دخول الرجل في الأعراس

[lll]

بسم الله الرحمن الرحيم

آية الله قاسم يدعو خلال خطبة الجمعة إلى انهاء ظاهرة دخول الرجل إلى الصالة بين النساء في حفلات الخطوبة ويعتبر الظاهرة تهاون وإستخفاف بشرع الله عز وجل
آية اللّٰه قاسم يدعو من خلال خطبة الجمعة إلى إلغاء عادات دخول الرجال إلى صالات النساء في حفل الزواج :


وكيف لنا ان ندعي الإيمان وأننا من أتباع الرسول "ص" والمتعلقين بفاطمة عليها السلام حين تصرّ الفتاة أن يدخل خطيبها جمع النساء بمن فيهم من متزينات ومتعريات في الجو الضاحك والمثير وأن يكون معها يبادلها القبلات أمام الفتيات اليافعات. ويجري هذا بمباركة الأسرتين أو السكوت على مثل هذا التصرف. وموقف السكوت هنا مشاركة في الإثم..
نريد لمجتمعنا المؤمن هذه الخطوات اليسيرة وتصحيح هذه الانحرافات على أقل تقدير ويستمر عنده مسار التصحيح والتراجع عن كل الانحرافات.


خــُـطـــبــــةَ الــجــُـمَـــــعــْةَ
11 - 4 - 2014 م
جـامـِع الِإمـام الـصادق
(عليه السلام) - الدراز

فرصة مناسبة لطرح هكذا موضوع .. و الهدف ليس الجدل اللانافع ، و إنما الإرتقاء بعادات المجتمع المتعارف عليها ..


1- ما أصل هذه الظاهرة ؟
2- آثارها ؟
3- لو رفضت الزواج منك إن لم تدخل معها كيف تتصرف ؟
4- كيف يمككنا كأفراد أن نعالج هذه المسألة ؟

لكم المجال إخوتي ..

 

[the life]

متعريات؟
مسامحه يعني
بس اكيد بيلبسون عباياتهم وهذا اللي اشوفه اني ما شفت شي غير!
بعدين اذا ما دخل المعرس ماله داعي يسوون حفله في صاله كبيره و تجهز العروس بمبلغ وقدره عشان تدخل كانها ضايعه بروحها الصاله وصورها بروحها!

المعرس ذاك الوقت يا اما بيكون مستحي ومنزل راسه
لو منزهق بالعروس
ليش يحط عيونه ع النسوان! عجل ليش تزوج؟

غريبه يعني هذا شي من ايام أجدادنا مو جديد

اني انتقد سالفه اذا دخلو نص العايله رجال عشان يصورون وبسطو
بس هو اسمه زواج
عروس ومعرس
مو عروس بروحها هذا الشي بيغير اشياء شكثر و يمكن العروس تغض النظر حتى أنها تسوي حفلة عقد ، يعقدون وبس لا من شاف ولا من درى ولا الجار يعرف أخبار جاره ولا شي
ما يشوفونهم الا ويا بعض!

واذا ع الحركات اللي تصير هذي من التصوير
وتقدر تخبر الاستيديو ترى مابي لقطات جذي!
وكان الله غفور رحيم

 

[روؤحي فاطمية]

جمع النساء بمن فيهم من متزينات ومتعريات في الجو الضاحك والمثير وأن يكون معها يبادلها القبلات أمام الفتيات اليافعات

انزين ويعني ..
ما المقصود بالمتزينات المتعريات عفوا .!!
المتزينات اذا صرنا في حفلة كلها نسوان فمعناته انه عااادي ..
بس اذا دخل المعرس الكل يحتشششم والكل يلبس العباءة
سوى كانت من اهل المعرس او من اهل العروس لو ويش تصير له ..
والكل يحتششم ويلزم نفسسة وش بيضرج لين لبستين وتغطيتين يعني لازم تعال شوفني اني عمتك ..

خير أن شاء الله ..

وثاني الشي المعرس مو فاضي لينا يجوفكم هو يا الله يا الله يجوف عروستة ويصور وياه ويطلللع يبي الفكة بس عشان يهج من هاي المكاان
بسبب الخوف والربكة وو .. واصلا أكثر اللي نشوفهم يدخلون مستحين وبسرعه يصوور ..

وفي نقطة لين جت لك العمه والخالة ولابسة ذاك الفستان اللي يفشل وراحت تحب وتقبل ولد اختها او ولد اختها ويش صاير عفوا وش وضعج بالله :sly:

لو منعو انه المعرس يدخل لقاعه او الصاله او الماتم كان ليش يعني يسوون كل هاي الشي ومثل ما
كالت الاخت ليش يسون حفلة بالاساس مثلا بتقعد العروس بروحها وبتصور بروحها او مع الجني مالها ..!!

أما في حالة التصوير وجذية يكدرون يكولون لبني فلبينو الحركات اللي يبونها وخلإلإص

وهذا اصلا عرف امام الناس والناس تعودت عليه ومجرد ما يدخل المعرس الكل يتغطى والكل يسكت
ما تجوفون الا صوت اليهال اصييااااحهم اما المعزومين او الحشود ما شاء الله يا اما تشوفونهم
قافزين على البوفية او تشوفهم يطالعون المعرس والعروس ويشوفونهم من الاحلى .. ..

واخيرا ً من خلال هاي العرس الكل يعرف الاحوال الثاني والكل يشوف بعض يعني
الناس اللي ما تجوفهم من سنة جدي تجوفهم بالعرس وتسلم عليهم ويسلمون عليك وتااخد اخبارهم

الاهل والا اهما الاهل ما يبينون الا في الاعراس والفواتح ووو ...

أني اكول اذا صارت السالفة لهذا الحد لحد يسوي عرس :mellow:وفكونـا


اسفة على الاشياء اللي كلتها بس هاي وجهه نظر والاختلاف في الراي لا يفسد في الود قضية
وشكرا ...​

 

[أمواج]

الي فهمته المقصودين هم أهل المعرس نفسهم
اخته عمته بت اخته بت أخوه .... (المحارم)
وهو بالفعل فيه موضات طالعة للفساتين ما فيها ستر ومخجلة
مو معناها المعرس حلال عليها يعني في عرسه يحل ليها يشوفها بهالشكل

أما الغير محارم معروف ان يتغطون و يلبسون عباياتهم

اذا فيه فئات مو جايين يلتزمون .. ما يبرر هالشي ان ينمنع دخول المعرس .. الغلط مو غلط العروسين

أما التصوير فهالشي غير متقبل في رايي وهذي الأمور المفروض من خصوصيات الزوجين

 

[محمدونا]

سالفة ان الرجال مستحي و بينزل راسه هذي طافت و انتهت .. الحين زين ما يرقع راسه في السقف

كلمة متعريات مو معناها اللفظي .. هذي استعارة الى ان المعرس يقدر يطالع اشياء في البنات المتواجدين هناك " وهي حرام عليه شرعا "
الفسااتين ماخذة حتة على قولتهم

يعني ليش تتهجمون على الموضوع ما اشوف في شي غلط
بالعكس وكأنه يوصل رسالة للمضمون .. الي هو " عرسكم لا تسوونه في صالة "

مجرد رأي ،،

 

[Waffa]

اتوقع هاي المرة الوحيدة الي محد بيمشي على كلامه ،

ولو اني ماشجع هالعقد تعال ادفع وشيل ايدك تره عرسه، بس ادا بنجيها من ناحية دينية تره كلامه مو غلط، يعني اني الي لاحظته الاغلبية هني ماترضى باي شي يمس الدين وواجد تم مناقشة اشقد غلط موضوع البنات "المتبرجات" والي شعرهم طالع الخ،
تره في العرس بيدش هو وحتى الي غطت شعرها بيتم مكياجها باين فمن ناحية دينية كلامه ماعليه غبار
اما سالفة الرجال مابيطالع بليييييز يعني هاي في مكان عام يقزون الوحدة من فوقها لحدرها مو بعد فالتينه في وسط نسوان معظمهم اول مرة يجوفهم متعدلين، شلون تضمنون ايمان الصبي؟
فيعني ادا تؤمنون بده كله وماترضون باي شي يعارض العرف الديني ليش مو قانعنكم الحجي؟

 

[stylish77]

الي فهمته المقصودين هم أهل المعرس نفسهم
اخته عمته بت اخته بت أخوه .... (المحارم)
وهو بالفعل فيه موضات طالعة للفساتين ما فيها ستر ومخجلة
مو معناها المعرس حلال عليها يعني في عرسه يحل ليها يشوفها بهالشكل

أما الغير محارم معروف ان يتغطون و يلبسون عباياتهم

اذا فيه فئات مو جايين يلتزمون .. ما يبرر هالشي ان ينمنع دخول المعرس .. الغلط مو غلط العروسين

أما التصوير فهالشي غير متقبل في رايي وهذي الأمور المفروض من خصوصيات الزوجين

سوري يعني..
بس المحارم بينهم و بين اهلهم يتفاهمون..
شنو يطالع المحارم..حيوانات احنا؟؟!

استغفر الله..يعني شنو هاﻷفكار..
جد جد تعصبون الواحد

 

[أمواج]

سوري يعني..
بس المحارم بينهم و بين اهلهم يتفاهمون..
شنو يطالع المحارم..حيوانات احنا؟؟!

استغفر الله..يعني شنو هاﻷفكار..
جد جد تعصبون الواحد

مسامحة
ما قصدت بقدر الصورة الي انت متصور أخي
خلها تكون بمكياجها و كشختها قدامهم مو مشكلة لكن
البنات المحارم مهما كان لازم تلتزم بالحشمة حتى لو يحل اليها .. بصراحة فيه فساتين ما يليق ليها حتى أبوها تكون قدامه ابها
أساسًا فيه حدود حتى بين المحارم .. عجل ليش البنت و الولد الاخوان يفصلونهم عن بعض بالغرف و ليش فيه واجب الاستئذان بين المحارم

 

[the life]

صلو ع النبي يا جماعه

اني اقول اذا الواحد ما دش ولا شاف لا يحكم بشي من عنده
يعني مهما يكون اني ما شفت مهزله تجبرنا ان نسوي هالشي وما يدش المعرس
احنا زين زين نشوفهم في المناسبات
هالشي يؤدي الى قطع الارحام ازيد مما احنا عليه الحين
اذا يسوون جذي يعني خلاص مافي حفله يعني ما تشوف الا فلان وفلانه عندهم جاهل
وش هست ؟ متى تزوجو ؟ ومتى جا هالجاهل
والله تزوجو وسافرو ومحد يدري!


بعدين هذا يعتمد ع العايله نفسها
انتون تجون تطبقون هالحكم ع كل العوايل اللي تسوي واللي ما تسوي
الحين دي جي عادي يصير عليه الضرب ويخترب الزواج
ما بالكم تصير هالمسخره ويسكتون ؟
ماني متخيله ان هالشي يصير والناس كلها ساكته

ولا يجون يقنعوني ان اللي وافقو ع هالكلام انهم كانو رافضين يدخلون الصاله ويا زوجاتهم
او اللي ما تزوجو للحين ما راح يدخلون

اقصصص ايدي

لان السعوديه اللي هي السعوديه اللي فيها الامر بالمعروف والنهي عن المنكر كاتمين على انفاس الناس ما طلعو شي جذي واكو يدخلون والامور طيبه واحنا بخير

مادري لوين بنروح عفر!

خوفي تالي ما نشوف اهلنا الا في الفواتح بعد مافي الا هالمناسبه​

 

[♥ Smile]

والله يفكونه من الحفلات والمخاسير استغرب ياخي من هالحفلات حفله بطول وعرض والله عبالك اتحررت الاقصى وفي الاخير اثنين متزوجين ! وخير يا طير ، ومتزوجين يعني مناسبه جميله ماقلنا شي ، ولكن لا داعي لكل هالفرح عليها الفرح مبالغ عندنا الصراحه تنقال اول ناس ولا اخر ناس تعرسون يعني شحلاتها الشغلات العائليه ويه الشيخ ويعقد عليكم وتباركون لـ كم نفر بس وتصلون صلاة الشكر وصفحتين من القرآن وصلى الله وبارك لازم ثلاث حفلات حنه و ملجه و عرس ؟؟ ويوم ثاني غدا وفي ناس ( أسبووع كامل ) العشا في بيت المعرس الي يشوووف هالطرب واهازيج والخساير وغيره يفتكر عندكم سالفه وفي الأخير على شنوو ؟؟؟ غلووم ماخذ فخريه ؟؟؟؟ بس ؟؟ خل هالشغلات تنتهي وتنقرض ونفتك حتى شبابنا صعب عليهم الزواج بسبب هالمخاسير الي مالها داعي وبالأول والاخير هالحفلات هدفها هو التعبير عن الفرح واعتقد الفرح تقدر تعبر عنه بألف طريقه حبكت الحين على هالطريقه ؟ الحمد الله عائلتي كل حفلاتنا عائليه وبسيطه وكل شي من بينا بس لدرجه اخر مره عرس واحد من اهلي صار في بيت وبوفيه صغير وقهوه ويه الشيخ ومصوره وحده وصل الله وبارك ،، لازم أسلوووب الحفلات ينقرض شي فعلاً رجعي

 

[the life]

سالفة ان الرجال مستحي و بينزل راسه هذي طافت و انتهت .. الحين زين ما يرقع راسه في السقف

كلمة متعريات مو معناها اللفظي .. هذي استعارة الى ان المعرس يقدر يطالع اشياء في البنات المتواجدين هناك " وهي حرام عليه شرعا "
الفسااتين ماخذة حتة على قولتهم

يعني ليش تتهجمون على الموضوع ما اشوف في شي غلط
بالعكس وكأنه يوصل رسالة للمضمون .. الي هو " عرسكم لا تسوونه في صالة "

مجرد رأي ،،

إذا في فعلا ناس جذي
هذلين مو رجال
اللي العروس ذابحه روحها
ومن الصبح لليل ف الصالون عشان تتعدل ليه
وهو حاط عيونه ع غيرها وهادنها

راحت رجال ترفع الدروازة صدق

 

[علي البلادي]

هههههههه هي السالفة كانت شاغلة تفكيري الحين لازم يعني يجي يتمشى وياها قدام الجمهور جنهم عارضين ازياء ههههه خلاص صار العقد و انتهى الموضوع

 

[روؤحي فاطمية]

راحت رجال ترفع الدروازة صدق

وجت ارجال المطنزة والعازة ​

 

[ambitious32]

للاسف فان مجتمعنا الذي اغلبه يعتبر اية الله قائدا .. تجده في تصرفاته يفعل عكس اوامره .. قائد بالاسم بس ولما انيي للتطبيق كل واحد طلع له حجه واتهرب من القضية ..

 

[ambitious32]

بخصوص كلام سماحة آية الله الشيخ عيسى احمد قاسم عن ظاهرة دخول العريس لصالة النساء :

لا يوجد من يطبق كلام الشيخ حفظه الله
عندما نتحدث عن هذه المواضيع في المجتمع يعتبروننا شذوذ بسبب تغلغل الافكار الجاهلية والاعراف المنحطة المنحرفه عن الدين ، وأنا متيقن ان الكلام لن يتم تطبيقه على الواقع بسبب حب الذات والأنا ..
سبق وتكلم سماحة الشيخ عن عمل المرأة وسبق وتحدث عن الاناشيد الخاصة بالعرسان التي يذكر فيها اسم العروس واسم العروسه ويتم دفع مبالغ طائلة فقط من اجل هذه الانشودة .. وسبق وتحدث عن غلاء المهور وفحشه .. وتحدث عن ظاهره الحفلات الكثيرة والزخم والبهرجة .. حيث ان في الخطوبة تضخ الآلاف من اجل ليلة واحدة وتصر الزوجة على اقامة حفلة ثانية وهي للعرس!! وشدد سماحة الشيخ على ان يكون حفل واحد فقط وبمبلغ معقول .
.
ولكن من يفهم ؟ من يعقل ؟ من يتفكر؟

البعض يدعي انتماءه الفكري لسماحة الشيخ والبعض الآخر انتماءه السياسي ولكن في الجانب الاجتماعي والثقافي والفقهي فانتماءه يكون لذاته فقط!!

أرجوا أن أكون
قد وفيت يا شيخنا الجليل~
‏شاهد "الشيخ عيسى قاسم و دخول الزوج صالة الزواج" على YouTube - الشيخ عيسى قاسم و دخول الزوج صالة الزواج: http://youtu.be/OeJMgARe5-s

 

[Narcissist]

استغربت من الموضوع شوي لأن هالشي اجوف الشي الوحيد الي متفقين عليه كل المسلمين
BTW ترا هاليومين طالعة موضة ان العرس يكون مختلط و انتون ما تبون تدخلون المعرس

​

 

[زينبية العشق]

/


بغض النظر عن الناحية الدينية فالمجتمع يتخذ هذا الشيء من ناحية عرفية و المساس به يسبب نفضة كهربائية " عند الأغلب" ، رغم إنه لا يوجد لا في التاريخ ولا في الإسلام ولم يصلنا رواية إن هناك من قام بهذا الفعل.. لأنه جذر غربي تأصل في المجتمع.

-


في نظري لا أرى لدخول الرجل أي لزوم أو سبب.. يدخل وسط حشد النساء ويلقمها الكعك ويشرب العصير ويخرج! مالذي زاد من مزايا الحفل بدخوله؟؟ غير إنه أجبر النساء على التغطي و التستر..

عادة لا أحبذها ولا أشجع عليها وليتها تنقرض​

 

[قمَر]

ما بدخّل رجلي أني
هكو بنصور في الاستيديوو ما يحتاج نصوّر بعد في الصالة
ويزفوني بروحي وش صار يعني؟؟
ع الأقل اللي بيتعدلوون ليي بقدر أشوف كشختهم
مو أقعد أحن على ربعي تعدلوا وتعدلوا
وأخير شي من يجي المعرس بيلبسون وبعدين بيتيسرون
شي ثاني أغلب النسوان لين دشّوا المعرس والعروس
يقزونهم قزز، ويقعدون يعلقون..
هو أحلى منها وما حصل ليه وحدة أحلى وهرارهم المجمّع
حتى لو هي في نفس مستوى جماله بيقولون أحلى وبقزونه
سلامات!! أهم شي عاجبني وعاجبتنه أنتون شدخلكم؟؟
أما من ناحية إن هو بيطالع، ما بسيء الظن
بس أني أتفق وي رأي أمواج
يعني لباس البنات في الحفلات حتى قدام المحارم ما يجوز
وأغلبهم ما يهتموون لهالشغلة
ويجون يحضنون فيه ويوقفون قدامه
حتى لو هو مو قصده يطالع بيطالع غصب
وهالشي بسبب وي؟
بسبب العروس اللي قعدت تصيح الا تبااه يدش عشان البرستيج
حتى لو هو ما عارض فكرة الدخول، أني بنسفها
مدام الشي فيه إشكالية شرعية ويش لينا إبه؟؟
وأهله يقدرون يشوفونه في وقت ثاني
ولين يبون يشوفوون الصور

# قاعدة أفكر في الموضوع
# شكلي صدق بسويها ​

 

[أمواج]

ما بدخّل رجلي أني
هكو بنصور في الاستيديوو ما يحتاج نصوّر بعد في الصالة
ويزفوني بروحي وش صار يعني؟؟
ع الأقل اللي بيتعدلوون ليي بقدر أشوف كشختهم
مو أقعد أحن على ربعي تعدلوا وتعدلوا
وأخير شي من يجي المعرس بيلبسون وبعدين بيتيسرون
شي ثاني أغلب النسوان لين دشّوا المعرس والعروس
يقزونهم قزز، ويقعدون يعلقون..
هو أحلى منها وما حصل ليه وحدة أحلى وهرارهم المجمّع
حتى لو هي في نفس مستوى جماله بيقولون أحلى وبقزونه
سلامات!! أهم شي عاجبني وعاجبتنه أنتون شدخلكم؟؟
أما من ناحية إن هو بيطالع، ما بسيء الظن
بس أني أتفق وي رأي أمواج
يعني لباس البنات في الحفلات حتى قدام المحارم ما يجوز
وأغلبهم ما يهتموون لهالشغلة
ويجون يحضنون فيه ويوقفون قدامه
حتى لو هو مو قصده يطالع بيطالع غصب
وهالشي بسبب وي؟
بسبب العروس اللي قعدت تصيح الا تبااه يدش عشان البرستيج
حتى لو هو ما عارض فكرة الدخول، أني بنسفها
مدام الشي فيه إشكالية شرعية ويش لينا إبه؟؟
وأهله يقدرون يشوفونه في وقت ثاني
ولين يبون يشوفوون الصور

# قاعدة أفكر في الموضوع
# شكلي صدق بسويها ​

انتين انسانه عفر تعرفين تقنعيني
مواليد شهر7 يفهمون على بعض له

بس بعد شسمه .. جزء من النص مفقود لتتمة الاقتناع عندي ^^"

شوفي خيوو .. اني مره من زماان رحت عرس وعجبوني
ليش انهم صارو بالنص لا منعو كامل و لا خلو كامل
يعني المعرس دخل ويا العروس بس في الزفة للمسرح
و طبعا الزفه يطالعون سيده الاثنين .. و تعرفون ارتباك الزفه ما يشوفون احد
وبعدين رد طلع وصلته امه اظن وبكامل الاحترام وهو منزل راسه

 

[قمَر]

انتين انسانه عفر تعرفين تقنعيني
مواليد شهر7 يفهمون على بعض له

بس بعد شسمه .. جزء من النص مفقود لتتمة الاقتناع عندي ^^"

شوفي خيوو .. اني مره من زماان رحت عرس وعجبوني
ليش انهم صارو بالنص لا منعو كامل و لا خلو كامل
يعني المعرس دخل ويا العروس بس في الزفة للمسرح
و طبعا الزفه يطالعون سيده الاثنين .. و تعرفون ارتباك الزفه ما يشوفون احد
وبعدين رد طلع وصلته امه اظن وبكامل الاحترام وهو منزل راسه

أييي يمكن جذي أوكيه يعني بس يدش وياها وبعدين يمشي ​