[موضوع شامل ] لكل استفساراتكم حول اختيار التخصص الجامعي ..

[غِيابْ . .]

مم بس الاعلام بعد رأي بيتنا فيه شلته من بالي
وأحاول أفكر بتخصص ثاني

أفكر في تصميم داخلي
الي عرفته إن هندسة تصميم داخلي لـِ فيز وريض
بس تصميم داخلي يصلح للكل اتوقع !!

انزين سؤال :
تصميم ديكور او داخلي مايصير أحد يدخله ويحب ينمي هالشي فيه
مايكون موهوب اساسا بالتصميم !!

 

[AM-ahmeed]

انتين تعرفين ترسمين اولا؟؟؟؟ بنت خالتي شاطره وذكيه ورسمها في نظرنا اوكي يوم دخلت الأمتحان خلوها ترسم وماقبلوها وثاني شيء هي علمي

الهندسه مو لتجاري

 

[AM-ahmeed]

وحتى لو يقبلون بمال التجاري والهندسه مايقبلون بمال التجاري ولو فرضا قبلو ترى ماهو سهل على مال التجاري لأن الريض الا خذيتوه في المدرسه مو مكثف حتى الفيز يعني بتحسين بصعوبه وايد وفي النهاية الشيء راجع لش بس ماخبري يقبلون بمال التجاري

 

[AM-ahmeed]

انتي قولي شنو الأشياء الا انتي فالحه فيها واني بقترح عليش

 

[غِيابْ . .]

لا ماعرف ارسم

يعني اشيل التصميم الداخلي من بالي بعد !
شتخصص يارب !​

 

[غِيابْ . .]

فيني ميول للأدب . . بس مافكر اتخصص فيه
احب التصوير عدل
المواد التجارية زينة فييها
بس ودي ادخل شي بعيد عن التجارة
معنه الاكثر تواجد بالسوق . .

 

[AM-ahmeed]

التصميم الداخلي امتحانهم ترسمين خخ والهندسه شيليه من مخش نهائيا هو اولا لمال العلمي وثانيا صعب على مال التجاري

يعني مثلا انتين انجليزتش ضعيفه فكري في تخصصات الآداب لأن كلها عربي وتخصصات الحقوق

واذا عادي عندش البزنز في محاسبه >> بس انتين اوكي في المحاسبه؟؟ اذا اوكي في المدرسه وتستمعتين فيه هذا بيكون نفس المستوى بس طبعا من كل ماتنتقلين لمرحله اكبر بيصعب اكثر

وعندش كذا تخصص انتين كتبي وبفكر اني شنو الأقرب لقدرتش

قولي انتين اي مواد تحبينها في المدرسه وتجيبي فيها اعلا الدرجات حق اقدر انصحش له

 

[AM-ahmeed]

امم غير تخصصات التجاري

تقدرين تاخذين نظم معلومات ترى موب ذيك السهوله فيه صعوبه لأن فيه مواد علميه هو ممتع ويبي له تشغيل مخ وبعد فيه اشياء تجاريه

والبعيد كلش عن التجاري آداب بالعربي وحفظ هو ويه الحقوق بس تقدرون انتون تاخذون حقوق؟؟؟ والحقوق مناك من صوب المحاكم وهالقضايا ويعني هالتخصصات كرج بالعربي واذا انتين تمام في اللغه تقدرين تاخذين انجليزي بيكون شيء سهل بنسبه لش وطبعا بيكون من تخصصات الآداب

 

[غِيابْ . .]

يعني ما بفلح في التصميم :mellow:
الانج زينه فيه ,, بس مافكر في كلية الآداب
زينة في المحاسبة بس بعد مافكر فيه
الاقتصاد والبنوك والمنجمت زينه فيهم

عقلي مشوش عدل
وماعندي خلفية عن التخصصات

 

[AM-ahmeed]

التجاري مثل مواد المدرسه بس كل ماده ليها تخصص بروحها وبالتفصيل الممل ومشوار شطوله

نظم معلومات يتكلم عن السستم الجهاز الكمبيوتر >> بنسبه لي يبي له شوي والبزنز اسهل منه .. بس حلو ممتع

مادري فكري انتين بعد ولي كلش ماله علاقه بالتجاري تخصصات الآداب او الحقوق .. عن اذنش انتين شوي مخش مشوش تحتاجين تفكرين واني مخي مشوش محتاج لنومه

انتين كتبي التخصصات الا تبينهم رغباتش وبكتب لش عن كل وحده عن شنو تتكلم وشو هدفهها واكيد بعد في اعضاء غير بيساعدونش وبيفيدونش

بس نصيحتي لوجه الله فكري في قدراتش قبل رغبتش نصيحه لوجه الله

 

[غِيابْ . .]

- ادارة أعمال
- التسويق
- تصميم جرافيك " تخصص مشابه للتصميم الداخلي او مختلف ؟ "
- العلوم المالية والمصرفية


مشكورة .. غربلتش

 

[▌ ṝᾱṫḩᾶᾳ » ✿]

تصميم داخلي ماله علاقة بفيز و ريض أو تجاري
لانهم ببساطة ما يدرسون فيز
يدرسون بس كالكولاس 1 و كالكولاس 2
و هذا الكل يمشي فيه
سواء تجاري أو علمي
. .
التصميم الداخلي يعتمد على الموهبة بالدرجة الأولى
معظم اللي أعرفهم في التصميم الداخلي كانوا تجاري
.

​

 

[shy.eyes]

هالخطوة مصيرية تقريباا ويتخللها خوف وتردد وهذا شي طبيعي وكلنا مرينا فيه ،،

قبل راي الاخرين ومدى اهمية التخصص انتي شنو ميولش اي جانب تحبين تنمينه ،، من خلال كلامش تحبين التصوير بس هذا يعتبر هواية ،،

الانه ماعتقد اكو مهنة كتخصص متوفرة حاليا ،، بالنسبة لتصميم الداخلي اني انقبلت بهالتخصص وحولت لاكاونت ،،

التخصص يعتمد ع الموهبة واكو امتحان ومقابلة والتجاري عادي يقبلونهم ،، اذا كان لش حس فني بالديكوريشن والتصميم وانتي رسامة ،،

اتوكلي على الله ودشي التخصص اما اذا ماعندش هالميول فما انصحش الانه يعتمد ع الرسم وااجد ،، ويتطلب اغراض واجد للرسم ،،

وبيني وبينش هالتخصص عادتا كلن يفتح له مشروعه الخاص بعد التخرج يعني المستقبل الوظيفي مو خوش ،،

بس ماخفي انه التخصص ممتع ،،

اكو بدائل وتخصصات ثانية حلوة ،، حتى لو انتي تجاري مو شرط تدرسين تخصصات تجارية اذا كان عندش ميول ادبية ،،

حقوق اعلام سياحة ،، حبيت اتكلم عن السياحة التخصص مهمش بس مستقبله الوظيفي ممتااز طبعا بعيدا عن الاوضاع الحالية ،،

التخصصات التجارية حلوة بس فيها جانب الفهم وجانب الحفظ وانتي عليش تصنفين نفسش بينهم ،،

يعني مثلا تخصص الاكاونت يعتمد ع الكلكوليشن اكثر وطبعا ماننكر انه فيه مواد متخصصة بالثيوري بس يظل يعتمد على الفهم بالدرجة الاولى ،،

عكس المنيجمنت و الماركتنق يتخلله فهم بس يعتمد على الحفظ بالدرجة الاولى ،،

والبنكنق نفس الاكاونت ،، انتي جوفي المواد التجارية الاا درستيهااا شنو الاا حبيتي اكثر كبداية فقط ،،

بإمكانش تجوفين كتب من اخواتش او اهلش لتخصصات معينة و تجوفين يتكلم عن شنو وهل هالشي انتي تميلين له اولاا ،،

اقري عن التخصصات الاا حاطتهاا في بالش في النت لازم اكو وصف او موجز عن تخصص معين واعتقد حتى عن المستقبل الوظيفي شنو راح يكون ،،

اطلعي على الخطط الدرراسية لتخصصات وجوفي المواد قبل ما تتخذي قرار اتوقع هالشي بيفيدش ،،

لاا تستعجلين وفكري وبنفس الوقت حطي في بالش لو لاا سمح الله اخترتي التخصص الخطأ عندش فرصة لتحويل بالجامعة مرة وحدة طول فترة الدراسة ،،

لكن ممكن تخسري مواد وممكن تتأخري عن الخطة اي تطولين بالجامعة ماتتخرجين بالمدة المحددة ،، هذا بحالة التحويل من كلية لكلية ،،

لكن اذ التحويل من تخصص لتخصص بنفس الكلية مثلا من اكاونت لبنكنق ماراح تروح عليش مواد الانه مواد الدبلوم نفس الشي بس يمكن تتاخري عن الخطة ،،

والتحويل له شروط من معدل ووو ،، وان شاء الله ما بتحتاجين له ،،

بالتوفيق ،، ​

 

[shy.eyes]

...

 

[AM-ahmeed]

امم فكرت انه هندسه فيه هالأمور ..

بس الأكيد انه مايقبلون بناس مايعرفون يرسمون ..

وفكرت فيه هالسوالف لأن رباعتنا الا دخلوه كلهم علمي

وعادي مافيها شيء لو خذيتي تخصصات الآداب اذا ماخذيتي من الآداب ولا البزنز من وين تقدرين تاخذين الا اذا تبين من كليه المعلمين ولازم معدلش يكون تمام

 

[تأمل]

سلام عليكم
.

انيي طالبة توجيهي / ما تعرف شنو تتخصص ..
و ما عندها احد تسأله و تاخذ بنصايحه / تقدرون تقولون انها ضايعة كلياً / و ما باقي شي عن التخرج فهيا في حالة توتر و خوف شديد :tears: !
/
المهم اني مسار - تجاري -
بس مو حاطة ف بالي كلش ادخل شي فيه تجارة ..

مع إني اوكيه ف المحاسبة و المال < درسناهم بالانج ، و البنك و القصد < درسناهم بالعرب

لكن ف الجامعة اعتقد اكيد بكون الوضع غير لان كل شي بالانج و اني مو لهناك ف الانج يعني بس امشي حالي ..
و هي غير التعامل مع الاساتذه ووو .. من جي مو مفكرة
.
حبيت اسالكم عن تخصصات كلية الاداب
تخصص التاريخ و الجغرافيا و العربي و الدين
انه اعرف ان تخصص العربي و الدين مع بعض ..

ف ابي اعرف تخصص التاريخ و الجغرافيا مع بعض او لا ؟

و ابي اعرف المواد الاساسية و الفرعية الثانية الي ندرسها ف كل تخصص من هذول ؟

و هل المواد دراستها كلها بالعربي ؟

و هل هذي التخصصات فيها مقابلة و امتحان قبول ؟


و بس هي حاليا اسالتي و اذا ممكن تساعدوني و طبعا شاكرة لكم

​

 

[أمواج]

حبيت اسالكم عن تخصصات كلية الاداب
تخصص التاريخ و الجغرافيا و العربي و الدين
انه اعرف ان تخصص العربي و الدين مع بعض ..

ف ابي اعرف تخصص التاريخ و الجغرافيا مع بعض او لا ؟

و ابي اعرف المواد الاساسية و الفرعية الثانية الي ندرسها ف كل تخصص من هذول ؟

و هل المواد دراستها كلها بالعربي ؟

و هل هذي التخصصات فيها مقابلة و امتحان قبول ؟

اولاً مثل ما قالت ليي الاخت كود أول ما جيت أسأل عن التخصصات

أولا ً : أهلا فيج خيو
حلو الواحد يسأل قبل لا يدش اي شي , نصيحة مني , اسألي واسألي واسألي حتى لو الكل قال عنش شسمه شسمونه , بعد اسألي

من قال لش ان العربي و الدين ويا بعض ؟!

اللغة العربية تخصص بروحه و الدراسات الاسلامية تخصص آخر بروحه

فيه في الجامعة تاريخ بس ما اذكر اذا كان وياه جغرافيا أو لا

المواد تقدرين اشوفينها في الخطط الدراسية للتخصصات .. ابحثي عنهم في المكتبة بالمنتدى

مثل ما اعرف ان اللغة العربية و الاسلاميات و التاريخ كلهم بالعربي

فيه تخصصات فرعية مع هذي التخصصات

ما فيه مقابلة و امتحان

بالتوفيق =)

 

[تأمل]

ايي انه سجلت بالمنتدى حتى اسال .. لكن شكله محد له خلقي / ف اظل ع عماي احسسن


محد قال لي ، بس شفت في موقع جامعة البحرين في الاقسام الاكاديمية تبع الكلية مكتوب " اللغة العربية و الدراسات الاسلامية " .. :mellow:

تقصدين المكتبة الجامعية ؟
لاني دخلتها و ماكو شيي بس تلخيصات .. < قسم التاريخ

على العموم مشكورة اختي ، تعبتج معاي

يوفق الجميع يَ رب : )



​

 

[أوراد]

حبيت اسالكم عن تخصصات كلية الاداب
تخصص التاريخ و الجغرافيا و العربي و الدين
انه اعرف ان تخصص العربي و الدين مع بعض ..

ف ابي اعرف تخصص التاريخ و الجغرافيا مع بعض او لا ؟
العربي .. الدين .. التاريخ .. الجغرافيا
كل واحد تخصص بروحه ماله علاقة بالثاني


و ابي اعرف المواد الاساسية و الفرعية الثانية الي ندرسها ف كل تخصص من هذول ؟
في مواد مشتركة لكلية الآداب .. يعني لكل التخصصات مثل (العربي والاسلامك و الايتي ولستات ... في بعد مواد)
تخصص تاريخ الفرعي الا ليه (عربي و علم اجتماع وانج والايتي)
العربي الفرعي الا ليه (انج و الايتي وعربي .. في بعد بس مو ذاكرة)
تخصص الجغرافيا .. مغلق

و هل المواد دراستها كلها بالعربي ؟
ايي دراستهم بالعربي

و هل هذي التخصصات فيها مقابلة و امتحان قبول ؟
لا مافي مقااابلة ولاشي

إن شاء الله افدتش

 

[تأمل]

أمواج & أوراد
.
تسلموون خواتي ’ ما قصرتون ..
يعطيكم العافية و جزاكم الله كل خير
و ان شاء الله ما اكون ثقلت عليكم

​