((من قدك المايك بيدك ))

[Mystro]

^^^

الله يرزقك انشالله


اني بناديك بابا ع طول << إذا ما كنت تمانع يكون عندك بنت بصير عمرها 19 عقب اسبوعين تقريبا​

أكيد ما راح أمانع ، وكل سنة وإنتي طيبة ​

 

[šωєєт нєαят]

أكيد ما راح أمانع ، وكل سنة وإنتي طيبة ​

^^^

كبرتك بسرعة بابا ​

 

[Mystro]

^^^

كبرتك بسرعة بابا ​

عادي ​

 

[šωєєт нєαят]

عادي ​

^^^

​

 

[Biology boy]

مايسترو


بعدك صغير على كلمة بابا

الله يرزقك اولاد وتصير جد ان شاء الله

 

[šωєєт нєαят]

مايسترو


بعدك صغير على كلمة بابا

الله يرزقك اولاد وتصير جد ان شاء الله

^^^

اني قلت له بابا و كبرته شوي

الحين جد مرة وحدة ،، كبرته واااااااجد
​

 

[Mystro]

مايسترو


بعدك صغير على كلمة بابا

الله يرزقك اولاد وتصير جد ان شاء الله

أدري بعدني صغير وحتى لو خاطب ومتزوج يمكن للحين ما يكون عندي أولاد​

 

[♑•.мзŗмăįԀ]

بنسميه بابا أحمر ..​

 

[عبير البنفسج]

ساعات اتخيل فعلا يكون ليي ولد أو بنت صغير/ة

وينادوني بابا عن جد ​

قول ان شاء الله ما تخلص سنة 2010 الا و انتا صاير بابا << قوية

أكيد ما راح أمانع ، وكل سنة وإنتي طيبة ​

ناس و ناس يعني .. حتى اني باقي شوي على عيدميلادي

و كل سنة و انتي طيبة مقدما يالحلوة

بنسميه بابا أحمر ..​

و ليش مو بنفسجي << كل شي تبيه بنفسجي هالبنية

و يلا سمارة احنا ننتظر

 

[šωєєт нєαят]

ناس و ناس يعني .. حتى اني باقي شوي على عيدميلادي

و كل سنة و انتي طيبة مقدما يالحلوة

^^^

خخخخخخخخخ

بدينا بالغيرة ها عبور

أدري عيدميلادج عقب جم يوم

لأن اني بكون السبت و انتين الاثنين


و انتين بعد ،، كل سنة و انتين بخير خيو << بيييه بابا مايسترو كبر بسببنا ​

 

[عبير البنفسج]

لا افا عليش لا غيرة ولا شي

اي اني الاثنين

و انتي طيبة حبيبتي

 

[الغالية]

الحين المايك بيد من مثلا ؟

 

[عبير البنفسج]

بيد سماره و المفروض اليوم تجي تكتب

 

[SAMARAH]

ما كنت ابي آخذ المايك وقلت لحُلُم لا تختاريني بس صار بيدي مرة ثانية
وثانكس حور عالاختيار

امممم , المايك شغّال

اسمي وتعرفونه "سماره" , عمري 19 سنة , دشيت 19 شهر 6 ومن مواليد 91
كان اسوأ عيد ميلاد مر عليي لأنه كان مع اول امتحاناتي وكلش ما في مود حق عيد ميلاد او أي شي من هالقبيل

::
::

احنا في البيت 9 اشخاص , ثلاثة اخوان وثلاث خوات وخالتي وامي والوالد
وترتيبي الرابعة واصغر وحدة في البنات , نشكّل حزب في البيت اني واخوي الي اصغر مني بسنتين , كلمتنا وحدة واذا صار اي شي في البيت او قاعدين نتكلم عن شي , دايمًا احنا متفقين :rofl:
وعندنا بعد بنت اختي " مروه " عمرها اربع سنوات , هذي حركاتها بالضبط مثلي لما كنت صغيرة وفيها شبه مني , وحتى حاليًا واجد تكون ويايي
وحركاتنا نفس بعض , كبرت وبتروح الروضة السنة :tears:السنين تركض

.::. في البيت كلش ما عندي أي دور فعّال , ما أسوي شي من تنظيف وترتيب وهالسوالف , من يوم كنت صغيرة جذي
وقليل انه احد يطلب مني اسوي شي ,,
ومن يوم كنت صغيرة وخالتي عايشة ويانا , فـ هي الي ربتني , وتقريبًا علاقتي فيها اقوى من امي وهي الي تشاركني كل شي
ومدلعتني آخر دلع , وحتى صديقاتي ينتقدوني عشان هالشي , لأن صراحه من ابتدائي الى التخرج من الثانوية , هي الي تجهز كل شي من أكل وثياب وشنطه حق المدرسة
اقعد من النوم ويكون كل شي مجهز , حتى الاكل " ما اشتري من المدرسة , احمل من البيت " , وقت الفسحة اجوف وش حاطه ليي أكل لأن هي تحط ليي على كيفها واني اكيد بيعجبني
صدق كبرت على هالشي بس هي ما عندها غيري وكل يوم اقعد وهذا الروتين الي عودّتني عليه , وحتى الحين في الجاامعه , تسألني تبين اسوي لش شي من الصبح عشان تحملينه ويااش , طبعًا ما احمل شي واشتري من الجامعه ,,

::
::
بالنسبة للدراسة " الابتدائي "
كنت وحدة هااادئة ما ليها حس وخجولة شوي وحتى " اكرمكم الله " اذا ابي اروح الحمام , اشاور نفسي أكثر من مرة عشان بس ارفع ايدي واقول حق المعلمة انه ابي اروح , وساعات استحي وخلااص ما ااروح

.::.

" الإعدادي "
الخجل قل شوي وكنت مهتمة في دراستي , ومدرستنا كانت عجيبة " مدرسة يثرب الاعدادية " في مدينة حمد
اكثر شي أذكره لما كنت في ثالث اعدادي , كان معدلي 96 وكنا ننتظر يوم النتايج وقبـلها بيوم كنت حلمانه انه النسبة ارتفعت وصرت 98
لكن المفاجأه لما رحت المدرسة وجفت انه معدلي نزل وصار 91 , على طول الدموع نزلت مع انه ماا عمري صحت على درجات وثاني شي ما احب اصيح قدام احد
كان الشي غير متوقع ابدًا , بس عوضت في الفصل الثاني وارتفعت وصرت 94 وتخرجناا

.::.

" الثانوي"
احلى المرااحل , انتقلت من الهدوء الى الازعاج شوي وصرت مشاغبة شويتين , بس مو بمعنى إني اسوي مشاكل ولا إني قاعدة وما اتكلم وصوتي كلش ما يطلع
, صفنا كان من أجمل الصفوف " في مدرسة العهد الزاهر" , واخذت أول تعهد في حياتي بسبب هوشة مع بنية متحججه وما سكت عنها
فما مسكت اعصابي وصار الي صار وطلعت اني الغلطاانة في الاخير وعطوني تعهد ,, بس رغم كل شي استمتعت بكل يوم في الثانوي

.::.

"الجامعه"
ما كنت أبي ادش الجامعه ولا فكرت فيها حتى , اني متخرجه من علمي وابي اي شي في كلية العلوم الصحية
مع انه كنت اول شي افكر في طب بشري بس ما في ميزانية وما في حظ في البعثات
وكنت بقدّم في كلية العلوم بس كانت كل التخصصات مسكرّة ما عدا التمريض واني ما ابي تمريض
ومع هذا كنت مكمله اوراقي للجامعه واني مو حاطه في بالي أي تخصص , حتى تخصص نظم المعلومات مو اختياري , اختيار اخوي , هو الي راح سأل عنه وكل شي وقال لي خليه اول رغبة
في هالحالة ما كان عندي أي خيار وانقبلت وحصلت منحه , ما كان يهمني في شنو انقبلت لأن ما كنت افكر في أي شي
وتحسرت على كلية العلوم الصحية , بس هذا الي مكتوب

.::.

طبعًا في الجامعه أول شي ما حبيتها كلش لأن كان مكان كبير وناس واجد وزحمه وشي جديد واني ما احب هالاشيا بس بعدين تعرفت على حُلُم وفطيمبو , كانو وياي في كل السكاشن ,وصرنا نمشي على طول مع بعض
من الصبح لين ما يخلص دوامنا , واحلى شي مغامراتنا في الجامعه , وبعض الاشيا الي تموّت من الضحك , شي عجيب
::
::

بكلمكم شوي عني
عصبية شوي ولين اعصب ما احب اتكلم لأن اذا تكلمت , يصير شي مو خوش
كتومة , ما احب دلع البنات والغرور , لا تقولون دلع الاهل , لاا , بس دلع البنات الماصخ ما احبه " وفي الكلام بالأخص" , احب اسمع للناس اكثر من إني اسولف وياهم
أحس إني سلبية في حياتي وما اتفائل بالحياة , ما احب أزعّل احد وخصوصا الزعل بين الصديقات , حتى لو كان فيه خاطري شي عليهم ,اسكت ,وخصوصًا اذا كانت صديقة سبشل
احب خفة الدم بس مو بزيادة لانه الشي اذا زاد عن حده ينقلب ضده , واجتماعية واحب اتعرف عالناس لكن مو دايمًا كصديقات , لين تعرفت على ناس وتميت على طول وياهم , اكتفي فيهم , نفس حلم وفطيمبو , صارو صديقاتي وما افكر انه هالفصل بروح الجامعه وبتعرف على وحدة جديدة وبتكون علاقتي فيها نفس علاقتي وياهم او نفس علاقتي مع صديقاتي الي من قبل
وفي شي بقوله لحُلُم " تعجبني ايجابيتها في الحياة" هذا شي كنت دايمًا اجوفه منها من عرفتها للحين
وفطيمبو يعجبني فيها قلبها الابيض , حتى صديقاتي الي ما يعرفونها واجد , لاحظو هالشي فيها واذا اقعد اتكلم عن الجامعه واجيب طاريها يذكرونها بهالشي
حقيقًة افتخر بمعرفتكم

::
::
::
والحين المنتدى
اشتركت في منتدى واحد وكان منتدى بس للبنات , حتى ما اتذكر اسمه وتركته من فترة طويلة وسكروه بعد ,
وكل الي اسويه في المنتديات اجوف المواضيع بس , ودشيت الجامعه وكنت اتابع الشرح للمواد فاشتركت هني عشان اسأل الي ما اعرف عنه , هذا كان هدفي فقط لأني اعرف نفسي مو مالت منتديات ومشاركات وتفاعل وكل هالسوالف
لكن عرفت انه حُلُم هني وقمنا نتابع المواضيع في المنتدى ونشارك , وشوي شوي زاد التفاعل وصرنا على طول هني
ودايمًا نسولف عن المنتدى , حتى فطيمبو تتملل منا , فصار شي ضروري انه نكون هني ..
وبس ,,,

done سوري طولّت عليكم ,,,

 

[♑•.мзŗмăįԀ]

سمآره ... الـــ ع ــفو ..

..

استمتعت وآنه اقرآ .. صرآحة



أتمنى المزيد

 

[The Princess]

سمارة حياة موفقه باذن الله
حبي تخصصك وباذن الله بتكوني من الاوائل فيه
ربي ينورلك طريقك ​

 

[Pardon]

بس تركي التشاؤم و اقتدي بحلم و صيري متفائلة

و بالنسبة لتخصصش هذا المكتوب مثل ما قلتي
بالتوفيق
​

 

[أوسكار]

شخصية لطيفة جدا سمارة
احس في قصتج براءة جميلة
موفقة دايما يارب
^^​

 

[عبق النرجس]

مشاء الله عليج سموره

دائما متألقة

بس تركي عنج السلبية والتشاؤم

 

[الغالية]

~ سمارة جميل جدا ما قرات ..

حياة جميلة ..

ولو اني اتمنى ان تكوني متفائلة في حياتك دوما

لان الحياة بلا تفاؤل .. متعبه جدا ..

ودي لك