصورينها للاجهزة او المركب النهائي فنحطهم تحت بعض ...

6- النتائج/results:
اي وزنة اخذناها اثناء التجربة او وزن البرودكت النهائي نكتبها في هالبارت...او نتايج قراءات من جهاز ...و علشان يصيرمنظم اكثر نحطهم في جدول..
في النتايج بعد نضيف الوان و اشكال المركبات النهائية " يعني نذكر ائا كان كرستال و لا باودر..و نذكر لونه..."

7- الحسابات /calculations:
هذا من الباراتات المهمة في الريبوت...طبعا نوعية الكالكوليشن مختلفة من مادة لثانية:
-يعني في الاورقانق و الاناورقانق ..عادة نحسب ال%yield..
-في الانالايتكيل نطلع من القراءات الcalibration curve علشان نقدر نحسب تركيز الunknown...
- في الفيزكال ..اهم شي عندهم الكالكولشين..و هي مالتهم مميزة و تجي طوييلة ..
- في لفلات ال1..بعد يختلف الحساب على حسب التجربة...

8- المناقشة/ discussion:
هي اكثر شي جديد علينا ..و ناخذ وقت علاما نعرف شلون نكتبها..في المناقشة كلش غلط انه ناخذ كوبي بست من ريبوتات سابقة..لانه مطلوب فيه انه الطالب يناقش في النتايج اللي طلعت اليه باسلوبه ..
قبل لا نكتب لازم نخطط قبل و نقسم الاشياء اللي بنضيفها علشان يسهل كتابتها.."هي تختلف من مادة لثانية ومن دكتور لثاني"
-تعلمت طريقة من لفل 3..علشان يصيراسهل. ..انه امشي على البروسيجر "خطوات العمل "..يعني ارد اذكرها بس اهني لازم افسر الخطوات..
"مثلا" لما اقول انه ضفت هالمادة للثانية اذكر سبب اضافتها في المناقشة ...
-لما يكون فيها معادلة كيميائية توضح التفاعل او آلية التفاعل/ mechanism بعد نضيفها...
ولما نخلص من الخطوات..نروح للنتائج بعد نذكر تعليق عليهم...نذكر اذا كان في error..لو كان الناتج مادة نذكرها مع وصفها...
* في المناقشة بعد لازم نكتب بصيغة الpassive

9-الخاتمة/conclusion:
الخاتمة نكتب فيها شي بالمختصر ..."في بعض الدكاترة يعلقون على الطلبة ..انه ليش كاتبين لينا فقرة ويش كبرها في الخاتمة..بس كتبوا شي بسيط"..
-يعني نذكر مثلا الوزنة للناتج النهائي.. لون المادة و شكلها ..%yield ..نذكرها بدون ما نعلق عليها...التعليق يكون في المناقشة..
-او من ناحية ثانية ..نكتب استنتاج ..لو مثلا استخدمنا جهاز معين لتحليل و القياس و طلعت النتائج تمام..فنعلق في الخاتمة انه هالجهاز نقدر نستخدمها لقياس كذا و كذا " بشكل مختصر"..

10-المصادر/references:
-اذا كان المصدر موقع من النت ..لازم نكتب الوقت اللي دخلنا اليه "هالتعقيدات تجي في لابات اللفل 3 و اكثر"
-وطبعا ما يبغونا كل نعتمد في مصادرنا على النت..لازم يكون فيه بعد كتب او research paper ..و ليه طريقة معينة :
1.نكتب في البداية اسم صاحب المقالة او مؤلف الكتاب ..وساعات يذكرون اختصار الاحرف الاولى من اسمه
2. نكتب اذا وياه احد "يعني مشترك في التاليف"..
3.سنة التاليف او سنة النشر+ رقم الطبعة للكتاب..
4.اسم الكتاب او المقالة..
"كلهم نكتبهم في جملة وحدة"
- هالمعلومات نحصلها تحت عنوان المقالة او اذا من كتاب كلشي بيكون مكتوب على الغلاف..
مثال:

Shukla, M. K., Lal, R. and Ebinger, M. (2006).Determining soil quality indicators by factor analysis. Soil Tillage Research, 2: 194-204.

​

-نقاط مهمة:
-في المقدمة..لما نقتبس شي لازم يكون موضوع بين " " ولازم نكتب بعد نهاية الاقتباس علامة للمصدر ..يعني نحط [1] او * ..و في المصادر نكتب [1] ونذكر المصدر تحته..
-ما يصير نحط صورة او مخطط بياني او جدول بدون ما نعرفه..يعني لازم نحط تحت كل صورة وصف ..مثلا لو الصورة لمادة ..نكتب تحتها اسم المادة...و لازم نرقم الصورة و الجداول..اذا عندنا اكثر من جدول نكتب على حسب ترتيبهم :table1 - table2..
مع مراعاة انه الجدول ينحط عنوانه فوقه..بينما الصور والرسم البياني ينحط الوصف تحتهم.

*******​

- الريبوت لكل تخصص من تخصصات الكيمياء الاربعة فيه شي مختلف ومميز..فيه اشياء>تخصص معين يركز عليه و تخصص ثاني ما يطلبونه حتى..و يعتمد بعد على اللفل..من اللفلات الاقل يكون الريبوت اكثر بساطة و كل ما ارتفعنا يصير المطلوب على الريبوت اكثر دقة..
و حتى نوعية الدكتور بعد تاثر على الريبوت اللي بنكتبه..

-انك تغلط في الريبوت و ما تحصل كل مرة 10 من 10 هذا شي طبيعي "يعني مو شرط الاا 10"..الغلط انك ما تدرب و تطور روحك في كتابة الريبوتات..لانه في النهاية بنكون مطالبين على كتابة ريبوت التخرج اللي يعتبر ادسم واحد..
فاذا استلمت الريبوت و في اغلاط..شوف شنو هي اغلاطك علشان تتعلم منها و تعدلها في المرات اللي بعدها "و قليل بعد من الدكاترة اللي يرجعون الريبوت للطالب و هالشي انتقده..اذا ما رجّع الريبوت من وين بيعرف الطالب اغلاطه!"

-الوصف اللي قلته عن الريبوت هو بشكل عام و مو ثابت..يعني يمكن لما تقرؤونه تحسون انه معقد...بس هذا اللي يبغونه نوصل اليه في النهاية...و ما راح نضبطها من البداية انه نعرف نسوي ريبوت متكامل من اول مادة..لكن شوي شوي بيمشي الحال..

 

[بنفسجيه.~]

شكرا شرح وافي و استفدت


تدرين اني احط الرفرنس وصله من فوق htt
الدكتورة مالتنا زين ان ما تحاسب عليها
والدسكشن سطرين
وانقصفت 5 درجات
المشكله في الدسكشن ما أدري لو نضيف الأشياء والدكتورة ما تقول فما اعرف ويش اناقش

كنت أكره الربورت بس صرت أحبهم لو ما ضيق الوقت انجان جملتهم

و هذي المشكلة الكبرى..غير ان الطالب من اساسه يستصعب الريبوت..فانه فيه دكاترة ما يشرحون للطالب شنو لازم يحط!..فبضيعونه ازيد

احنا وضعنا في القسم صاير ..في دكاترة يبغون كل شي دقيق في الريبوت و على طول يحاسبون و دائما يصححون الريبوت و يرجعونه علشان نتعلم من اخطائنا..
و بعدين ننصدم بالدكاترة اللي ما يشرحون كلش والريبوت من نسلمه ما نشوفه بعدين...

** لكن اذا عندش اي شغلة ..اسالي الدكتورة..او اسالي استاذة اللاب بتساعدش علشان ما تسوين شي غلط و تروح عليش درجاتش

 

[بنفسجيه.~]

"اليوم الكيميائي"
"chemistry Day"

بالنيابة عن جميع المنظمين..
أدعوكم لحضور اليوم العلمي-الكيميائي
المقام في قسم الكيمياء- كلية العلوم
وذلك في يوم الخميس "غدا" -21/4/2016
***

"هالفعالية تُقام لطلبة المدارس- المرحلة الثانوية
منها علشان يتعرفون على القسم و التخصص
و منها بياخذون جولة على تجارب كيميائية عجيبة و ممتعة"

لكن اذا خاطركم و تقدرون تجون حياكم..
الدعوة للجميع
​

 

[بنفسجيه.~]

حساب للكيميائيين على الانستا..
تم افتتاحه من فترة قصيرة..ترقبوا فيه تغطية الفعاليات وصور التجارب العملية و مناقشة كل ما يهم الطلبة من امور الدراسة و التسجيل و المواد...الخ

https://www.instagram.com/uob.chemy/​

 

[بنفسجيه.~]

Department Free Elective courses
المواد الاختيارية التابعة للتخصص
****​

معلومات عامة و تعريفية بمواد الFree elective:

- من بين متطلبات التخصص ..هو دراسة ثلاثة مقررات اختيارية من مواد الكيمياء..عادة ناخذها اخر ثلاث كورسات في التخصص
-هي يسمونها مواد ال free elective =المواد الاختيارية

-او يسمونها مواد الjob ويكون سبب تسميتها انه هالمواد هي تعطينا نوع الخبرة او دافع يساعد على قبولنا على وظيفة معينة على حسب المادة "علشان جدي يخلونها اخر الخطة"...يعني كتوضيح ازيد لو احد اخذ مواد الانديستريال اللي هي الصناعية "بتسهل عليه قبوله في الشركات الصناعية مثل بابكو او GPIC او البا او غيرهم..
مثال ثاني..لو تم قبولك انك تشتغل فنيّ في الجامعة..بيعتمدون في اختيارهم على المواد الاختيارية اللي اخذتهم...كلما اخذت مواد فيهم لاب وعاطتنك خبرة اوسع في الكيمياء ..بيكون عندك فرصة اكبر

- هو لو بناخذها بالتفصيل..في الخطة يكون المطلوب انه ناخذ مادتين جووب..ومادة اختيارية وحدة ..لكن في تفصيله ثانية هالمواد كلهم يعتبرون واحد ..يعني مواد الالكتف هي نفسها مواد الجووب >"لحد الحين ما تشدد انه لازم مواد معينة لكل من النوعين"

-هالمواد كلهم ليهم الكردت =3..وبعضهم فيهم لاب و بعضهم بدون لاب..اللي فيهم لاب تكون عدد المحاضرات النظرية في الاسبوع =2 +لاب..لكن اللي بدون لاب يكون عدد المحاضرات =3 في الاسبوع..

-طبعا ما يتداوله الوسط الكيميائي لما يسألون بعض: اخذ/ي المواد اللي ما فيها لاب اسهل واخف..لا تاخذ هالمادة كله حفظ ودسمة....او اخذ/ي المادة الفلانية لانه اسهل و بتجيب فيها A.. لانه بنظرهم اختيارية يعني لاازم A..
هو فعلا الواحد من يدخل في مواد البراكتكل بيصير صعب انه يمسك مواد الكتف فيهم لاب لانه بيكون متعب بصورة اكبر..لكن مثل ما قلت ..هالمواد تساهم و لو بنسبة بسيطة في تقوية شهادتك و تميّزك عن غيرك..لانه كلنا بناخذ نفس المواد التخصص الروتينة الثانية..لكن بنختلف في هالمواد ..

- فيها مواد ثابتة و على طول تنزل .. ترى المادة تنزل مرة وحدة في السنة "ما يصير تنزل كورسين على بعض"..اما في الكورس الاول او الثاني..
- وبعض المواد هي مطروحة في الخطة..لكن لا يتم تنزيلها لعدة اسباب اما لانه ما فيه طلبة يبغونها او مافيه عدد طلبة كافي بياخذونها "صعب ينزلون مادة لاقل من 5 طلبة الا اذا كان من الضرورة ذلك" ..او لانه ما فيه دكتور مستعد يدرسها..او اذا كان فيها لاب ولكن القسم ما عنده المواد المطلوبة لللاب فانه ما راح ينزلونها..



-المواد الاختيارية هي :
"ما راح اتفصل فيهم..حتى اللي اخذتهم..بذكر معلومات عامة عنهم فقط"

The job placement courses​

Chemy 351 “Green chemistry”
الكيمياء الخضراء​

​

-المواد المتطلب اجتيازها للتمّكن من اخذ المقرر:
chemy211, chemy221
-التخصص التابع له: Organic chemistry..على انه ارى الكيمياء الخضراء تتداخل في كل تخصصات الكيمياء
- دكتور المقرر: منذ زمن وقدره ..واتوقع من اول ما ينزل هالمقرر كان عنده لحد الحين> "د.احمد طه"
-المقرر بدون لاب..
-المقرر ينزل على طول "و في الكورس الثاني"..وفيه اقبال عليه من الطلبة..يعني يوصل العدد لفوق ال10 طالب في السكشن..
-نبذة عن المقرر: مقرر لطيف..يتكلم عن الكيمياء الخضراء..ايّ هي مبادئ يتم اتباعها لتحويل الطريق الصناعية و تحضير المواد من طرق اكثر خطورة الى طرق تكون اقل خطورة و صديقة للبيئة..
-هو المقرر حفظ +فهم..لما تفهم المحتوى بيكون الحفظ سهل..وليس كما هو شائع عنه انه حفظ بحت!
​

”Chemy 348 “ industrial inorganic chemistry
الكيمياء غير العضوية الصناعية​

-المواد المتطلب اجتيازها للتمّكن من اخذ المقرر:
chemy241
-التخصص التابع له: Inorganic chemistry
- دكتور المقرر: د.أحمد سعد
-بدون لاب..ولو انه هالمقرر المفروض يكون فيه لاب..لكن تم تنزيل المادة و حذفوا لابها لانه تكلفة مواده ومتطلباته عاليه "ونفس الشي لـ انديستريال اورقانق"..على العموم هالشي لصالحنا انه ما فيه لاب لانه بصير ادسم بـ دبل
-هالمقرر بعد يتم ادراجه على طول في الكورس الثاني..يمكن الطلبة بياخذونه لانه ما فيه لاب..او لانه ما بيحصلون غيره
-نبذة عن المقرر: المقرر يتكلم عن طريقة تصنيع و تحضير المركبات الان اوقانيكية..مثل الامونيا +حمض النيتريك+ حمض الفوسفورك ..حتى العناصر نفسها من نيتروجين +كبريت+فوسفور.. فعادة اللي يتناوله..طريقة تصنيعه+ تفاعلاته مع المواد الاخرى+تطبيقاته في مجال الحياة..وطبعا تحت كل جملة معادلة
-المقرر حفظ بصورة دسمة..حتى اقدر اصنفه انه اكثر مقررات التخصص اللي فيها معادلات كيميائية..علشان جدي يصير نفور منه..لكن الجيد انه اسئلة احمد سعد في تستاته دائما تكون من داخل النوت ..
- فائدته يعطي خبرة نظرية للشغل اللي يسوونه في الشركات الصناعية

​

Chemy412 “ Environmental chemistry”
كيمياء البيئة​

-المواد المتطلب اجتيازها للتمّكن من اخذ المقرر:
chemy312
-التخصص التابع له: Analytical chemistry
- دكتور المقرر: د.احمد يوسف..وبعد تقاعده ما احد مستعد يستلم هالمقرر من الدكاترة..استلمته لمدة كورس واحد د.جميلة و باختصار ضاع المقرر عندها !
-المقرر فيه لاب
-نبذة عن المقرر: هو قريب من مقررات الانلايتيكل..واتوقع انه يخص التحليلات اللي تتداخل مع مجال البيئة..مثل تحليل المعادن في الاشياء الموجودة في البيئة و دراسة تاثيرها على البيئة و الانسان ..
-احس بيختفي هالمقرر من القائمة اللي تنزل ..كان ينزل الكورس الاول..​

”
Chemy 424 “ Natural products
كيمياء المنتجات الطبيعية​

-المواد المتطلب اجتيازها للتمّكن من اخذ المقرر
chemy321
-التخصص التابع له: Organic chemistry
- دكتور المقرر: د.عواطف مهدي
-طبعا فيه لاب..وهو اللي مخل المقرر ممتع
-نبذة عن المقرر: من اسمه..فانه يختص في استخراج المواد الطبيعية و المفيدة من مصادر طبيعية..في براكتكل الاورقانق..وحدة من التجارب تعتبر من تجارب هالمقرر،و هي استخراج مادة الآيوجينول من المسمار اللي يحطونه في الاكل ..وهالمادة مفيدة لتخفيف الم الاسنان"..فشي ممتع..انك تستخدم الكيمياء في هذا المجال..و يتم ذلك باستخدام تقنيات مختلفة من الديستليشن او الريفلاكس ..
-المادة لو بتاخذها احس من الافضل انه تكون ماخذ براكتكل اورقانق "Chemy322" من قبل علشان تكون حركتك في اللاب اسهل..
​

”Chemy 426” Food Chemistry
الكيمياء الغذائية

​

-المواد المتطلب اجتيازها للتمّكن من اخذ المقرر:
chemy321
-التخصص التابع له: Organic chemistry
- دكتور المقرر: د.أحمد طه
- فيه لاب..و بعد اتوقع لابه ممتع
-نبذة عن المقرر: هالمقرر من زماان ما ينزل..يمكن اخر مرة قبل 4 سنوات او ازيد..و شكلهم ما عندهم نية ينزلونه..لما سالت دكتور احمد عنه..قال لي سبب عدم تنزيله انه شي ناقصهم في اللاب او فيه مشكلة تخصه!..على انه احس فيه طلبة خاطرهم يكتشفون هالمقرر..و اني احس انه مقرر عجيب..لكن ما ليه مكان




​

”Chemy428” Industrial Organic Chemistry
الكيمياء العضوية الصناعية
​

-المواد المتطلب اجتيازها للتمّكن من اخذ المقرر :
chemy321
-التخصص التابع له: Organic chemistry
- دكتور المقرر: د.أحمد طه
-بدون لاب
-من المقررات اللي للحين ينزل بصورة سنوية..و تنزل الفصل الاول
-نبذة عن المقرر: "اقتبسته من توصيف موقع جامعة البحرين الرسمي"
المواد الأولية المستخدمة في تصنيع المواد الكيميائية العضوية، عمليات التصنيع الكيميائية ومنتجات المواد العضوية المصنعة، عمليات تكرير النفط وعمليات تصنيع الجازولين، عمليات تصنيع البتروكيماويات والمواد الداخلة فيها، عمليات تكسير النفط وعمليات التهذيب الكيماوي، العمليات البتروكيماوية المستخدمة في الخليج مثل إنتاج البولي إيثيلين، البولي فينايل كلوريد، والألياف الصناعية، الأدوية، الصابون (المنظفات)، العطور، المواد المضافة للأغذية، المبيدات والأسمدة الصناعية.

- يعني هالمقرر اخو مقرر انديستيريال الاناورقانق ..بندرس فيهم نفس النقاط لكن على مواد مختلفة.. اهني عن المواد العضوية
-اتوقع انه حفظ اكثر من انه فهم...على انه الدكتور مصر انه هو فهم مو حفظ!


​

”Chemy438” Electrochemisty
الكيمياء الكهربية
​

-المواد المتطلب اجتيازها للتمّكن من اخذ المقرر:
chemy331
-التخصص التابع له: Physical Chemistry
- دكتور المقرر: د.محمد اختر
-بدون لاب..و هو مشهور انه من اسهل المقررات الاختيارية
-نبذة عن المقرر:هو يعني الكيمياء الكهربية..احس انه نِطاقه محدود..لمّا يكون الواحد عارف بهالمجال الاشياء المهمة فبيكون هالمقرر سهل عليه
-و كذلك للتوضيح فكرة المقرر: #مقتبس​

يتناول :الإتحادات الأيونية، التوصيل الإلكتروليتي، جهود كيميائية كهربائية، السطح البيني المكهرب، مقياسية التحليل الفولتي للأنظمة العكسية (المعاكسة)، طرق التحليل الكهبائية، علم حركة الإلكترود، التحليل الكهربائي، تطبيقات صناعية.

Chemy442 “ Bio-inorganic Chemistry
الكيمياء الحيوية غير العضوية​

-المواد المتطلب اجتيازها للتمّكن من اخذ المقرر:
chemy241
-التخصص التابع له: inorganic chemistry​

-دكتور المقرر: د.فضيلة السلمان
- المقرر ما ادري اذا نازل من قبل..و لو كان نازل فانه كان من زماان..حاليا ..الكورس القادم بينزل هالمقرر و لاول مرة عند فضيلة
-فيه لاب..
-نبذة عن المقرر : بما انه ما عندي اي فكرة عنه..فباكتفي بالتوصيف الموجود في الموقع:
المبادئ الأساسية للكيمياء الحيوية غير العضوية، دراسة البروتينات الفلزية والجزيئات الحيوية المحتوية على المعادن، الأنزيمات الفلزية والأنزيمات الأخرى المنشطة فلزيا المستخدمة في التحلل بالماء ومجموعة التفاعلات المنقولة (المحمولة)، العناصر الإنتقالية المستخدمة في عملية الأكسدة والإختزال الحيوية، تثبيت النيتروجين و دورة النيتروجين، ناقلات الأوكسجين، تخزين ونقل الحديد، الفلزات القلوية والقلوية الأرضية في علم الحياة، أيونات المعادن والعوامل الكلابية في الطب.

- اشوف هالمقرر ينتج لمّا يجتمع الكيمياء البيو..>يناسب ياخذونه اللي تخصصهم ماينر بيو..يمكن يكون دسم..من توصيفه يبين هالشي..بس احس هالمقرر بعد من المقررات اللي بتضيف للواحد..

" Chemy435"Selected Topics in Physical Chemistry
موضوعات مختارة من الكيمياء الفيزيائية​

-المواد المتطلب اجتيازها للتمّكن من اخذ المقرر:
chemy331
-التخصص التابع له: Physical Chemistry
- دكتور المقرر: د.محمد سليم اختر
-نبذة عن المقرر: هو معروف باسم الثيروديناميك..يتناول المفاهيم والآليات الميكانيكا الإحصائية والديناميكا الحرارية. الديناميكا الحرارية من الحلول؛ ثلاثة أنظمة المكونة. الأنشطة ونظرية هاكل. تنشيط الناحية النظرية المعقدة؛ عمليات بالكهرباء.
- ما يقبلون عليه طلبة واجد..و كان من اللي ينزلون في الجدول كل سنة في الكورس الثاني..بس لانه العدد قليل..وما احد يسجل فيه ..فصار انه تم ازالته من الجدول.


​

*******​

مواد اخرى..مختفية ولكن فيه احتمال يردون ياخذونها الطلبة ،مثل :

Inorganic Reaction Mechanisms = chemy443
Mechanism in Organic Chemistry = chemy425​

وفيه مواد غيرهم ..بس موجودة بالاسم فقط!..قبل مع الاجيال اللي قبلنا كانوا ياخذونهم..بس الحين كلش مختفية!

 

[قيثارة من الورد]

السلام عليكم أخت بنفسجية
أولا أحب أقدم شكري على الجهود إلي تقدمينها ..
واجد استفدت من المواضيع الي تطريحينها و دائما أتابعها

بس عندي استفسار عن مواد البراكتكل .. و هو متى راح نعرف إن تسجلت ليي المادة أولا ؟ و على أي أساس يختارون ؟
و عندي طلب صغير بعد .. يا ريت تفيدينا من خبرتش و تعطينا معلومات عن ( مشروع التخرج ) و شكرا أختي مرة ثانية

 

[بنفسجيه.~]

السلام عليكم أخت بنفسجية
أولا أحب أقدم شكري على الجهود إلي تقدمينها ..
واجد استفدت من المواضيع الي تطريحينها و دائما أتابعها

بس عندي استفسار عن مواد البراكتكل .. و هو متى راح نعرف إن تسجلت ليي المادة أولا ؟ و على أي أساس يختارون ؟
و عندي طلب صغير بعد .. يا ريت تفيدينا من خبرتش و تعطينا معلومات عن ( مشروع التخرج ) و شكرا أختي مرة ثانية

عليكم السلام و الرحمه،،
العفو وهذا اللي اتمناه..انه يوصل لمحور افادة الجميع

- مواد البراكتكل غالبا تنزل في الجدول في اسبوع التسجيل الثالث "اللي بالحضور الشخصي" ..يعني قبل لا يبدأ الدوام باسبوع
والسبب انه هالاسبوع يدامون الدكاترة و تصير فيه عملية فرز الاسماء على المواد
تتم عملية التوزيع على حسب عدد الساعات المجتازة..اللي مكمل عدد ساعات اكثر و يعتبر اقرب للتخرج فبتكون ليه الاولية وهكذا ..
كل براكتكل يتسع 12 طالب ..يعني مجموع عدد طلبة البراكتكل كل كورس اذا نزلوا المواد كامل =48 طالب
فاذا ما كان في طلبة واجد اقدم منش للحين ما اخذوا البراكتكل اللي سجلتين فيه = فانه راح تزيد فرصته

- مشروع التخرج حاطة هالشي في بالي..
لكن ماجلتنه لانه ارد اكتشف اشياء جديدة تخصه..فان شاء الله في اقرب وقت بنزل عنه و عن التريننق..
علشان يكتمل الموضوع

 

[قيثارة من الورد]

شكرا ..
بانتظار كل جديد

 

[بنفسجيه.~]

تم اضافة مقرر براكتكل انلايتكل "chemy 312"

 

[بنفسجيه.~]

Chemy399
Training Course
" كورس التدريب العملي"

​

- التدريب العملي "التريننق"..كما هو معروف في معظم التخصصات الثانية..انه عبارة عن شهرين او شهر ونص يقضيهم الطالب في احد الوزارات او المؤسسات الحكومية خارج جامعة البحرين ، يكتسب فيها برنامج تدريبي يساعده على الانخراط و التعود على العمل

- اهم هدف لهالمقرر انه يخلي الطالب يتعود ويتاقلم على بيئة العمل - فيها تخصصات معينة يكون التريننق فيها مهم كتطبيق عملي للي درسوه " مثل الهندسة نظامهم انه عندهم كذا كورس تريننق"..

احنا في الكيمياء.. التريننق ما راح يكون علينا كلش صعب او شي جديد..لانه بالاساس في الجامعة متعودين على الشغل العملي

***
في السنة متى ينزل هالمقرر؟
- هالمقرر في قسمنا ينزل بس في الصيفي "يعني لو احد تخرج في الفصل الاول وما اخذ تريننق.. فبيضطر ينتظر للصيفي علشان ينزلونه اليه...او يمكن يحل السالفة بواسطة "

متى انسب وقت علشان ناخذ التريننق؟
مو شرط الا بعد التخرج..هو الشروط عليه انه لازم يكون الطالب مكمل 2 براكتيكل - ومجتاز فوق ال90 ساعة و كل ما كان مكمل ازيد..كل ما كان افضل اليه و بيستفيد اكثر من التريننق لانه خبرته في الجامعة اكبر
فيصير الطالب ياخذه بعد ما يخلص كل المواد..او يصير حتى في الصيفي بعد ما يكون مكمل 3 سنوات في التخصص > يعني مو محصور الشي بالسنوات

لكن كنصيحة " الافضل انه الواحد ياخذه بعد ما يخلص المواد كامل..لانه فيه احتمال كبير اذا كان الطالب زين ويا الجهة اللي تدرب فيها انه ياخذون اوراقه و يوظفونه..هالشي ما راح يصير لو كان ماخذ التريننق و هو للحين ما كمل الجامعة"

طريقة التسجيل للمقرر؟
هالمقرر بالذات لازم الواحد يتابع كل شي يخصه في فترة تسجيل و الا بيروح عليه...
الحين مع نهاية هالكورس "شهر 12" اتوقع بينزل اعلان الى اللي يبغى يسجل للتريننق يروح يسجل اسمه..
بعدين في فترة عطلة الربيع او مع نهاية هالكورس بعد.. راح يعطونا استمارة نملي فيها بياناتنا العامة ...و نرفق وياها هالشغلات:
-نسخة الجواز
-نسخة البطاقة الذكية
-صور شخصية
- السي.في "C.V" >ضروري يكون عندنا سي في

هالخمسة الاشياء ..بيحطون تاريخ معينفي الكورس الثاني ضروري انه احنا نكون مسملينهم للدكتور المختص "كل شي بيكون واضح في الاعلان "..و عادة هالتاريخ يكون قبل نهاية شهر3

- خلال شهر 4 و 5 ..المفروض انه الجامعة تكون مدبرة الينا اماكن ..جدي على نهاية شهر 5 او بداية شهر 6 يخبرون الطلاب وين مكان تدرببهم
* طبعا اللي قاعد يصير انه يتأّزم موضوع التوزيع و ساعات ما يحصلون اماكن ويتاخرون علاما يحولون الطالب لمكان معين* ..لكن نتفاءل انه الكورسات الجاية ما يصير هالشيء

- الاشياءات اللي قلتها فوق..المفروض تكون عندنا منها اكثر من نسخة احتياط...لانه بيطلبونهم منا كذا مرة + لازم تكون عندنا النسخة الالكتورنية منها في سي دي بعد نسلمه ويا النسخ الورقية..
-بعض الاماكن تتطلب اجراء للتسجيل فيها..يعني مو بس اجراءات الجامعة..مثل انه بعضهم ياخذون بصمة الطالب لتسجل الحضور..وبعضهم حتى ياخذون الاوراق لوزراة الداخلية " كشف ملف"

- وقت التدريب على حسب الجهات..لكن المعظم يكون من بداية 7 الى نهاية 8

- اماكن التدريب الشائعة عندنا في الكيمياء:
- وزارة الصحة" أما يكون في مختبرات المراكز الصحية..او في مختبرات الصحة العامة"
-وزارة التجارة..في مكاتب فحص الذهب " عن طريق تحليل كيميائي"
- وزارة الكهرباء و الماء "في مراكز تحلية المياء"
- البيئة
- المطار > ما ادري ويش نسوي هناك..ما احسه من صوب الكيمياء ..بس اللي سمعته انه يروحون لمكان الارصاد الجوية > ولا يشتغلون اصلا

^ هاذي الاماكن المعتاد انه الجامعة تسجل فيها الطلبة.. و لانه كل شركة او جهة تقبل بس عدد معين..فهذا يصّعب عميلة الحصول على مكان
لذلك يصير ان الواحد يتحرك على روحه "عن طريق الواسطة" انه يكلم جهة معينة " مثل الشركات الصناعية الخاصة" و يتشغل على عمره و بيحصل مكان

طريقة التوزيع يعتمدون على عدة اشياء:
- على حسب قرب المكان من منطقة السكن للطالب > وهاذي عادة ما تضبط عندهم ..يعني مو شرط الواحد بيحصل مكان قريب من سكنه
- اذا شافوا عدد الطلبة واجد..بالاولية بتصير للي هم متخرجين و ما بقى لهم الا التريننق

المتطلبات اثناء فترة التدريب؟
- في فترة التدريب..بيقوم الدكتور المسؤول عن التريننق " اللي منزلهة المادة باسمه"..بيقوم بزيارتين لمكان التريننق و بيقابل الطلبة و بيسالهم عن الشغل و بعد بيقابل المشرف عليهم في المكان > يعني هالزيارة تفّقدية للاوضاع... بيكون مطلوب منا تملية استبيان و اجابة على الاسئلة "ان ويش السكِل اللي تعلمتها و من هالنوع.."
- بيكون مطلوب من انه نكتب تقرير نختصر فيه طبيعة الشغل اللي اشتغلناه و نرفق الشرح بصور > التقرير ما عليه درجات لكن لاازم نسلمه والا ما راح نجتاز المقرر

- المقرر بكردت 3.. يعني اللي مو منحة او بعثة بيدفعون 24 دينار رسوم تسجيله في جدولهم...و هو عبارة عن مقرر اجتياز ..
يعني في النهاية اذا الواحد مجتاز بيحصل S - غير مجتاز U
- الحضور شي مهم جدا..عادي انك ما تجتاز المقرر لمجرد انه عدد غيابك كان كبير

- هل الطالب بيحصل مبلغ مالي مقابل شغله في التريننق؟

هو يعتمد على الشركة اللي اتدرب فيها...
- يعني وزارة الصحة معروف انهم ما يعطون
- وزراة التجارة تعطي مبلغ 100 دينار للشهر الواحد
- وزارة الكهرباء و الماء بعد تعطي مبلغ معين " في حدود ال150-200" عن الفترة كلها
- بقية الشركات بعضهم يعطون وبعضهم لا

طبيعة و دسامة العمل في التريننق؟
- مو كل شركة الطالب راح يتشغل فيها...يعني مثل ما قلت فوق..في بعضهم يروحون بس جدي تسجيل حضور بدون شغل طول اليوم قاعدين و في شركات بالعكس يشغلون الطالب
" على الاغلب انهم لازم بيشغلونه او أقلها بيعلمونه طريقة الشغل علشان يقدر يكتب تقرير و ما يبين قدام الدكتور انه مو فاهم شي اثناء زيارته"

​

* هذا اللي طرى على بالي و اني اكتب..اذا فيه شي نسيته و تذكرته بضيفه مستقبلا*

 

[بنفسجيه.~]

CHEMY499
SENIOR RESEARCH PROJECT
"مشروع التخرج"
الجزء الاول​

- مشروع التخرج- او المعروف بيننا بال 499- هو اعلى لفلات التخصص و عادة يكون اخر متطلب ينجزه الطالب في الجامعة علشان يحصل على الشهادة.. من ناحية ثانية هو اكثر مقرر بيبذل فيه الطالب شغل فردي و تدّخل الدكتور يكون مقتصر على الاشراف

تعريف مختصر عن طبيعة المشروع:
-هو عبارة عن بحث علمي شامل للجانب النظري " بالبحث في التقارير و الكتب العلمية"..و الى الجانب العملي " العمل على التجربة في مختبر البحث العلمي في القسم"
- مدة العمل عليه : عادة الطلبة ينجزونه في كورسين ..و قليل اللي يحتاجون الى كورس اضافي
- المقرر متطلب اجباري على طلبة الsingle track ..بينما طلبة الفرعي يكون المقرر عليهم اختياري
- يتم تسجيل المقرر عن طريق رئيس القسم..و يعتمدون في التسجيل انه يكون الطالب مجتاز 75% من مجموع الكردت الي عليه..او بصورة اوضح تبّقى عليه كورسين على التخرج و من ناحية ثانية كل ما كان الطالب ماخذ مواد براكتكل اكثر ...كل ما استفاد اكثر اثناء شغله على المشروع..لانه هالمواد هي اللي راح تعطيه خبرة اكثر في الشغل في اللاب
- درجات المقرر موزعة على 60% على الشغل العملي - 20% على الريبوت -20% على البرزنتشين

مراحل المشروع:

1- التسجيل للمقرر:
مثل ما ذكرت سابقا" انه المدة اللي يشتغل فيها الطالب على ال499 هي كورسين " لكن اني اشوفها 3 كورسات..لانه اول كورس"اللي هو كورس التسجيل للمقرر" ضروري و من الافضل انه الطالب يكون مشتغل على المشروع من هالناحية:
- سالفة التسجيل تكون عن طريق تسجيل اسم الطالب عند رئيس القسم علشان تنزل المادة في الجدول الكورس اللي بعده " نفس التسجيل مواد البراكتكيل"..
سابقا الطالب ليه حرية اوسع في اختيار الدكتور المشرف و اختيار الموضوع..اما الحين بعد ما صار المقرر اجباري و كل ما ليه عدد الطلبة يزيد..صارت العملية معقدة اكثر.. لانه مو كل دكتور يوافق انه يستلم طلبة للاشراف على مشاريعهم .. والدكاترة اللي يوافقون انه ياخذون اكثر من طالب قليل كلش..عادة يبغون بس طالب او طالبين!
علشان جدي صار الوضع حاليا انه الطالب يسجل اسمه و ينتظر لبداية الكورس الجاي علشان يشوف اي دكتور سجلوه عنده..و يا ريت يحصل دكتور عنده موضوع..الطلبة يتأذون بعد ان هالدكتور مو مهيأ روحه للاشراف.. فيصيده تأّخر علاما يثبتون و يتفقون على فكرة مشروع

نصيحة في الاختيار:
ويا هالوضع اللي يصير الحين..نتمنى انه يصير افضل في الكورسات الجاية..
لكن نصيحة للطلبة المقبلين على تسجيل المقرر.. "في نفس كورس التسجيل "اذا حابين تشتغلون ويا دكتور معين روحوا و كلموه انه يصير تاخذنا للمشروع ..اذا قال تمام فاتفقوا وياه على الموضوع..بعض الدكاترة تكون عندهم مواضيع جاهزة و بعضهم يطلبون من الطالب يدور موضوع ..فعلشان ما يتاخر الطالب الافضل انه يدور اليه موضوع و ما يكون مكمل كورس التسجيل الا و هو عارف ويش موضوعه و ماخذ خلفية عنه

نقاط تعيق في الاختيار:
- حركة غير محبذة يسوونها الدكاترة :انه اذا راحوا ليهم الطلبة يسالونهم اذا تبغون تشرفون على مشروع..ما ياخذون اي طالب..يعني يميلون للطلبة المجتهدين و الشغالين فقط!
-اختيار الموضوع مو بس انه الواحد يدور الشي السهل..نقطة اساسية لازم تحطونها في بالكم انه المواد والاجهزة المطلوبة للشغل العملى تكون موجودة في القسم..لانه صار كذا مشروع يتعطل الشغل عليه او بعضهم يغيرون وسط الشغل و السبب انه الجهاز يخترب اومادة مو متوفرة

2- التطلع والبحث النظري للمشروع:
ثاني خطوة بعد ما يتم التسجيل و اختيار الموضوع..انه الطالب يبحث و يقرأ عن الموضوع في المقالات العلمية..و كل ما قرأ اكثر كل ما صارت عنده فكرة اوسع من ناحية الشغل العملي و من ناحية الريبوت قبل لا يبدأ
لو صار هالشي في فترة اجازة بين الفصلين او في اجازة الصيف يكون واجد احسن لانه بيكون متفرغ اكثر ..على عكس لو صار هالشي بعد ما يبدأ الكورس بيكون زحمة

نصيحة أثناء البحث:
- من الافضل انه عملية البحث تكون مرتبة..مثل ترقيم المقالات بارقام -تحديد الفقرة اللي يحس الطالب انه بيقتبسها او يستخدمه للبحث - كتابة ملخصات و وضع فيها الفقرات المقتبسة المتشابهه ويا بعض ..
كل هاذي الاشياء راح تسهل عملية كتابة الريبوت خصوصا الIntroduction و الDiscussion

3- بدأ الشغل العملي على المشروع:
بعد البحث المبدئي و الاتفاق مع الدكتور على بروسيجر معينة "اما تكون من الدكتور جاهزة ..او فيه دكاترة يخلون هالشي على الطالب انه يدوّر بروسيجر من المقالات السابقة و هذا اللي بينفع الطالب اكثر لما يسوي الشي بنفسه...
بعد ما تصير البروسيجر جاهزة و توفر مكان للشغل - و تم طلب المواد و الglassware ..حزتها يبدأ الطالب بالشغل..شي مؤكد انه الدكتور بيكون موجود في بداية الشغل للاشراف و بيتواجد في اللاب ..بعدين بيقل تواجد الدكتور و بعض الدكاترة خير شر ما يدخلون اللاب بعدين و يقتصر اشرافهم في اذا كان عند الطالب سؤال او استفسار يروح اليه المكتب..

نصائح واشياء تعيق الشغل العملي:
- ألا ما تصير انه خطوة في الشغل تتغير او تتبدل ..لانه في النهاية هي تجربة..فمو كل خطوة بتكون صح و عاادي جدا انه نعيد عدة مرات مو مرة وحدة!..يعني لازم الواحد يطول باله في ال 499
- بالاضافة الى عقبات التجربة والاشياء اللي تصير نتيجة اجراء خاطئ في الشغل.. جانب ثاني يعيق الطالب في شغل اللاب و هو وضع القسم:
-مثلا ضيق و قلة لابات البحث العلمي..فالتالي مو كل وقت بيقدر يشتغل فيه الطالب اذا كانوا كل الطلبة اللي مخلينهم نفس اللاب متواجدين في نفس الوقت بيكون كلش زحمة و ما بيعرف الواحد يشتغل...
-لابات الريسيرج تعتبر قديمة..يعني مو كلها تتواجد فيها اجهزة فيوم شغالة و الباكيم بعد ..و لو تواجد يكون بس واحد!...على عكس اللابات اللي ناخذ فيها المقررات العادية "فرق شاسع بينهم"!
- هذا غير الاجهزة الجميلة في قسمنا ..اللي يا تكون خارج التغطية او تشتغل و هي على وشك الهلاك
فيه نقاط وااجد لو بذكرها ما بخلص...و افضل انه ما اذكرهم عن احد يقرأ و يتحبط...الاهم انه الواحد يحط في باله انه عادي يمر بهالاشياء و يطول باله عليها..

-المفروض انه الطالب يخلص الشغل العملي يا في كورس واحد او اذا زاد يصير في كورس و نص..يعني المفترض الكورس الثاني و الاخير يكون معظمه لكتابة التقرير لانه ياخذ وقت


التكملة في الجزء الآخر

 

[بنفسجيه.~]

CHEMY499
SENIOR RESEARCH PROJECT
"مشروع التخرج"
الجزء الثاني​

4- كتابة التقرير النظري:

التقرير اللي بيسلمه الطالب و اللي يضم فيه البحث اللي اشتغل عليه..هو اكبر انجاز يقدمه الطالب في مسيرته في الجامعة..علشان جدي لازم يحاول قد ما يقدر يشتغل عليه بضمير و كل ما كانت المدة في الكتابة اكبر كل ما كان افضل

- مو شرط ينتظر لما يكمل الشغل العملي كامل علشان يبدأ في الكتابة..فيه جباتر يقدر الطالب يشتغل عليها اثناء الشغل العملي و لو بس مسودة علشان يتسهل عليه بعدين

الريبوت يتكون من :

1-الاشياءات الاولية " الغلاف - أبستراكت "الملخص" - الفهرس- كلمة الشكر

2- جبتر1 :introduction

و فيه مقدمة نظرية عن المشروع..يكون فيها تسلسل للموضوع على شكل فقرات يتم بنائها من عدة اقتباسات من كذا مصدر علمي موثوق، مع اعادة صيغنتها " بما معناه ممنوع الاقتباس النقلي بدون تغيير صياغة الجملة"

و بعد المقدمة البحثية.. يذكر الطالب الاهداف من هالمشروع اخر الجبتر



3- جبتر 2: procedure or experimental

اجراء العمل..يذكر في هالجبتر كل خطوات الشغل العملي بصورة مفصلة..يعني يذكر المواد- الخطوات ..اذا كان فيه اجهزة مستخدمة يتكلم عنها و عن طبيعة شغلها..و طبعا ما تكون الصورة اوضح الا بالصور ..فالافضل اثناء الشغل العملي انه يصوّر الخطوات و يرفقها في الريبوت

"جبتر 1و 2 يقدر الطالب يكتب فيهم و لو مسودة حتى لو ما كمل الشغل العملي"

4- جبتر 3: results and discussion"

هالجبتر بعد ما يخلص الطالب من الشغل نهائيا و صارت عنده نتائج واضحة ..فيبدأ يكتب فيه..
-حتى لكتابة المناقشة الطالب يحتاج انه يقرأ المناقشات المذكورة في البيبر السابقة المشابهة للبحث لتكوين فكرة عن طريقة المناقشة.

هالجبتر بياخذ وقت .. و عادة يصير للطلبة انه يكتبونه على الاخير لما الوقت يضيق
و غير انه مطلوب نسلم مسودة للدكتور المشرف علشان يعدل الاخطاء و تصحيحها بعد ما يرجعه..كلها تاخذ وقت

"هو بالواقع كل الجباتر يتم تسليم مسودة منهم للمشرف ..بس مو كل دكتور فعلا يهتم انه يصحح و يتابع !..فما استبع انه في طلبة يسلمون ريبوتهم التسليم النهائي و الدكتور ما قرأ او ما اطلع على الريبوت من قبل كلش!


5- جبتر 4:conclusion

-الخاتمة او الاستنتاج من هذا البحث..يعني مختصر المناقشة

- ايضا يتم ذكر في هذا الجبتر ال Future work:
كخطوات مستقبلة للبحث..يعني لو احد بيشتغل على نفس خط المشروع..شنو النقاط اللي يركز عليها في بحثه


6- الاشياءات اللي تصير نهاية التقرير و الملحقات:

لستة الجداول- لستة المخططات البيانية - اذا كان فيه ورقة من جهاز يتم ارفاقها ، مثل الIR او الNMR او Standards deviation


وبس..هاذي الاشياء الاساسية في الريبوت

**********

5- تسليم الريبوت الى الممتحنين:

بعد ما يتم الانتهاء من كتابة التقرير و مراجعته من قبل المشرف...بيصير اختيار من المشرف او الطالب نفسه الى الدكتورين الممتحنين
- عوامل الاختيار : انه يُفضل يكون تخصص واحد من الدكتورين نفس تخصص المشروع "يعني لو خط المشروع اورقانق الافضل انه احد الممتحنين يكون دكتور اورقانق..
بس ما احس انهم يشددون بصورة كبيرة على هالشي"​

-بعض الدكاترة يعطون الحرية للطالب في اختيار اللي يمتحنونه علشان يكون في موضع انه يختار الدكتور اللي يرتاح اليه..و بعضهم هم بنفسهم يحطون الاسم بدون ما يستشيرون الطالب
- الدكاترة الممتحنين هم اللي راح يصححون التقرير ويحطون علامة ال20% عليه..و هم بعد يقيمون برزنتيشين الطالب في النهاية و يحطون ال2% مالته بعد
-بينما ال60% اللي تنحط على الشغل على المشروع طيلة الكورسين ، الدكتور المشرف هو اللي يحطها
- بعد التسليم..يتم الاتفاق ويا الطالب على يوم البرزنتشين "اللي هو يُعتبر موعد الامتحان الفاينل للمشروع"

6- البرزنتشين
آخر محطات المشروع و متطلبات المقرر..هو ان يقف الطالب و يعرض و يناقش المشروع اللي اشتغل عليهم طيلة كورسين "بشكل مختصر"..
يحطون عادة مدة 30 دقيقة للعرض والمناقشة..يعني بعد ما يتكلم الطالب عن المشروع و عن النتائج مع مناقشتها..بيطرحون عليه الممتحنين اسئلة و بيناقشونه في جوانب المشروع
هدفهم يعرفون اذا فعلا الطالب اشتغل لو لا ..يعرف يجاوب لو لا...
- نقطة مهمة جدا...انه الطالب يكون واثق من نفسه ومن الشي اللي قاعد يعرضه..يتدرب من قبل على العرض..و بعضهم يعرضونه على دكتورهم علشان يصحح ليهم شغلات ..

*****

وبسس..
في النهاية..شي اكيد ما بنوصل للنهاية المشروع الا و احنا هلكانين ..
المشروع يبغى ليه شغل عدل..فيه طلبة "مع الاسف" يتجنبون انهم يشتغلون بضمير في الشغل العملي بالذات و يعتمدون على النقل من ريبوتات سابقة اثناء كتابة التقرير " على انه فيه تشديد وتحذير على اللي يسوي هالحركة"..
لكن لو الواحد تعب..في النهاية انت اللي بتحصد تعبك...
يعني هذا اكثر مقرر بيكون فيه الطالب معتمد على نفسه..فكلما ثابر فيه اكثر
كلما ضاف اليه و يطوره اكثر في التخصص..
وترى شعور حليو بتلمسه..لما توقف تعرض البرزنتشين وتتكلم عنه و انت مفتخر انك انجزته..
على عكس اللي ما تعب..ما بيحس بشي ايجابي و هو يعرض!


" ادري انه فيه نقاط اوسع ما ذكرتهم..حاولت اكوّن فكرة شاملة و مختصرة عن طبيعة المقرر
و حتى لو ذكرت كل شي ..حزة اللي بينأخد المقرر..بعد بتكتشفون اشياء و بلاوي اكثر"

بالتوفيق لكم

 

[الفـيـلـسـوف]

أعجبتني ، طريقة عرضش للتجاربش في المشروع التخرج ، وأتمنى من الكل يحط تجاربه في مشروع التخرج في هذا الموضوع للإستفادة وتبادل التجاررب والخبرات

 

[قيثارة من الورد]

شكرا ما قصرتين عزيزتي
كنت بانتظار كتاباتك

 

[دريم هاوس]

السلام عليكم