فَضّفَضة جَامِعِية ..

[ايتن]

بكره الاحد راح نبدي عملي ودراسه الجد
للحين الحماس فيني ان شاء الله يتم لنهاية الكورس ​

 

[عصفوره ..]

كملت الاجازه بسرعه ما مدانا نتهنى

 

[ms.dalo0o3a]

لحد الان ما بديت ادرس شي احس توني ف البداية

الحمدلله الاسبوع مر بسرعة لان اول مرة اخذ يو تي اج وبصرااحة اررريح بواااايد

 

[Mrs.chic]

بالمناسبة
في قناة الامام الحسين ٢ برنامج "جامعتي"
يقدمه الشيخ عبد الرضا معاش
أظن راح يعرضونه يومياً الساعة تسع

 

[Dr.Hakim]

اليوم .. قلت الباص أركبه أركبه ..........................
جا الأول فَوّل و مشى
الثاني نفس الشي
الثالث؟ بعد نفس الشي
الرابع حصلت لي كرسي بالغفصة

#المهم طارت أول ربع ساعة من المحاضرة ​

 

[رحيل النورس]

الصراحة مو حالة مع باركات الجامعة افففف يعني الواحد شذنبه اذا عنده محاضرة متأخرة ​

 

[Ms.Angel]

للحين ضايعه بالاكاونت والايكون انتظر المعهد يبدأ عشان ادرس

وبالنسبة لسكشن الايكون
حضرت بس اول يوم
الله لا يراويكم الوضع المأساوي
السكشن مايكفي الطلبه فوق كل هذا قررت اروح قبل الوقت وجان اكتشف انهم صابغين الطوف والريحة قويه
ماقدرت اتحمل الريحة وطلعت

يعني جامعتنا المصونه معلش
قابلين نقعد فالحر ونتحمل دكاترة فاشلين
بس تخنقونه بعد !!!!!!!!!!!!!!!!!!

 

[M7MDOGRAPHY]

.. مسَاء الخَير ..

اليوم كان بسيط ممتع ، مفعم بالحيوية والضحك

أتمنى باقِ الأيام تكون وأكون جدي ​

 

[zahra h]

اليووم توني ببدي دراسه جديه
بما ان جدولي يو تي اج
فبخلي المراجعه في الام دبليوو


بصراحه طول العطله الجامعه ما صبغت السكاشن يوم داومنا خنقووووووونا
حرام عليكم
وبعدين الباركات !!
شعني وش اسوي اذا سكشني الساعه 9 واجي 9 اللا مافي بارك !!!! يعني اجي من 5 عشان احصل بارك

 

[ايتن]

امس نهلكت بمعنى الكلمة والحرف من صبح كان عندي بكليتنا تالي العلوم طبعاً رحت مشي تالي صاله وهم رحت مشي تالي بعد صاله عقب كان عندي في كليتنا رحت انتظر ماجه دكتور رحت مكتبه مقفل رحت ويه البنات مكتب العميد مادري شنو وسئلتها جان تقول اامحاضره في الاداب جان اتم اتحلطم بس مافي فايده من تحلطم شلت ااغارضي جري ع الاداب وطبعاً ع ما جفت سكشن دخلنا اله دكتور قال كلمتين عن مقرر وطلع قهرر عقب رديت رحت الاي تي بعد مشي كملت 4 كنت ميته اله شوي

اليوم مختلف كان عندي محاضره 9 ونص كملت بريك اله 2 ونص تخيلو طول هلفتره ما عندي شي عقب رحت سكشن في اوادم ما كنت افضل اكون وياهم بس يالله معلي


هدرت واجد
ان شاء الله بكره احلى

 

[Stillness]

مو حابة الاورنتيشن أبداً

و خصوصاً إني ماخذه الرايتنق في الثانوي الكتاب بالضبط هذا هو
بس في الطبعة الجديدة الكفر مغيرينه و من داخل ملون..

و إلي يبط الجبد إني مسوية زين في المادة هذي و درجاتي أوكي..
و مقدمة امتحان الإعفا عن التمهيدي بس مادري ليش خلوني فيه..

واجد أحس إن ظالمينا فيه.. و ياريت دكتورة عدلة

لكن ماعليه و عسى أن تكرهوا شيئاً و هو خير لكم
​

 

[رَحِيــلْ ،]

بالنّسبَة ليي ، للآن مرتاحَة في الجامعَة ..
حَتى لحد الآن اللي أعرفهم من قبل .. وَ من مثل الدُّفعَة وبالتخصص نفسه وَصلوا 6 " 2 منهم تَمهيدي "
العائِق الوَحيد اللي صاير ضدي (هذا إذا سميته عائق ) هُو مادَة الإنجليزي ..

دوامِي صاير يوم متأخر و يوم من الصبح ،

امم ، فَقَط حاليًا ..
​

 

[IT-Student]

أشوف ما زالت أزمة إزدحام كليتي الآداب و البزنز
شكلهم السيارات زايده صدق
لكن أهم شيء كليتنا ما فيها كل هذا الإزدحام >> P:'

 

[IT-Student]

اليوم .. قلت الباص أركبه أركبه ..........................
جا الأول فَوّل و مشى
الثاني نفس الشي
الثالث؟ بعد نفس الشي
الرابع حصلت لي كرسي بالغفصة

#المهم طارت أول ربع ساعة من المحاضرة ​

احسك كنت دايخ حدك في ذاك الوقت .. ههههههه

 

[mo7amedi]

أحد يعرف متى تبرز البطاقة الجامعية ؟

 

[IT-Student]

أحد يعرف متى تبرز البطاقة الجامعية ؟

حسب إلا اذكره من السنه إلا طافت : وزعوا البطاقات على الطلبه في الفصل الثاني

 

[رَحِيــلْ ،]

حسب إلا اذكره من السنه إلا طافت : وزعوا البطاقات على الطلبه في الفصل الثاني

هههههههههه ، عجل احنا السنة الجاية ( بما إن عددنا كبير يعني ) xD

 

[IT-Student]

هههههههههه ، عجل احنا السنة الجاية ( بما إن عددنا كبير يعني ) xD

ما أعتقد على العدد

و حسب أغلب الإعتقادات :

بأن مو كل الطلاب يواصلون في الجامعة و أغلبهم مسجلين بس جدي ، و البعض ينسحب من صعوبة الدراسه
فالجامعة تحارس هذه الفئة "المؤقته" تنسحب و بعدين تعترف بالباقين و تعطيهم البطاقات ...

و أهم الأسباب إلا تخليهم يسوون جدي :

- علشان لا يخسرون واجد فلوس على كل دفعه جديدة كما حدث في الدفعات القديمه :
يعني : بدل ما يخسرون قيمه البطايق على 5000 طالب في بداية السنه ، فتصير الخسارة على 50% فقط

- أحتمال علشان يميزون الطلبة الجدد عن باقي الطلبة و يعاملونهم معامله خاصه (ما أعتقد يفرق )

و غيرها من أمور و أسباب أخرى تمشي عليها إدارة الجامعة ...

 

[نجمة تشرين]

اذا هو مكان فضفضة جامعيه فيالله خلنا نطلع ما ضاقت به صدورنا هالكورس
و جان زين احد يشفوفه من الجهات المختصه مع انهم يدرون بان كلامي لا بيزيد و لا بينقص شي

افشل قرار اتخذته كلية الحقوق هو ان شالت المكتبة القانونيه و خلتها مع المركزيه في الاداب عشان تخلي مكانها مكاتب للدكاترة

يا جماعة ترى تورطنا واجد ورانا بحث تخرج
و مواد يبغى ليها بحوث او تحليل احكام
من اللي بيقدر يطق درب كل دقيقتين للاداب عشان يطالع في المراجع و الكتب
مو حالة هذي
تورطنا من الزين من هالسالفه
و جان زين لينا ركن مخصص و ينعرف
الا المكان مبهدل بهدله
اوكي نقلتونها
لا تخلون كتبنا وياهم خلونا في ركن بروحنا
جانا عوار راس و احنا ندور و جان زين حصلنا شي
هذا القهر

 

[أمواج]

بكرة أقدم أول اختبار في هذا الكورس
اذا استثنيت كويز البيت من مصطلح اختبار

للحين صايرة من الصامدين
ان شاء الله ما اكون من المصدومين

بالتوفيق للجميع