شبااااااااااب *إلي أخذ الليسن* تفضلوا ...

[طموح]

مرحبا جميعا,
عام دراسي جديد ... بالتوفيق للجميع ...

نسمع الكثير من القصص التي هي أشبه بالمغامرات في فترة التدريب وتعلم قيادة السيارة , ابتداءاً من البحث عن مدرب ذو أخلاق وكفاءه إلى سالفة manual gear التي يتخوف منها البعض وخصوصاً البنات وووو وغيرها إلى وقت دخول الامتحان أو التراي....

أحب أدرج هالموضوع كدليل يشارك فيه الجميع وكل من لدية خبرة في تعليم وإثراء حافظة كل من له نية في تعلم السياقة ... فلا تبخلون بالشرح والتوضيح بوضع الصور ...

*شاركونا ,بتجربتكم الأولى...
*متى أخذت الليسن وصار لك كم سنه, من أي تراي نجحت؟
*ويش نوع سيارتك؟


تحياتي ...​

 

[5alil]

اولاً تسلمين على الموضوع

والله ما ادري ليش يفكر الكل ان التدريب مخييف والمخيف اكثر المرور في التراي


ولله الحمد كملت ثلاثة شهوور من اخذت الليسن

ولله الحمد ما واجهتني اي مشكلة
لان المدرب واحد يعرف العيلة كلهم

ودخلت التراي
واخذت ربع ساعة من رحت مدرسة التدريب إلين ما قصيت الليسن
ونجحت ولله الحمد من اول تراي

الحمد لله ان ماكنت خايف ويا المرور وكنت اتخيل المرورو المدرب إلي دربني​

 

[الحياة كلها تعب]

يسلمووو حياتو

دعوااتكم بعد 4 اياام باقدم الامتحااان حدي خاايف من الرويس

مدربي يقوول ع كل شي محااسبين

دعوااتكم لي بالنجاح باول ترااي ​

 

[زهرة الأيام]

يسلمووو حياتو

دعوااتكم بعد 4 اياام باقدم الامتحااان حدي خاايف من الرويس

مدربي يقوول ع كل شي محااسبين

دعوااتكم لي بالنجاح باول ترااي ​

الله يوفقش وتجين لنا ناجحة ​

 

[مشاعر خجولة]

مرحبا

أكثر شي حبيته يوم كنت اتدرب تبديل القير العادي كان شي عجييييييييييب

وتدريبي كان كله من الصبح الساعه خمس بعده ظلام الشمس ما طلعت وهذا الشي بعد كان ممتاز لان ما في احد في الشارع واسرح وامرح على كيفي

الحمدلله نجحت من اول تراي


صار لي سنه و10 شهور من اخذت الليسن

 

[زهرة الأيام]

اني اخذت الليسن بتاريج 10/5 /2011 يعني تقريبا 4 اشهر
والي سوا ليي الليسن زوج بنت عمي قال ليي بوقفش المروور مايناسبش تسوقين حجمش صغير ههه
اول ما اخذت الليسن جه ليي اخويي عشان ياخذني من المرور ونروح البيت اني الي سقت فيها طبعا كانت اول مرة بالنسبة ليي
فبغيت اطلع على شاحنة في الهايويي بس اتداركت االشي .. وضربت هرن تن تن تتن بالغلط (هاذي اول مرة اسوق فيها)
بعد مااتعودت على السياقة قمت اسوق بروحي بس مرة كنت طالعة من سار ووصلت لشارع البديع ونسيت انزل الهاندبريك واني كلما ادوس اجوف السيارة ماتمشي
تالي طلع الهاندبريك مرفع هههههه تالي نزلته .. فناتك

مشكورة خيو على الموضوع
​

 

[قموووورة]

بقولكم قصة معاناتي ويه السياقة قصيت الكجة نهاية شهر واحد وظليت ادور مدرب وحصلت واحد من اهل الوالد وقال بدربني وخبركم اني انسانة عجوولة خخ ظليت احن عن راسه كل يووم اتصل اليه واخر شي اتصل الييي في شهر 4 وقال انه بدربني وتدربت وقصيت اول تراي وكان عندي احساس اني برسب بالرغم انه سويت المرتفع صح والريوس سويته من اول مرة بس يوم كنت على المرتفع بندت السيارة وقلت خلاص راسبة راسبة ما بسووي شي صح وفي التراي الثاني خمس محاولات على المرتفع وسيده رجعتني لاني رسبت ههههه والتراي الثالث رونسيد واخدت الليسن بعد عناء طويل في التراي الرابع وكان هذا في شهر 7 وترى الممتحنة ما تخووف بس ما ادري ليش احنا نخاف وعن السيارة للحين قاعدة ادور لليي سيارة ولا حصلت ادعوا اليي احصل سيارة في القريب العاجل .... ومشكورة خيو على الموضوع الي خليتيني اكتب فيه معاناتي

 

[زهرة الأيام]

نسيت مااقول لكم اخذت الليسن من الترااي الرابع هههههههه

الثالث داخل المدرسة نجحت ورسبتني بره ​

 

[the life]

القير العادي بصراحه بلوه كبيره بالنسبه للبنات ههههه اني كنت أعاني
انتظرت شهور لين حصلت مدرب ولو اشرح معاناتي هالفتره ما تكفي صفحات
بس بمجرد ما تاخذ الليسن تشوفين السواقه مافي أسهل منها ويا الاوتوماتيك
اني صار لي سنه تقريباً من خذيت الليسن
خذيته من التراي الثاني وكل هذا بسبب خوفي و ربكتي
أخطائي اللي سويتها في التراي حتى اول مره سقت ما سويتها !
لا تربكون روحكم وكل الامور بتكون طيبه
اما فرحتي لا توصف يوم اخذه ما بغيت افتك من هم التدريب لانه كان في رمضان
وبخصووص السياره اللي عندي الحين بي ام وما انكر اني حكيتها مره ههههههه بس هالشي لازم يصير
والله يوفق الجميع في تراياتهم

 

[قهوة الصباح]

الموضوع رائع

صار ليي 3 سنين من اخذت الليسن هههههه عجوز

المهم

حبيت فترة التدريب بصراحة
كان عندي حماس اني اتدرب
اول 3 اسابيع صرت عند مدرب الله يستر عليه مايعلم شي كلش
بس يقول يمين ويسار

يعني لا علمني على اللفات ولاشي
وفوق كل هذا مايدربني الا مرة في الاسبوع
هذا غير هراره وهدرته ,,,,,,,,,,,, هدار بشكل مو طبيعي

المهم
خبرته اني ابي اخذ الليسن بسرعه
واقترحت عليه انه يوقع ليي وبدفع ليه بدون مايعلمني <<<<<< جدي جدي مو مستفيدة شي


المهم قال ليي بحولش على مدربة بتمشيش بسرعه وبتخلصين
وفعلا حولني على هالمدربة وحسيت بفرق في التدريب
يعني هي تعلم عدل وهو ماعلمني ولاشي اصلن

وجى يوم التراي
كان تاريخ 13/1/2008
اذكر كنت اقول لزوجي من الصبح جبدي لايعة شكلي متوترة من التراي

وبالاخير طلعت حامل ومادري عن روحي

كان هذا اليوم ممطر بشكل مو طببعي

دخلت السيارة ومشيت كلها دقيقتين وقالت ليي بس دخلي المدرسة

دخلت ورحت جيكت بعد شوي

طلعت ناجحة

استانست لاني اخذته من الاول

بس كانت فترة حلوة

نصيحة مني
لا ترتبكون في التراي وركزوا عدل وبسهولة تاخذونه من الاول

بالتوفيق

 

[وردة البحر]

أنا قصتي غير عنكم كلكم
لحين ما تدربت كلما اتصل في مدربة تقص علي وما تدربني

لو سمحتوا اللي يعرف أرقام مدربات أوكي يطرش على الخاص ضروووري

 

[m.g.s]

نسيت مااقول لكم اخذت الليسن من الترااي الرابع هههههههه

الثالث داخل المدرسة نجحت ورسبتني بره ​

 

[يَـآقـوتَ]

قصيت الكجه شهر سته يوم الاثنين وبعدي ماحصلت مدرب ولحسن حظي كنت متصله لمدربي يوم السبت الساعه 12 وبعدي قال لى بشوف اذا عنده مجال ومااشوف الا مكالمه منه الساعه2 ردت يقول لي باجي ادربش الحين عندش مانع قالت اكيد لا عـــادي (ماهقت احصله) .
وطبعا جننته هههه يقول لي دوسي عل البترول اقول ليه اكوا ادوس له والسرعه 40 او عند اشاره قف مااوقف يقو لي الاااوي ماوقفتين!! اقول مافي سياره
او اقول ليه بعرف اسوق عدل لين كملت الساعات يقول انتين !! لا مابتعرفين انسحبي افضل ليش
وقبل يوم من لتراي اقول ليه بنجح ف لتراي يقول لي اذا هي اخطاءش اكيد مابتنجحين
والحمدالله نحجت ف لتراي الاول

 

[Saheb Al Qrar]

السلام عليكم ورحمة الله وبركاته
من احلى الفترات بعد الثنوية ,كانت فترة التدريب ..
بالنسبة لمدربي كان مسوي لي ازمة يوم الساعه 6 الصبح ,ويوم 4 العصر ويوم 5 المغرب ,,فعذبني شوي ,لكن الحمدلله المدرسة مهب بعيدة علي لأني في المدينة ..
وطبعاً ماكنت محصل مدرب بأول أسبوع من الكجه ,لكن الأسبوع اللي وراه دخلت واسطة وحصلت.
التدريب بالغير العادي كآن ممتع لي ولله الحمد ,والسياقة كآنت امر عادي وقتها لأني كنت اسوق قبل الليسن بسنة تقريباً ..
تبديلاات الغير كآنت روعه ,لكن اللي كرهته هي الإشارات والدوارات في المدرسة وإشارات قف الحمره
هذولي اللي يقهرون ,اما غير جذي فكل شي تمام

تدربت فترة بسيطة ,قدمت امتحاني يوم الخميس الساعه 5 ,على نهاية الدوام والأسبوع ,ودشيت على مرور حليو وكآنت لايعه جبده ويبي يخلص الدوام ويطلع ونصيبي بأني كنت آخر واحد عنده .
فخذ فيني فرات ع السريع وطلعنا برع أذكر كنت امشي على راحتي عشان اراويه أني ملتزم فقال لي (عطه عطه روح) فعقبها شفته بأنه من ربعنا زقرت والحمدلله نجحت من اول تراي.

صار لي سنتين تقريباً من خذت الليسن ..
عندي هوندا أكورد 2007

شاكر لك موضوعك التفاعلي ..
​

 

[نغمة الحياة]

اي انه بعد تعبت ع ماحصلت مدرب المدرب صدفة ان درب نسيبتي او صديقتي
اممم ايام التدريب صج كان فن ع انه تعب شوي كل تبديلات
او ريوس كريه
ف تراي الاول رسبت لاني كنت متورترة او نسيت كل شي
ف لمرتفع نسيت ان لازم ارفع ريولي عن الكلج او سيارة كل ساعه ترجع ورا
بس تراي ثاني حسيت اني بنجح
حمدالله الحين صار لي 4 اشهر

 

[sabeel]

اللهم صل على محمد و آل محمد

الموضوع في وقته اخذت الليسن تاريخ 6/9

او عند اشاره قف مااوقف يقو لي الاااوي ماوقفتين!! اقول مافي سياره

كأني سويت هالحركاة بعد + طفت اشارة حمرا الظاهر انتي مثلي
اني من النوع اللي يفهي يعني السياقة ماتصلح لي

الله يسلمكم السالفة من أول كان المفروض اتدرب عن وحدة من اهلي
و تدربت كم مرة بس و بعدين ماعطتني موعد و خليتها و رحت إلى مدرب
احيانا انفخ وجهي عليه بس يتصبر خخخ
و لما اخذت موعد للامتحان كنت شبه واثقة اني برسب أصلا و فعلا رسبت
اللي اعرفه و اللي مااعرفه ماسويته عدل
مع اني ماكنت خايفة و المرورة كانت طيبة

و قبل التراي الثاني يسألني المدرب شنو الصعوبات عندج ؟ قلت له الدوارات
و دخلت الامتحان يقول لي المرور لا تخافين و مادري شنو و يتكلم حتى اهدأ مع اني من أصل ماكنت خايفة واجد
بس زين يفكرني خايفة هذا من صالحي حتى اذا في خطأ يفكر من الربكة هع
و نجحــت في التراي الثاني و قال لي في شوي اخطاء تجاوزها

و مع اني نجحت لكن للحين ماعرف للدوارات
مثلا : كنت بدخل الدوار و اني عاليسار و في تيلر على يمني في الدوار
انتظرته يطلع من الدوار و بعدين دخلت و الناس وراي تضرب هرانه
غير طلعتي من الديره اروح للسيارة اللي على يمين و المفروض يسار

و مره بعد مانزلت الهاند بريك و اشوف السيارة تطلع اصوات و الحمد لله التفت بعد

و مرة بعد حكيت سيارة كل هذا في أقل من شهر

شكرا نغمة الحياة خليتينا نطلع الفضايح

اللهم صل على محمد و آل محمد​

 

[XII]

إن شاء الله باجر رايح اطلع الكجة ..
و إن شاء الله حصلنا المدرب ..
ادعوا لينا بالتوفيق ..

 

[زهرة الأيام]

ههههههه خجالة ​

 

[نغمة الحياة]

عفووووا
بعد فيه فضايح بس خلوها مستورة ​

 

[moto l6]

ما في سالفة للاسف
حصلت مدرب , اسرع من الخباز لين يسوي خبز
10 ساعات تدربت قصيت تراي
نجت من اول تراي ’ حتى اقول لمدربي لا تخاف انته تدرب نابغة
صار لي واجد
بس تسلفت من المدرب فلوس الليسن


​