((من قدك المايك بيدك ))

[šωєєт нєαят]

تعآل تعآل ..

احمر وين بتروح بهالسهولة المتوقعه ... !!

كمل كمل تراك ماقلت شي بعدك ..

بعتبرهآ بداية النص ..

نبي الـــتفاصيل .. نبي الي تكرهه والي تحبه ..

نبي حياتك الخاصه شلون عايشنهآ ..

اوقات فراغك

هواياتك ..

كلمنآ عن حياتك مع ربعك ..

كلللللللل شيييييييييييييييييييييييييي كل شييي

نبي نعرفه

الي ماعرفته بعدك انه فيه وحده سمها حور تحب تقرآ بشكل هستيري ..

يالله كمل ​

^^^

راح فيها عجل بابا المنتدى ​

 

[عبير البنفسج]

عجل اني احسن منك من اول ابتدائي و اني 100 في الرياضيات

بس صراحة اكرهه .. ما احبه الا لأنه يرفع معدلي + احب افكر في الامتحان النهائي

طلع عدكم جهال نفس الي عدنا

كمل قصتك مو بس اني تخلوني واجد اهر

 

[غرام الورد]

ما شاء الله عليك مايسترو


حلوة قصتك مع الرياضيات



تجربة ممتازة

 

[الغالية]

Mystro

حكاية جميلة .. ما توقعت انه ممكن احد يكون ما يعرف لمادة وبعدين يحبها وتصير تخصصه

شيء جدا جميل

لان انا من قبل لي اليوم وانا اكره الاجتماعيات .. وما زلت ^_^

وما اعتقد بغير رايي فيها

بس صراحهـ

حلو لما الواحد يحط في باله شي ويسويه

الله يوفقك يا رب

 

[Mystro]

عجل للحديث بقية .... عندي يوم آخر أفكر في شنو ممكن أفصل أكثر من جذي


تراني غامض ما أحب اتكلم عن نفسي ، وخصوصا الأشياء الخاصة ، بس من أجل العين

تكرم ألف عين ، شوي بس ها مو واجد

​

 

[Pardon]

Mystro

حكاية جميلة .. ما توقعت انه ممكن احد يكون ما يعرف لمادة وبعدين يحبها وتصير تخصصه

و يبين عليك غامض
ننتظر التكملة
​

 

[عبث]

أحلى قصة كفاح تمر عليي ​

 

[أوسكار]

ماشاالله مايسترو طريقتك في السرد رائعة
في كل موضوع تكتبه ألاحظ في تحدي وانتصار
إنشاالله دوم هذي الهمة والطموح العالي​

 

[Mystro]

أكمل شوي عن قصتي مع الطفولة

أنا كنت ضعيف شوي في الرياضيات ، لأني ما كنت اهتم لهذاك الزود ، على الرغم كنت في الانجليزي أجيب عكس الرياضيات كنت كله 100 في الانجليزي ، وتالي صادنا واحد من السادس ، الحصة تبع المادة نروح نلعب رياضة وكورة ، ونزل المستوى في اللغة وهو ما يدرسنا ، يجي على طول يفلت على الصف كورة ، ويخلينا نروح ساحة المدرسة

على كل حال ، ربيت وما كنت أعرف أحد من بعد أخوي الكبير لأن كنا بس اثنين في البيت في هذاك الوقت ، ما كنت أعرف إلا ولد عمة اصغر مني بسنة وحدة ، من هذيك الفترة إلى تقريبا الحين قبل ثلاث سنوات كان هو اقرب واحد ليي وأنا اقرب واحد ليه ، بس كان واجد يغار مني لدرجة الحسد ، والسبب إن أهل أبوي بيت جدي العمات والعموم كانوا يحبوني أكثر منه ، ودائما لما أدخل عليهم البيت يسلمون عليي ويرحبون فيني أكثر منه هو ، وإذا في شيء يعطوني إياه عنه ، بس دائما أحاول إني ما أحسسه بهذا الشيء ، وإن ما في فرق بيني وبينه ، لكن هذا الشيء ولا كأني أسويه ، ولا كأني أساوي نفسي معاه أبد ، كانت طلعاتنا كله وي بعض ، وأكثر من مرة يضرني ويسبب ليي مشاكل وأنا عادي بعد فترة أرد ولا كأن شيء صاير ، إلا قبل ثلاث سنوات ، صارت مشكلة مع أحد عمومي ، وأنا قلت رأي في الموضوع ، وهو وي أخوه الأصغر منه ، راحوا وألفوا عني كلام أنا ما قلته خير شر ، وتعرفون زيدوا على السالفة بهارات وفلفل وملح وجذي يعني ، لين دخلت عليهم هذاك اليوم وما شفت إلا ولا أحد معبرني أبد وأنا من طلعت من عندهم ما قمت أرووح أبد ، إلا في ما ندر لأجل أمي العودة المكسرة ، وكانت علاقتي قوية بواحد من اعمومي ، إلي فعلا عتبت عليه واجد ، اشلون يصدق كل هالكلام إلي ينقال ، ولا كأنهم رجال كبار يقرؤون القرآن ، (وإذا جائكم فاسق بنبأ ، فتبينوا عسى أن تصيبوا قوما بجهالة) ، لكن ويش أقول ، الحمدلله على كل حال ، وبعد ثلاثة اشهر ، شافني في محل وسلم عليي ولا كأن شيء صاير ، أنا استغربت واجد وصادتني نفس الصدمة إلي مو قادر اتكلم ، بس مجرد المصافحة ، واتسائل في نفسي ويش صاير ، مرة يكلمني ، والحين يرحب ويهلل !! غريبة السالفة ، هل عرف الحقيقة ؟

بعد فترة اتصلت أمي لوحدة من عماتي ساكنين قريب منا ، تتسائل شنو فيه Mystro تغير وما قام يرووح ، وقامت عمتي قالت الكلام إلي عن يا زعم أنا قلته ... ، وأمي خبرتني بكل شيء ، وتسألني قلت جذي فعلا ، وأنا قلت لا مو جذي إلي قلته ، وعلى طول اتصلت ليها وكلمتها بكل صراحة ، وقلت ليها أنا قلت إن أنتوا تفشلون وما تشرفون ، ومن هالكلام إلي ما ينقال ، ولوا فعلا قلته شنو إلا بيخليني اتصل لش وأكلمش دام أنا قلت هالكلام ، وقلت ليها صيغة الكلمة إلي أنا قلتها واتحمل مسؤليتها كوني مو جاهل وأفهم بكل شيء ، وترجتني أروح ليها البيت بدل ما أقعد اتكلم في التلفون ، بس ما رحت وفضلت اتكلم في التلفون لأني ما راح أقدر أتكلم قدامها ...

والحمدلله مع الوقت بان كل شيء ، بس بعد شنو ؟؟

ونهيت علاقتي مع شخص يطعني في ظهري نتيجة بغضه وحسده ، ومو بس هو الكل بان على حقيقته ، والحمدلله رب العالمين

اما بالنسبة لربعي كنت لما أنا صغير أطلع في الفريق وي شباب الديرة ولعب ، وروحة وجية ، بس جت فترة في واحد خراب سحب واحد واحد معاه ، وأنا انسحبت شوي شوي ، قعدة البيت ولا أكون وي ناس بيتبعونه ، وهو الله هداه بعد ما توفى ليه أخ أكبر منه قبل سنة جذي

وربعي يعني أعرف كذا واحد من مختلف القرى ، وينعدون على الأصابع ، بس شهادتي لله طيبين وحبابين حدهم ، وما عمري شفت منهم شيء يضايقني في شيء

في المنامة ما أعرف أحد خير شر ، إلا بيت جدي اهناك أروح بين فترة والثانية اقعد وي الخالات وأمي العودة وأبوي العود

أوقاتي انحصرت سابقا بين دراستي والبيت ، وأروح في المناسبات المأتم وجذي ، وأطلع شوي مع ربعي نروح وي بعض طلعات على خفيف

أحب الزراعة واجد ، وما خليت شيء وما زعته من لما كنت صغير ، ولما تحولنا في بيتنا الجديد وأنا في الصف الخامس ، عندنا زراعة ورى البيت قعدت أزرع فيها وأخوض تجارب الزراعة ، وأسقي واهتم ، من دخلت الجامعة ما كان عندي وقت أرجع البيت 5 العصر وقريب الأذان خصوصا في الفصل الأول ، اتعب تركت تقريبا ، بس بين فترة والثانية أروح وأشوف ويش صاير فيها

فيني اسلوب إذا خاطري في شيء آخذه آخذه ، وخصوصا لما شيء يفيدني ، ما اتردد ، وعندي حساسية شوي ، يعني إذا أحد يردني خلاص يصير في خاطري واتحسس واجد لهذه الأمور ، بس ما اتحسس إلا للأمور إلي تسوى إن الواحد يآخذ على خاطره فيها ، مو كل شيء يعني .

حاليا أوقات فراغي ما أسوي شيء تقريبا ، في هذا الشهر شهر رمضان الله يعودنا وإياكم على كل خير ، من الحر وين الواحد يروح ، ودوام المدرسين تعرفون إجازة ولاحقين لبعد الحين حق التعب ، مآخذنها راحة ، وفي الليل بين فترة والثانية أروح ليي كم مجلس في رمضان ، أو عندي بروحي اقعد ادرس قرآن


عندي ارتباط قوي مع مدرسين الرياضيات ومدرسين العلوم بشكل عام ولحد الحين ما نسوني ولا أنا راح أنساهم ، وإن شاء الله دوم أكون في حسن ظنهم

وفي أشياء بعد ، بس ما أحب اتكلم عنها ... و uob-bh مع biology Boy يعرفوني ما في داعي اتكلم أكثر


في شيء أخير بضيفه وخلاص ، خضت تجربة كبيرة نوعا ما ، تعلمت منها أشياء واجد ، عرفتني اشلون اتعامل مع الناس ، والخلاصة إلي تعلمتها ، إن في النهاية كل من يسعى لمصلحة نفسه وبس ، ولا عليه من أي أحد ثاني ، إضافة إلى شيء إن رضى الناس غاية لا تدرك ، ولو شنو أسوي ولا كأني مسوي شيء ، وهذا كلامي وجهته حق biology Boy قبل لا يجرب نفس التجربة ، وتعلمت شيء وما راح إنساه بعد من أخوي الثاني uob-bh إن أنا مو مجبر في النهاية حق أبرر لغيري سواء عن تقصير أو عدم تقصير ، أكون واثق من نفسي وبس ، والحمدلله رب العالمين

أسعى إن أرضي طموحي الشخصي ، وما أرضى أحد يدووس عليي على طرف ، أو لما أحس إن أحد منزعج مني لكوني نجحت في شغلة أو حققت لي أمنية كنت اتمناها ، اهني أحمد ربي إن كل شيء يكون واضح قدام اعيوني حق أعرف أعرف من يحبني فعلا ويتمنى ليي كل خير ، ومن العكس

واجهت صعوبات واجد في حياتي ، وما عمري حصلت شيء إلا بتعب وبطلعة الرووح ، من جذي أحس بفرح شديد لما احقق لنفسي أي شيء ، وما أعتبر لأي أحد إذا حسيته منزعج مني مثل ولد العمة أو أي أحد ثاني .

افتقدت السند الحقيقي في حياتي ، ما حسيت إن في أحد اعتمد عليه ، ويسمع ليي ، ويفهمني . فاعتمدت على روحي في كل شيء

بس خلاص له ... بعد تبوني اتكلم ... لا بالله المايك بيخترب

عن نفسي ما راح أختار أحد من بعدي ، إلا اختارني هو إلي يختار من يجي بعدي

تحياتي الحارة والدائمة لجميع الأعضاء .... Mystro





​

 

[عبير البنفسج]

:mellow:

قريت اشياء اول مرة اعرفها في حياتي و كأنها قصة مسلسل !!!!!

لا تعليق ....

المفروض انتا تختار مو اني

 

[الغالية]

يلا مايسترو عليك انت تختار ..

 

[Pardon]

واجهت صعوبات واجد في حياتي ، وما عمري حصلت شيء إلا بتعب وبطلعة الرووح ، من جذي أحس بفرح شديد لما احقق لنفسي أي شيء ، وما أعتبر لأي أحد إذا حسيته منزعج مني مثل ولد العمة أو أي أحد ثاني

​

و يلا اختار اللي بعدك
​

 

[♑•.мзŗмăįԀ]

أحمــــر ..

قصه لطيفة جدآ .. فيهآ حمآس وآشياء ح ـلوة وتجارب ..
واستمعت وانه اقرآآ ..
حسيتك تعبت وانت تكتب ..

بس مب مشكله انت قلت علشان عين تكرم الف عين .. >> ياخفيف !!
وانه احييك صراحة لروحك الحليوه
وحكمتك بحل الامور ..
وفوق هذا عندك ارادة قوية جدآ في مواجهة الصعوبات .. والحياة

الله يعطيك ع قد نيتك يارب

يعطيك العافيه وبانتظار العضو القادم​

 

[Mystro]

:mellow:

قريت اشياء اول مرة اعرفها في حياتي و كأنها قصة مسلسل !!!!!

لا تعليق ....

المفروض انتا تختار مو اني

شنو لا تعليق ...

ويش فيها إذا البابا قال لبنته تختار بداله ، البنت مو المفروض تطاوع وتسمع كلام البابا ​

 

[غرام الورد]

مايسترو
.

يعطيك الف عافية

 

[Mystro]

مايسترو
.

يعطيك الف عافية

الله يعافيش يارب ​

 

[عبير البنفسج]

شنو لا تعليق ...

ويش فيها إذا البابا قال لبنته تختار بداله ، البنت مو المفروض تطاوع وتسمع كلام البابا ​

ما عندي تعليق زيادة على قصده

بس وافقت عشان اصير مطيعة

انتظروني شوي

 

[Mystro]

ما عندي تعليق زيادة على قصده

بس وافقت عشان اصير مطيعة

انتظروني شوي

عفية على الشاطرة ​

 

[AL-MU’allim]

الاسم: السيد/محمد
العمر: 19 بدخل العشرين سنة نهاية السنة
البرج: الميزان
الهوايات: اللعب بالطائرات الورقية عندما كان عمري 5 سنوات واتجهت بعد ذلك إلى لعب كرة القدم أموت فيها وليس فقط ألعبها بل أشاهد أيضا وخصوصا الدوري الإسباني وفريقي المفضل برشلونة لأن فيه ميسي
بتكلم عن نفسي في بداية مراحلي الدراسية, أنا ما دخلت الروضة ما أدري السبب شنهو عل طول دخلت الأول الإبتدائي كنت أعرف شوي من الأرقام والحروف تعرفون ما دخلت الروضة بس ساعدتني أختي والمعلم اللي كان من ديرتنا بس تخطيت الصف الأول جيد جدا
بعدين حطيت على روحي، وبمساعدة أختي اللي ليها الفضل الكبير والمعلم جبت في كل المواد ممتاز من الصف الثاني إلى السادس الإبتدائي
وفي الأول الإعدادي حطيت على روحي أكثر وطلعت الثالث على دفعتي
والثاني الإعدادي نفس الشي لأني حصلت مشرف حبني ما أدري ليش الحمد الله وكان يوصي الأساتذة اللي يدرسوني ويضربهم باليس على قولتنا
أما الثالث الإعدادي بالصراحة واجهت صعوبة فيه شوي بس الحمد الله اجتزته بمعدل لا بأس فيه
أما في المرحلة الثانوية اللي هي مدرسة التعاون التجارية الي في سند دخلتها ما فيها ولا وسخة ولا كتابة بالطوفة أي جديدة ما حد دخلها قبلنا أول ناس دفعتنا وكانت هذي المرحلة أفضل مرحلة لأني تعرفت على أصدقاء واجد بس أول سنة مرتحت ليها مو من المدرسة من الطلاب الا ويايي في الصف لأن أول مرة أشوف طلاب بالصراحة أشكالهم غريبة عني شوي يعني قصات شعر وغيره من الي تعرفونه
ونزل مستوايي ومعدلي في السنة الأولى لكن في السنة الثانية تعودت على الوضع وحطيت على روحي وبدأت أرفع معدلي والحمدالله تخرجت من الثانوية بامتياز وحصلت على منحة
ودخلت الجامعة وخذيت تخصص محاسبة لأن في المرحلة الثانوية كنت تجاري وكنت أحب مادة المحاسبة وكانت درجاتي في مادة المحاسبة ممتازة وأما الجامعة لا تعليق مثل مقال المايسترو كنت أول مرة أروح الجامعة وكانت أختي اللي درستني في ابتدائي قبلي بعد ما تخرجت بسنتين كانت تحدثني عن الجامعة وأوضاعها بس الصراحة ما توقعت هلون يعني خلط وبنات أكثر من الصبيان >>>>ما شاء الله يزيدهم
وخلصت ولله الحمد أول سنة ليي في الجامعة بمعدل لا بأس به

تقبلوا تحياتي...

 

[AL-MU’allim]

مسامحة عبير البنفسج إذا خذيت منك المايك
لأن شفت الموضوع عجبني وما قريت الشروط من بداية الموضوع فحبيت أشارك
والآن المايك بيدك عبير البنفسج