لتكون لي ذكرى حين أرحل

[غريبة الدار]

ماتت خطيبته بقصف جوي في بغداد وكتب فيها هالقصيدة

ذكرت أيامك وحنيت

كسر خاطري و جتني الصيحه(الغبنه) /لأكثر من مره أعيده

 

[غريبة الدار]

​

 

[غريبة الدار]

في جلسه نسائية
وحده : فلانه تحنين؟
اني وباستغرب بعدين استوعبت وتذكرت اني حاطه في حالة الوتساب : للحين توي ما بديت تبين أحنيش ؟
الوحده : لا

لن أيأس
طالبة تسعى الرغبة موجوده

#أحتاج_وقت
#أحتاج_ممارسه_وتدريب
مو طماعه ترى الخدمه مجانية لأول زبونه
رغم أني حاليا مو محتاجه ومو قاصرني شي بس ..........
أتمنى المبلغ اللي حصلته يكون كافي لي لفتره بحيث ما أحتاج أخذ أو أطلب من أبوي كوني طلعت من ذمته
أتمنى ما أصير مسرفه
بديت أحس بقيمة الفلوس
مو كل شي في خاطرنا لازم نأخذه

ملاحظة: الهدف ليس مادي بحت
بس نجرب شي جديد
أمبي أسوي شي مفيد​

​

 

[غريبة الدار]

سهل لو صعب؟!
​

م:نصيحة و عن تجربة لا تاخذون على كلام الناس هذا سهل و هذا صعب، أصابع يدك مو متساوية ، يمكن واحد يقولك مادة سهلة و تطلع عندك صعبة و مادة يقولك صعبة تطلع عندك سهلة ، بعض الي اهني مثلا الفايننس عندهم سهل بس البعض عندهم صعب ، عقليات الناس تختلف فأنتون شوف الي يناسب ميولكم

ز:أي

هو السؤال بحد ذاته صعب
إنه نقول سهل أو صعب بس خصوصا لين ما كان السؤال محدد مو عن ماده أوتخصص كامل أو كلية أو الجامعه بشكل عام كلمه وحده ما تكفي وممكن ما تكون منصفه

المكان هني أحسن مو مجبوره على اللون الأسود فقط ومو ملزومة بحجم خط صغير ولو غلطة في إمكانية أعدل أحط خط تحت الكلام اللي أحسه مهم أكتب باللون اللي أحبه وإذا شسمه اكتب باللون الأبيض وعملية البحث .أحسها أسهل وأسرع والتنظيم ووجود الأقسام أي أحد يقدر يقرء كلامي مو ملزوم يسوي تسجيل دخول ولا ملزوم يكون عضو في هذا المنتدى كلامي ما بيكون أحد مجبور يقرأه ولا بيوصلكم كإشعار مزعج في حال ما سويت اقتباس ولا منشن

كثيرا ما تكرر علي هالسؤال في هالفتره

كنت رايحه المركز الصحي
الدكتوره : ويش تخصصش ؟
اني : إدارة أعمال
الدكتوره : مو صعب ؟
اني: اتبلعم وتصديني نفس الغصه ووواعتقد اني قلت على الله إذا ما نسيت ويش كان ردي

كلمة صعب او سهل(أي أو لا ) بروحها ما اقدر اقولها
ما احسها منصفه ابدا والوقت والمكان مو مناسب ل التفصبل اساسا اني ما عدت احب افصل واتطرق للكلام بشكل سلبي عن مواد وعن دكاتره وعن قوانين ووو او حتى لو بشكل ايجابي لانه عادي الشي اللي اشوفه سلبي يكون ايجابي بالنسبه لغيري والعكس صحيح ممكن تكون السهوله والصعوبه في التخصص شي نسبي نفس الجمال الناس ما يتفقون عليه ولكل شخص نظرته ومعاييره الخاصه وغالبا الاشياء النسبيه ما احب اتكلم او اعطي راي الخاص فيها بحيث انه احد ممكن يبني قراره على راي

اصلا مو مهم تعرف هي خلاص دكتوره وكملت دراسه وتشتغل جوابي وردي ما كان بيفيدها ومو محتاجه ل جواب

#جامعيه_ولكن
#فضفضه
من محادثه ل اللي يسألون عن تخصصي (إدارة اعمال )
اني :وانتين وش تاخذين مواد ؟
لو كملتين
فلانه :خلصت الحمدلله ☺
عقبالج
اني:مبروك التخرج

إن شاء الله
فلانه:يبارك فيج
اني:شوفي عجل جان عندش نوتات او سلايدات او تستات ل هالماده طرشي لي
فلانه : عندكم كتاب ولا شنو
اني:اي عدنا بس ما اعرف ادرس واعتمد على كتب مال جامعه

فلانه: يوم اخدها ماكان في لها سلايدات لازم كتاب و كريه الكتاب عدل مابخرعج بس يوم الفاينل رحت اصيح متردده اقدم او لا، مع ان المنجمنتات لعبتي، ف لاتستهينين فيه درسيه عدل
اني:اصلا خلاص عرفتش بدون ما تقولين أنتين كله جدي
أيام الامتحانات تصيحين، كتب الجامعه بشكل عام كلها كريهة بالنسبه لي
فلانه :لا هاي مستخدمين كلمات صعبة ماقط مرت عليناا كلش


مرعاة لمشاعر البعض (طلبة التخصص والمقبلين عليه واللي يفكرون فيه ) ما بكمل باقي الكلام

همسه أو ملاحظه : قد تكون حلاوة الأشياء في صعوبتها في التحديات اللي توجهنا في تخطبنا ليها ندرك قيمتها وندرك قدراتنا
تخيلوا كل شي سهل سواء دراسه لو شغل لو زواج .... الخ احس بنعيش نفس الروتين وما في شي جديد ولا تغير وما في أكشن وبنحس بملل من هالحياة

 

[غريبة الدار]

منذ لحظات

في الساعة الاولى من اليوم الثاني من شهر مارس لسنة 2019

في مكان ما في وطني وبينما أتفقد هاتفي أملا في وصول رسالة تفرح قلبي أو محادثة تسر خاطري اسمع صوت الجرس
لا اعرف ربما كنت أحلم أو اتخيل

بصوت خائف ومرعوب فلانه فلانه فلانه بالكاد سمعتني
قد غطت في نوم عميق انتبهت لثواني معدوده وعادت لتواصل نومها

اوه ماذا افعل الأمر مخيف بالنسبة لي في وقت كهذا هممت بارتداء الحجاب وفتحت الباب و تفاجأت بعمتي قرب باب الغرفه ابتسمت في وجهي وسألتني عن السمعات
في داخلي وباستغراب (اوه أي سماعات في هذا الوقت؟ !)

حسنا انهم ضيوف او أهل (عائله صغيره من زوجين وطفل صغير وأختان مرهقتان ) قدموا من السعوديه غادروا منزلنا منذ ساعاتين او ربما ٣ساعات وعادوا فقط لأجل سماعات ابنتهم!!!
أتسأل هل كانت (السماعات ) مهمة وضروريه للحد الذي يجعلهم يعودون في وقت متأخر من الليل ومن مكان وطريق طويل !!

الحمد الله قد كانوا مجرد ضيوف وليس شيئا آخر

 

[غريبة الدار]

بمناسبة يوم المرآة العالمي
​

المرآة في المنزل ليست عاطلة عن العمل البعض يظن أن المرآة عاطلة عن العمل في المنزل ​

لا
,تؤدي المرآة أعظم وأصعب وأدق الأعمال
اقتباس من كلام الخامنئي أثناء عقد قران زوجين شابين 9-3-1998

لي الفخر بأن أكون آمرآة

رغم أنه وأنه وووو ......
بس حاليا ما عدت خايفه من ولا شي
لا الفشل ولا الرسوب ولا المستقبل ولا العمل خارج البيت بعد التخرج

في النهاية استودعت الله عقلي وقلبي وروحي ومستقبلي وأحلامي وتوكلت عليه

 

[غريبة الدار]

في الأمس يوم الخميس 14مارس 2019
كان من المفترض اكمل دوام الساعه 3:50 ولكن تكنسلت محاضرتي الآخيره وكملت الساعه 1:50 ورجعت البيت من وقت قبل لا توصل أختي

بعد الغد احتفلنا احتفال بسيط بعيد ميلاد أختي
حجزت لينا كيكه وخذيت ليها هديه بسيطه ومتوضعه على قدي
يوم بتقص الكيكه اختفى ولدها الكبير وهو طفل في الصف السادس اجتمعنا كلنا في الصاله قمت أسأل عند ولد أختي الكبير وأنادي بس بدون ما أحصل أي رد
اختي تقول خله يولي
على ما يبدو انها حركة دائما يكررها يختفي ويشرد حزة الجمعات وحزة الغدى
قصينا الكيكه وأكلنا وكملنا بعد ما كملنا اتفرغ وجا يبي كيكة
عاتبته وسألته وين اختيفت وليش توك الحين جاي، توك الحين تفرغت ؟؟!! أناديك وما ترد
رغم العتب قصيت ليه من الكيكه اللي بقت
قال انه مجهز ل أختي هديه إلكترونيه وطلب من أختي اجي الحجره اللي فيها الكمبوتر عشان تشوف سألته ويش قال ليها تعالي وبتشوفين
ورحت وياهم عشان أشوف
كان مسوي عرض بوربوينت بسيط بس جميل
اللي اذكره وظل في بالي وعجبني
الشريحه الأولى كتب فيها عبارة
(تزوج جدي جدتي وأنجب لي جنتي)

طبعا عقب ما كمل ارتسمت على وجه أختي ابتسامه وشكرت ولدها ودعت ليه بالهدايه

طرأ على بالي أني لمتى بعيش؟
بجي اليوم اللي أصير فيه أم وأشوف ولدي

 

[غريبة الدار]

 

[غريبة الدار]

السلام عليكم..
عنوان عبقري للجذب كالعادة.. عدل له؟ يسسسسس

أسمع ناس يتحجون عن (الخياييط ~ جمع خياط) بس أحسه كائن وهمي وأخاف حتى من الاقتراب منه. طبعا ما أقصد الجلابيات.. دلين منتشرين بكثرة. ولا أقصد فساتين السهرة.. دلين بعد موجودين إلى حد ما. أقصد الفساتين الناعمة إللي ممكن لبسها في الحياة اليومية.. الأقمصة والبنطلونات.. موجودين؟ بناتج مرتب يعني وملائم وينافس الملابس الجاهزة؟ أو إن يكون بمستواها؟


للمشاركة:
اسم الخياط:
الموقع:
وصف الموقع:
حدود الأسعار:
التجربة الشخصية:


^في التجربة الشخصية تكتبون مثلا فصلت عنده كذا وطلع مرتب وطلع نفس الا ابيه وهيك يعني وكم استغرق أيضا ممكن بعد.. يُفضل تكون التقييمات لنتائج إيجابية عشان نستفيد.


أفكر نضيف نقطة للموضوع تتعلق بالموديلات الجميلة والصالحة للتفصيل < معليش مو قاعدة أحصل كلمات مناسبة.. بالإضافة لتفاصيل عن أنواع (الخَلَق) والألوان *الترند* في هالفترة.. بس مادري إذا هالشي مقبول اهني مجتمعيا أو لا .


بس لا صدق يعني إذا تعرفون خياييط/ خياطين زينين شاركونا بمعلوماتكم.

من اول ما شفت عنوان الموضوع جذبتي
حصلت هديه (قطعة قماش) بمناسبة عيد الأم واني للحين ما صرت أم

كنت بفصلها وذكرت هالموضوع جيت بحط مشاركه هناك بس شفت روحي طولت وفي أشياء شوي شسمه... حسيت لو احط في مدونتي الخاصه يكون أفضل

اسم الخياط: المليح للازياء والخياطة
وهي حسابهم على الانستا
https://instagram.com/almaleee7_fashion?utm_source=ig_profile_share&igshid=1a06hwxbu4not
الموقع: سوق واقف
وصف الموقع: مقابل مودا بيطار صوبه كله محلات شنط وجواتي
حدود الأسعار: امممم 10 وفوق يمكن بعد في اقل على حسب الطلب
التجربة الشخصية:فصلت عندهم فستان لملجتي طبعا قبل رحت اشتريت خلق من منطقه ثانيه شفته معروض ودخل مخي وعجبني حسيته حليو عقب امبي افصله وين وين وين؟
كنت من قبل مفتره محلات في سوق واقف واحد من المحلات اللي دخلتها بالصدفه المليح ولما دخلت شفت موديلات وفساتين حليوه وكان هناك مره عقب قلت اني برد ارجع ل (مليح) لانه هناك مره بيكون احسن من رجل اجنبي واحسن من هندي للعلم اني مو متعوده اتعامل بالخلق والتفصيل اغلب ملابسي جاهزه واحيانا أمي_الله يحفظها ويبارك في عمرها_تولى مهمة التفصيل وروحة الخياط
لما رحت مره ثانيه ل محل المليح المصممه وصاحبة المحل خلتني اقعد وقامت تسالني وشافت الخلق استنكرت منه شلون جدي؟ وكم سعره؟؟ وشلون لعروس؟؟
قلت ليها: ما تقدرين تتصرفين فيه وتساعديني
تسوين لي موديل زين بس كنت امبي أكمل..... وأخلص من سالفة الفستان وشنو بلبس( بالي مشغول امبي أجهز روحي وامبي ادرس ل الامتحانات) وما امبي افتر بعد واجد عشان لا يضيع الوقت وعن لاأتعب ابوي
المهم في النهايه انقذتني وتيسرت الامور وخذيت قماش (خلق) اضافي واشتغلت عليه شغل عدل وطلعت بنتيجه حليوه ومرضيه بعد معاناه ومحاته وتفاصيل ثانيه ما حبيت اذكرها

 

[غريبة الدار]

مو بيدنا نودع عيون الحبايب
يالحبايب شلون ننسى عيونكم!!

رب لاتحملنا ما لا طاقة لنا به

 

[غريبة الدار]

لأن غالي الستر
​

كان تعليق على بوست في آحدى حسابات الجامعه الغير رسميه وفيها عدد كبير من المتابعين قلت أنقله هني للفائده لعل الرسالة تصل
غريبة الدار:
عزيزاتي البنات ترى جامعة البحرين مؤسسة تعليمية (مكان ل الدراسة) سالفة الكشخه والمكياج والألوان وعباية الستارة والزولية والعطور اللي توصل ريحتها ل آخر الدنيا خليها لبيتكم والأعراس #خفوا_على الشباب_شوي ترى مو شطاره تتكشخين للصبيان الشطاره أنش تنجحين وتتخرجين #الجامعة_م_مكان لعرض_الأزياء

شخص مجهول:
تتكشخين للصبيان !! هذا التفكير اللي مستحيل يموت من مجتمعنا أن البنت إذا ترتبت وكشخت , كشخت عشان شباب !!

ع:
هههههه خفوا عالشباب شدعوه محور الكون يعني اهم ولا شنو

غريبة الدار :
إذا مو جدي السالفه ف تدلع روحها وتكشخ في بيتها فقط (بيت ابوها او زوجها) او إذا بتروح عرس على الاقل ما بكون في شباب يطالعونها (لكي لا يطمع الذي في قلبها مرض) بعد جدي يصير في تناقض تقول شي بس فعلها ما يطابق كلامها

:a_l
اتفق وياش ان الجامعة مكان رسمي مو عرس، بس عاد ما اظن البنية اذا كشخت بيكون لاحد غير نفسها، يعني لو صبي قايلنها بتنبلع، بس كبنية تقولين هالكلام فشوي يعني....

غريبة الدار :
مشكله انه مو فاهمين او فاهمين غلط هو السالفه انه اغلب الصبيان اللي في الجامعه عزوبيه ويمكن بس عدد قليل منهم متزوجين وكشباب شي طبيغي يكون عدهم غريزه وشهوات لما يشوفون نفس هالاشياء تتحرك شهواتهمو هي شي متعب وصعب يصير بين نارين يحافظ على دينه ويغض البصر لو ينجر ورى شهوته (نفس إذا تروحين مطعم وفيه ما لذ وطاب وانتين جوعانه بس ما عندش فلوس او تطلعين ناسيه الفلوس حزتها تصيرين في موقف صعب ومتعب يا تبوقين او تتحملين الجوع)

ع:
الحمدلله ان انا انسانه بلحم ودم وعندي مشاعر مو وجبه اكل .. من حقي أحب نفسي واكشخ وأتعامل باحترامي .. وإذا واحد عينه زايغه ولا تفكيره زفت لو وحده لابسه شنو بيخز فيها مع نفسهم عيشي لنفسج مو لإرضاء احد

غريبة الدار :
لانه قاعده اشوف اللي يصير عدنا في الجامعه ولانه عندي اخو يدرس في الجامعه هو يمكن ما تكلم ولا قال لي شي ولا حتى يبين عليه
بس ما ندري ويش داخل ولأنه قريت وسمعت وعرفت مشاكل او خل اسميها (معاناة الشباب) هم ما بيتجرأون يجون يقولون هالكلام لبنات عشان لا يطلعون بصوره مو حليوه قلت اكتب اهني يمكن يمكن توصل الرساله وتأثر

غريبة الدار :
تأكدي انه طبعتش كأنثى غير عن طبيعة الجنس الثاني(كذكر) انتين تشوفين شي عادي بس هو يشوف وممكن يتخيل أشياء ثانيه يعني ما بنحب روحنا إلا إذا طلعنا زينتنا ومفاتنا وتضاريس جسمننا لأشخاص أجانب عنا ترى هذا الشي علشان نحافظ ونصون أنفسنا اتفق وياش في النقطه الآخيره بس حزتها على الاقل نكون سترنا روحنا واتخذنا الأحتياطات من حجاب ولبس محتشم يستر مفاتن الجسم وهم بيكونون محاسبين على كل نظراتهم

ع:
اللي يتربى في بيئه وايد منكتمه يصير جذي اول مايتحرر من بيئته يصير جنه داخل ديزني لاند .. يعني لو فرضا ان قدرتي تفرضين على البنات شنو يلبسون وشنو يسون لو طلع برا لو عاش برا في دول اجنبيه .. مو حل يا حبيبتي والرجل مو كائن حيواني بس يفكر بهالطريقه الشباب اوادم نفسنا وثقافات وطاقات اللي يخلي فئه منهم جذي اهو العزله عن الجنس الثاني .. مع ان نادر في البحرين هالشي ! بس يعني ماعرف شقول لج الله يوفقج بس مو كل الناس تفكيرهم بس في الشي اللي في بالج وتقبلي احترامي

غريبة الدار :
عشان تطلعينه بصوره سيئة او مو حليوه وصفتينها ب (بيئة متكتمه مو بس متكتمه لا بعد قلتين وايد متكتمه) غريب عحيب احين لما نحافظ على حجابنا وسترنا ونحط حدود ل علاقاتنا وي الجنس الثاني نفس ما الله قال لينا نصير بيئة متكتمه عذارا نفس ما قلتين وايد متكتمه ((وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا ۖ وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ ۖ وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ أَبْنَاءِ بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنّ أَوْ مَا مَلَكَتْ أَيْمَانُهُنَّ31)) سورة النور الآية جدا واضحه وصريحه ولاحظي فيها أنه خص بذكر (المؤمنات) دون (المؤمنين) تدرين ليش؟ لأنه المره جزاء جدا مهم من المجتمع هي نص المجتمع وهي اللي تولد وتربي وتنجب النص الثاني الذكور فإن صلحت صلحت الاسره وان صلحت الأسره صلح المجتمع وإذا لا فالعكس صحيح “أول ما يتحرر “ من قال ليش اصلا احنا مسجونين أو انه في شي يقيدنا هي اللي تتكلمين عنهم يمكن تكون الفئة اللي ايمانهم او اسلامهم متزعز و مو مقتنعين من الحجاب ولا يدرون ليش يلبسونه او انه صار عليهم اجبار من الاهل ويمكن ما تاملوا ولا تدبروا في كلام الله اوحتى إبليس يقص عليهم ويزين الغلط في عيونهم

ع:
فاهمتج حبيبتي بس مو اجبار الكل يلبس الشي اللي انتي تحسينه صح سواء وحده مسلمه او غير مسلمه الحل مو بالفرض والاجبار .. الحل ان كل واحد يصلح ذاته وتكون البيئة المحيطة ماتنمي اخلاق شباب فاسد حاس ان اهو باقي دزة ويطيح في الغلط خلاص الواحد لما يختلط في الجامعه في الشغل بحدود الأدب والاحترام ويتعزز عنده مبدأ ان كل وحده تلبس اللي تبيه راجع لقناعاتهم مو تعالو كلكم غطو روحكم اخاف اشوفكم بالغلط واقع في الاثم لان بصير شي غلط مني انا غير مسئول عيل الله مايحاسب الرجل يعني .؟ لو كان هالشي صح الريال مايتحاسب عند ربه لو اهو مسلم وشاف وحده كافره متكشخه؟ يعني كل الذنوب والمعاصي من وإلى النساء ! صراحه تفكير غريب الأفضل الواحد يشتغل على نفسه مو يحاول يغير الغير يغير من نفسه اهو

ع:
لج بعد ان الرجل من هذا النوع اللي تتكلمين عنه وتقولين مو متزوج لو تزوج مليون مره بيتم كل ماشاف وحده خز فيها وقال النساء غير متحتشمات مابيوده شي لا زواج ولا غيره

غريبة الدار
بالنسبة ل نقطة التغير إن كان تغيير للأحسن فهذا شي جيد ومقبول عاد هذا بيعتمد على اسلوب الطرف الثاني اللي جاي يباني اتغير وإذا لا افضل اني ما اتغير وبالنسبه ل تغير الغير على ما يبدو حسيتن بشوي استفزاز يمكن لأنه الكلام ينطبق عليش او حسيتن روحش المقصوده رغم انه كلامي موجه بشكل عام للجميع واني ما كتبت هالكلام إلا لأنه الحساب يتابعه عدد كبير من الناس فنستغل الفرصه ومن هالناس بنات جامعيات الرسول صلى الله عليه وآله وسلم يقول : ((من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه ، وذلك أضعف الإيمان .)) فإذا كان بالأمكان نغير الغير للأحسن وين المشكله؟؟! نحاول والباقي على الله اني مو جايه افرض شي على احد وإنما أبين وجهة نظري واذكركم بكلام الله وأبين ليكم السلبيات المترتبه عليه اللي غافلين عنها او متجهلينها ما أدري يمكن يكون كلامي مأثر ((لأنْ يهْدِيَ اللَّه بِكَ رجُلًا واحِدًا خَيْرٌ لكَ من حُمْرِ النَّعم)) ونقطه.

:a.q
أول مره بنيه تقول شي صح والله لو الجامعه ما فيها أحد عادي يداومون ب جلابية النوم ,أكشخ علشان نفسي قالوا !

ع:
لو وايد انتي بيرفكت في الدين بتعرفين ان سوء الظن حرام ياقلبي هههههههههه

م:
من قالش اصلا انه يتكشخون حق الصبيان متى بينقرض هالتفكير المتخلف ترى الصبيان مو محور الكون

غريبة الدار :
خلاص اللي عندي قلته واعتقد كلامي وكلام الله واضح كتبت أشياء واجد بإمكانكم تردون ترجعون ل كلامي وتقرونه مره ومرتين وثلاث لين تفهمون وتستوعبون واضح انه لو مني لباجر اتكلم واكتب ما بتقتنعون (إن الله لا يغير ما بقوم حتى يغيروا ما بأنفسهم) أهم شي طلعت الهدره اللي في جبدي وبينت استناكاري على الغلط اللي قاعد يصير ووصلت الرساله اللي كنت امبي اقولها

غريبة الدار :
أكيد ما قرأتين كلامي فوق وإذا قريتنه فأكيد ما فهمتين عقب كلللل اللي قلته وجايه تسألين ليش !!! لين صار يوم الحساب وحطوكم في القبر أسألوهم ليش وللعلم ترى في أحاديث ورويات تتكلم عن عذاب المتبرجات (اللي يظهرون زينتهم ومفاتنهم ل الأجانب) بأمكانكم تبحثون وتقرون يمكن تراجعون نفسكم وتدركون حجم الغلط او الذنب اللي تتركبونه

:dr.s
اكو انا صبي واتكشخ .. يعني اكشخ للبنات ؟

غريبة الدار :
الله اعلم بالنيات وضع الصبيان مختلف وما يميلون ل نفس هالشغلات كثر البنات

dr.s
انتي بنية واخبر فيهم بس فعلاً الله اعلم بالنيات

 

[غريبة الدار]

اني اقترب ولكني لا أصل

 

[غريبة الدار]

واراد الانسان ان يبكي بأكثر من قلب فاخترع الناي.

وكيف للبكاء أن يكون بأكثر من قلب ؟؟!
وفي واقع الحال نحن لا نملك إلا قلبا واحد !!​

 

[غريبة الدار]

كلمتني عن المدرسه وش صار ويش سوت.... الخ

ابتسمت واني اسمع كلامها وسوالفها في يوم من الايام كنت في نفس عمرها كنت ارجع البيت وما اتكلم عن ويش صار في المدرسه وويش سويت يمكن لانه اصلا ما كان في احد مستعد يسمع وهذا خطاء في التربيه الاخطاء اللي تعرضنا ليها لازم ما نكررها لولادنا مستقبلا

الحياة كانت احسن كانت الدرجات احسن كانت الحياة ابسط
وهذي الجملة ما أقصد بها إنه الحين الحياة مو حليوه وكلها مو زينه الحمدالله في أشياء زينه وحليوه ولازم نحمد ربنا عليها
ما كان مطلوب منا شي غير انه ندرس وننجح
كبرنا وصار مطلوب علينا اشياء ثانيه اشياء اكثر

كبرت وعرفت انه حياة الكبار مو حليوه نفس ما رسمنها في بالنا مو حليوه نفس ما توقعنها
عرفت انه لازم ما نتوقع حياة مثاليه و ورديه عشان لا عقب ننصدم بواقع ما يعجبنا وما انتقبله

 

[غريبة الدار]

بمناسبة قدوم شهر الله (شهر رمضان )
يوم الأحد اليوم الخامس من الشهر الخامس سنة 2019>>> أوه توي انتبه أنه اليوم التاريخ مميز وحليو

المهم ما أطول عليكم اليوم كان عندي امتحان كان المفروض مقدمتنه من 24-4-2019
فدمته وكانت الكميه والمطلوب أكثر لأنه أجلته
وعقب المحاضرات قررت أروح أشتري كيكة ورمان عشان أقدر أسوي هالحلاوه اللي وصلتني طريفتها عن طريق قروب وت ساب

حلاوة الرمان

حلاوة الرمان
المقادير
ا . كيكة سارلي
٢.دريم ويب
٢.قيمر نستلة
١ فنجان فيمتو
١كيس جلي احمر
رمان للتزين.
الخطوات.
نقطع الكيك ونصفة في القالب مع تشريبة بالحليب ..نسوي الكريمة في الخلاط ..الحليب مع الدريم ويب والقيمر ومن ثم توضع على الكيك وتدخل الثلاجة لمدة ساعة ونص لين تجمد ..ثم توضع حبات الرمان فوق طبقة الكريمة ..ويحهز ..كاس الجلي مع فنحان الفيمتو يكون بارد توضع فوق طبقة الرمان بالملعقة ..وترد الى الثلاجة لمدة ٣ ساعات ..

وبالعافيه عليكم

 

[غريبة الدار]

قصه قصيره أعجبتني

ذات مرة وقع طائر في غرام وردة بيضاء
وقررأن يصارحها بحبه ، ولكنها رفضت .
وقالت أنا لا أحبك . فظل يصارحها بحبه بشكل يومي
. وأخيراً قالت الوردة البيضاء : عندما يصبح لوني أحمر سوف أحبك .
وفي أحد الأيام أتى الطائر وقطع جناحيه ونشر دمه على الوردة البيضاء فتحول لونها إلى الأحمر .
فأدركت الوردة كم أحبها الطائر ، لكن الوقت كان قد فات لأن الطائر كان قد مات .
لذلك عليك محبة واحترام مشاعر الشخص الذي يحبك قبل ان يفوت الاوان.

فقد ينكسر في النفس شيء لا يجبره ألف اعتذار

 

[غريبة الدار]

يقولون وعد الحر دين
27 يونيو2018
كنت حاطه في حالة الوتساب
.............ترحب بجميع استفسارتكم واسئلتكم وإذا تبون بعد عادي اطلع وياكم أغير ليكم جو عن طلعتكم بروحكم
وصلني تعليق من وحده تصير لي
لو اخذت او اخذتين الليسن قلت ليش قومي نطلع وعلى حسابي عازمتنش (رمز قلب مكسور )

سكت وما رديت بشي
أخذت الليسن بس ما شفت شي منها يا نست أو تناسبت يمكن صار ليها شهر لو شهرين

أني ما طلبت من أحد بشكل مباشر بس كان من الملل وتعبير عن ضيق وحاله نفسيه
هي بنفسها جت وقالت هالكلام محد مجبور على شي ولا على المجامله

لا تقولون شي ما تقدرون تسوونه لا توعدون بوعود ما تقدرون تنفذونها (بشكل عام )
ترى في شخص ممكن ينكسر خاطره و هو ينتظر وفائكم بوعدكم ويخيب ظنه فيكم
لا توعدون طفل بشي وعقب تسحبون عليه بس لأنه طفل
خلكم قد كلامكم وقد وعودكم أو لا توعدون
أو على الأقل اعتذروا لأنكم مو قادرين تنفذون وعدكم

ترى كسرة الخاطر شي مو سهل

 

[غريبة الدار]

كيكة كاكاو الجلكسي
الطريقة من عندي
المكونات
كيكة بيتي كروكر
كاكاو جلكسي بالبندق
كاكاو جلكسي ساده
وبعد بوردة الكاكو(النسكويك اللي علبته صفره )
سويت الكيكة ذوبت كاكاو الجلكسي اللي على بندق وحطيته وي خليط الكيك وحطيت من كاكاو النسكويك
دخلتها الفرن وعقب ذوبت الكاكو الساده وزينت الكيكة

 

[غريبة الدار]

مقتطفات من آخر سفره إلى ايران (شهر 1 سنة 2019) كانت عقب الأمتحانات

كانت سفره جدا مميزه وليها خصوصية في قلبي وكانت رفقه حليوه من الجيد أنه تحملوا طباعي السيئة
تمنيت لو كانت وياي أمي ولكن ....

أتملل وأتعب من الطلعات الكثيره وأتملل كلحين أبدل ثيابي ثياب بيت, ثياب طلعه, ثياب نوم, ف بدال لا يخلون المفتايح تحت عند الأستقبال يخلونهم عندي

هتل آبارتمان فراديس في مشهد حتى للحين عندي البطاقة أختي خذت لي يعني قلنا احتياط يمكن أطلع بروحي وأضيع أو ما ادلي

دئما اتذكر مثل الحاج أبو جواد في حساب الجدحفصي يقول : (يالله عوين ومعين حتى على مشي الطريق ))

منزل الإمام السيد علي الخامنئي قائد الثورة الإسلامية في مدينة مشهد.

آحدى المكتبات دخلتها ولكن كل الكتب باللغة الفارسيه وأني ما أفهمها خذيت لي كتاب صغير (قاموس) عشان أتعلم اللغه

اممم اعتقد أنه هي الصوره في نيشابور

مسابقة من رواق دار المرحمة في مرقد الامام الرضا عليه السلام
ما حالفني الحظ في الفوز ولكن عجبتني

اعتقد أنه كتاب مفيد ولكن للحين ما كملته إن شاء الله اٌقدر أكمله وأستفيد منه قبل لا تخلص سنة 2019

خلال سفرتي تعلمت أو علموني على خلط الرمان مع الروب طلعت وجبة لذيذة خصوصا إذا كان الرمان حامض

مطعم في مجمع ما أذكر وش اسمه في داخل مكان بس المكان متروس قعدنا برى والجو كان بارد بارد

الملك شيك (فقرة الحلويات )المفضله عندي

التقاطه سريعه وما طلعت واضحه من شوارع آيران

بعد ما اذكر وش اسم هالمكان

كنت أقول أنه ما أمبي أسافر أول شي اتخرج وأحصل الليسن وعقب أفكر في السفر وصرت كله أخاف أسافر وأموت ويصير في شي وعقب يتأذون أهلي و أتعبهم

تعوذت من إبليس وتفألت بالخير وتوكلت على الله وتعلمت أنه لازم أواجه خوفي

والحمدالله على كل شي حليو في حياتي
الحمدالله على كل الناس الحليوه(الطيبه) اللي دخلت حياتي
الحمدالله على كل النعم اللي الله أنعم علينا فيها

 

[غريبة الدار]

الدكتوره : ويش تخصصش ؟
اني : إدارة أعمال
الدكتوره : مو صعب ؟

لتو فقط استوعبت المعنى والمغزى من مثل هالسؤال
كنت البارحه اقرء في موضع متعلق ب (الجامعيات المتزوجات ) وقدرتهم على التوفيق والموازنه بين الدراسه ومسؤليات الزواج

كان المقصود تخصصش صعب ! أنتين تقدرين تدرسين وفي نفس الوقت تتحملين مسؤليات الزواج ؟
في الحقيقه منذ تخرجي من الثانوية كان هالموضوع جدا يشغل بالي
إن شاء الله أقدر ولو ما أقدر الله ما كتب لي هالشي و جان ما تيسرت أموري