~ اللي راحوا الجامعة اليوم تفضلوا هنا (استفسارات) ~

[AL-MU’allim]

الحين هالاسبوع هذا بس حق الحذف وسوالف التسجيل
والاسبوع الي بعده ما يصير نحذف يعني

 

[UOB-BH]

الحين هالاسبوع هذا بس حق الحذف وسوالف التسجيل
والاسبوع الي بعده ما يصير نحذف يعني

http://www.uob-bh.net/forum/showthread.php?t=15733

 

[لالولا]

ما كنت ابي اروح بنفسي الوزارة لان قلبي ناغزني من هالروحة

اذا لباجر ما حصلت اي خبر بروح و خلاص

اذا رحتين ياريت تخبريني شنو يصير واحسن بعد نروح باجر
اني بشوف اي احد يوديني وبسوي نفسش

اختي اذا رحتين خبرينا شصار

 

[في الإنتظار]

سؤال اني باجر علي مادة فيز في الاتي أدوام او لا ؟؟

 

[AL-MU’allim]

http://www.uob-bh.net/forum/showthread.php?t=15733

جزاك الله خير أخوي صادق

 

[وفاقي الهوى]

أنا بطاقتي الجامعية ضايعة ويش أسوي ياشباب الحل رحم الله والديكم

 

[أمواج]

عآآآآجل : طالب خليجي بجامعة البحرين رفض التوقيع على وثيقة الولاء وطلب مخاطبة السفارة فردوا عليه ممنوع الاتصال و اذا لم توقع لن تخرج من الجامعة​

مو صاحيين

انا الي فهمته ان هالاسبوع مافي دوام .. مجرد التوقيع وتأكيد التسجيل ع قولتهم
والدوام يبدي من الأحد الجاي
!!

بس فيه جم دكتور شرحو اليوم تبع الآي تي

حسب شروط الانسحاب اجتياز 12 ساعة دراسية
بما ان طلبة الاورينتيشن هذة اول فصل ما اجتازوا ولا شي
بس يمكن في قانون اسنثناء لهذة الفصل
لانة كل شي استثناء هالفصل حتي ما يبون توقيع الدكاترة للانسحاب

شلون 12ساعة !
أعرف وحدة متفوقة فاجتازت الاورينتيشن بس اتقرر انها تتزوج فانسحبت من اول كورس

سؤال اني باجر علي مادة فيز في الاتي أدوام او لا ؟؟

الي سمعته ان ما اداومين لأن اصلا مصكوكة كلية العلوم .. هالكلام من وحدة راحت اليوم ​

 

[في الإنتظار]

سؤال اني باجر علي مادة فيز في الاتي أدوام او لا ؟؟

 

[UOB-BH]

أنا بطاقتي الجامعية ضايعة ويش أسوي ياشباب الحل رحم الله والديكم

البطاقة الذكية + الجدول الدراسي

 

[أمواج]

بسألكم ,, لازم أبدل الستيكر ألحين لين ما انسحبت ؟​

 

[moto l6]

يصير نبدل wm الى uth

 

[AL-MU’allim]

واجد أسئلتكم صعبة
الستيكر كل فصل تغيرينه وكل فصل لون وهذا تغيرينه في كلية البزنز أو قاعة عبد العزيز
بالنسبة لغيير الجدول من MW إلى UTH أعتقد عادي بس تتفقين ويا الدكتور
والسموحة على التقصير

 

[طيوف]

بالعكس يا جماعة..
آنا أحس ان ادارة الجامعة تبي الطلاب ينسحبون و الدليل كل هالإستفزازات و نشر صور الحواجز الأمنية و السور في امنتديات و تهويل الأمر و بث الشائعات بشأن التفتيش الدقيق و تفتيش الهواتف النقالة...أضف الى ذلك تسهيل الإنسحاب..
و ثاني الشي ان البلطجية راح يفرحون اذا انسحبوا الطلاب الشيعة...

آنا أقول صح ان الدراسة صعبة في هالوقت خصوصا مع زملاءكم الا انفصلوا و اللمعتقلين و الشهداء..

لكن ما ننسى ان شهيدنا على المؤمن رحمة الله عليه هو شهيد العلم و ضحى بحياته ليصنع لنا مستقبلا أفضل..و كذلك الطلاب الا حاموا عن البنات و الحين اعتقلوهم..لازم تضحياتهم ما تروح هدر..

هل مثلا شهيدنا علي المؤمن خسر حياته يعني احنا بعد لازم ننتحر تضامنا معاه؟؟لا بالعكس لازم تكون نظرتنا ايجابية و نواصل درب طلابنا المفصولين و المعتقلين و الشهداء..و نحن على ثقة على أن الطلاب الأعزاء المفصولين سيرجعون معززين مكرمين مرفوعي الرأس..و لازم نقهر الأعداء و ما نستسلم و نهرب من المواجهة..


أنا أقول أن الحرب الآن تحولت من ساحة اللؤلؤة الى جامعة البحرين..لا تلتفوا لإستفزازاتهم و لا تخافوا..نحن شيعة علي لا نخاف في الله لومة لائم..لا نخاف من التفتيش و لا نخاف من أي شيء..


أعلم أن الكلام سهل و أنا عن نفسي لا أعلم هل لو كنت محلكم سأستطيع الصمود في الدراسة أو لا ..لكني سأعتبر طلابنا الأعزاء الذين يداومون و يتفوقون هؤلاء هم فخر الأمة و أفضل المجاهدين و أقواهم و أنظر اليهم بنظرة اكبار و إجلال و تعظيم...

الأمر ليس سهلا مطلقا التفوق في هذه الظروف..لكن من يثبت نفسه الآن فهو من أبطال الثورة الحقيقيين..

ربما ننظر بعواطفنا أنه نتضامن مع المفصولين..صحيح نحن نتضامن معهم لكن ليس تضامنا سلبيا بل ندعو لهم و نسعى في نشر قضيتهم العادلة..الظلمة عديمي الشرف قاموا بفصل 50 طالبا هل ننسحب نحن أيضا معهم؟!

يعلم الله أن قلبي يتقطع كلما تذكرت طلابنا المعتقلين و المفصولين لكن الحل ليس بالهروب بل بالمواجهة..يجب أن نواصل درب النضال الذي رسمه شهداؤنا و معتقلينا و المفصولين..

و بالتأكيد هناك من يختلف معي..و لم يكن هذا تفكيري أنا أيضا لكن بعد جلسة الإستماع لآراء بعض الأساتذة و التشاور مع الأصدقاء وجدنا أن هذا الحل المناسب..فمن يقدر عليه فهو بطل مجاهد..و من لا يقدر عليه فكل و تكليفه و نظرته..

التوفيق و التسديد لكم جميعا ان شاء الله و فرج عن معتقلينا و سنرجع طلابنا المفصولين رغما عنهم..كما في التسعينات أرجعوا المفصولين و أكملوا مستقبلهم الآن أيضا سيرجعون ان شاء الله..

و اعذروني على الإطالة و ان جرحت أحدا استميحوني عذرا..

لكن أقول لكم نصيحة الأساتذة و المثقفين و الممؤمنين هي أن اذا أمنتم على نفسكم داوموا و اجتهدوا ما استطعتم و اقهروا الأعداء.. و عندكم اسبوع بالتفكير بالإنسحاب اذا لم تستطيعوا أو حتى يمكنكم حذف بعض المواد و الله المعين....

و أنا حقيقة معجب بالذين داوموا بروح حماسية و تفاؤل و ان شاء الله كلكم أعزاءنا تتفوقون و تنجحون و تساهموا في رفعة الوطن بعد عودة زملائكم المفصولين و المعتقلين....ادعوا لبعضكم البعض و تآزروا فالله يحبكم أكثر و يعجل في نصركم..

هذي الفكرة الى كنت بوصلهاومو عارفه

 

[لالولا]

شوفوا عاد أني وحدة ما عندي احد اوديني و ارجعني لصخير كل يوم
ما فيه باصات خاصة .. الباص الي اروح وياه بشوف الوضع اسبوع و يمكن بعدين اوصل

و باصات الجامعة ما ادري بوضعهم !؟ .. و حتى لو دريت بروح الصبح ما عليه بس الرجعة ويش اقعدني لأربع العصر .. و لين رجعت الديرة محد بجي ليي مكان المحطة و مستحيل ارجع مشي بروحي من المحطة للبيت في هالاوضاع

و الحل ؟؟؟​

جان انتين بيشوف سبوع
احنا كللش مابوصل قال ههههههههههه
فمضطرة اروح الجامعه من ست الصبح لخمس ع بال مانوصل البيت
يلا الله كريم
بجرب يوم الثلاثا

 

[نجمة تشرين]

صراحة انقص عليي

رحت بانسحب الا يعطوني ورقة
تعهد و هرار
و خفت و وقعتها
و اللحين شفت روحي مجبورة اداوم عقبها لان تعني تثبيت التسجيل

حرام عليهم
لو ادري ما رحت

سامحوني مو بيدي بداوم:tears:

و عن الوضع

وقفنا ساعة كاملة على الكبري لين ما اتحرك السيد على قولتهم كان في حواجز ما شالوهم

و الجامعة ما اتغير فيها شي و حتى نعلة مفلته في الشارع قبل البوابة كانهم نعلة لصبيان (( صراحة قمت اصيح اتذكرتهم ))

و التفتيش كان عادي و ما فيه اهانه

لكن الجامعة غزة محوطة تحويط و لا تدرين وين الباب و المخرج

و لا في باركات
و حتى الباص اللي يوصلني المرة اتقول لين ما عدلوا الوضع سامحوني ما بوصل امتحانات المدارس قربت و لازم اوصلهم

 

[ارتحالات]

كلااام جميل

 

[لحن الغروب]

طيب في لابآآت او لا بكرى عندي لاب؟؟ ومالي نفس احضر :s

 

[أمواج]

واجد أسئلتكم صعبة
الستيكر كل فصل تغيرينه وكل فصل لون وهذا تغيرينه في كلية البزنز أو قاعة عبد العزيز
بالنسبة لغيير الجدول من MW إلى UTH أعتقد عادي بس تتفقين ويا الدكتور
والسموحة على التقصير

اوهوو .. بعد اروح ليهم مشوار على هاللصقة

​

 

[بنت سيد]

يعني غيروا لستكراااات ؟؟
اني ما ادلي قاعة عبد العزيز ؟؟
اني اول كورس ما يصير انسحب ؟؟ وييش الشوووور الحين ؟؟

 

[أمواج]

يعني غيروا لستكراااات ؟؟
اني ما ادلي قاعة عبد العزيز ؟؟
اني اول كورس ما يصير انسحب ؟؟ وييش الشوووور الحين ؟؟

اعتقد هذي القاعة الي داخل التسجيل القديم صوب المحاسبات مكان الي ندفع
لو لا ؟!​