طلاب التصميم الداخلي حياكم .. !!

[وعد البحرينية]

هاي بغيت اسال الي متخصص تصميم داخلي


شرايكم بالتخصص ؟ سهل ..صعب

اكثر المواد بالانج لو بالعربي ؟؟

اني قريت الخطة جفت المواد اوك ... بس ما ادري على اللغه

اني يمكن اغير ليه .. تنصحوني لو لا ؟

 

[Ayhara Kotoko]

شكله مافيه انتريورات اهني !

التخصص مايعتمد على اللغة لأنه عملي أكثر من كونه نظري، فتميزش راح يكون بشغلش أولشي
والتصميم الداخلي بالذات يحتاج لفن وذوق كبيرين وأني من وجهة نظري هالأمور يقدر الشخص ينميها لو ماكانت عنده، عن طريق الإطلاع على الأعمال الفنية و أعمال المصممين في شتى المجالات مو بس التصميم الداخلي...
وشيء مهم جدا هو أن لازم تكون عندش رؤية ،، تنطبع لاحقا في أعمالش... لازم يكون لأعمالش بعد فلسفي معين ..... في التصميم مايرتبون أثاث وألوان وينسقون مثل ماتسوي أي وحدة في بيتها... لا في التصميم لازم يصمم الطالب وفقا لرؤية و فلسفة معينة يجعلها موضوع تصميمه،، وممكن نسمي هالشي " كونسبت "

مانقدر ننصحش تدشينه أو لا،، أحنا نوضح ليش الصورة وانتين بعدين تقررين تبعا لاستعداداتش .

هل مستعدة تقضين معظم وقتش في التصميم والرسم ؟؟
هل عندش الرغبة في التعلم المستمر الذي لاينقطع حتى بعد التخرج ؟؟
هل مستعدة تكونين تخصصش ؟


إذا إي، فأهلا وسهلا

 

[هندساوية]

أهلين أختي وعد
التخصص لحد ألحين ما فيه أي صعوبة
واااايد متعب بس.....جميييل
بالنسبة للغة أكييد محتاجة الانج كتابة و خصوصا تحدث {حق عرض المشاريع
المواد مو معتمدة بشكل كبير على الانج ....يعني تمشين روحش
اذا مستعدة تسهرين...تتعبين...تصرفين فلوس بهبل....تروحين مشاوير ...و تتحملين اهانات من....
فهو التخصص المناسب
و من طلب العلا سهر الليالي
حياش ويانا

 

[مي مي]

اني خاطري احول تصميم
حدي احبه
بس مادري وش سالفة المقابله والامتحان

 

[orange.27]

التخصص حلو بس متعب جدا و مكلف ايضامثل ما قالوا الاخوات
اختي مقاابلة التصميم و الامتحان شغلة سهلة
الامتحان يطلبون منج ترسمين تخطيط لغرفة ببالج و ترسمين قطعة اثاث مو شرط رسم مضبوط بس شي معقول يعني و بدون ادوات
و تقدرين ارتفاعات واطوال بعض قطع الاثاث و شنو اللون الل يطلع من مزج لونين
مثال: احمر+ اسود= ماروني
و اذكر عطونا نصمم شعار لأي شركة بس الموضوع ان انتي شلون تبتكرين طريقة توصل للناس وظيفة هذي الشركة
و كان سهل نسبيا و التقييم يكون على نظرتج و قدرة توصيلج للفكرة ترى لا تخافين مو لازم كل شي مضبوط بس اهم اذا لمسوا فيج حس الفن و التصميم بيقبلونج
و المقابلة كانت بالانج تكلمي عن نفسج و شنو تعرفين عن التخصص؟
و هل تقرين عنه؟
و في وين تقرين؟
و هل تعرفين مصمم داخلي مشهور؟ شنو اسمه ؟ و شنو اللي يعجبج في تصميماته؟
انتي شنو التصميمات اللي تحبينها و ليش تحبينها و شنو تتوقين النوع اللي بتمشين عليه بعدين؟
هل تعرفين دلالة بعض الالوان ؟ و شنو اغلب الالوان اللي تستخدم في بعض الاماكن (هم بيعطونج جم مكان) مثل المستشفيات و المطاعم؟
المقابلة ما تتعدى الربع ساعة و مو شرط كل هذي الاسئلة بس يعني اذا بيسألون ما راح يقولون شي غير هالكلام هذا اللي اذكره و ان شاء الله اكون افدتج بشي
و توكلي على الله و اهم شي ما تكونين متوترة لأنهم يسجلونها نقطة سلبية كوني واثقة و ان شاء الله كل شي بيكون اوك