عندما تدرس المرأة مالهدف ...

[Hanany]

السلام عليكم،

تخيّلوا لو إنّ وظائف الإناث - هناك بعض الاستثناءات مثل المعلّمات والأشغال الخاصة بالبنات - كلها صارت للرجال .. والرّجال يصرف على زوجته .. من آدم لقبل 50 سنة هذا هو النظام .. بيكون فيه بطالة؟

احذري أختي المسلمة، أنتِ تأخذين حق الرجل في العمل، أنتِ منعتِ آلاف الأسر من التكوّن وآلاف العزّاب من الزواج

^

طبعًا كلامي مزح ممزوج بجد .. لكن أقول يبيّن ليي الله بيحاسبكم يوم القيامة ​

شدخل منع الآف الأسر من التكون وآلاف العزاب من الزواج البنت تتعب حالها حال الصبي تدرس وتكرف وفي النهاية شهادة معلقة بدون شغل طبعاً اذا خيروها ما بين بيتها والشغل أكيد البيت ليه الاولوية بس اذا كان الدخل ضعيف فتتضطر البنت تشتغل الي الاحظه ان اغلب الصبيان يخلصون ثنوية ويقعدون بطالية يبون شغل ويبي يكونون اسرة هذا مو كلام من جدي تتضطر البنت نشتغل الحين طلعت البطالة مننا خل الشباب يجدون على روحهم الوظيفة ما تجي بدون تعب والسبب الرئسي للبطالة اهوة توظيف المجنسين الحين صارو يدرسون وياخذون اعلى الشهادات والمناصب

 

[Prince.11]

شدخل منع الآف الأسر من التكون وآلاف العزاب من الزواج البنت تتعب حالها حال الصبي تدرس وتكرف وفي النهاية شهادة معلقة بدون شغل طبعاً اذا خيروها ما بين بيتها والشغل أكيد البيت ليه الاولوية بس اذا كان الدخل ضعيف فتتضطر البنت تشتغل الي الاحظه ان اغلب الصبيان يخلصون ثنوية ويقعدون بطالية يبون شغل ويبي يكونون اسرة هذا مو كلام من جدي تتضطر البنت نشتغل الحين طلعت البطالة مننا خل الشباب يجدون على روحهم الوظيفة ما تجي بدون تعب والسبب الرئسي للبطالة اهوة توظيف المجنسين الحين صارو يدرسون وياخذون اعلى الشهادات والمناصب

بغض النظر عن الشباب والبنات ..
الزمن الي احنا فيه الحين زمن العلم والتعلم ..
سواء للبنت اوّ للولد ..

مثل ما في صبيان يقعدون في البيت بعد الثنوية ..
في بنات يقعدون في البيت بعد الثنوية ..

بس خلنا نترك هالفئة الي اقدر اقول عنهم قليلين ..
المرأ اليوم اصبحت تقارن بالرجل بكل شيء ..

يعني من عوامل دراسة المرأة وشغلها هو الدخل في الاسرة ..
لكن في نفس الوقت الوقت الي احنا فيه يُطالب المرأة بالدراسة ..

في الزمن القديم نشوف المرأة جلوسها في البيت يعد شرف لها ..
لكن تطور الزمن تطور الوقت تظور الحياة أجبر المرأة على الدراسة ..

وبالنسبة للزواج ..

الدراسة بالنسبة لي ليس عائق كبير للمرأة بالنسبة للزواج ..
شيء عادي المرأة تدرس وتكون متزوجة ..


#وجهة نظر

 

[purple.cs]

كلمة للشباب اللي مو عاجبنهم دراسة المرأة و شغلها مناصب و على قولتكم اخذت مكان الرجال وما قدرو يكونون اسرة ،،،

#ليش_لين_رحتون_تخطبون_تشترطون_نبي_وحدة_خريجة_جامعة :sly:

 

[Hanany]

كلمة للشباب اللي مو عاجبنهم دراسة المرأة و شغلها مناصب و على قولتكم اخذت مكان الرجال وما قدرو يكونون اسرة ،،،

#ليش_لين_رحتون_تخطبون_تشترطون_نبي_وحدة_خريجة_جامعة :sly:

بالضبط

 

[غريبة الدار]

كلمة للشباب اللي مو عاجبنهم دراسة المرأة و شغلها مناصب و على قولتكم اخذت مكان الرجال وما قدرو يكونون اسرة ،،،

#ليش_لين_رحتون_تخطبون_تشترطون_نبي_وحدة_خريجة_جامعة :sly:

نفس السؤال
لأن بنات تفكيرنا غير عن الشباب وفي أشياء ما نقدر انفسره ومنه هالنقطة نبي جواب مقنع

مجرد تخمين مأدري صح لو غلط

يمكن علشان انه اذا جامعية اتكون فرصته في التوظيف أكبر واتحصل وظيفة محترمة وراتب زين حق اتساعدكم في المصاريف ويمكن بعد انه اذا اشتغلت اتحس بقيمة الفلوس نفس الرجل وما اتكون مبذرة واتحسب لرجل

اذا غلط صححوا لي

 

[Blue Castle]

نفس السؤال
لأن بنات تفكيرنا غير عن الشباب وفي أشياء ما نقدر انفسره ومنه هالنقطة نبي جواب مقنع

مجرد تخمين مأدري صح لو غلط

يمكن علشان انه اذا جامعية اتكون فرصته في التوظيف أكبر واتحصل وظيفة محترمة وراتب زين حق اتساعدكم في المصاريف ويمكن بعد انه اذا اشتغلت اتحس بقيمة الفلوس نفس الرجل وما اتكون مبذرة واتحسب لرجل

اذا غلط صححوا لي

مو بس عشان فرصتها في الوظيفة أكبر و ما إلى ذلك بعض الشباب مع الأسف يبغي جامعية حاط في باله انه عشان معاشها ، حتى واحد خاطب مرة قلها أشكره يقول كلها سنة و نص و تشتغل و أنا أرتاح و هي الي تصرف على البيت ويش ليي بعوار الراس ، فنظرت الشباب غالباً و بالأخص الي مو مكمل تعليمه أو شغله و راتبه مو ذاك الزود ينظر للجامعية عشان معاشها ، طبعاً مو قاعد أعم و لا أقدر أحط نسبة للشي بس في المقابل بعد في شباب ما يقربون لمعاشات زوجاتهم ، شخصياً اعرف واحد من أيام الشغل كان يشتغل إلى لظهر و بعد يشتغل شغلة ثانية بارت تايم العصر مع العلم ان زوجته جامعية و تشتغل بس معاشها ليها هو بنفسه قال هالكلام ، و كلامه صحيح في النهاية توفير مستلزمات من واجبات الزوج و حتى لو كانت تشتغل من واجبه يصرف عليها

 

[ambitious32]

المرأة اللي تشتغل تساعدك في فتح بيتكم الخاص .. اما انها تصرف على البيت انا ضد هالشي .. المرأة الجامعية ضرورة ملحة وخاصة اصحاب التخصصات والوظائف الانسانية

 

[المهندس عبدالله]

تعليم المرأة أمر ضروري, أصلا مستحيل أتقبل وحدة مو متعلمة و بس شغلتها اتزن غير اذا متعلمة و فاهمة حتى لو زنت بيكون الأمر مقبول أكثر من المرأة غير المتعلمة...
و هل أيام أغلب الشباب يتمنى المرأة المتعلمة مو عشان وظيفتها و أنها بتساعدهم حتى من نواحي ثانية المرأة المتعلمة ليها مميزات أكثر من الوظيفة و المعاش

 

[red❤heart]

السلام عليكم،

تخيّلوا لو إنّ وظائف الإناث - هناك بعض الاستثناءات مثل المعلّمات والأشغال الخاصة بالبنات - كلها صارت للرجال .. والرّجال يصرف على زوجته .. من آدم لقبل 50 سنة هذا هو النظام .. بيكون فيه بطالة؟

احذري أختي المسلمة، أنتِ تأخذين حق الرجل في العمل، أنتِ منعتِ آلاف الأسر من التكوّن وآلاف العزّاب من الزواج

^

طبعًا كلامي مزح ممزوج بجد .. لكن أقول يبيّن ليي الله بيحاسبكم يوم القيامة ​

ونرد عليك رد سريع يقول فيه لو تجري جري الوحوش غير رزقك ما تحوش

 

[red❤heart]

تدرس لانها تستحق الافضل وتعمل اذا رغبت فهي انسانة والوظيفة لا تدخل ضمن العيب او الحرام
هذي نقطة النقطة الثانية على عهد فاطمة الزهراء كان مفتوحة مجالس العلم للنساء
اما من ناحية ثانية فالحياة الحالية رفعت سقف التوقعات وجعلت من الطفل ف الابتدائي يتعلم ف المدرسة علوم قد لا تتناسب مع القدرات الفردية للافراد
وبالتالي من هو المدرس غير الام ؟
ثالث نقطة في ظل الظروف الحالية نسمع كثير مطلوب مساعدة لزوجة معتقل او او او فهي من حقها بدل ان تمد ايدها للناس ان تعمل
رابعا قد لا يستطيع الزوج البحريني ان يغطي تكاليف احتياجات منزله من راتب واحد فيكون اللجوء لراتبين لتمشي الحياة
خامسا قد ترى المراة احتياجاتها لاكسسوار مثلا اساسي بينما يراه الرجل انه امر ثانوي فبدل ان ترهقه بالطلبات وايضا المواجيب والعلاقات الاجتماعية تلجا لراتبها
مع تاييدي الشديد لعمل المرأة ولكن اذا لم تكن محتاجة للعمل فالبيت بها اولى

 

[المهندس عبدالله]

مو المراة الإنسان غير الجامعي بشكل عام يخليني أخلي ألف علامة استفهام ..
عن تجربة الانسان بدون تعليم جامعي هو انسان متوحش في كلامه وفي تصرفاته وكل شي فيه يضحك ..
الشي ما يتعلق بتعليم الجامعي بل بالعقلية فهذلين اله اختارو ما يواصلون تعليم جامعي عادة تكون نظرته تشاؤمية وكثير الانتقاد...
الانسان الجامعي من جهة آخرى عنده طموح كبير.. مستمع جيد.. أقل عدوانية ألفاضه محترمة أكثر وعنده مبادئ أكثر كونه "مثقف"..

وطبعًا آخر هم الرجال يبتلش بوحدة هدارة وما عندها تفاهم وبعد تضحك تصرفاتها .. شيء قاتل ... + مو متأكد من شي بس أعتقد ان المرأة اله تدخل سوق العمل تتغير نفسيتها وتصرفاتها نوعًا ما.. يعني تشوف الدنيا شوي


** ممكن تكون نظرتي الخاصة، فعادي لو ما كنتون تشوفون اله أشوفه.. والكلام بشكل عام.. بس ما أعمم

 

[red❤heart]

بصراحة موضوع جداً يحتاج لنقاشَ !

البنت لماَ تكمل دراستها الجامعية هذا جداً مهم ؟
و اني اشجع كل بنت عندها القدرة المادية على انها تكمل تعليمها الجامعيَ ،
حتى لو كانت درجاتها بالمدرسة كانت سيئة !

* الجامعة حياة جديدة ، تقدر البنت تبدأ من صفرَ فيها و تحط اساس قوي ليهاَ ( المعدلَ )
و تنسى كل العقباب الا واجهتها في المدرسة و ما تكررها في الجامعة ..



المراة في المجتمع العربيَ ، دائماً في المرتبة الثانيةَ ؟
ليش ما نغيرَ هذي القاعدة ! ليش ما نكافح حق نكون فالمرتبة الأولى
و نخلي رجال في المرتبة ثانية ..

مشاء الله أني عن نفسي أجوف البنات أذكى و عقولهم شغالة أكثر من لصبيانَ !
واقع هذا مو مجرد تحيزَ ؟ حتى درجاتهم و عطائهم في تخصصاتهم أفضل من الشباب بواااااجددَ ..
هذا دليل على أن حواء متميزة بعقلها إلا يحل أكثر من مشكلة في نفس الوقت ،

لا تقولينَ إن بدرس و ما بشتغلَ ؟
دوري تخصص حليوَ و بالمقابل مافيه طلبة واجدَ !
هني فعلاً راح تحصلين وظيفة ..

ولا تقولين بيه شلونَ ادرسَ و ازوج بنفسَ الوقت ؟
ترا عادي لو اجلتين فكرة زواج لسنة أو سنتين كلش ما راح تنتهي دنيا
إذا ما تزوجتين الحينَ ؟!!

عمرش جفتينَ صبي تزوجَ و هو يدرسَ ؟
قليل و نادراً بعد !!

ليش تضحين بمستقبلشَ و مجدشَ و طموحش عشان الزواجَ ،
وهو شيء تقدرين تأجلينه لفترة مو طويلةَ ! ابداً ما بخلصون لرجال و الله !

إلا صج يحز بالخاطر إن اجوف البنات كل يفكرون يمبون يعرسونَ و حالة !
و مو عاطين دراستهم حقهاَ ، الغوا تفكيرهم في العلم على حساب رومانسية و الحب و زواجَ و الأولادَ ؟

فكرتين شلون راحَ تعيشين أنتين و ولادش بعد 20 سنة ، و على معاش شخص واحدَ ( زوجشَ ) ؟
شلون راح توفرين لهم حياة كريمة في ظل ارتفاع الغلاء المعيشيَ ..

مشكلة الناس الأولى و ليست الأخيرة ، نظرتهم للمستقبلَ جداً قصيرة !
تفكر شلون بتعيش شهر عسل حليو و رومانسي ويا رجلهاَ و ما فكرت بهل جهال فقارة الله إلا بجون
في لعواز و ناقصتهم اشياء واجدَ بسبب ظروفهم المادية ( لحد يقول نفس ما عشنا هم بعد بعيشونَ )
زمنهم غير عن زمناَ ؟ و احنا نواكب زمنهم مو هم يواكبون زمناَ !!!!!!!


على عموم أني اجوف المراة العاملة و الزوجة في نفس الوقت هي المراة المثالية
تقدر توفق بين حياتها زوجية و عملهاَ ، عكس الطالبة و متزوجة إلا حياتها عذاب في عذابَ
و هذا شيء نلمسه من صديقاتنا إلا متزوجين و هم يكملون جامعةَ ..
و حتى لو كانوا متفوقات ينزل معدلهم للأسفَ لان ضغط كبير عليهمَ

واجد طولت بالحجي بس صح الموضوع يحتاج نقاش و ندوات و محاظرات لعل و عسى إن بناتَ
يغيرون فكرتهم الجاهلية بالموضوع

​

اني وياش ف نقطة التفكير ف المستقبل
لكن اختلف وياش ف نقطة وهي المعاش الواحد والمعاشين
ياما ناس عندهم معاش واحد وممشين امورهم مثل المسطرة
ويا ما ناس عندهم معاشين لكن مو عارفين يستغلونه صح
وبصراحة اكثر تفكير الشخص نفسه وطريقة التصرف هي اللي تتحكم ف سير حياته
اعطي مجنون 5 دينار
ورد اعطيها مسرف 5 دينار
ورد اعطي طموح 5 دينار يمكن تسوي له مشروع
الهدف مو بالكم الهدف بالكيف

 

[red❤heart]

مو المراة الإنسان غير الجامعي بشكل عام يخليني أخلي ألف علامة استفهام ..
عن تجربة الانسان بدون تعليم جامعي هو انسان متوحش في كلامه وفي تصرفاته وكل شي فيه يضحك ..
الشي ما يتعلق بتعليم الجامعي بل بالعقلية فهذلين اله اختارو ما يواصلون تعليم جامعي عادة تكون نظرته تشاؤمية وكثير الانتقاد...
الانسان الجامعي من جهة آخرى عنده طموح كبير.. مستمع جيد.. أقل عدوانية ألفاضه محترمة أكثر وعنده مبادئ أكثر كونه "مثقف"..

وطبعًا آخر هم الرجال يبتلش بوحدة هدارة وما عندها تفاهم وبعد تضحك تصرفاتها .. شيء قاتل ... + مو متأكد من شي بس أعتقد ان المرأة اله تدخل سوق العمل تتغير نفسيتها وتصرفاتها نوعًا ما.. يعني تشوف الدنيا شوي


** ممكن تكون نظرتي الخاصة، فعادي لو ما كنتون تشوفون اله أشوفه.. والكلام بشكل عام.. بس ما أعمم

ما اشوفها نظرة منصفة صراحة
ممكن يكون شخص غير جامعي واعطيك مثال
تقريبا الشباب ف جامعة البحرين ما يجون كثر البنات البنات صاير الضعف اذا مو اكثر
هذي نقطة
نقطة ثانية الطموح والرؤية هذا الشخص وين يشوف نفسه بالضبط
التجارب والخبرات
واكبر دليل على كلامي روح شوف بعض كبار السن تجوف كلامه موزون وعقله سليم والقعدة وياه غنيمة هل درس ف جامعة اكيد لا
احيان اذا حكته الدنيا نفس ما يقولون كل طراق بتعلومة
اما بخصوص السلبيين بتجوف منهم واجد واغلب السلبيين اذا جيت لحياتهم بتشوفهم مو متوفقين والسبب ان ديننا بحد ذاته دين التفاؤل اعتبر الابتسامة صدقة والكلمة الطيبة صدقة
وهذي من بديهيات الدين حتى اللي مو دارس يعرفها
اعتبر الدراسة شي والوعي شي ثاني
ممكن تنضاف كميزة اضافية واعي و جامعي
اما جامعي بروحها بدون وعي ويمكن تحصله عقله صغيير وماعنده ثقافة شهادته شسوي فيها خل يلوتها ويسويها قلادة

 

[red❤heart]

خلَ أوضح لك جم شغلة يمكنَ أن مو حاطَ بالك ليهاَ كونكَ رجلّ ..
ولا ترى الأمور من منظار الأنثى نفسهاَ ( لان الشخص لما يحطَ روحه مكان غيرهَ بقدرَ )

أول شيءَ ، ليش المراة في المرتبة ثانيةَ - بشكل عامَ - مو بس بالبحرينَ ،
مو كل الاشغال يوظفونَ المراة فيهاَ ؟ صحَ ! يعني تجوف مرة تصلح سياراتَ أو مهندسة سياراتَ ؟
في الدول الاجنبية أيَ , عادي عندهمَ ولا يعلقون عليهمَ بعد .. بس هنيَ ؟
فدمتكَ لو وحدة درست هندسة ميكانيكية وين بتشتغلَ !!!
# فكر فيهاَ و بتفهم إن المراة عدنا مو نفس الرجل ، و دائماً يقولون المراة ناعمة و رقيقةَ ,
و هي اقوى من رجال بمليون مرة ، إلا تتحمل عملية الولادة ( بمعدل 30 عظم ينكسرَ ) ! ما راح تتحمل أن ترفعَ
معدات ثقيلةَ ؟ تفكير تافه جداً ..


ثاني نقطة ، يا اخي في الاسلام و في نفس التخصص - اني داخلة التخصص رغبة أولى
و معظم البنات الله يسلمكَ ينقطون في تخصصنا و هو يمكن رغبة رقم 6 أو 7 ، فشتتوقع ؟ يتمون مثلاً !!
و بزيدك من شعر بيتَ وش كثر صبيان يدخلون بعثة لتخصصنا و ينسحبون ما يتحملونَ ,
و ترا مو مقياس إن تطلع من الاب بعد لكويز أو الاسايمنت من وقت يعني أنت عبقري ؟ لا !
اني اكمل من وقت بس احب اجيك و اتاكدَ سواءاً في تست أو كويز أو فاينل أو اي شيءَ ، مقدر اطلع قبل الوقت
لازم اتاكد فوق 3 مرات من حليَ و حتى لو كنت حالتنه صحَ .. !!!!
و في بنات واجد مثل حالتيَ ، فلا تحكم على ظواهر الامورَ ، لان اني اشوف صبيان درجاتهم اخس من البناتَ
معنهم يتفلسفون ويا دكاترة فاللكجر و الا يجوفهم يقول دلين بجيبون A و اخر شيءَ !


و بخصوص الغلاء المعيشي ، أنت الحين تحت ظل أهلكَ ، لما تكون بيتكَ و تزوج و جيب ولادَ
بتحس بالحجي إلا قلته و إن معاش واحد ما يكفيَ و بتذكر كلاميَ ، راح اترك الايام تثبت لكَ هذا الشيء


و ترا المراة العاملة ( نصهم في بيوتهم خدمَ ) إذا مو كلهم بعد ، الحين إلا ما تشتغل عندها خدامة ..
المهم ما عليناَ ، ترا المدرسات حدهم مستانسينَ ؟ شعبالكَ متحاناتهم هي نفسها كل كور لنفس المقرر اللهم الفكرة غيرَ
أو تاخد السؤال من امتحانات المنتصف أو الفاينل اللهم تعدل و طاخ و طيخ و خلاصَ !
و جان على درجات الله يدنيا احنا كنا نصحح وياهم ( ساعات خدمة المجتمع ) و نحسب وياهم درجات ، خلني ساكتة بسَ
ما يسون شيء ، حتى معاشهم ما يحللونه ! مو الكل بس الاغلب فلا تقول انهم يتعبون داك الزودَ ..
و جان على شرح هذا شيء هم يحبونه و إلا يحب الشيء عبارة ما يشتغل فهمتَ ، جنه يمارس هوايته # مو عارفة اشرحَ
بس ان شاء الله توصل لك الفكرة ..

و بعيد و بكرر ، الدراسة أولى من كل شيء لانها سلاح المراة حتى تثبت مكانها في المجتمع
بشكل قوي بعد

​

هذا اذا دل يدل على عدم الاخلاص ف العمل وهذا مو فخر
المفترض المعلم او المعلمة يزعلون زعل شديد اذا طالب راح لمدرس اخر او معهد
ماهو الا دليل على فشله ف ايصال المعلومة
اما من ناحية المراة كائن رقيق فاني اشوف الرجل القوي يحتاج امراة قوية والمثل الا يقول وراء كل رجل عظيم امراة اؤمن به بشدة هذي المرأة هي الا تسنده ف الحياة و تربي اطفاله والقوة ما تعني انها عنتر زمانها ولكن التماسك والاتزان وشخص ممكن تسند نفسك عليه وانت مطمئن والقوة لا تتنافى مع الرقة والنعومة
فيه الهندسة ف المثال الا ذكرتينه صح انه مو عيب ولا حرام لكن طبيعة العمل بعد ما تخلص الجامعة اقصد بتكون ف وسط ذكوري بحت و فيه حديث يقول خير للمرأة ان لا ترى الرجال ولا الرجال تراها

 

[red❤heart]

اول شي العلم ماله علاقة بكون الشخص ذكر او انثى الاثنين من حقهم يتعلمون.. ثاني شي اسباب البنت او اسباب الولد تختلف من شخص لاخر.. في ناس تدرس عشان تبي وظيفة وفي ناس تدرس لانها تحب الدراسة...
عن نفسي .. ادرس لان مهما علمتني الحياة وعشت فيها.. الدراسة تبني شخصية واعية اكثر .. يعني حتى لو احد عنده شهاده ثنوي ومتثقف من الحياة ماتقدر تقارنة بشخص جامعي..وهالشي تقدر تجوفه فالحياة الواقعية اذا كنت فاهم بتحس ان الفرق موجود بين الاثنين يخليك تعرف ان هالشخص دراس وفاهم مقارنة مع الشخص الي مثقف نفسه بالحياة.. الدراسة تعلم الشخص مو بس معلومات .. اشياء كثيره منها شلون انك تتعامل مع الناس والضغوطات النفسية والجسمية + في رأيي عيب في حق المرأة انها تعتبر ك ربة منزل فقط, هالشي غلط بالعكس انا اشجع ان المرأة تدخل في جيمع انواع الوظائف وحتى الي تكون صعبه و شاقه. انا ادرس عشان نفسي, مو عشان وظيفة هذا مو همي.. بس حلو الواحد لما يحقق انجازات في حياته.. وحلو لما احد يسالك عن مستواك العلمي تقوله بدون اي خجل.. واما الوظيفة ان حصلنا عليها لا بأس وان لم نحصل هم بعد لا بأس.

#بغض النظر عن خلط اللغة العامة بالفصحى _اهم شي وصلت الفكرة

تاج على راس المراة ان تكون ربة منزل من اشرف واحب الاعمال الى الله العمل ف المنزل
وش تقول عن فاطمة الزهراء الم تكن ربة منزل وما زادها الا شرف
اختلف وياك ف فكرة الوعي الوعي مكتسب يكتسبه الانسان من التجارب والاطلاع والقراءة والتفكر ف الكون ومخلوقات الله
وفي نفس الوقت اقول لك ممكن 70 بالمئة من المعلومات اللي درستها من المدرسة لليوم ما تحتاجها ماعدا درس الحروف والارقام وتركيب الجمل والكلمات هذي اكيد الكل يحتاجها اما الباقي مع الايام تنساها
ويمكن مع كثرة التقديمات ف وزارة التربية والتعليم البعض يكاد يجزم ان نسى كمية كبيرة من دراسته

 

[red❤heart]

المراة هي السند الحقيقي لنفسها من بعد الله
حتى مع وجود اخ واب وزوج حلو شعور المراة ان تكون سند لنفسها
هذي نقطة
النقطة الثانية
تدرون المشكلة موف البطالة مع انها مشكلة عودة المشكلة ف تفكير الشباب انفسهم مافيه وظايف ما ادرس واطلع من المدرسة واقعد جذيه
الحياة صعبة بس ما تصعب على ان ارفه على نفسي واروح واصرف بدون ما اخلي لي مبلغ وازيده لتحقيق اهدافي وطموحاتي كشاب من مشروع اوزواج او غيره
اضافة الى نقطة ان في البلدان المتقدمة اتجهت بعض الشعوب الى عدم الذهاب الى الجامعة واللجوء للعمل مباشرة
طبعا هذي خطوة لها اكثر من تعليق عليها
اذا كان عندي قابلية للدراسة استمر بالجامعة
اذا لم يكن اتوجه للعمل ولا اضيع سنيني ف شي لن افلح فيه
اذا كان عندي قابلية للتوفيق بين الاثنين نور على نور

 

[علي البلادي]

مرة مطرشين حكمة محشش ما ادري مقولة لمفكر المهم يقول أنا لا احتمل إمرأة جميلة ولكن غبية !
ولو أن الشهادة الأكاديمية مو مقياس لمدى تعقل الإنسان لكن نقدر نقول أن الدراسة ممكن ترفع من وعي الإنسان أكثر وتجعله أكثر تعقلًا من غيره فيعني المسالة مو بس مسالة عمل وفلوس المسالة أن الشخص الغير متعلم كارثة..

 

[المهندس عبدالله]

ما اشوفها نظرة منصفة صراحة
ممكن يكون شخص غير جامعي واعطيك مثال
تقريبا الشباب ف جامعة البحرين ما يجون كثر البنات البنات صاير الضعف اذا مو اكثر
هذي نقطة
نقطة ثانية الطموح والرؤية هذا الشخص وين يشوف نفسه بالضبط
التجارب والخبرات
واكبر دليل على كلامي روح شوف بعض كبار السن تجوف كلامه موزون وعقله سليم والقعدة وياه غنيمة هل درس ف جامعة اكيد لا
احيان اذا حكته الدنيا نفس ما يقولون كل طراق بتعلومة
اما بخصوص السلبيين بتجوف منهم واجد واغلب السلبيين اذا جيت لحياتهم بتشوفهم مو متوفقين والسبب ان ديننا بحد ذاته دين التفاؤل اعتبر الابتسامة صدقة والكلمة الطيبة صدقة
وهذي من بديهيات الدين حتى اللي مو دارس يعرفها
اعتبر الدراسة شي والوعي شي ثاني
ممكن تنضاف كميزة اضافية واعي و جامعي
اما جامعي بروحها بدون وعي ويمكن تحصله عقله صغيير وماعنده ثقافة شهادته شسوي فيها خل يلوتها ويسويها قلادة

انا تكلمت عن سبب كون المرأة الجامعية أفضل.. ولكن بينت انه انا ما اعمم..
لذلك الجامعة مو أساس الثقافة..

بختصار عشان لا أنفهم غلط.. الانسانرالجامعي دخل الجامعة لأن عنده طموح وعنده أمال.. الانسان اله اختار (كبار السن ما اختارو انفرض عليهم) انه ما يدرس في الجامعة عادة يكون محبط ونكدي ويدور على الحياة المريحة والكسل قدر الامكان..
الانسان الجامعي انسان مكافح وصبور وانده نظرة مستقبلية...

** مجددًا ما أعمم بس هي اله أشوفه.. من دخلت الجامعة الناس النديين والعدوانيين انقرضو ..

 

[قمَر]

ونرد عليك رد سريع يقول فيه لو تجري جري الوحوش غير رزقك ما تحوش

حي الله فلانة
يقولون من طول الغيبات جاب الغنايم ههههه

اني مادري اذا علقت على هالموضوع من قبل أو لا
بس لو كنت علقت ما اعتقد رايي بيتغير..

الزبدة
الدراسة ما عليها أسافة خخخ على الوزن يعني
اذا درست وما توظفت اني مو خسرانة شي
اني اكتسبت خبرة وعلم ومهارات في الحياة يمكن ما كنت بحصلها لو ما دشيت الجامعة
فأني درست لأن العلم نور وأني أمبي أتنور

لو توظفت فهذا خير وبركة، عن نفسي مو شي مهم واجد عندي لأن وجودي في البيت ليه فوائد بعد
فلو ما توظفت اني ماخذة الشي بروح إيجابية
وما أحس لو توظفت راح أزاحم الرجال مثل ما قال أحد الأخوة
لأن في وظائف تحتاج النساء
مثل المعلمة، للبنات
والدكتورة للنساء
وجود النساء في هذين المجالين على الأقل مهم جدا
لأن ما أعتقد يصلح يخلون رجال يدرسون البنات في المدارس
الا اذا يبون بعد ما ندرس بالمرة وتصير المدارس للرجال بس !

في وحدة كتبت في تعليقها ان البنات يهتمون بالزواج اكثر من الدراسة وهالشي يأثر على دراستهم وينزل معدلهم بسبب الضغط
أني عن نفسي أشوف هالشي مو قاعدة
لأن أني معدلي ارتفع بعد ما انخطبت
وحصلت أعلى معدل في حياتي الجامعية بعد ما تزوجت
رغم اني ما انكر اني كنت مضغوطة اكثر شي ذاك الفصل
بسبب المسؤوليات الا زادت عليي وبسبب ان موادي كانت مواد تخرج وصعبة
بس التوفيق من الله، والواحد اذا يبا الشي يبذل كل طاقته في سبيله

أما بالنسبة لكلام اللي قال ان الجامعة تخلي الواحد عاقل واذا مو جامعي متوحش
فهذا كلام غير صحيح لأن الجامعة مو كل شي
فبالإضافة للجامعة الحياة فيها واجد شغلات نتعلم منها
يمكن الجامعة فعلا تزيد مستوى وعيك وادراكك وتهذب بعض سلوكك وهذا تأثير طبيعي للعلم على الناس
ولكن مو معناه ان كل واحد درس في الجامعة صار مؤدب ومثقف
للأسف في واجد جامعيين ولكنهم همج رعاع
اني ما اقدر احكم على الشخص بشهادته ودرجته الاكاديمية
احكم على الشخص بتجاربه وخبرته في الحياة والاشياء الا يقدر هو يستفيدها من الاشياء الا تصير قدامه
لأن حتى لو جبت اثنين من نفس التخصص ومعدلهم بالضبط نفس الشي مو شرط تشوف خبراتهم متساوية والفائدة الا عندهم مثل الشي
وحتى لو جبت اثنين من نفس السكشن ويدرسهم نفس الدكتور بعد بتشوف تفاوت بينهم لأن الناس قدرات وكل شخص ياخذ الأمور بطريقته
هذا ما يعني اني اشجع الناس ما تتعلم، بالعكس اذا كنت انسان عاقل ومؤدب وفاهم الحياة العلم راح يزيدك عقل وفهم وأدب وهالشي ما يضرك طبعا
وأني أتمنى لو كل الناس تتعلم وتستفيد من العلم بغض النظر عن الظروف
لأن العلم مو الغرض منه انك تشتغل، الغرض منه انك تتعلم وترتقي بعلمك وتفيد المجتمع من حولك
سواء كنت رجال أو مرة
وسواء بتكون تشتغل برى أو بتم في بيتكم بعدين
وسواء كنت بتتوفق وبتحصل شغل في مجال تخصصك أو بتضطر تشتغل شي بعيد عنه
المهم تكون انسان متعلم

 

[G h a i d a]

ما قريت كل الردود
بس من وجهة نظري الدراسة سلاح في يد المرأة ..
لما تتطلق او تترمل لا سمح الله محد بينفعها ولا بيتحملها ولا بشيل مسؤوليتها خصوصا اذا عندها اولاد، وبتعيش طول حياتها ع المنة وتحس انها عالة على غيرها اذا ما كانت في ايدها شهادة تخليها تصرف على نفسها واولادها بنفسها بدون منة أحد ..
+ سواء لو كانت متزوجة او لا ، الاستقلال المادي اللي بكون عندها لو درست وتوظفت يعطيها قوة اكبر واستغناء عن الاعتماد على احد
وزمننا وواقعنا ومجتمعنا الحين يتطلب هالشي