السلام عليكم
كأني واصله متأخرة على الموضوع لكن بتكلم فيه
طبعا كرسوم كارتون الناس عرفا اعتبرته وسيله لالهاء الاطفال و دائما يوضع في فقرات الاطفال
ما في ما يمنع ان الشخص بعد ما يكبر ان يطالع رسوم لكن بحدود
مثلا الجهال قاعدين قعدت تطالع وياهم
امم مثلا رسوم قديم يذكرك بما مضى ما في مانع ترجع تطالعة (( مثلي كلما يحطون سالي لصقت في التلفزيون
و خسارة محد يحط جودي ابت .. راحت رسوماات اول كلها هادفة و قصة مو احين عنف و رسمة كريهة و تلوع الجبد ))
المهم عجبتك قصة رسوم معينه و تحس ليها هدف يناسب عقليه اللي في سنك ما في مانع في الموضوع ..
لكن 24 ساعة رسوم في رسوم كأنك الشخص توه في ابتدائي هذا غلط
يعن يالا اشوفه ان اخوي في ثالث اعدادي و لحين يطالع لي رسوم نحاول نقول ليه خلاص ابد ما في فايدة مو معناته ما يطالع شي غير بس في شي اسمة خلصت فئتك العمرية لهالرسوم تطور مسوي روحك رجال و ما ادري شنو و بعدين لشي و شي
و الكل قاعد يدرج ليه ان يطالع فترة رسوم و بعدين شي غير
بس اشوف في اكبر منه و يطالعون يعني وضعه نورمل طلع
المهم في ناس اعرفهم ينزلون الرسوم و شغلهم الشاغل كونان و ربعة و حتى يتعلمون ياباني بهالسبة و على فكرة في عضوة هني صديقتي من ثنوي يمكن الحين اختفت بس كانت موجودة واجد تحب الرسوم بشكل مو طبيعي ما يسمونها الا كونان و تنزل حلقاته و كانت تقول لينا ان الاجزاء الي في سبيستون لحين في فوقهم اكثر لحين بالياباني و ان لحين ما كبر
تبغون الصراحة اني احارس اشوف هالكونان يكبر و لا هو كبران يمكن بس هالشي الا يجذبني فيه
اما تكرار قصته و هالقضايا مصخت يعني واحد وين ما يروح تصير جريمة و قتل بعد اشكرة وجها نحس
فشوف الواحد من يكبر يشوف اشياء صارت تافهة و ممله بحسب ميول الكبير لكن في ميولات تختلف للاشخاص
مهما كان الشي اللي ما يعجبك يعجب غيرك و هذا تفاوت
بس كنصيحة حتى لو الشخص تعلق بافلام كارتون بالعكس في افلام او رسوم احسهم خصيصا للكبار ما يخلي هالشي يأثر على حياته لازم ان يفصل بين الواقع و الحياة لان كثرة الاندماج في الخيال راح يؤدي الى عواقب وخيمة ان الشخص ما يقدر يتأقلم مع الاشخاص الطبيعيين او ان حتى لو الناس تتكلم في جد ممكن يجيب الرسوم و يوضفه في حوار و هني راح يجيه شي مو خوش و امور واجد
و دمتم موفقين
وآخر أنمي طالعته كان إسمه Death note كان إبداع هالأنمي وانصح الكل يطالعه , واطالع المسلسلات الأجنبية اكثر شي حالياً , هو عالعموم اكثر الأنميات خلصتهم لأنه صار ليس فترة طويلة وانا أتابعهم وانزلهم وعندي مكتبة ضخمة من السيديات كلها أنميات , بس الأنميات القديمة مثل داي وصقور الآرض وتوم سوير ونيلز وسلام دانك وهالسوالف لو أطالعه 100 مرة مايملل
..
أنصحك بـ samurai champloo قصة سيناريو رسم لطيف ومو طويل بعد 26 حلقة
