عبارات قديمة

[نجمة تشرين]

على طاري العبارات القديمه
تذكرون العزا مال قبل

اني اتذكر اول عزا سمعته في حياتي كنا في باص رايحين سوريا و الجو ظلام و اضائه خفيفة ..اصلا اول مقطع في حياتي اتذكره هو يوم الا بنسافر
و شريط لشيخ حسين (( من جراحات الهدى السائله ..قد حملنا الثأر في القافلة. يا علي يا علي ))

ليها اثر في نفسي

 

[التماس دعا]

احسن شي لعبة ...
چش كورك ( جش يعني عيون ..كور يعني غمض...لعبة الي يغمضون العيون ونروح ندورهم وين راحوا) وآخر واحد ادا طلع وقال (آبولو جميع) مرة ثانية بصير الدور عليه




ليي عودة في باقي العاب

 

[نجمة تشرين]

اممم في بالي شي قديييم كنا نسويه يوم كنا جهال
ما ادري تعرفونه لو لا

لما كنا نتزاعل مع بعض
نجود بعض من الاصبع الخنصر و نقول خاصمتش

و بس ما نحاجي بعض عقبها يا زعم صدق

و عقب لين بنتراضى لازم نسوي نفس الحركه لكن مع الاصبع سبابه
و نقول كلمتش ما ادري رجعتش و الا نسيت


^
كنت اسويها واجد هبله طلعت

 

[نجمة تشرين]

كانت في لعبه كلامها شكله لمحششين يعني
لعبتها شكثثثثثثر

ان نسوي مثل بدر و انيس نصفق ايد بعض
بس نقول


شرم برم زيكو زيكو
شرم برم زيكو زيكو
شرم برم زيكو ......نسكت عقب نقول زيكو يا زعم لحن
و عقب استلموا الهرير
شرم برم مشط شعرك شرم برم مشط شعرك و نسوي حركات يا زعم نمشط
و شرم برم ناد الاسعاف شرم برم ناد الاسعاف شرم برم نادأل اسعاف

و هرير واجد ما اتذكرة
عقب شرم برم بكس بكس شرم برم بكس بكس
شرم برم بكس ....بكس
و نضرب بوكس و خلاص




وا فشيلتاه
اخجل ان لعبت لعبه جذي

 

[أمواج]

تذكرون يوم كنا صغار فيه مسرحيات للجهال فن
لهدى حسين و سحر حسين

من جم اسبوع شغلت مسرحية عن ذيب ويا غنمات ثلاث الى بت خالتي الصغيرة و اندمجت وياها ​

 

[نجمة تشرين]

امم تذكرون برنامج قدييم كانوا يحطونه قبل

اغنيته :
سلامتك سلامتك نود لك سلامتك
لانك الانسان تعمر الاوطان
نود لك سلامتك ..نود لك سلامتك
تنينينا ههههه موسيقى يا زعم

 

[غصن شوك]

لفيت على على الصفحات كلهم

في قصص محرفة ترى


تذكرون أفتح يا سمسم ابوابك نحن الاطفال ؟
أحبه

واحب توم سوير و جوري و ليدي و بوبو و اشياء خيرات الله من ضمنها ماركو

 

[رَحِيــلْ ،]

هالأيام ما أدري وش فيي بس أنبش في الغبار...!!


انزين المهم، بذكر جم شي،
لفيت عالموضوع على السريع ما قريت كل شي بس شسمه ..

- قولي ربية.
* ربية
- امش محلية، أو ساعات أمش حلوة وذهبية ( يعني هي ودقاتها ههههه )

- قولي نص
* نص
- أبوش مشنص ( كانت تنبط جبدي ما أرضى على أبويي )


- قولي أربعانات
* أربعانات
- في بوزش أربع دبانات

^ يا دافع البلا


- قولي ماني
* ماني
- خطبش عماني، وطلقش يوم ثاني



فيه لعبة بعد للحين نلعبها ويّ الجهالو ساعات
فارة يا فارة
مش محتارة
سرعي ودخلي خيمتنا
سي سي سي سي
نو نو نو نو
هيا نقبض على قطتنا المسكينة
سمبوسة
محبوسة
فييي القفـــص..



وفيه لعبة بعد نلعبها أتذكر فيها ينقسمون الناس لفريقين
ويسحبون حبل أو شي، وكل واحد يسحب في اللي قدامه هههههه

ولعبة غير، ما أذكر بدايتها بس فيها يجندسون، واثنينه يتفقون واحد بيضرب أو يفلص >> تعذيب كانوا يجيبون الرّعب ليي
ويسألونه تالي يقومونه، منهو ضربك؟ أو منهو فلصك.. ويجاوب، وما يصححون ليه..
بعدين لين خلصوا الجهالو، هالاثنين يسحبون جاهل جاهل، يعني هو في الوسطة ويمرجحونه قدام ورا وهم يقولون : جنة، نار ، جنة ، نار...
إذا إجابته كانت صح يدزونه يفلتونه عند الجنة، وإذا غلط في جهة النّار ههههههه
وتالي اللي في الجنة يسوون ليه كرسي من الأيادي
يشبكون الاثنينه أياديهم على شكل × ويركبون الجاهل على أياديهم،
ويجود أكتافهم وبعدين يرفعونه ويناقزونه وهم يقولون : أبحلسوا أبحلسوا أبحلسوا ويمد لسانه يعيب على اللَ في النار !!!!


هاللعبة أحين نلعبها وي الجهال بس مو بكل تفاصيلها.. يعني بس جزئية الكرسي وما نعلمهم على آخر شي ، أو نغني ليهم شي فاني هههههه

وعلى طاري التمرجح، كان أبويي يشيلنا من أيادينا ورجايلنا ويسويي لينا مرجحانة..
كنت أستانس عجيييييب، وبعض النّاس كانوا يخافوون..


وبعد فيه وحدة ما كنت حافظتنها وللحين ، ههههه
بس فيها جديي:
أزهار في الرّبيع... أمطار في الشّتاء..
ما أدري غيوم في الشّتاء..

المهم يعني


والألعاب اللي فيها كفك بالإيد وصفقة وساعات الأصعب اللي فيها الأيادي تقابل بعض من فوق وتحت تالي حركة كفك وصفقة يعني 3 حركات .. هههه
أحين سويناها صفقتين ويصيرون 4 حركات يصير اللحن تن تن...

المهم، وحدة منهم كنت أحبها، كان يعجبني اللحن، وتعجبني الكلمات عفر ..

بدر وأنيس .. في الأوتوبيس
صاحَ بدرُ.. وَضَحَكَ أنيس
قرَّرَ البوليس.. بحبسِ أنيس
يومَ الجمعَة.. ويومَ الخميس
قالَ الجبن..مانه جبن.. لأنَّ الفأرَ يأكلنِي
قالَ الفأر.. مانه فأر.. لأنَّ القطَّ يلاحقني
قالَ القط.. مانه قِط.. لأنَّ الكلبَ يطاردني
قالَ الكلب.. مانه كلب.. لأنَّ العصا تضربني
قالَتِ العَصا.. ماني عصا.. لأنَّ النارَ تحرقني
قالتِ النار.. ماني نار.. لأنَّ الماءَ يُطفِئنِي
قالَ الماء.. مانه ماء.. لأنَّ الإنسانَ يشربنِي
قالَ الإنسان.. مانه إنسان.. لأنَّ إبليسَ يوسوسُ لي
قالَ إبليس.. مانه إبليس.. لأنَّ الله يُعذبنِي

هههه أستغفر الله..



وغيرها..
فيه نجار يبي يبني باب الدّار.. جم مفتاح يبني إبه باب الدّار .؟
( جنه جدي ما أذكر الجملة عدل بس فيها جديي ونحزر الرّقم، والليي يحزر يطلع ما يكون هو الصّياد هههههه )




​

 

[sanabsy 15]

- قولي ربية.
* ربية
- امش محلية، أو ساعات أمش حلوة وذهبية ( يعني هي ودقاتها ههههه )

مو أحسن من إلا يقول، أمك هندية له =)

حتى في الألعاب هالبحارنة ..​

 

[رَحِيــلْ ،]

مو أحسن من إلا يقول، أمك هندية له =)

حتى في الألعاب هالبحارنة ..​

اييي ترا كنّا نقولها ونسويها وأستحمق إذا قالوها ليي ههههه


بس نسيت أذكرها فوق
​

 

[Dr.Hakim]

فيه لعبة بعد للحين نلعبها ويّ الجهالو ساعات
فارة يا فارة
مش محتارة
سرعي ودخلي خيمتنا
سي سي سي سي
نو نو نو نو
هيا نقبض على قطتنا المسكينة
سمبوسة
محبوسة
فييي القفـــص..

عجيبة الغنية .. تتلحن بروحها بروحها

​

 

[أمواج]

هالإختراع كنت أستانس عليها وأحفظها .. كان هالبرنامج كل مرة عن مهنة .. بس الخلالو هذي خاصة

[video=youtube;Aj5csQG2T48]http://www.youtube.com/watch?v=Aj5csQG2T48[/video]

​

 

[sanabsy 15]

هالإختراع كنت أستانس عليها وأحفظها .. كان هالبرنامج كل مرة عن مهنة .. بس الخلالو هذي خاصة

[video=youtube;Aj5csQG2T48]http://www.youtube.com/watch?v=Aj5csQG2T48[/video]

الله ..

من وين مطلعة هالتحفةة​

 

[أمواج]

الله ..

من وين مطلعة هالتحفةة​

مرة دقت بخاطري أسترجع أيام أول .. قمت دورتها وحصلتها
السؤال الي رافعنها باليوتيوب من وين طايح عليها
واجد تحف في اليوتيوب تحصل

 

[مارد المصباح]

تتذكرون اذا واحد كان يمشي ونجي نقول له .. حركة بركة ستوب ! ولازم يوقف على حسب اخر وضعية ليه واحنا قايلين له ستوب ! وعاد مسكين يضل ساعة واقف وحيدا فريدا لا ناصر له ولا معين ،او يحصل له جم طراق وبوكس بس لازم ما يتحرك ويخرق قانون اللعبة
اوادم نظاميين نحب النظام

في لعبة ما اتذكر وش بدايتها بعد بس نكون صاكين ايادينا ببعض ونقول له افتح الصندوق "الا هو ايادينا المصكوكة" ويسوي روحه يفتحها عقب نقول له خد مقص .. ويسوي روحة اخد مقص من الصندوق .. قص خشمك .. رجع المقص .. خد وردة ... اشتمها .. واذا سوى روحه يشتم نقول له جداااب اصلا مافيك خشششم

 

[أمواج]

في لعبة ما اتذكر وش بدايتها بعد بس نكون صاكين ايادينا ببعض ونقول له افتح الصندوق "الا هو ايادينا المصكوكة" ويسوي روحه يفتحها عقب نقول له خد مقص .. ويسوي روحة اخد مقص من الصندوق .. قص خشمك .. رجع المقص .. خد وردة ... اشتمها .. واذا سوى روحه يشتم نقول له جداااب اصلا مافيك خشششم

تراث هاللعبة .. بس مفيدة .. يتعلم الطفل ان ينتبه لأفعاله و يفكر قبل لا ينفذ .. و تنمي جانب من الخيال للطفل

هذي ألحين أعلم الجهال بعمر سنتين و 3 سنين و روضه و مدرسة عليها عشان لا تنقرض
و أجيب ليهم أشياء متنوعة مرة يقصون شعرهم و مرة أذونهم ووو .. عشان يكتسبون الفائدة من اللعبة

 

[مارد المصباح]

تراث هاللعبة .. بس مفيدة .. يتعلم الطفل ان ينتبه لأفعاله و يفكر قبل لا ينفذ .. و تنمي جانب من الخيال للطفل

هذي ألحين أعلم الجهال بعمر سنتين و 3 سنين و روضه و مدرسة عليها عشان لا تنقرض
و أجيب ليهم أشياء متنوعة مرة يقصون شعرهم و مرة أذونهم ووو .. عشان يكتسبون الفائدة من اللعبة

بالفعل كنت افهي ساعات وانا العبها واذا انصاد فيها افكر شوي .. بوووو اما دا صدق عبقري شلون ما فكرت في هالشي ،تالي صرت مدقق حرف حرف :sly:

 

[رَحِيــلْ ،]

ذكرياااات..





​

 

[مارد المصباح]

ذكرياااات..





​

صورة ويش دي ؟

 

[رَحِيــلْ ،]

صورة ويش دي ؟

عفر مو واضحة



هذي
غبار..
​