الأخــت الكــبرى *'

[G h a i d a]

ايي يجننون ..
يشيبون الراس بعد ..
​

ما هكذا التفاهم
​

 

[alialmulla]

امممممممم بصراحة ما عندي اخوان أو اخوات أكبر مني
أنا أكبر واحد
و أنا يبين ليي لو يصير الصبي أكبر واحد أحسن من البنية
لأن الصبي إذا كان رحوم فبيكون شايل أخوانه الا اصغر منه شيل برة و داخل البيت
و إذا كان متفرعن يبا ليه ضرب .. ما يهتم بأمر بيتهم واجد و بيهملهم لكن ما بيأذيهم مثل البنية قاعد على راسهم في البيت 24 ساعة و من يصير شي بردت الحرة فيهم
أنا أحس ان في نعلة تبي تتسطر على دماغي من هالكلام يمكن
ألف ألف اعتذار و أنا ما أعني الكل ،إنما البعض بحسب التجارب الا اشوفها قدامي ..
بالتوفيق جميعا لكل خير ​

 

[G h a i d a]

امممممممم بصراحة ما عندي اخوان أو اخوات أكبر مني
أنا أكبر واحد
و أنا يبين ليي لو يصير الصبي أكبر واحد أحسن من البنية
لأن الصبي إذا كان رحوم فبيكون شايل أخوانه الا اصغر منه شيل برة و داخل البيت
و إذا كان متفرعن يبا ليه ضرب .. ما يهتم بأمر بيتهم واجد و بيهملهم لكن ما بيأذيهم مثل البنية قاعد على راسهم في البيت 24 ساعة و من يصير شي بردت الحرة فيهم
أنا أحس ان في نعلة تبي تتسطر على دماغي من هالكلام يمكن
ألف ألف اعتذار و أنا ما أعني الكل ،إنما البعض بحسب التجارب الا اشوفها قدامي ..
بالتوفيق جميعا لكل خير
​

يا علي :mellow:
مو بس نعلة إلا خيزرانة منقعة في ماي وملح :sly: << أمزح
بس ترى فكرتك كلش غلط عن الخوات الكبار
أعترف أني عصبية شوي بس حرتي ما أبردها فيهم

على العموم شكرا على مرورك هني
وشسمه الله يعطيك مرة هي الكبيرة في بيتهم عشان تشوف شلون البنية اذا صارت أكبر وحدة شلون بتتعامل وياك وويا أولادك
​

 

[Dam3at Malak]

- هل تشعرين بأن والديك يحملانكِ مسؤولية كبيرة في المنزل ؟
نعم ،، بالنسبة لوضعي في البيت مثل البرلمان يمشي اوامر الحكومة ( الوالد و الوالده ) لشعب ( اخواني ) و يرفع عن مطالبهم للحكومه

- هل تشعرين بحنان الأمومة تجاه أخوتك الصغار ؟ أم انكِ تضطرين لمعاملتهم بقسوة ؟ ما مبررات ذلك ؟
أنه قريبة من أخواني بس كل واحد مختلف عن الثاني ،، و كل اخواني يعتبروني أم قبل أخت ما عدا أخوي اللي أصغر مني بسنتين .. أكيد أضطر الى القسوة في غياب الوالدين ،، لأنه يصير نظام اذا غاب القط العب يا فار

- ما محاسن كونكِ أخـتا كبرى ؟ وما مساوئ ذلك ؟
كلمتي هي الحل الوسط يعني ساعات تكون كلمتي فوق الكل .. و هاي لها ايجابية و طبعاً محد يقدر يشتكي عليي لأنه أنه خط أحمر .. يكون عندي خبر عن كل شي و قبل الكل ،، المساوئ احصرها ف الغيره من اختي الوسطى و مواجهة مشاكل اخواني و محوالة حلها قبل ما تواصل للوالد و الوالده ..

- هل تعتقدين أن أخوتكِ الصغار يقدرونكِ ويحترمونكِ كما يجب ؟
يقدروني و يحبوني ،، بس احترامهم على حسب النفسية :mellow:

- هل تعانين أحيانا من ظلمٍ في المعاملة من والديكِ ؟
أحياناً أضطر اتحمل أغلاط أخواني و أكون وجه المدفع و اتلقى كل التوبيخ بدلهم ،، بس انه ثلجة ما أعصب و احاول أهدي الأمور ولو على حسابي في بعض الأوقات

- هل أنتِ مجبرة باعتباركِ أختا كبرى على تحمل أخطاءِ أخوتكِ الصغار ؟
نعم كوني محل ثقتهم ،، لأنه أنه الأكثر إلماماً بإمورهم و من يماشون و أسمع كل فضفضتهم و مشاكلهم و أنه اللي انصحهم فإذا كانت النتيجه خطأ فأنه أتحمل جزء من المسؤلية

- هل حدث وتمنيتِ لو أنكِ لم تكوني أكبر أخوتك ؟ لماذا ؟
نعم لكي أحكي لها ما يختلج صدري كما يفعل أخوتي
​

 

[توق]

انا عن نفسي الوسطية اوماقبل قبل الاخير يعني ثلاث اصغر وحده بالعيلة لاكن على مسؤليات اكثر من خواتي الكبار على حكم انهم متزوجين وعندي اخت اكبر مني في البيت لاكن الكل يغلط ويقول اني انا الاكبر وهذا الشي كان بالبداية يضايقني بس بعدين السلطات عندي زادت وصرت اتحكم بالبيت:sly:
حتى اغراض البيت اروح انا اشتريهم وكل المسئوليات تقريبا ماراح اهمش دور اختي اهي بالبيت ناديها كومار على اساس انها دريول البيت وعليها مسئوليات بعد
احيانا نضحك على روحنا نحس روحنا صبيان مو بنات
" اصبيان البيت مامنهم فايدة بس يأكلون وحنا علينا كل شي احيانا اتمنى ان ماعندي اخوان "
ان شاء الله يصير عند البنات اخوان عدلين مو نفسي
بس الحمد لله على كل حال

 

[sanabsy 15]

انت تبي اخت ..
و انا ابي اخو ..

عندي 4 خوات .. بس اخوان ما عندي ..

اقول للوالدة جيبي ليي اخو له .. تقول روووح .. جيف انته اللي بتربيه ؟ اني اللي بربيه .. خلاص انتون الخمسة كفاية

هههههه استمليت من الأخوان، نبي نغيّر عاد، نبي جنس ناعم في بيتنا غير الوالدة الله يحفظها ، بس الأخوان فن بليستيشن وهرار وطناز ​

 

[shy.eyes]

حبييت الموضوع ،،

و إذا كنتِ أختا كبرى ==> بجاوب بشكل عام لكل الاسئلة ،،

كوني الاكبر شلت المسؤولية من الصغر واعتبر ملجأ ليهم بعد الوالدة الله يحفظها ،، وفرق العمر يلعب دور ،،

اعتماد امي وابوي علي كليااا بامور البيت فرايي يمشي ع الجميع ،،

فروحوا حق فلانة لإقناع الوالدة او الوالد فاعتبر دوا سحري عليهم ومستغلين اخواني هالشي ههههه ،،

شخصيتي قوية وحازمة عليهم وعندي تدخل مباشر بامورهم وهذا شي اعتبره من المساوئ لو اخر العنقود او الوسط ماعتقد كنت بهتم ،،

عندي خوات توأم يعتبروني متسلطة واخوي نفسهم هههه وجملتهم المعتادة ماترتاحين الاا اذا تدخلتين ،،

بس لو يفكرون فيها تدخلي يجيب نتيجة مرضية بالنهاية ،،

مشكلة امي وابوي عودوني ماقدر ماهتم بكل شاردة وواردة ،،

ومااكون مجبرة على تحمل اخطائهم لاني من اجوف الخطأ اوقف لهم ويصير زعل بس بالنهاية ينسون ،،

من محاسن الدور انه البجر له معاملة خاصة عكس باقي الاخوان عادتا ،،

مدلعة تماما وضرب المثل فيني حق اخواني اختكم كذا واختكم كذا الله يدوم رضا الوالدين ،،

وهذا الشي يقهرهم ويتمنون يكونون بهالدور مع اني مستعدة اتبرعه بالمجان ،،

المسؤولية بدايتها كانت ثقيلة لكن ثمارها قاعدة اجنيها وليها دور في بناء شخصيتي والحمدلله رب العالمين ،،

المساوئ اني احس روحي اكبر من عمري وجان ماشيب بسرعة ،،

لاني واجد احاتيهم بالذات الصبيان وعندي اخ معتقل دعواتكم له بالفرج ،،

كنت اتمنى انه يكون لي اخ لو اخت اكبر مني ويكونون قريبين ليي ،، مع انه الوالدة مو مقصرة بس الاخ لو الاخت غيير ،،

والله يخليهم ليي ويخليكم حق اخوانكم ،،

واقول كلمة حق الاا بدوري ترا صرتون مهيئين تكونون امهات مابتضيعون عقب هههه ،،

خصوصا جربتون العناد بانواعه والعصبية والنذالة واللذي منه فعندكم مناعة وصبر ،،


​

 

[d.e]

في رأيكم " إذا عندكم خوات كبار "

- ماهي إيجابيات وجود الأخت الكبرى بينكم ؟
يشيلون عنا مسئوليات، يعطونا من تجاربهم خبرات وعبر، يكونون رفيقات في السراء والضراء

- هل تمثل فعلا الأم البديلة ؟
لا .. يمكن شوي

- ما هي النقاط السيئة في وجهة نظرك في وجود أخت كبرى بينكم ؟
مافي نقاط سيئة إلا ان الخوات الكبار يحطون عيالهم عند الخوات الصغار

- هل تحظى أختك الكبرى بمعاملة مختلفة من والديك ؟ وهل يثير ذلك غيرتك ؟
لاا ههههههه

- هل حدث و تمنيت أن لا يكون وجود لأختك الكبرى في حياتك نتيجة لتوتر العلاقة بينك وبينها ؟
لا والحمد لله

- كيف ترى أختك الكبرى ؟ هل هي حنونة أم تعاملك بتسلط ؟ أم الاثنين معا ؟
اممم .. الخوات الكبار وجودهم صمام أمان حق العايلة ما قط أحد منهم عاملني بتسلط بالعكس ،، يمكن ساعات يتخذون عني قرارات بس بدونهم آضيع ،،
الله يعينكم ياللي ما عندكم خوات كبار !!

- هل تعتقد أنها تستحق التقدير ؟ وإذا كانت كذلك هل تقدرها كما يجب ؟
اي طبعا يستحقون التقدير / تعبوا علينا يوم كنا صغار
واحين نتعب على عيالهم

موضوع جميل وفي وقته //

 

[AL alawia]

هل تشعرين بأن والديك يحملانكِ مسؤولية كبيرة في المنزل ؟
ايي
- هل تشعرين بحنان الأمومة تجاه أخوتك الصغار ؟ أم انكِ تضطرين لمعاملتهم بقسوة ؟ ما مبررات ذلك ؟
اشعر بببعض الحنان اتجاههم وااضطر الى القسوة بعض الاحيان
- ما محاسن كونكِ أخـتا كبرى ؟ وما مساوئ ذلك ؟
محاسنها كوني قريبه من خواتي واخواني , مساوئها يجب ان اكون المثاليه التي لا تخطأ
- هل تعتقدين أن أخوتكِ الصغار يقدرونكِ ويحترمونكِ كما يجب ؟
احيانا
- هل تعانين أحيانا من ظلمٍ في المعاملة من والديكِ ؟
لا
- هل أنتِ مجبرة باعتباركِ أختا كبرى على تحمل أخطاءِ أخوتكِ الصغار ؟
ايي
هل حدث وتمنيتِ لو أنكِ لم تكوني أكبر أخوتك ؟ لماذا ؟
اي
يسلمو​

 

[math lover]

اني الاخت الكبرى
لكن ابدا ماحسيت بمسوؤلية لان امي ماشاء الله قايمه بالمهمة الله يخليها لينا
لكن احس خواتي يحقدون علي ويبون يفتكون مني لاني متسلطة صراحة وكل شئ اقول ليهم ترى اني الكبيرة هني
وبالنسبة للماما والبابا اني الدلوعة وخواتي دائما يغارون وكله يقولون من تقول math lover تبي شئ سيده تنفذونه ليها واحنا ننتظر سنة ههههه
بس في النهاية اني احبهم وهم يحبوني ومانستغني عن بعض والمشاكل والهواش هي ملح الحياة

لكن تمنيت يصير عندي اخو كبير لو صغير لو وسطي كان خاطري ولازال خاطري لكن الله مو كاتب
عشان بنات خيلاني يتغطون عنه واني ماتغطى شعور عجيب له ههههههههههههه

شكرا على الموضوع

 

[zainaby]

مادري هل الموضوع القصد منه بيان الدور الي تمثله الاخت الكبرى
بس المفهوم هذا ما يتطبق في كل الظروف
اني مو الاخت الكبرى بس اني الي حاطه اخواني في عيوني واتحمل فيهم من كانوا صغار
واساعد امي بشكل كبير في البيت
مو قصدي اقلل من دور الاخت الكبرى
بس مو دائما اهي تكون قلب البيت
يعتمد على شخصيتها
والله يخلي ليكم خواتكم ويخلي اختي

 

[..أتومآ..]

و إذا كنتِ أختا كبرى :

- هل تشعرين بأن والديك يحملانكِ مسؤولية كبيرة في المنزل ؟
لا


- هل تشعرين بحنان الأمومة تجاه أخوتك الصغار ؟ أم انكِ تضطرين لمعاملتهم بقسوة ؟ ما مبررات ذلك ؟
أكثر وقت أحس فيه إني أم لخواتي إذا أمي وأبويي يسافرون ، القسوه لازم تكون موجوده للتأديب ،


- ما محاسن كونكِ أخـتا كبرى ؟ وما مساوئ ذلك ؟
محاسن واجد ، أهم شي إنها الفرحه الأولى وأول دلع ،
حالياً ماذكر المساوئ كلها بس الشي إللي مايعجبني إن الإخت الكبيره تكون مثال للخوات
الصغار ، لهالسبب أحاول أكون بيرفكت في كل شي وهالشي صعب :tears: ..


- هل تعتقدين أن أخوتكِ الصغار يقدرونكِ ويحترمونكِ كما يجب ؟
إي .. الحمد لله


- هل تعانين أحيانا من ظلم في المعاملة من والديكِ ؟
كلش لا ، المعامله وحده بيني وبين خواتي ،



- هل أنتِ مجبرة باعتباركِ أختا كبرى على تحمل أخطاءِ أخوتكِ الصغار ؟
مو دايماً ، على حسب الموقف ،


- هل حدث وتمنيتِ لو أنكِ لم تكوني أكبر أخوتك ؟ لماذا ؟
ساعات يصير خاطري في إخت أكبر مني
بس يتم عاجبني موقعي في البيت
​

 

[alialmulla]

يا علي :mellow:
مو بس نعلة إلا خيزرانة منقعة في ماي وملح :sly: << أمزح
بس ترى فكرتك كلش غلط عن الخوات الكبار
أعترف أني عصبية شوي بس حرتي ما أبردها فيهم

على العموم شكرا على مرورك هني
وشسمه الله يعطيك مرة هي الكبيرة في بيتهم عشان تشوف شلون البنية اذا صارت أكبر وحدة شلون بتتعامل وياك وويا أولادك

​

ههههههههههههه خيزرانة مرة وحدة >> هذا اثبات لكلامي هههه
انا كلامي ما قلته الا من الا شفته بعيوني و طبعا مو كل البنات مثل الشي ..
بالتوفيق جميعا
[/CENTER]

 

[قمَر]

اني مو الكبيرة ..
لكن بما ان خواتي الا اكبر مني تزوجوا "صرت في دور الكبيرة"
بجاوب على كل الأسئلة

****

في رأيكم " إذا عندكم خوات كبار "
طبعاً عندي خوات ثنتين اكبر مني ، بتكلم عنهم ثنتينهم
وثنتينهم تزوجوا الحين خلاص

- ما هي إيجابيات وجود الأخت الكبرى بينكم ؟
اممم ، الايجابية مو على انها "اكبر او اصغر"
الاخت بـ شكل عام ، تخفف من الأعباء اللي بتصير عليش
"هذا من وجهة نظري يعني"
احنا في بيتنا اختي الأولى ما شالت اي عبء
لين ما تزوجت ولـ اليوم هي الأميرة
انما الثانية فعلاً تعبت وتحملت مسؤوليّة
وكانت لي مثل الصديقة والونيس دايماً

- هل تمثل فعلا الأم البديلة ؟
طبعاً نفس ما قلت فوق ، الأولى "أميرة"
ما احسها سوت شي خلاها توصل لـ هذي المرحلة
بس الثانية ، اي
حتى اختي الصغيرة كانت تناديها ماما
وهذا كانت حزتها لا زالت في المدرسة
+ انها مو بس اخواني ، انما كانت هي اللي تعتني بـ ولد اختي الكبيرة اغلب الأحيان
لأنها كانت تجيبه وتروح الشغل ، واحيان واجد تنام في البيت
على الرغم من انها كانت تشتغل بس كان اغلب الوقت عندها
ومو على مسألة التربيّة بس والاعتناء بـ الاطفال

- ما هي النقاط السيئة في وجهة نظرك في وجود أخت كبرى بينكم ؟
اختي الكبيرة ، تعودت من يوم احنا صغار "كل شي ليها"
وما كانت تتنازل اذا تبي شي
في النهاية ابوي يستسلم ويلبي ليها الا تبيه
بينما احنا كنا نسكت ونحاول نراضي روحنا
وطبعاً هذي مو سلبيّة الأخت الكبرى ، انما صفات سلبية في اختي نفسها
مثل الأنانيّة ، وحب الذات
ودايماً تفرض نفسها على الآخرين
ولحد الحين لو الود ودها نطلع من البيت وتقعد هي فيه

- هل تحظى أختك الكبرى بمعاملة مختلفة من والديك ؟ وهل يثير ذلك غيرتك ؟
الصراحة اي!
يمكن يثير غيرتي شوي
بس اني مو من النوع الا احن واتطلب واجد
فـ مو فارقة اذا اختي الكبيرة او غيرها
يعني مو اغار ، بس يحز بـ خاطري شوي
اما الثانية ، فـ " الحال من بعضه "

- هل حدث و تمنيت أن لا يكون وجود لأختك الكبرى في حياتك نتيجة لتوتر العلاقة بينك وبينها ؟
لـ الأسف اي ..
لكن الثانية كانت بـ مثابة الصديقة ليي

- كيف ترى أختك الكبرى ؟ هل هي حنونة أم تعاملك بتسلط ؟ أم الاثنين معا ؟
اختي الكبيرة اذا حبت الآدمي توديه فوق الغيوم
ولين حقدت عليه يروح فيها :mellow:
يعني عادي هي وياك "سمنة على عسل"
وتتهاوشون تسوي لك اشياء ما يتصورها العقل البشري
اما الثانية فـ هي حنونة غالباً ، مزاجيّة بعض الأحيان
واحنا صغار كانت واجد تأثر فيني مع ان الفرق بينا بس 4 سنين

- هل تعتقد أنها تستحق التقدير ؟ وإذا كانت كذلك هل تقدرها كما يجب ؟
بـ شكل عام ، اني في البيت كل واحد اعطيه قدره
الكبيرة واجد مواقف منها خلتني اكرهها :mellow:
بس مهما يكون تظل اختي الكبيرة
عشان جذي احاول اتجنب ان تصير بينا مشاكل عشان تبقى العلاقة بينا طيبة
اما الثانية نفس ما قلت قبل "بـ مثابة صديقة بـ النسبة لي"

و إذا كنتِ أختا كبرى :
هـ الأسئلة بجاوبها لأني ماخذة دور الكبيرة في البيت آلحين

- هل تشعرين بأن والديك يحملانكِ مسؤولية كبيرة في المنزل ؟
بـ صراحة مو واجد واجد ..
واكثر شي احسه متعب اذا خلوني اتحمل بـ الصغار
يطفروني لين اجتمعوا
بس احبهم

- هل تشعرين بحنان الأمومة تجاه أخوتك الصغار ؟ أم انكِ تضطرين لمعاملتهم بقسوة ؟ ما مبررات ذلك ؟
اني اخواني اسميهم اولادي
اللي اصغر مني 3
- صبي 16 سنة
احرص دايماً اني اكون قريبة منه
وعلاقتنا وي بعض جداً لطيفة
- وبنية 10 سنوات
هذي شوي فيها شطانة
وتجنني ساعات
وتوصلني لـ الدرجة الا اضطر استخدم فيها العقاب
وعقابي عادة ينتهي بتهديد ما يتنفذ
- وآخر العنقود سنتين
هذا يحسسني اني امه
متعلق فيني واجد
فيه شطانة شوي ، وهذا شي طبيعي
بس احبه واااجد
+ ولد اختي 6 سنوات
هذا شيطاااان
ونفس اختي يخليني احياناً اضطر اعاقبه لأنه يطلعني من طوري!
لكن بـ شكل عام احاول اتجنب القسوة
حدي اصارخ

- ما محاسن كونكِ أخـتا كبرى ؟ وما مساوئ ذلك ؟
صراحة ما اذكر محاسن ، يمكن المحاسن تنفعهم هم
يمكن في القليل من الأحيان تكون كلمتي مسموعه
والمساوئ ان احياناً يحملوني فوق طاقتي
اذا صار شي اني دايماً المسؤولة
وعلى اقل شي امي تقعد تعاتبني وتأنبني
حتى لو اني ما ليي ذنب
وحتى لو اني مسوية ألف شي

- هل تعتقدين أن أخوتكِ الصغار يقدرونكِ ويحترمونكِ كما يجب ؟
امممم
الصراحة اخوي "16 سنة"
يحترمني وما يرضى عليي
كل شي ولا اني
اختي "10 سنوات"
كلش كلش ما تحترمني ودايماً تطول لسانها عليي
وولد اختي ، نفس اختي
واثنينهم على النية
يعني ساعات الله يهديهم ويسووني ملاك منزل من السماء
والصغير للحين ما اقدر احكم عليه

- هل تعانين أحيانا من ظلمٍ في المعاملة من والديكِ ؟
يمكن

- هل أنتِ مجبرة باعتباركِ أختا كبرى على تحمل أخطاءِ أخوتكِ الصغار ؟
احيان اي ، واذا كنت تعبانة اعتذر
بس اغلب الأحيان اكون مجبرة على هـ الشي

- هل حدث وتمنيتِ لو أنكِ لم تكوني أكبر أخوتك ؟ لماذا ؟
طبعاً اني مو الكبيرة ..
بس بما اني اتكلم عن وضعي حالياً
عادي عندي

***

في النهاية احب اقول :
الأمر ما يعتمد على كون الأخت كبيرة او صغيرة
انما يعتمد على شخصيتها في المقام الأول

موضوع جميل
​

 

[sanabsy 15]

أهم شي الخت الكبيرة تعرف تطبخ، والا ما منها فايدة ​

 

[G h a i d a]

شكرااا جميعا على المرور والمشاركة في النقاش ،

استمتعت وأني أقرأ ردودكم الحليوة

منورين
​

 

[G h a i d a]

أهم شي الخت الكبيرة تعرف تطبخ، والا ما منها فايدة

طبـاخة أفا عليك


​

 

[رَحِيـــقْ !]

أحس العائلة تلعب دور كبير في صقل شخصيات الأبناء ، لما تطبق مبدأ المساواة بين الجميع ، من ناحية العطاء ، من ناحية الحزم والشدة ..
لما يحس الجميع انهم سواسية في الحقوق والواجبات بالتأكيد مع مراعاة أعمارهم وظروفهم ، هذا يخلق نوع من المودة بين الأبناء ..
كوني الكبيرة بالبيت ، ما حسيت في يوم ان أمي وأبوي حملوني حمل زائد أو انحطيت في موقع تحمل مسؤولية أمر ما كنت طرف فيه أو استحقه
بس أظل أحس من داخلي ببعض المسؤولية تجاه الأخوه الأصغر ، كتكوين علاقة أقرب للصداقة من الأمومه ، ومشاركتهم في اهتماماتهم ..
فطريقة حزمي واتخاذي لتدابير تأديبية تكون ودية ومتقبله من أخواني ، أكثر من طرق الوالدين ، فبعض الأحيان أمي تستشيرني في بعض الأمور
اللي تخص أخواني كـ إني أعطيها حلول ، أو تحملني مسؤولية تصليح المشكله .. لكن هالأمر بالعكس يحسسني بثقتهم في أرآئي وقدرتي على القيادة
وما أعتبره ثقل .

نلاقي شريحة كبيرة من المجتمع ، تعتبر آخر العنقود أو الجيل الأخير ، جيل مرفه على عكس طفولتهم ، ويغفلون عن كونهم انولدو في فترة
العائلة تمر فيها في ضغوط أكبر ، لتشييد عمود الأساس والبدء في الإستقلالية ، وأحس ، الأكبر يستنفذ أكبر حنان ممكن في صغره كونه أول فرحه
لكن طاقة الحنان تستنفذ مع كل مولود جديد ، وفارق العمر يزداد ويخلق فجوة .. فدور الأخت الكبيرة يكون أكبر في تعميق الروابط العائلية في هالمرحلة

الإيجابية في الأولى ، تسوي طبخات مودرن تتناسب ويا الجيل الحديث ، وحكم كونها أول تجربه فقد تحاول تصحح بعض الأمور اللي حست بتقصير
من خلالها من الوالدين .. ، ^ وهذا يعتمد بالتأكيد على شخصية البنية ، والبعض يحاول يفرض السيطرة والتحكم وتطبيق مبدأ الكبيرة ولازم تحترمني !
والله يعين من النوع الأخير ..

ما ندمت ولا بندم على كوني الأخت الكبيرة ، وأخواني كانو ولا زالوا .. يحملون جزء كبير بالقلب ، .. ♥ ~


موضوع لطيف جدًا ،
دمتِ ودَام العطاء
​

 

[Human rights defender]

ما عندي خوات

 

[تووومة]

حلمي من زمان، وكما هو حلم أمي، ان تكون عندنا بنية، اخت لي وبنت لأمي، كنت أتمنى اخت والله أحطها في عيوني، كبرى لو صغرى لو وسطى، بس للأسف الله ما كتب ان تجينا اخت احنا أربعة مصبنة ، وامي يوم احنا صغر وأنا أكثر شي، كانت تسوي لينا قراعين وتلبسنا ثياب بنات ، مسكينة امي الحمدلله لكن الله عوّضها بنات خالاتي كله هي تتحمل فيهم يوم صغار، آسف ما عندي إلا هالرد

خل نبادل عططونا صبي وبنعطيكم بنيه سبووع بس بنجرب الوضع