لا تشتري الكتاب. لا تفتح الكتاب. الكتاب بلا فائدة. (مناقشة)

[.:مغترب:.]

السلام عليكم ورحمة الله وبركاته


بسم الله الرحمن الرحيم



عندي اليكم موضوع يؤرق كل طالب جديد على الدراسة الجامعية، وخصوصاً في الفروع العلمية التجريبية، مثل الهندسة والفيزياء والكيمياء وغيرها.

انتا كطالب أوّل فصل عنده دراسة جدية. يجي لك واحد أكبر منك بسنة يقولك لا تاخذ الكتاب لا تشتريه، خسارة فلوس، خذ نوتات بس.

أنا في قرارة نفسي: معقولة؟!. لا، مو واحد بس يحاول يقنعك! كل من تقابله يقولك لا تفتح لا تشتري ولا حتى تطبع، إنتا أصلاً ما بتفتحه من الأساس ولا بتفهم منه شي.

"""""


معقولة مامنه فايدة؟ كتاب كل فصل ينزلون نسخة معدلة اليه! ماحد يفتحه؟
كتاب 1000 صفحة أو 500 ماحد يفتحه؟ ليش كل هالقدر من المعلومات ما منها فايده؟
احنا صدق ما بنفهم منه شي؟ والا الموضوع يختلف من تخصص لآخر؟
هل صحيح اننا ما نحتاج الكتاب؟ أو هل الموضوع يقتصر على جامعتنا فقط؟
هل صدق مامنه فايده؟



...... هل الكتب الجامعية من وجهة نظركم مهمة لفهم المادة؟ أم أنها حقاً بلا فائدة؟ -سؤال طالب السنة الأولى لطالب السنة السابقة-




-- أترك لحضراتكم المناقشة والإدلاء بأوجه النظر المختلفة --



شكراً لمشاركتكم.​

 

[♥ Smile]

عمرك شفت كتاب مامنه فايده ؟ الطلاب يبووون الـ easy way مايبون حشو كلام ، يبون يقرءون صفحه بالخط الكبير الي المسافه بين السطر والسطر الثاني شارع ابو سيدين وزبدة الزبدة مايبون التفاصيل والخط الصغير والاسطر القريبه من بعض والاسلوب يختلف بين الانجلينزيه البسيطه في النوتات والانجلينزي الثقيله في الكتب لا تستغني عن الكتاب انزين النووت من الكتااب ليش اروح للفرع واخلي الاصل ؟ 4 فصول في الجامعه وكل مقرر درسته عندي كتابه وكل الدراسه من الكتااااب ولله الحمد اموري ماشيه تمام

 

[زيزوو]

بالنسبة لي مو كل كتاب اشتريته استفدت منه
خصوصا للمواد اللي فيها فهم .. هني الطالب يحتاج مثال مثالين و يفهم زبدة الموضوع كلها

فيه بعض النوتات تكون شاملة و أسهل من ناحية الفهم و توفر وقت أنت تحتاجه لدراسة مواد ثانية
يعني مثلا 5 موآد و كل كتاب 500 صفحة مثل ما قلت متى الواحد يمديه يكملهم ؟ و غير عنده كويزات و بروجكتات

و أحس بعض الكتب اسلوبها يضيع و بدل ما تستفيد منها يتشتت تفكيرك و تختلط عندك الآمور
يعني لو النوت كآن يجنبني هالشي أكيد بستغني عن الكتاب

 

[_ALI_]

بالمختصر المفيد : يعتمد من مادة لأخرى ، و من دكتور إلى آخر ، و يعتمد من طالب لآخر
- فعلى سبيل المثال :
إذا كان شرح الدكتور ممتاز ، و نتوتات و أمتحانات متوافرة ، و محتوى المادة سهل .. فليش آخذ الكتاب وأضيع وقتي في تصفحه وقراءة التفاصيل الممله ؟
لكن فيه طالب يدرس نفس المادة و لكن يدرس مع دكتور سيء ، ما عنده إمتحانات سابقة ولا نتوتات أو ملخصات ، فأكيد بكون الكتاب حلّه الوحيد للنجاح

وبالتوفيق جميعًا إن شاء الله

 

[Noise-X]

الكتاب هو المرجع الأول والأخير في المادة ..
وبعض المواد تتطلبه بشل أساسي ( الدين ، التاريخ ..إلخ )
بس في الجامعة أغلب المواد اللي دَرَستها ما ناخذ الكتاب كامل في المقرر الواحد، بالإضافة أن الدكتور يركز على النقاط اللي يجي منها الإمتحان، و بعض الطلبة يركزون على الدراسة للإمتحان فباقي المعلومات المذكورة في الكتاب ما ليها أهمية بالنسبة ليهم
فيكون شرح الدكتور / النوتات / سلايدات افضل من الكتاب

سالفة الكتاب تعتمد على الطالب بشكل أساسي ..
- إذا تبي توسع في المادة عندك الكتاب
- إذا تبي نجاح في المادة عندك نوتات

 

[Narcissist]

عن نفسي دايما ارجع للكتب

برايي ما عليك منهم سوا الي انت مقتنع فيه

تحس انك بتفتح الكتاب و بتدرس منه اشتره ،

ادا تحس انك بتقط فلوسك على الفاضي لا تشتريه

 

[أمواج]

مستوى اهمية الكتاب عندي يعتمد عالمادة و طبيعتها و مصادرها فمثلاً

- مواد الحفظ الي بالعربي نحتاج فيها لكتب طبعاً لأن اساساً الدكاترة ما يعطون نوتات كافيه فيه مثل الهستوري و الدين

- العربي و الانج و كافة اللغات نحتاج الكتاب لأن الدكاترة أساساً يعتمدون بشرحهم عليه

- مواد الحفظ الي بالانج أفضِّل ملخصات و سلايدات على الكتب .. لأن بضيع وقتي و أني بس أترجم و أحاول ألخص .. أرجع ليهم بس اذا افتقرت الى الملخصات

- مواد الفهم مثل الفيز و الكيم و الماث و البرمجة .. الخ .. الكتاب بالنسبة لي مصدر للتمارين و اذا شي ما فهمته أو نقصني نوت أرجع ليه

 

[رَحِيــلْ ،]

اممم ، مثل ما قالوا يعتمد على التخصص نفسه والطالب نفسه واللي يجوفه إنه يحتاجه...

مثلًا احنا العربي تخصصنا ما عندنا كتب معتمدة مطبوعة من الجامعة ( أظن ما فيه إلا للعربي المشترك 110 و 210 + جابوا لينا كتاب شرح ابن عقيل للنحو ) ، إنما نشتري لينا كتب من بره إذا المادة تتطلبت فعلًا ..
أغلب دكاترتنه نوتات يعطون أو ملازم ، والكتب نحتاجها للبحوث أزيد مقارنةً باللي نحتاجها للشرح والدراسة ..
​

 

[Ruthless]

الكتاب مهم واحياناً فيه اشياء الدكتور ما يغطيها ولكن مطلوب منا نفهمها لكن بالنسبة لي في المواد اللي لها علاقة بالمعادلات والرياضيات ما اقدر افهم من الكتاب، الدكتور هو مصدر المعلومة الأول بالنسبة لي.
باختصار أحب اقرأ كتاب وأنا فاهم اللي اقرأه.

 

[موج هادي]

ما شاء الله كفو ووفو ..
اني من الطلبة الي افضل ادرس من كتاب .. احسه اشمل ..

لكـن فيه مواد اذا كانت تندرس من نوت او سلايد بحيث المحتوى الي موجوود في النوت راح يكفي ويغطي .. ف هذا الوقت ما ألجأ للكتاب ..

ومثل ما ذكرو يعتمد على الدكتور احيانا وعلى طبيعه المادة ..

 

[Mrs.chic]

و عليكم السلام و رحمة الله و بركاته

موضوع مهم و يستحق النقاش فعلاً

حاجة الطالب إلى الكتاب تختلف من تخصص لتخصص و من مادة لمادة
أني كنت مثلك أول كورس عبالي لازم أشـتري الكتب لكل المواد
و اشتريت خمس كتب كلفوني تقريباً 100 دينار بدون مبالغة - كان المبلغ فوق الـ90 دينار-
استفدت من ثلاث كتب بس . . واحد كنت أحتاجه فقط للتمارين و لو أخذت لي مطبوع كان بكون أرخص لي
و واحد ما فتحته خير شر أبداً أبداً و ليومك هذا مقطوط في الكبت

فالأفضل لك إنك تسأل الطلبة الأقدم الشطّار الا their target is A
مو طالب يبي يدرس من ملخص بسيط و همه بس ينجح في المادة و يطوفها
و شوف شنو يقولون لك . . أني قمت أسوي جي
ممكن ينصحونك تسجل المادة عند دكتور تعتمد على نوتاته و ما تحتاج لكتاب
أو تاخذ نوتات شاملة لدكتور معين
أو إذا كان راح يكون استخدامك للكتاب بسيط جداً فالأفضل تشتري لك مطبوع
لأن الكتب غالباً غالية كله على 20 دينار و انت يمكن تفتحها مرتين ثلاث طول الكورس و مصيرها تنقط في الكبت
إلا إذا ناوي تبيعها . . و يمكن بعد يغيرون الايدشن و يطيح في حظك هه
لكن إذا كنت تبي يصير عندك refrence ترجع له أو تطّلع أكثر على المادة فَـ اشتر الكتاب

موفقين

 

[Prince.11]

مثل ما ذكروا الاخوان في الردود السابقة ..
الكتاب هو المرجع الاول والاخير للطالب في كل الظروف ..

لا يمكن للطالب ان يستغني على الكتاب ..
ومن غير المعقول الاستغناء عنه اساساً في أي حال من الاحوال ..

ولكن نأتي لنناقش تلك المناهج التي تحتاج الى كتب ..
ربما الكتاب يكون من 500 صفحة وفيه على سبيل المثال 10 مواضيع ..

هذ الـ10 مواضيع انتَ تقدر تفهمها في 10 اوراق ..
فأكيد الطلاب يبحثون عن الاسهل ويبحثون على الملزمات والنوتات والخ ..

على سبيل المثال كتاب اسلاميات 101 (المشترك) ..
كتاب من الشكل يبين ثقيل وغير مهضوم بعض الشيء والبعض يبتعد عنه ..

ولكن مواضيع المقرر تقدر تلخصهم في نقاط معدودة ..
فاغلب الطلاب يتابع بالملزمات او النوتات الي تختصر له الوقت ويستفيد بشكل اكبر ..

في الوقت نفسه في بعض الطلاب لا يفهمون بشكل سريع ..
أيّ ان لا يستعبون الدرس الا على هيئة نقاط مثلاً او اسئلة فلذلك يبتعدون عن الكتب ..

هذا احد الامثلة، ولكن لو ننتظر للجهة الثانية راح نلاقي ..
في بعض المقررات لا بد من احضار الكتاب ولا غنى عنه في المحاضرات والمذاكرة ..

وفي هذه الحالة كذلك نرى بعض الطلاب يحتاج الى الملزمات وغيره ..
بالاضافة الى الاستعانة بالكتاب، لأنه باختصار اصبح الطالب يبحث عن الشيء السهل والذي يوفر له الوقت ..

وجهة نظر متواضعهـ..!!​

 

[Ms.Angel]

من وجهة نظري
ان الكتاب مهم في اغلب مواد الحفظ حتى لو كانت بالانج
او مادخلت مواد تخصص
نصحوني ادرس اول مقرر منيجمنت من سلايدات عدة دكاترة وقالولي شاملين
وبما ان اني ماعندي خبره في طريقة الامتحانات شلون تجي
درست من النوتات فقط ورحت اقدم الامتحان و نصدمت !!!
اغلب المعلومات مو موجوده فالنوت والنتيجة جبت درجه مأساوية فالماده :tears:


المقرر الثاني اخذت كتاب ودرست منه
حسيت نفسي افهم اكثر و درجاتي كانت احسن بواجد !

ولما درست من الكتاب رجعت للنوت حسيتها ما تغطي كل اللي مطلوب فالمقرر ومنها اخذت عهد على نفسي ادرس من الكتاب ولو في اشياء معقدة الجأ للنوتات افضل


طبعا من ماده الى الثانيه يختلف في مواد ما احتجت فيها للكتاب ابدًا
مثل الايكون والماث اعتمدت على نوتات الدكاترة والحمدلله اموري ماشية

ونصيحة مني
اللي يفكر ياخذ له كتاب معين لا يتسرع وياخذ جديد
يشوف الكتب المطبوعه بسعر معقول او ينتظر معرض بيع الكتب المستعمله لأنها ارخص ولكنها جديده
لأني اليوم رحت باخذ كتاب واطلعت على اغلب كتب البزنز كلها من 15 دينار وفوق

 

[.:مغترب:.]

مثل ما ذكروا الاخوان في الردود السابقة .. الكتاب هو المرجع الاول والاخير للطالب في كل الظروف .. لا يمكن للطالب ان يستغني على الكتاب ..ومن غير المعقول الاستغناء عنه اساساً في أي حال من الاحوال .. ولكن نأتي لنناقش تلك المناهج التي تحتاج الى كتب .. ربما الكتاب يكون من 500 صفحة وفيه على سبيل المثال 10 مواضيع ..هذ الـ10 مواضيع انتَ تقدر تفهمها في 10 اوراق ..فأكيد الطلاب يبحثون عن الاسهل ويبحثون على الملزمات والنوتات والخ .. على سبيل المثال كتاب اسلاميات 101 (المشترك) .. كتاب من الشكل يبين ثقيل وغير مهضوم بعض الشيء والبعض يبتعد عنه ..ولكن مواضيع المقرر تقدر تلخصهم في نقاط معدودة .. فاغلب الطلاب يتابع بالملزمات او النوتات الي تختصر له الوقت ويستفيد بشكل اكبر .. في الوقت نفسه في بعض الطلاب لا يفهمون بشكل سريع .. أيّ ان لا يستعبون الدرس الا على هيئة نقاط مثلاً او اسئلة فلذلك يبتعدون عن الكتب .. هذا احد الامثلة، ولكن لو ننتظر للجهة الثانية راح نلاقي ..في بعض المقررات لا بد من احضار الكتاب ولا غنى عنه في المحاضرات والمذاكرة ..وفي هذه الحالة كذلك نرى بعض الطلاب يحتاج الى الملزمات وغيره ..بالاضافة الى الاستعانة بالكتاب، لأنه باختصار اصبح الطالب يبحث عن الشيء السهل والذي يوفر له الوقت .. وجهة نظر متواضعهـ..!!​

بصراحة مادة دين 101، درستها بدون نوتات بس الكتاب وتلخيصي الخاص. حصلت فيها A. حتى للحين عندي الملخص اللي سويته للمادة.

لكن من جانب ثاني، عشان أصارحك الرأي، كتابة الملخص الشخصي بإشتقاقة من الكتاب وشرح الدكتور، يحتاج لوقت وجهد كبير.​

 

[محمدونا]

الواقع يقول ان احنا نبي اي شي يسهل علينا المراجعه

بس بالنهايه انا اعترف ان لو كنا نراجع الكتاب ما بنحتاج لا نوتات ولا سلايدات ةلا غيره

سواء ماده فهم لو حفظ

الكتاب مرجع للفروع ^​

 

[Prince.11]

بصراحة مادة دين 101، درستها بدون نوتات بس الكتاب وتلخيصي الخاص. حصلت فيها A. حتى للحين عندي الملخص اللي سويته للمادة.

لكن من جانب ثاني، عشان أصارحك الرأي، كتابة الملخص الشخصي بإشتقاقة من الكتاب وشرح الدكتور، يحتاج لوقت وجهد كبير.​

على اساس هالشيء تشوف الطلاب يبحثون عن الدكتور الي يعطي نوتات ..
وفأول محاضرة الطلاب يسئلون الدكتور تعطي نوتات؟ملزمة؟تلخيص؟
مع ان يقدرون يلخصون بنفسهم في المحاضرة ، ولكن لاحد يريد التعب الشخصي
لانة اعتاد الطلاب على الاشياء الجاهزة والتي تختصر له الوقت ..

وبالنسبة لمقرر دين، فهو من المقررات الممتعة والسهله
فعادي يكون تلخيص من الشخص نفسه
ولكن مواد التخصص تكون اكثر تعب واكثر ارهاق في تلخيصها ..

 

[AL BAHRANI]

يا جماعة الخير راجعوا الكتاب ، الكتاب فيه كل شيء

الملخصات والنوتات والسلايدات كعامل مساعد إي بس كعامل أساسي لا وألف لا

مشكلتنا نحن العرب أننا لا نقرأ كما قالوا عنا " إنهم لا يقرؤون "


فلنعالج هذه المشكلة ونترك الكلام الزائف عن التقليل من أهمية الكتب

نحن في مرحلة الجامعة وليس الثانوية العامة

ونسألكم الدعاء

وجمعة مباركة طيبة على الجميع ​

 

[روؤحي فاطمية]

كل الشكر لصااحب المووضووع ..

وشسمـة كل واحد على حسب تخصصة قد تحتاج لشراء كتب وقد لا تحتااج
أظن شكله محد يشتري كتب كله استعارات من الاصدقاء اذا بنشتري كتب اكتاب اكتابين فقط فقط ..

ومثل ما كالو الاخوان ترى الكتااب هو المرجع الوحيد وان النوتات هو شي يسهل عليك وعشان تفهم وش السالفة لازم تقراء الكتاب ...

عن نفسسي اول سنة جامعه شريت كتب كلفتني فوق الـ100 دينار واحد بسبعه والثاني 12 والثالث بخمسة وطارت الفلوس ...
شريت كل الكتب استفدت منهم الا كتااب واحد فقط شريته بـ7 ما ادري اذا كان لهذا المقر فية نوتات او لا ..
بعدها شفت وحدة عندها نوت والكلام اللي يكوله الدكتور كوبي بست من شرحة فالنهاية درست من النوت وخخليت الكتااب هذا مو معناته اني ما فتحت الكتاب بلا فتحتة وخليت الكتاب والنوت وشفت نفس الكلام وكنت بالمحاظرة افتح الكتاب الدكتور ما يرضى افتحه وكان كلة يتحلطم علي ً..
وبالنهاية ويبت درجة زينة غير متوقعه لانة الكلام بالكتاب غير وكلة حشو الواحد كثر ما يقراء يعمي ..

وبعد مرور الاياام وما زلت اشتري كتب واي احد يكول لي ان لا تشترين اكوم اشتري اعناد لانة كليتنا حفظ في حفظ
فالمرجع الوحيد هو الكتاب لاني اذا ما شريت كتاب احس كاعده بالمحاظرة حالي حال الطوفة ما ادري وش صاير يعني ما افهم ...

ما عليكم من الاشخاص اللي يكولون الكتاب لا تفتحة ولا تشتري اشتر كتااب هذا طبعا اذا تبون تييبون A B
واذا اشخاص يبون ينجحون فقط نجاح وفقط دون تفوق خلو الشسمة شيسمونها تنفعكم ..

حاليا عندي مقرر بالانج صح الانج شسمة يعني امشي فيه بس سالت الدكتور هل النوتات تكفي كالت لا
كالت بحدد لكم الاشياء بالكتاب يعنو الاشياء اللي موب موجودة بالنوت ..

وبمعنى كلامي انه ما اكرة النوتات او اتحلطم على الاشخاص اللي سووه وبذلو جهدهم لا انما اشكرهم ويعطيهم العافية على جهودهم ..
ولكن مو معناته نستغنى عن الكتااب يعني وكت المراجعه خل النوت والكتاب امامك اذا ما فهمت شي من الكتاب ادرس من النوت وبعدها ارجع للكتاب
على الاقل تدري وش صاير ..

 

[Smart]

الكتاب مفيد ؛ بس الطالب ييي الطريقة اللي تختصر عليه الطريق ويطلع بنتيجة حلوة
وبعض الكتب اوردي تكون متوافرة في النت ؛ فليش اشتريه ؟
ومثل ناقالوا تواجد الكتاب او عدمه يعتمد على نوع المادة والدكتور
مثلاً اول كورس لي شريت كتاب chemy101 في البداية كنت اسوي روحي شاطرة واقرا الشرح
بس جفت ان شرح الدكتور كافي ؛ فكنت ارجع له فقط حتى احل المسائل اللي يحددها لنا
والفيز بعد استعرت الكتاب من رفيجتي بس ما فتحته ؛ لان الرجوع للامتحانات السابقة كانت بالنسبة لي كافية
اما الماث لازم يكون عندي كتاب حتى ارجع للمسائل الللي فيه
اذا مو موجود في النت اشتريه
اما الحفظ ما اثق في الملخصات
اما الكتاب محد يقدر يقول عنه غير مفيد ؛ بس حنا نستبدله بأشياء ممكن تعطينا الفايدة الللي نحتاجها منه

 

[qassoomy]

احنا تخصصنا ( تاريخ ) اساساً ما في كتب - الدكتور نفسة يطبع ملازم و يوزع علي الطلبة و طبعا بس يجيب في الامتحان من هالملازم
اما من ناحية المواد المشتركة مثل الدين و التاريخ بالنسبة لي ضروري ادرس من الكتاب اتذكر الكل كان يقول لي خذ تلخيصات و راجع بس انا رفضت هالفكرة
لانة مثلا مادة مثل تاريخ المشترك يجيبون من بين الاسطر ما يفيد نراجع تلخيصات او نوتات و فعلا كل اللي راجعوا من التلخيصات طلعوا بــD من المقرر

من ناحية شراء الكتب اشوف طلاب اول سنة اكثر شي يشترون كتب لانة متعودين من ايام المدرسة يراجعون من الكتب
اما ما لية داعي كل هالصرف
حتي اذا طالب كان محتاج الكتاب يشتري مستعمل ما في داعي يشتري كتاب جديد بل ياخذ مستعمل
انا شخصيا هالكورس اشوف بيد الطلبة كيس من البوك شوب في عالاقل 4 كتب و يمشون فية و سعرة ما يقارب 70 دينار
في حال ان تقدرون تشترون كل هالكتب بسعر 25 الي 30 دينار مستعمل ( هذا اذا تبون تشترونهم كامل )