اسأل مُجرب.. وَلا تسأل طبيب !

[UOB-DESIGNER]

إنت مو اقل من غيرك ولا تقارن نفسك بغيرك

هذا مرة في هذا الفصل وفي مادة الملتميديا تحديداً ندرس فيها برنامج الإلستريتر ..كان مطلوب علينا نسوي سايمنت simple logo مجرد كلمة تعكس معناتها كنت متخوف من امرين الامر الأول الدرجة والأمر الثاني إن مستوى logo الا سويته اقل من اقراني الطلبة ...بس لما عرضته قدام السكشن وبقية الطلبة قاموا يعرضون logo حسيت إن مستوايي مو اقل من مستواهم بلإمكان اسوي مثلهم وافضل منهم​

 

[حلم أنثى]

((لاتفقد الامل ::: حينما تحتاج فقط اسجد سجدة طويلة بث حزنك ودموعك الى الله ))
((اهل البيت عليهم السلام هم الوسيلة التي لن يردونك ابدا))

جربت في حياتي حتى امور بسيطة:: توكلت فيها على رب العالمين وتوسلت باهل البيت عليهم السلام
وماقصروا
وماخيبوني
ولاردوني
الحمدلله رب العالمين


:tears::tears::tears:سلام الله عليهم من تجارب ناس عندهم مشاكل كبيرة واننحلت بفضل الله وبشفاعة اهل البيت ​

 

[قمَر]

لي عودة ،​

 

[♥ Smile]

لي عودة ،

​

 

[قمَر]

عُدت

طبعًا القصة اللي في بالي وكنت أبي أقولها عن الجامعة
أني إنسانة دشيت الجامعة مو حبًا في الجامعة والدراسة أبدًا
وأساسًا ما كنت أفكر أدش جامعة بالأصل
ولكن أقنعوني بعد إصرار وإلحاح إني أسجل
وسجلت، وحطيت الرغبات جذي على المزاج "مادري بالضبط شنو طبيعة التخصص"
وانقبلت في رغبتي الثالثة.. والحمد لله إني ما انقبلت في الرغبة الأولى
ومن هالشي تعلمت عدّة أشياء مهمة
وتغيّرت رؤيتي بشكل كبير
وصرت أحب الجامعة
وأدرس لأني أبي أدرس

أول شي: الجامعة مو مثل المدرسة
يعني ما ينفع إنك تقول بدرس قبل الإمتحان بليلة
لازم تدرس أول بأول، ولازم تحرص على إنك تكون فاهم كل شي
والمراجعة للإمتحان تكون مجرد استذكار للي درسته

ثاني شي: الانتباه وقت المحاضرة شي مهم
والحضور المستمر ينفعك إنت شخصيًا قبل لا تفكر في مسألة الـWF
يعني لا تقول دكتور مو زين وحضوري من عدمه
هالدكتور السيئ ممكن يقول معلومة تفيدك
ويمكن حتى لو كنت تحضر لسنر لدكتور ثاني ما تحصل هالإفادة
يعني لا تستصغر الدكتور، هو دكتورك يعني إنت تحتاجه

الشي الثالث: الاعتماد على النفس شي ضروري جدًا في الحياة الجامعية
يعني مثلًا تقول دكتور سيئ، ومادة صعبة
خلاص أنا بحط إيدي على خدي وبنتظر الـF في كشف الدرجات
إنزين ليش ما تحاول؟؟
دوّر لك نوتات من طلاب ثانيين، أو لخص لنفسك من الكتاب
أبحث في النت يمكن تحصل شي يفيدك
مو ضروري تتوفر لك هالأشياء لكن على الأقل أكو اسمها إنك حاولت

رابع شي: لا تيأس أبدًا
الجامعة فيها واااااااجد صعوبات
ممكن تصادفك ظروف تخليك تكره الدراسة
مثلًا دكتور أخلاقه سيئة
أو دكتور ما يشرح عدل
أو زملاء غير متعاونين
أو غيره وغيره من المشاكل المُعتادة
لا تعتبر هالأشياء عثرات قدامك أبدًا
حطها ورى ظهرك واستمر

خامس شي: تعلم تتحرك على نفسك
صادك ظرف واضطريت تغيب، كلم دكتورك واشرح ليه ظرفك
أسأل عن أي شي أنت مو فاهمنه
حاول تبني علاقات طيبة وي زملائك
ساعدهم عشان لو احتجت مساعدة يساعدونك

سادس شي: لا تصير أناني!
مال أول الجهالو اللي ما أبي أساعد عشان لا يصيرون أحسن مني
الجامعة تحتاج روح متعاونة
وهالشي بيكون تأثيره في ذاتك قبل كل شي
يعني حتى لو ما ساعدوك خلك أحسن منهم
ولا تنتظر المساعدة من أحد
حاول تكون مكتفي ذاتيًا عشان ما تتضطر تطلب من أحد
وبنفس الوقت خل إيدك ممدودة دايمًا لأي أحد يحتاج مساعدة
وأجر هالشي بتحصله في الدنيا لأنك بتستفيد من مساعدتهم من ناحية دراستك
وفي الآخرة لأن ليك الأجر والثواب

سابع شي: لا تغتر بروحك
يعني لو مثلًا صرت في تخصص ما يناسبك
عادي تحوّل تخصص ترى ما فيها شي أبدًا
مو عيب ولا حرام
أهم شي إنت في النهاية تكون في مكان يناسبك
وتقدر تطلع فيه كل طاقاتك الإبداعية
ولا تقول بتروح عليي سنين
أني شخصيًا حولت عقب دراسة 3 سنين
ومو ندمانة أبدًا لأني أحس إني الحين صرت في المكان الصح

ثامن شي: لا تخلي دراستك مجرد حبر على ورق
تعايش وي دراستك، وحب اللي قاعد تدرسه
مو تحسس روحك إنك قاعد تدرس غصب عنك

تاسع شي: خل هدفك من الدراسة أرقى من إنك تنتظر شهادة ثم وظيفة
يعني مو تفكر أنا أدرس دين لأنه شي سهل وبعدين بصير استاذ دين
أو أنا أدرس بزنس لأن سوق العمل واسع في هذا المجال
وغيره وغيره
لأن الأرزاق بإيد الله
المهم إنت تجتهد في الشي اللي أنت قاعد تدرسه وتبدع فيه
وتكون تدرسه عن رغبة بعد
يعني لو أنت مثلًا درست شي نهايته مجال التدريس
شلون بتوصل للطلبة أفكار أنت مو حابّنها ولا مقتنع فيها؟؟؟

عاشر وآخر شي: خلك واثق من نفسك دايمًا
حتى لو كسرك اليأس في يوم من الأيام
بهذي الثقة بتقدر تقوم من جديد وما بتتحطم
"ليس الفخر ألا نسقط، إنما الفخر أن ننهض من بعد السقوط"

وبس سلامتكم
أعتذر على الإطالة
الوصايا العشر ​

 

[♥ Smile]

لا يووقف

لاااااااا يووووقفففف ..


بعد بعد


باجر بدش ابي الموضوع صار 6 صفحات

عُلم ؟
​

 

[روؤحي فاطمية]

مو من فترة طويلة مريت بأزمة نفسيه مادري وش اسميها ، اكتئاب جنون مادري ! !
كله اصيح ومن غير سبب ومن اصير بروحي كله افكر في الماضي واسرح في خيالي وكلله متضايقه وحزينه ومغربله اللي حولي ! ينعكس جوي عليهم ! واتضايق اكثر ان اني قاعده اضايقهم !!
باختصار كنت ( سلبية لابعد حد ) ومادري وش اسوي في حالي ،، كنت ابي احل موضوعي بس ماكان عندي دافع ! واكتئب اكثر ان مافي احد اقدر الجأ اليه !! اني من النوع الكتوم ، صدق اهدر واجد بس مو اللي فداخلي ! ما اقول اللي احسه ولا اشكي ! اخاف ! كان يتعبني الموضوع ..

+1
حالتش مثل حالتي .. ، قد يكون حالتش اسوء أو العكس ..​

 

[روؤحي فاطمية]

لا يووقف

لاااااااا يووووقفففف ..


بعد بعد


باجر بدش ابي الموضوع صار 6 صفحات

عُلم ؟

لا ، ما عُلم ... كتبي تجاربش له ..

 

[UOB-DESIGNER]

مو كل شيء يقولونه ليك الناس تسمعه واصبر على الشي الا تحبه

اول ما دخلت تخصص الإعلام اهلي نصحوني بعلاقات عامة
بس لما قمت ادرس مقررات الملتميديا ترنحت بين الإثنين ..
وقبل ما يبدأ الفصل دا سألت واحد اسمه (أ)

كلمني عنها وقال ليي

تطلعك بيرفكت.. من ناحية التعامل اوكيه.. لكن محد يسلم من درجاتها

قلت باخد عندها حتى لو الدرجة C ..دي الدكتورة اخذت وياها مادتين الكورس هذا ... ومع مرور الوقت قلت خلاص بختار ملتميديا ...

الحين خلني اسرد ليكم بعض المواقف مع عدة اشخاص وليكن اسمائهم (ب) (ج) بلإضافة (أ)

(أ)
كان يقول ليي الدكتورة بتقصفك قصاف (من ناحية الدروس) ...ومرة كنا نتكلم عن دكتورة في نظر الطلبة مجنونة ..فقال ليي في نهاية كلامه وانت وياك في ها الفصل ثلاث مصايب يعني الدكتورة مصيبتين لكونها تدرسني مادتين وقبل المنتصف بيومين قلت ليه للحين ما شفت القصف الا تقول عنه قال ليي اصبر لا تستعجل
(ب)
كنت امشي وياه مع (أ) قمت اتكلم وياهم عنها ولما (ب) عرف إني ماخد وياها في مادتين قال ليي ابشر بالتوأم يقصد (C) انا ماخد وياها 150 حطتها ليي (C) عندها عادي تحط في 150 (D)

(ج)
كنت خبرته سابقاً إني باخد وياه مادة مع الدكتورة ..و اثناء هذا الفصل ...سألني قال ليي ويش بتختار تخصص ؟ قلت ليه ملتميديا قال ليي هذا اول كورس تاخد عندها قلت وياه اي مادتين ..قال ليي ما عليه نهاية الكورس إذا سألتك ويش بتتخصص قول ليي ...وبعد المنتصف بإسبوع التقيت به بموقف عابر قلت ليه خلاص باخد ملتميديا ..قال ليي فيك شدتها ؟ قلت ليه انا للحين ما شفت الكلام الا انتون قايلين عنه قال ليي كم حطت ليك قبل ؟ قلت ليه هذا اول كورس وياها ومادتين ..قال ليي ما عليه بعدين قول ليي كم حطت ليك

الحين الا يسمع كلامهم يحس إنه راح يندم ...بس انا للحين ما حسيت بالندم ..واثناء امتحان المنتصف ما سويت في العملي زين ..طلعت من الإمتحان بنفسية سيئة واتصلت بـ(أ) ورجع ليي الحياة ورفع معنوياتي و الحين انا خلاص قررت اختار ملتميديا والكورس الجاي بعيد 4 مواد عشان ارفع معدلي واختار ملتميديا

الرسالة إلا اريد اوصلها من هذا الكلام...إن مو كل شي يقولونه ليك الناس تسمعه لإنك قد تخسر الشي الا تحبه وحزتها ممكن تندم مستقبلاً لإنك سمعتهم وما سمعت عقلك وقلبك هذا من جهة
من جهة ثانية حتى لو واجهت صعوبة في الشي الا تحبه اصبر لإن إذا ما عندك استعداد لمواجهة الصعوبات الا تشوفها في طريقك راح تخسر الشي إلا تحبه
مو بمجرد تتعثر بحجرة خلاص تستسلم ... إنت توك في بداية الطريق ...فإذا ما كان عندك استعداد لتحمل الصعوبات ومواجهة العقبات الا قدامك راح تخسر الشي الا تحبه فلازم يكون عندك صبر على تحقيق الشي الا تريده ..ما في شي يجيك بارز ومودائما الهدف الا تسعى لتحقيقه يكون طريقه ناعم قد تواجه شوك ..حجارة ...

إن شاء الله يكون كلامي مفهوم ​

 

[رَحِيــلْ ،]

الرسالة إلا اريد اوصلها من هذا الكلام...إن مو كل شي يقولونه ليك الناس تسمعه لإنك قد تخسر الشي الا تحبه وحزتها ممكن تندم مستقبلاً لإنك سمعتهم وما سمعت عقلك وقلبك هذا من جهة
من جهة ثانية حتى لو واجهت صعوبة في الشي الا تحبه اصبر لإن إذا ما عندك استعداد لمواجهة الصعوبات الا تشوفها في طريقك راح تخسر الشي إلا تحبه
مو بمجرد تتعثر بحجرة خلاص تستسلم ... إنت توك في بداية الطريق ...فإذا ما كان عندك استعداد لتحمل الصعوبات ومواجهة العقبات الا قدامك راح تخسر الشي الا تحبه فلازم يكون عندك صبر على تحقيق الشي الا تريده ..ما في شي يجيك بارز ومودائما الهدف الا تسعى لتحقيقه يكون طريقه ناعم قد تواجه شوك ..حجارة ...

+1

أحيانًا البعض ينصح ، ولكن النصيحة لا تكون أهلًا للأخذ بها !
أغلب الأمور تحتاج الرأي الشخصي والقرار الفردي .. حتى لو سمعت من فلان وعلان لكن الاختيار للشخص نفسه ..

وبالنسبة للعثرات صحييح ، أختصر بالتأييد فيما قُلت وأضيف المثل : ليس الفاشلُ من يسقط مرة ، إنما الذي لا يُحاول الوقوف


​

 

[رَحِيــلْ ،]

بذكر شي تقريبًا مُشابه ..

المهم ، بداية الكورس هذا لمّا جفت جدولي اتضجرت وضاق خلقي وما أدري ويش
طبعًا تعرفون جداول الجامعة اللي تخليها أول كورس شلون معظمها سيئة ويضطر الواحد للتغيير ..
اكتشفت هذيك الحزة بالأخذ على رأي أغلبية الطلبة أن دكتورة العرب ودكتور الانج اللي حاطينهم اثنينهم سيئين ، يعني لا شرح ولا درجات ..
إضافةً للحاسوب اللي كان بدون اسم ، يمكن ما كان إلا دكتور الدين اللي أوكي ..

وطبعًا ما قدرت أغير في الجدول ، ما لحقت شي وغيرت المقاعد ، فرضيت بالأمر الواقع واتوكلت ..
وبدت السنة ، وأني حاطة في بالي هالأفكار ! ، وقلت بحاول آخذ الدرجات من مجهودي وما بستسلم
الحاسوب طبعًا انتهى أمره وطلعت الدكتورة أوكي .. أما الدين فغيروا دكتوري لدكتور آخر بس بعد زين ..

فكلامي أغلبه على مادتي الانج والعرب
فكنت أستمتع بالمحاضرات ، خصوصًا وإنه العربي مادتي المفضلة وتخصصي ده ، أما الانج كان كعادتي من أيام ثانوي أعتبره تحدي بالنسبة ليي
بس كنت في الوقت نفسه أتحلطم في خاطري على هالدكتورين ، وكنت أنتقد بعض سلبياتهم مع ربعي ، وكنت أبالغ بصراحة ، وكل هذا لأني حطيت في بالي كل هالأفكار الغلط وما سمحت لنفسي إني أطالعهم بنظرتي الخاصة المنفردة .

الانج ومشى حاله مع مرور الوقت ، ويعني عادية معاملة الدكتور ، يعني هو صدق مو الأفضل ولكنه مو سيئ ! وحتى الدرجات اللي خلاها ليي في المنتصف ما نقصني ولا زيدني .. يعني هو يمكن شديد بس بعد مو للحد اللي يخلي يظلمك بدرجة كبيرة مع الدرجات ..

أما العرب، فكنت بعض الأيام أتعاطف وياها ومرة ثانية أرد أغير ، يعني بين وبين ، بس.. في النهاية قلت خلاص أني ما بحكم على هالمواقف على الدكتورة ، يمكن غلطت يمكن أحيانًا تكون جافة يمكن فعلًا عندها بعض العنصرية ويمكن تعلق وتمزح وتطنز ووو ولكن لحظة!!.. ما يصير هالإنسانة خالية من الإيجابيات ! ما يصير ما أطالع منها ولا أدقق إلا على السلبيات .. وفعلًا اكتشفت الجانب الأبيض منها ، وموقفي أقرب ما يكون دفاعي عنها ، معن وحدة من ربعي اشتكت على موقف صدر منها ، وبصراحة " أشوه " دشيت متأخرة ولا سمعت ولا جفت ..

بالمختصر
- لا تطالعون الأشياء كلها من جانب واحد ، مثل الأرض.. كروية وليها جهتين ، ما فيه إنسان كامل ..
- حاولوا تنصفون الدكاترة ، ولو كانوا سيئين بس أثناء كتابة الأراء " لحد يبالغ " ، اكتب الصراحة وبس ..
يعني أحين هم كتبوا وحسسوني وحسسوا غيري بعد إنه هالدكاترة ما ينطاقون في المعاملة كلش ولدرجة إنه لازم نغيرهم أو لازم ننسحب أوأو ....
وما أدري شنو واحنا جفنا بعدين أشياء غير ( أتكلم عني وعن حوالي 5 طالبات فأكثر بشوي )..

وباقي الكلام مثل خلاصة غريب طوس ..

بس معذرةً على الإطالة




​

 

[♥ Smile]

سلامتكم

بس نمسح الارضيه صار كلها غبااار


Up
up
up
​

 

[رَحِيــلْ ،]

سلامتكم

بس نمسح الارضيه صار كلها غبااار


Up
up
up

الله يِسَلّمش..

ما فيه أَمَل، شَكْلَه خلّصت التَجارب ههه

خيو ما تفكرين تحطِينْ تجربَة؟!
​

 

[♥ Smile]

الله يِسَلّمش..

ما فيه أَمَل، شَكْلَه خلّصت التَجارب ههه

خيو ما تفكرين تحطِينْ تجربَة؟!
​

المشكله ماخذه وعد على نفسي ان ماتحلطم

مادري هل هشي يعتبر مخالفه للمعاهده

 

[رَحِيــلْ ،]

المشكله ماخذه وعد على نفسي ان ماتحلطم

مادري هل هشي يعتبر مخالفه للمعاهده

هَذي ما تنقض المخالفَة..
الحديث عَنْ تجربَة شخصية غير عَن التحلطم
^ على ما أجوف يعني
​

 

[رَحِيــلْ ،]

تجربة صغيرَة بس جه منها اكتشاف لطيف..

خلال الأيام اللي طافت.. كنت قاعدَة أشخل العيش
وطفر الماي على إيدي "ذراعي بالتحديد" وصادني حرق
كنت أقول لأختي: لو فيه عسل حطيت عليه، يقولون إن مفيد للحروق يخففها بجرب أحط دبس ، لأن اثنينهم فيهم سكّر واجد .
بالفعل حطيت ليي، في البداية من أول ما حطيته ما حسيت بنتيجة، بس صار إن بعدين نمت ساعتين أو أزيد أقل، وقعدت وجفت إنَّ الوضع أفضَل حتّى ما ليه أثر


الزبدة: الدبس مفيد لتخفيف الحروق..
بس سالفة إن السبب فيه سكر لو لا ما أدري
​

 

[yagmur]

كانو يقولون لي في يوم من الأيام ان اللي يفشل هو انسان فاشل ,
مع تجارب الحياة و المرور بهده التجربة أكتشفت أن الفشل هو سبب النجاح ... =) و الفشل بداية جديدة و نجاح كبير للإنسان .. يتعلم منه و يطور نفسه .

مو كل شيء ينقال صح - في ناس يمرون بتجارب فاشلة و يستسلمون بس مو معناتة ان الفشل نهاية الدنيا ...
الواحد لازم يطيح و ينكسر و ينخذل في حياته عشان يتعمل يوقف على رجولة بنفسه , يعتمد على نفسه , يثق بقدراته .

 

[المهندس عبدالله]

المجرب يفهم الحالة اله هو مر فيها..
ولكن مشكلته انه ممكن يلتبس عليه الأمر لما اجي لحالات مشابهة.. في هذي الحالة المجرب بيعطيك نظرة خاطئة...
الطبيب هو شخص مختص وعنده نظرة عن كل الأمراض والأعرض.. والأفضل ترجع ليه عشان يشخص ليك المرض.. الطبيب عنده المهارة حق يعالج الحالات الخاصة.. المجرب ما راح يقدر يعطيك شي مفيد..

في النهاية اله صاير عدنه هو حالات الإهمال والنصب وضعف من بعض الأطباء خله هل العبارات الفضفاضة تنتشر على أنها صحيحة..

** هل شي ينطبق على كل الأعمال مو بس الطب..

 

[رَحِيــلْ ،]

المجرب يفهم الحالة اله هو مر فيها..
ولكن مشكلته انه ممكن يلتبس عليه الأمر لما اجي لحالات مشابهة.. في هذي الحالة المجرب بيعطيك نظرة خاطئة...
الطبيب هو شخص مختص وعنده نظرة عن كل الأمراض والأعرض.. والأفضل ترجع ليه عشان يشخص ليك المرض.. الطبيب عنده المهارة حق يعالج الحالات الخاصة.. المجرب ما راح يقدر يعطيك شي مفيد..

في النهاية اله صاير عدنه هو حالات الإهمال والنصب وضعف من بعض الأطباء خله هل العبارات الفضفاضة تنتشر على أنها صحيحة..

** هل شي ينطبق على كل الأعمال مو بس الطب..

طبعًا.. مو كل حالة تنقاس على الثانية
بس ما فيها شي لو استفدنا من التجارب، مو شرط تسوي نفس الشي بالضبط، يمكن بالفعل مثل الحالة وتستفيد، أو ما تستفيد، ويمكن تتجنب تسوي الأشياء الخطأ اللي صارت، يمكن حتّى مع تكرار التجربة مع عدّة أشخاص تصير نمط، من اسمها تجربة وليست حقيقة أو قانون لجميع الأفراد.

 

[المهندس عبدالله]

طبعًا.. مو كل حالة تنقاس على الثانية
بس ما فيها شي لو استفدنا من التجارب، مو شرط تسوي نفس الشي بالضبط، يمكن بالفعل مثل الحالة وتستفيد، أو ما تستفيد، ويمكن تتجنب تسوي الأشياء الخطأ اللي صارت، يمكن حتّى مع تكرار التجربة مع عدّة أشخاص تصير نمط، من اسمها تجربة وليست حقيقة أو قانون لجميع الأفراد.

وممكن توديك في ساين داهية ..
القصد هو انه في الأشياء الحساسة واله ما تحتمل الغلط المجرب ممكن يخليك تخسر للأبد ...