البرزنتيشن (الشرح أمام الصف ) ||::|| لماذا لا يحبونه ؟

[AM-ahmeed]

المكان الا ادرس فيه لازم بين كل فترة برزنتيشن المفروض تعودت بس بعد.. >>بقول لكم ليش.. اني قبل لا ادخل البرزنتيشن اكون مستعده عدله ومحضره وغيرو وغيرو ومن اوقف قدام الطلبه يطير كل الكلام الا في مخي واعلوج ذاك البرزنتيشن تعلوج كأنه علوج واخربط الأولي بالتالي حتى يخلون فيني سلبيات وانا بصراحه اعرف مو ماعرف بس تحول عليي الهباله اذا وقفت وقمت اشرح

طبعا اني اقصد اذا برزنتيشن بالأنج لكن بالعربي اكون مسيطره على الوضع

 

[درازية]

اني لا ابتدائي ولا اعدادي خلوني اشرح
بس في توجيهي آخر سنهلازم نشرح وله صفر في بدايه ارتبكت بس بعدين صار عادي
في الجامعه ماجربت اشرح للحين

 

[رَحِيـــقْ !]

بسم الله ..

تخصصنا بالذات ، أو العمارة أيضًا نواجه ما يسمى بالـ "JURY" وفيه نشتغل على مادة ونعرضها بالأخير كعمل نهائي ويقيمونا 4 دكاترة
يتخلل المادة برزنتيشنات ، تقريبا كـمشروع التخرج لكن بكل فصل .. بالبداية تصادف الطالب مشاكل ، ممكن تكون من تهويل الآخرين للموضوع
فيستصعبه حتى لو كانت عنده تجارب سابقه ، ممكن أيضًا بسبب نقصان ثقته بالنفس أو بالعمل المقدم ، وممكن من الشخصيات المحيطة وأسلوبها المحبط
وعامل منتشر بالغالب .. وهو تخبط الطلبة باللغة الانجليزية ممكن يشكل هاجس او تخوف من استهزاء الطلبة او عدم تمكنه من الاجابة او التعثر بالكلام
ونضيف عامل الخجل ..

كحل .. فالمفترض الانسان يرحب بالانتقادات السلبية طوال عمله من ذوي الخبرة او الزملاء في المرحلة اللي يكون فيها قادر على تدارك السلبيات
منها يكون عنده ثقة بعمله وبنفسه أكثر وبنفس الوقت يستمع لأطراف لها اساليب مختلفة.. وفي حالة وصولة للوقت الضائع فهي مرحلة الاستماع
للناس الايجابيين او عدم الاستماع لأحد مؤثر تأثير سلبي ، موضوع الخوف واللغة الانجليزية والخجل .. عوامل تحل بالارادة والممارسة والانخراط
في الانشطه وتحدي الذات .. فكل شي انا اتخوف منه أتحدى نفسي وأسويه ..

من تجربتي الشخصية بالجامعة .. بغض النظر عن الانشطة المدرسة السابقة ودورها .. فأول جوري واجهته كان قاسي بعض الشيء ..
الانقادات من قبل الدكاترة كانت محبطة للغاية .. حتى أذكر كان اول تعليق للذكتورة عن ان تعليقي للعمل كان فيه شوي ميلان ..
فماذكر بالتحديد شلون بينت النقطه .. بس بالنهاية قالت .. ذا برزنتيشن يا حبيبتي مش لعبه ! وصحت بعد بالنهاية .. بس كانت
نقطه لانطلاقة أعتبرها قوية .. وفرصة لتجميع السلبيات وتجنبها بالمستقبل ..
بالجوري الثالث الكورس اللي راح .. كل سكشنا كانو محبطين تقريبا .. وكان رقمي بالنهاية .. ووحدي كنت الانسانه السعيدة بصورة
مبالغه .. وما أحاتي ولا هامني الموضوع .. فلما جافونا الدكاترة اللي يقيمون جذيه .. كانو مشفقين ومستغربين على الوضع
فكان تعليقي اني للحين مستانسة .. فردت الدكتورة انيي للحين ما قدمت الجوري لهالسبب اني مستانسة !
طالعتها بنظرة تحدي .. حاجب فوق حاجب تحت وابتسامه عريضة Even After the Jury !
وفعلا ظليت على هالمنوال .. صار الموضوع شي سهل ... فـ المفترض كل طالب يعرف ان الفشل او التعثر على قدر
ما هو مؤلم بالبداية على قدر ما يقدر يحوله لنقطه انطلاقة كبيرة .. فقد يكون الفشل هدية وقد يكون حفرة ، ونحن لنا الخيار



​

 

[AM-ahmeed]

حسيت الكلام موجه حقي اني مو سالفه خوف مادري شيصيدني خخ

وقت مااقوم كل الا في مخي يتبخر والمكان الا ادرس فيه ممنوع احمل شيء واقرأ منه بس كي وورد واني حزتها ماشوف حتى الكيي وورد واحس اني بطيح بعد

قبل على ايام المدرسه اقوم اخربط الأولي بالتالي بس مااصيح بالعكس اقول بكل ثقه مع انه كله غلط خخخخخخ ليش اكسر بخاطر روحي ماكنت اتفشل بس الحين قدام رجال وحريم لحيه وشنب موب يهال هري عليهم كلمتين ومشي

 

[c o d e]

الشكر موصول لكل من شاركنا مجددا ^_^

محور الحديث الأخير هالمرة يلخص لنا الخجل من الجنس الآخر في الصف .
طيب خلنا نشوف , البنات والشباب مو بس نشوفهم في السكشن
في المطاعم الاثنين موجودين , المكتبة , البوك شوب , أقسام الكلية المختلفة وووو .

يعني هالشي يهوّن من مسألة الخجل نوعا ما .


يبقى الجزء الآخر متعلق في الكلام أمام هذا الجنس الآخر ,
لو الطالب بيحط في باله أن الآخر راح يكون مثله وفي موقفه عقب شوي , هالشي بعد راح يخفف من حدة التوتر عنده .
والا شرايكم ؟

يعني ليش ما الطالب يجذب على روحه ويقنع روحه بأن البرزنتيشن شي حلو وجميل
ومع الوقت راح يصدّق الجذبة ويعيشها بعد !
هذا أسهل حل ربما !

 

[wilted flower]

بالنسبه لي اني طبيعه صوتي هادئ .. يعني حتى ايام المدرسه كانو المعلمات ينتقدون هالشي
بس شسوي يعني هاي صوتي ما اعرف اغيره :mellow: !
اما في الجامعه ما جربت ولا مره .. و حدي متخوفه
احس روحي بسرعه برتبك و بتوتر ، و اتمنى احصل حل لـ هالمشكله ​

 

[بســــــكوتــــــة!]

الواحد ما يحب يكون في موقف انتقاد.. وهالشعور يصاحب الشخص إلي يعرض البرزنتيشن, دائما يصيده شوية توتر ويخاف قبل البرزنتيشن. بس الحل الوحيد لتخطي هالمشكلة انه يعود روحه يعرض برزينتيشن ومع الوقت الشي بيصير طبيعي.

 

[jacksparrow]

البرزنتيشن شي جميل وحلو =)
ليه جو يمتاز عن الاشياء الثانيه ...وياريت دايما اسون لينا برزنتيشن حتى لو كان صعب ماعليه اهم شي نتعلم

 

[Abo Jawad]

السلام عليكم..
ما عساي أن أقول في الموضوع..
سوى أنه "ضرب على الوتر الحساس"..
هناك عدة أسباب تجعل الطالب خائفاً من العروض التقديمية "البرزنتيشن"، أحدها عندما يكون الهدف من العرض تقديمياً لفكرة، رأي، رؤية لشيء ما ..الخ، فيخاف الطالب من التقديم إما لعدم اقتناعه بالفكرة ذاتها هذا إن لم تكن فكرته، أو أنه لم يفهم الفكرة جيداً فهو في قرارة نفسه مقتنع بعدم مقدرته على إيصال تلك الفكرة إلى الجمهور..
من الأسباب أيضاً عندما يكون العرض تقديمياً لمنتج معين أو "فكرة مطبقة" ، سواءً هو بصدد تحليله، تقييمه، ترويجه .. الخ، ولم تكن لديه المعرفة الكافية أو الشاملة حوله، طبعاً سيخاف أيضاً من عدم قدرته على إيضاح جانب أو جوانب، أو من طرح أسئلة تتعلق بالموضوع علاقة قوية ولا يعلم لها جوابا...
أيضاً البعض يخاف من التقديم لجمهور ضخم وليس تربطه معهم صلة وثيقة، وذلك أغلبه بسبب عدم الثقة بالنفس...

أما بالنسبة ليي، بالعكس أستانس لما أسمع برزنتيشن، فيه أقدر اعبر عن رأيي واقنع الآخرين به ، وبعد استعرض مهاراتي كمتحدث واستمتع بهذا الشي...
بالتوفيق جميعاً
دمتم ودامت برزنتيشناتكم موفقة

بالنسبة للتعليقات، استانس ابها، لان أفشل اللي يعلق ما اخليه في حاله، سواء كان صبي لو بنية
ومافي اي خجل مدام ثابت على رايي​

 

[عبق الورود]

موضوع شدني وحبيت ارد عليه ..

البنت بطبيعتها خجوله ..
يعني هاذى الشي يعتمد على البنت نفسها ,,
يعني انه ماتخيل نفسي اشرح لسكشن خلط بنات وصبيان
يعني البنات امرهم بسيط .. بس صبياااان صعبببه من قللللللب
يعني معنى ف المدرسة صادنا جم مقرر وشرحت فيه بس بنفس الوقت
كنت منحرجه ومرتبكة .. فما بال صبيان بعد ف السكشن .. !

ف المدرسة الشي عادي بلاس الجامعة لاااا ..
بس لو الوحده تفكر شوي ف الموضوع تلاقي ان الششغله عاديه
يعني اهمشي شرحت واهمشي تنحط الدرجة ..
وبنسبة لتعليقات ولاكاني اسمع
او اقول لدكتور سكتهم اول ههههههههههه ..

موضوع جدا رائع ..
يسلمووو على طرح الموضوع ..

 

[سوار الحنين]

ما اتخيل روحي اعرض برزنتيشن ولا شوي


وجان خسي احد يفهم هع

 

[Saheb Al Qrar]

السلام عليكم ورحمة الله وبركاته

صراحه اكره البرزنتيشن كره مو طبيعي ,ومثل ماقلتي بالعادة انسحب او اتجنب هالمقررات
وبالنسبة للي مخوفني من هالموضوع
ماهي مواجهة الناس بالعكس
بس انجلنزيتي في الكتابة والفهم تمام
لكن حق اتكلم ومع إرتباك الوقفه والتعبير تضيع كلماتي واتخربط
لكن البرزنتيشن اللي يكون بالعربي بالعكس عجيب وكنا ابداع ولله الحمد في المدرسه
لكن احين وحنا داشين على مستوى رابع عندي مواد كثيره برزنيشن فأتوقع راح اضطر اواجه مخاوفي
واسأل الله الإعانة
وعندي إحساس إني بيوم من الأيام راح اضحك على نفسي من شعور الخوف هذا .!

شكراً كود ,موضوع راقي وفي الصميم​

 

[..أتومآ..]

أكره لبرزنتيشن كره مو طبيعي ،
من أول مادخلت الجامعه وأني متجنبه هالسالفه ،
بس هالكورس عندي ماده شكلي بضطر أقدم فيها برزنتيشن ،،
أني أستحي أتكلم أو أشارك في السكشن بعد مو أوقف قدام الأوادم وأقعد أتكلم والناس ساكته و تطالع ،
مع إن كل إللي تناقشت وياهم عن هالسالفه قالوا إن ما يناسب عليي أستحي أو أخاف من هالشغله
جايفيني إجتماعيه يحسبون عادي أسولف قدام الأوادم :tears:..

إذا ربعي يقدمون برزنتيشن ، أني أستحي وأرتبك بعد مو أكون مكانهم ​

 

[MohdAlkhabaz]

سلام عليكم ..


شخباركم؟

في اعتقادي .. ان البرزنتيشن شيء مهم ولازم بتسويه .. لكن مجتمعنا احسه يتوجه نحو .. "خطأ"

صار الطناز عادة عند المجتمع .. وما استثني روحي

لو كان الجميع يتفاعل وي اللي يسوي البرزنتيشن .. جان بصير فله ..

بس الأغلبية .. ينطرون الهفوة .. عشان يعلقون ويتطنزون



تحياتي​

 

[CE . Student]

من دشيت الجامعة ماخذت مقرر فيه برزنتيشن

او بالأصح احاول اتجنب المقررات اللي فيها برزنتيشن

في المدرسة كان عادي بس بعد كنت ارتبك قدام البنات

اما الحين ما اتخيل نفسي ابداً ابداً اني اوقف في السكشن قدام الجنسين والدكتور واشرح شي !!

اني حتى في السكشن على طول هادئة واستحي اتكلم .. حتى اذا ابغي اسأل الدكتور اروح له المكتب او اسأله نهاية المحاضرة

مادري ويش الحل بصراحة ومتى بتشجع وباخذ مقررات فيها برزنتيشن:mellow: :mellow:

 

[عآفك الخآطر]

البرزنتيييييشن
بصراحه , تقريبا مقرراتنا كل مقرر يكون فيه شرح , ولكني طفت من مواد واجد بدون ماقدم
لكن هالكورس صار عندي ضغط بالنسبة للبرزنتيشات , وتحضير البوربوينت
المشكله اللي تصيدني اهي ان قبل ليلة افكر واجد فيه واخاف يكون فيه شي ناقص , ويوم البرزنتيشن اول واحد اكون في الجامعه عشان اتهيأ
ممكن اول برزنتيشن تقدمه فيه خوف وجذي , لكنه يتلاشى مع تعدد العروض .
ويصير الشي عادي .
عموما البرزنتيشن يفيد الطلاب مستقبلا , ويقوي الثقة بالنفس .

لكن فيه نقطه مهمه تخص هالمووضوع

فيه بعض الدكااتره يستغلون هالوضع ويكون شرح المقرر كامل موزع على الطلاب ؟؟
انزين شنو شغلتك انت كدكتور جذي ؟ بصراحه هذا ظلم للطالب
وفي نفس الوقت عمر الطالب ماراح يوصل لك المعلومه المطلوبه مثل الدكتور

لكن فيه دكاتره ثانيين يخلوونك تشرح فترة معينه ويعقبون عليك بعد شرحك هذا تمام

 

[كليوباترا]

الردود شوي تشجع بس ما يمدي اقراهم كـامل ،

عن نفسي كلش ماعندي جرأة ، أني مشاركة في السكشن مااشارك
و لو عندي سؤال او شي مو فاهمتنه مستحيل أقول .. اظل مو فاهمة للنهاية و لااتكلم
يمكن مثل ما قالوا لو المكان كله بنات بتجرأ شوي ، بس بوجود الشباب .. و التعليقات ماشاء الله
الدكاترة ما سلموا منهم ، فأني واجد خايفة من هالشي .. الله يستر لذاك اليوم

 

[sadeq91]

انا بكرة عندي عرض برزنتيشن في المحاضرة ،،

دعواتكم لنا بالتوفيق ..

 

[math girl]

اليوم في محاضرة
عن البريزنتيشن سكلز
لا تفوتونهم
في s50
من الساعه 11 الى 1

 

[إيمَان]

آنا ما آخاف اسوي برزنتيشن جدام مجموعة من الناس
ولا رهاب ولا توتر ولا شي كللللش بالعكس فللللة

بس المشكلة آنا ما عندي أسلوب
يعني يا يكون البرزنتيشن مالي كلّه قراءة
أو أن اقعد اشرح بس بطريقة تملل
آنا نفسي كنت آتملل شلون اللي كانوا يسمعوني هههههههه