ذكرياتكم في طريق اخذ الليسن ^_^

[نجمة تشرين]

حليوة قصتش لؤلؤة
فن
لكن قهرتي هالممتحنة ... صار خاطري اكفخها

 

[Queen]

خخخخخ حده حلو الموضوع صراحة

انا من حظي قصيت تراي شهر 12 وشهر واحد على طول اتصلت فيني مدربة لان دربت امي واختي ومرت اخوي
تدربت عندها لان حدي احب سيارات وسياقه كنت شيطانه في سواقه
جم مرة احصل زف من مدربه لان مااحط الحزام ماتجوفني الا في مدرسه

اول تراي دخل معاي شرطي ياكثر مايهذر كنت مااوقف عن كلمه قف ورسبني

وثاني تراي كانت وحده معصبه حدها ريوس عطتني مرتين ثاني مره سويته صح خلتني ارجع ورا وايد عقب قالت لي راسبه ورجعتني مفروض لي بعد فرصه

مع ان الترايين اثنينهم اطلع وانا شاقه الحلق ويسألوني اللي هناك نجحتين اقول لهم لا كل يستغرب مستانسه وانا راسبه

وثالث كل شي صح سويته حتتى نص ساعه ماصار لي ونجحت

اول يومين من اخذت الليسن رحت المنامه افتر بيتنا في مدينه حمد

 

[qassoomy]

لؤلؤة

 

[5alil]

ويش هل الحالة

واحد من كل 100 ياخذون الليسن من التراي الاول.

الحمد لله ما صادناو لا شي ايام التدريب ولا في الامتحان

لان كان عدنا خبرة قبل التدريب

سنة كاملة بدون ليسن.

لكن إلي يقرا السوالف مالكم يفطس.

 

[درازية]

قصيت تراي شهر 1 لسنة 2010
تدربت شهر 6 سنة 2011 عند مدربة بس ثلاث ساعات وماكملت رديت تدربت عند مدرب بنفس السنه ف شهر 11 وكنت ماغلط في المرتفع ولا الريوس ويوم طلعني برا المدرسة في مره من مرات سياره بيكب قدامنه لف علينا مره وحده لا خفف بالبريك ولاطق سكنير وكنت امشي 100 وشوي تقريبا ماشوف الا واحد لف قدامي وباقي شويه ندعمه كنه بنموت حتى قلت الشهاده ف قلبي سيده المدرب لف السكان في اخر لحظه كان هالشي وترني من بعد التدريب الايام الجايه يتني حاله نفسيه

دخلت تراي الاول كل شي اوكي رحت المرتفع بندت عليي سياره عطتني 10 محاولات تقريبا وكله تبند وكان غلطي الثاني المسارات ادا بطلع من المرتفع اني رحت اليمين مفروض اكمل المسار رحت سيده ورسبت بس قلت عادي توه تراي الاول

ثاني تراي تمرورة خربطت لي الاول والتالي دربت ساعه 9 قبل تراي وترايي كان 12 بس دخلوني 11 وتعبت وقالت لي سرعه جنونية كنت ماسرع امشي عل قير الثاني داخل المدرسه مع االمدرب قالت لي اودية الثالث واطالعها لا هي ميوده الباب من الخوف وضرب بريك مره وحده ووجهها يصير قدااام ههههههههههههه لانه صارت الاشاره حمرا ماقدرت من الضحك ولفاتي كلها غلط بسبب السرعه وكنت بدعم رصيف بس عصت بريك و 10 اغلاط كتبت لي في الورقه عكس التراي الاول ماعندي الا غلطين شكلها بردت الحرة فيني اطالع الاغلاط ماينفهم من خطها الا 5 اغلاط و5 باقي كله هرار ومو مبين الحجي بس شكلها انقهرت عليي هههه بس انفرت فيني الدنيا يوم شفت كلمه راسبة كنت متوقعه انجح بس الله كاتب


وثالث تراااي كانت مرورة طيبة كل شي سويته اوكي بالول ودتني المرتفع وضبطتتودتني الريوس محاوله الاول والثانيه غلط محاوله ثالثه قلت لازم اضبطه ضبطتت شوية ويوم بدخلها ف بارك ماتعادلو الخطوط لفيت السكان عشان يتعادلون عدلته وقلت لها اوكي عشان تمشيني ماصدقت فتحت الباب قامت تطالع تقول باقي شوية وكان بصير عل الخط قلت اشوه ومشنه وودتني اسمح للمرور
ورحنه بره المدرسه بس رحنه دوار ورجعنه ونجحت خخخخخخ قلت واخيرا

بس صج كان تعديب ايام تدوير عن مدربين صار لي سنتين وتوني هسنه ماخده ليسن 27-2

يالله عقبال الي يتدربون ينجحون
وعقبال لي قصو كجه يحصلون مدربين بس وين يتحصلون
واحلى ايام ايام التدريب

 

[yagmur]

هههههههههههههههههه ..... قصصكـــم بلاوي !

 

[MR.DEVIL]

والله خوش موضوع

انا كلش كلش ما توهقت في سالفة المدرب و قبل ما اقص الكجة و المدرب جاهز
و المدرب خووووش رجال و دربني من الصفر الى حد 14 ساعة بالضبط و قصيت التراي و نجحت من الاول

لكن القمنده على قولة اخوانا الكويتين في الممتحن ، اول ما وصلت السيارة من الربكة فحت باب السيارة و دخلت و لصقت الكرسي في السكان ( قدمته )

و انجان يبدي تهزيئ في هالممتحن و المهم بعد هالمصخره مشيت و خلصت تراي المدرسة بسلام و طلعت برا و قاعد امشي على شارع المدرسة 40 و هو يصارخ علي دووس يبه دوووس و انا متخربط و حالتي حالة و كل ما اسوي شي صرخ علي صرخة حسيته ناوي يرسبني و تالي يوم رجعت المدرسة طلع من السيارة و وقف على يكتب على سقف السيارة في الدفتر و يخربش وانا بعدي على الكرسي

و توني بنزل الا فالت علي الدفتر و يقول انتبه لروحك يبه و روح لغرفة 11 و طبعا منالربكة اول غرفة دخلتها و قعدت الا كلها مرور و واحد كبير قاغد ورا مكتب المهم و انا قاعد كلمني اللي ورا المكتب يقول ها يبه بشر

قلت له اي ابشر شكلي راسب و طبعا وجهي لونه بنفسجي على اخضر من الصريخ اللي صارخه علي هههه فهم الموضوع هو الا يقول عطني الدفتر يبه بشوف و اخده و قام يقلب الا يضحك لي
و يقول كاتب لك ناجح يبه ليش متكدر بس قوم اقعد في غرفه 11 ههههههههه و طبعا قمت وانا مو مصدق لقيت ولد عمي و خبرته ان الممتحن معصب و الا الممتحن وراي و جودني من جتفي و يصارخ علي الممتحن مب معصب عليك

طبعا حالتي لا توصف و من الربكة ما جتني زهقة السياقة من اول يوم ما سقت الا ثاني يوم

فما اقول الا حسبي الله عليه من ممتحن و توني شايفنه قبل كم يوم يصارخ على ممتحن ثاني وياه في السيارة

 

[qassoomy]

كل قصة تقول الزود عندي

 

[أوراد]

يااعلي
كل ما اشووف هالموضوع تجيني بقه من المدربين
متى باخذ الليسن ما ادري

 

[hlwlw]

بسم الله نبدأ

التراي الاول
الثقة صفررررر والخوف 20 اس 10000 وحالتي حالة

خصوصا قاعة الانتظار ويجون يقولون اسمك تحس يوم القيامة استغفر الله

آخر شئ جا دوري ورحت انجان يقولون ليي وين الاستمارة واني ايهي وطلعت ما جبتها ورجعت لا راسبة ولا ناجحة

وثم ذهب في اليوم الثاني
والتوتر مليووون والخوف
ونادو اسمي اشوى ما اغمى عليي
ورحت اله السيارة مغصغصة بعد
ركبت واني وش اقول ليكم طالعة روحي
ولا لبست حزام ولا شئ
سيدة بمشي حتى منازلت هاند بريك ومسكينة تقول ليي وين حزامنا ؟
وعقب سيدة بلف وقدامي سيارة مافي مكان
اله تقول ليي نريوس
وريوست ومشيت وكان الوضع يسير وجميل وذهبنا الى لفة وكانت سيارة جاية من اللفة ومن غبائي وقفت
هي بتدش اللفة واني بطلع ماااادري ليش وقفت
ومن وقفت ما تحركت كل ما بمشي تبند كل ما بمشي تبند حتى روحي طلعت
تقول ليي ويش نبدل ؟ قلت ليها لاااااااااااااا عطيني محاولة مسكينة عطتني وش قد
وعقب بعد فشلت وبالغصب مشيت وودتني المرتفع
مشكلتي كنت فنانة في المرتفع والريوس بس الباقي ماعرف ههههههههه
وطبعا اوكي مشيت وخب ديك الحزة طرت اناسة
ودتني الريوس انجان اجوف السهم في الارض على انه يطلع ولفيت ع طول بدل لا ادش وهي ضرب بريك لو ما ضربت جان دشينا في اللوحة
اقول ليها ما يصير اهني ندش اله تسوي تقول اهني ريوس
وودتني واحد غير وانجان ادش ليها من الوسط مادري بعد فيه يمين ويسار وانجان ترجعني
ورااااااسبة

هذي الورقة


​

 

[hlwlw]

التراي الثاني

كنت خايفة بعد بس هالمرة اعرف صدقوني اعرف
وانجان تجي ديك النزرة ويمين يسار يمين وعلى فكرة ما بندت كلش السيارة
رحنا المرتفع الجديد مادري نركب احسب نروح سيدة وخلتني اروح وطبعا سيدة رحت عقب ويش عاد ما سويت غلطة جايدة
ودتني الريوس ودشيت جهة اليمين ورسبتني بعد ما خلتني اريوووووس وكان حلمي كله اريوس

نزرة وحدة
اصلا من جيت وقعدت وهي حاملة ورقة الرسوب وششششش قصدها


راسبة وافتخر


والثالث نجحت صلوااااااااات
وتوي قبل جم يوم كسرت الليت ودعمت بيكب مرة بعد كسرتها من قدام مستانسة بعد

​

 

[qassoomy]

ههههه هلولو

ضحكتيني اهم شي نجحتي في الاخير

 

[Ms.Hoor]

شلون بديتون تسوقون عقب الليسن ؟؟
خذ لي سنة من خذت الليسن ولا اسوق ..
سقت بروحي سيارتنا الجديده وسويت فيها حادث بسيط والحين وقفت .. لان احس ما يناسب بروحي اروح مع إني اوكي يعني ،
بس مادري شلون ابتدي .. ابي اسووووق عادي ​

 

[..أتومآ..]

ركبت السيارة في مدرسة السياقة وقمت افتر شوية ، المهم الرزيل توني افتريت شوية بس في المدرسة توني بطلع الا يقول لي ارجع ، انا قلت هذا شكله انعجب بسياقتي وماشاف احد يسوق مثلي قبل بهاي العمر ، المهم نطرته بره المكتب يجيب لي ورقة النجاح ، جان جايب لي ورقة رسوب كحل عيوني بها ذاك اليوم .
الأغلاط : اتذكر قال لي روح يسار الدوار انا رحت سيدا ، لان كان في لفة لاهي يسار ولا سيدا بين البينين (ذكاء باهر) + دست على الخطوط البيض اللي تفرق الشارع عند لفة + بندت مرتين يمكن في اشياء غير بس ناسيهم لان هالكلام قبل 10 سنوات
بس نجحت في الثاني

BD:​

وعليكم السلام ورحمة الله وبركاته

بوووه رجعتنا ايام الكرف
صراحة كانت ايام الواحد مايتمناها تنعاد
اتذكر قصيت الكجه عقب يوم ميلادي بيوم من صباح الله خير
واتصلت حق مدرب العيله طلع ظهره يعوره ومادري شنو فمايدرب
واستلمت اللستة مالت المدربين وكردت زين 25دينار
وماتم احد ماتصل له ,اللي يقول مشغول واللي فل واللي مريض ,, وواحد طلع متوفي بعد
وعقب مانزل علي اليأس والهم
وبعد يومين من الكجه ,كنت طالع من صلاة الفجر وكنت اسولف ويه الشيبان ويسألوني عن اخباري ففتحت لهم موضوعي مع المدربين
إلا يقولون لي روح قولي حق بوعلي داخل ترى اهو يدرب .!
هنيه آنه صرت هلون
توني ادري إن بوعلي مدرب هههه
المهم رحت له وكلمته وقال لي والله زحمه عندي وهلون لكن ابشر بكرة بإذن الله راح نبتدي
هنيه مادري شلون احس روحي طاريت من الفرحه وماياتني النودة يوم رجعت البيت
المهم بديت وياه وكان يدربني من صباح الله خير الساعه 6 و7 ,كان الجو حليو ونشاط ,بس مب شي القعده
والله يذكره بالخير كان عنده سكر ,فكل دقيقة اوقفه عن الحمامات تكرمون ,وساعات يخليني اروح الريوس ويقول لي تدرب وهوه يرقد وعليه
كملت وياه 16-18 ساعه شي هلون والباقي وقعهم لي
المهم عطوني تراي عقب اسبوع ,ودربني ساعه المدرب قبلها
وصار حظي إن ترايي يوم الخميس الساعه 6او خمس شي هلون
المهم وقت مانادوني انه ماسمعتهم
وتميت انطر وانطر والوالدة الله خليها كانت وياي تقول لي جوف شسالفتهم الكل راح مافي إلا انه وانت
رحت لهم المكتب ورى وإلا يقولون ناديناك ,قلت لهم ماسمعت ,المهم قالوا لي في واحد يقدم امتحان احين ,عقبه روح دش انت
وطبعاً كنت آخر واحد وحسيت روحي ثقيل عليهم صراحة لأنهم كانوا يبون يمشون تخبرون ويكيند هههه
المهم ركبت الكورولا2007 ,وقعدت احوس بالمناظر ولبست الحزام وأعشق الغير ونزل الهاند وقعدت اسولف وياه وجذيه عشان اخفف التوتر
افتريت في شارع الإشارة الطويل اللي في المدرسه ,,ووداني الريوس وضبطتها ولله الحمد ,وعقبها إلا يقول اطلع برع ,هنيه استانست قلت في قلبي خوش هاي حده مستعيل ويبي يفتك مني
المهم طلعنا برع ,وانه على راحتي منضبط يعني
وإلا يقول لي سرع سرع روح
هنيه جان اعطيه التعشيه وأطلق عنان وكربون الكورولا هههه
ولله الحمد رجعنا عقب المدرسة وقال لي امش وياي المكتب هنيه شوي واضمه من الوناسه ههههه
كان انجاز بالنسبة لي كمن أول تراي
والحمدلله طلعت الليسن في نفس اليوم واستلمت الأكورد
​

BD:



ــــــــــــــــــــــــــــــــــــــــــــــ

أني طلعت روحي على ما أخذت الليسن ،
أخذته من الثالث لا و بواسطه بعد ..

من البدايه كنت غير عن الناس ماحنيت على إني أتدرب ولا كان خاطري يصير عندي الليسن كان عادي عندي أتأخر خصوصاً
لأني ملوله وكانوا يقولون مافي مدربين فما تعبت روحي ودورت ..
بعدها لَما جفت روحي مصختها قصيت الكجه وقعدت أتصل للمدربين واحد واحد ,,
إستجنيت وياهم كلهم ما عندهم مجال .. حتى أذكر إتصلت لواحد قاليي أنا مريض
الحين مادرب إذا صرت زين بتصل ليش ، قلت ليه متى بتصير زين ؟

المهم بعدها أبويي طلّع مدرب يعرفه ودربني ..
أول تراي رسبت في الريوس ،
ثاني تراي رسبت في المرتفع ، وقبل لا أدش لتراي كنت جايفه حادث وتخسبقت ..
قبل لتراي الثالث قلت لبيتنا إذا بعد رسبت خلاص ما بتدرب ولا أبي ليسن ،
بس بعدين أبويي رفق بحالي ونفسيتي وكلم مرور يعرفه ، ويوم الليسن ناداني
ووداني للمروره وقاليها هاذي فطوم حطيها في عيونش ..
ودتني ريوس وسويته وأصلاً وأني أعدل السياره كانت تقوليي " إي بعد شوي إي خلاص وديها ورى " ..
ما ودتني المرتفع سيدآ طلعتني برى ، ورجعتي ركبت على الرصيف بعد ..
المهم دخلت المدرسه وجفت أمي وأبويي يحارسوني في السياره وعطيتهم ضحكه ..
لين ما خلاص خذت الليسن طرشت للأوادم مسجات أخذت الليسن ..
رحت لأمي وأبويي السياره إلا المرور العجيب واقف وياهم ويقوليهم تحملوا في فطوم
< طبعاً خايف .. ضعوف BD: ..​

 

[Right to Cry]

هههههههههههههههههههههههههههههههههههههههههههههههههههههههههههههههههههه الي رسبوا من الدوار الغبي ابو 5 مداخل الي اداخل المدرسة اقدر رسوبكم لاني رسبت فيه مرتين المرة الأولى دشيت سيده على اللفه الكبير يوم قال يسار ورسبني , والتراي الثاني رحت يسار بس ما بدلت لليسار الأيمن خخخخخخخخخخخخ

والثالث قبل جم يوم نجحت وسويت كلشي صح بس مشيت سرعة زايده وحمق علي هههه , توني معشي الشباب من شوي

 

[نجمة تشرين]

شلون بديتون تسوقون عقب الليسن ؟؟
خذ لي سنة من خذت الليسن ولا اسوق ..
سقت بروحي سيارتنا الجديده وسويت فيها حادث بسيط والحين وقفت .. لان احس ما يناسب بروحي اروح مع إني اوكي يعني ،
بس مادري شلون ابتدي .. ابي اسووووق عادي

هذا الغلط ان تسوقين بروحش
المفروض ابوش او اي احد
لما تتوافر ليش سيارة يخليش
تمشين و انتي وياه في ففريقكم لين ما تاخذ ايدش و رجولش و بعدين للاماكن اللي تروحين لها يعني طريق الجامعة تروحين و هم وياش
طريق سوبر ماركت شي جذي
طلعات زيارات
بتاخذ رجولش و بعدين بتمشين عادي

 

[أسيرة الشوق]

أني كله أرسب في السياقة شكلي ما باخذ اليسن إلا طالعة روحي
كل مرة أرسب مرة رسبت في المرتفع ومرة في الدوار وكله اتبند عليي السيارة
الله كريم ان شاء الله هالمرة أنجح في التراي​

 

[نجمة تشرين]

أني كله أرسب في السياقة شكلي ما باخذ اليسن إلا طالعة روحي
كل مرة أرسب مرة رسبت في المرتفع ومرة في الدوار وكله اتبند عليي السيارة
الله كريم ان شاء الله هالمرة أنجح في التراي​

لا تيأسين
عندي صديقة و اخت عزيزة علي بصراحة
اخذت الليسن في ال9
بس كانت عندها امل
و اكا اخذته خيرتها

 

[hlwlw]

بلا هرار بتنجحون بس ركزو اشوي وترى المرتفع سهلللللللللل بس اعطي بترول قوووووي واشوي اشوي شيلي من الكلج وبتجوفينها طيراااااان

المهم اني عقب الليسن 3 شهور ابويي يخليني امشي وهو ويايي وبالغصب هداني بروحي وصرت اروح الجامعه واشخطها شخاط ولا هماني احد

 

[MisS Soft]

ههههههههههههههههههه هالموضوع ع الجرح
اكبر معاناة في حياتي كانت تدوير المدرب :tears:
آكثر من سنة من قصيت الكجة لين ما تدربت << حتى جددتها
مدربي كان طيييب بصراحة وتدريبه اوكي بس احيانا عليه حركات
يعصب وتنطنز علّي ويحسسني ان ماعرف اسوق :mellow:

كنت احب المرتفع حددددي وعلى طول اسويه عدل
بس مرة مادري وش صار فيني ! فوق ال10 مرات حاولت وما ضبط
هو يعصب وكل ما يزفني اخربط اكثر
اني طبعي اسوق اوكي لكن من يعصب علّي اعفس الدنيا فوق تحت

ومرة بعد عند الدوار السياارة شوي حكت الرصيف ! حتى ما حسيت بالشي كلش :mellow:
شوي ويقلتني حسيت بالاجراام بصرااااحة :tears:

وطبعا موضوع الكلج شيء ثااااني جم مرة احصل زفة محترمة هههههههه
خايف على سيارته المسكين ما ينلام يترقع فيني اذا كسرت له القير

اما الترايات ! هههههههههه
اول تراي رااايحة حدي متحمسة وبصراحة كنت حاسة ان بنجح مع ان ما كنت اعرف للريوس عدل
قعدت في غرفة المصير هههههههههههههه ميتة من الخوف كنت وقعدت اسولف وية البنات الي هناك
نادوني واني عايشة الدور وايدي على قلبي ! الااا تسألني وين الاستمارة ؟ قلت ليها أي استمارة :mellow: ؟؟؟!! هههههههههههههههه
طلعت ناسية الاستمارة او بالاحرى ما كنت ادري ان يبونها واصلا نسيت امرها لان قاصة الكجة قبل اكثر من سنة
وحطيت حرتي في ابويي مسكين حتى كنت اشوي واصيح :tears:
حتى ما رضيت ارجع البيت اقوله اتصرف وياهم خلهم يدخلوني هههههههههههههه وهو مو بيده شيء ! مستحيل يدخلوني بدونها

المهم اخذت موعد ثاني للتراي ورحت كنت متشائمة ومتأكدة ان برسب
وقتها كان عندي 3 كويزات بالجامعة وطبعا دخلت وخبصت الدنيا ورسبت وكان الريوس السبب الرئيسي

عقب التراي الاول والتوتر الي عشته ! وبعد السيارة كانت غير والقير ما يتبدل بسرعة
فقدت الامل ان انجح :tears:

التراي الثاني ! كنت متدربة ساعة قبل التراي
والمدرب عطاني احباااط طبعا وحسسني ان ماعرف اسوق ! :tears: وقالي اذا رسبتي ما بادربج ح
حده قهرني وقلت انجح يعني انجح
توني طلعت من التدريب ودخلت قبل موعدي بنص ساعة جان تنادي اسمي !
يعني حتى غرفة المصييير الحمدلله ما دخلتها ههههههههههههه
وكانت الانسانة لطيفة جدااا واني سويت زين طبعا ونجحت وافتكيييييييييييت
وكان شعوووور مو طبيعي لان تعذبت واني ادوّر مدرب بصراحة