البرزنتيشن (الشرح أمام الصف ) ||::|| لماذا لا يحبونه ؟

[c o d e]

مرحبا

بدايةً , البرزنتيشن هو قيام الطالب بالشرح أمام الطلبة والدكتور في السكشن . هذا في نطاق الجامعة .
في خارج الجامعة , يكون برزنتيشن أمام مجموعة من الناس كإلقاء كلمة في حفل ما أو إبداء رأي أو أو .


موضوعنا عن البرزنتيشن في الجامعة .

منتشر الخوف من البرزنتيشن , الطالب يخاف يوقف قدام هالكم من الطلبة ويتكلم ويشرح
هالشي يؤدي أحيانا , إلى تجنب الطالب تسجيل المقرر وتأجيله
البعض الآخر يتجنب يختار التخصص الفلاني من البداية لكي يتجنب هالموقف !


هل هذا هروب أو خوف أو ظاهرة منتشرة والكل قام يطبقها من الاوعي !

اذا ألحين تجنبت هالمقرر أو هالتخصص , تضمن تتجنبه في الخارج , في حياتك الاجتماعية مع الناس ؟
يعني هل الجامعة هي مكان للدراسة النظرية فقط وفقط فقط !
يعني بس احفظ وراجع وتعال قدم امتحان ؟




آرائكم .

 

[عبير البنفسج]

اول ما قريت العنوان عرفت صاحبة الموضوع

و ما حبيت اطلع بدون رد



عن نفسي ..

ما عندي خوف كبير من هالشي و انما في بعض الاحيان خجل و في اوقات ثانية و هي الي تغلب " عدم تقبلي للتعليقات "

ايام المدرسة كان واجد عادي لان الي في الصف كلهم بنات و عارفتنهم زين

اما الجامعة يكون السكشن فيه صبيان " و ما شاء الله تعليقاتهم كل وحدة كأنها صاروخ ... كسرو على البنات >.> "

عادة اذا كان السكشن هادئ و فيه عدد من الطلبة ما اتردد ولا اخاف من البرزنتيشن لان احس يعطيني ثقة بنفسي

اما اذا مزدحم و الي فيه يحبون يعلقون .. ما احب سالفة البرزنتيشن ولا حتى المشاركة

بس بعض الاوقات اقوم عشان اقهرهم و ابط جبدهم و بدال ما يقهروني اقهرهم .. باختصار تصير سالفة عناد عشان يحسون شلون الواحد ينقهر



كيوت الموضوع

 

[Malath alro0o7]

بصراحه يخوف ويربك اني ماعندي جرأة اتكلم قدام السكشن كله كلهم بطالعوني يعني التركيز كله عليي يمكن لو كان بس بنات بكون مرتاحه اكثر وبتكلم

 

[أزهار الخلود]

اهلين
بالنسبة للبرزنتيشن انه اوافق عليه و احسه افضل للطالب
علشان يتعلم ع الجرئة واللباقة وتوصيل المعلومة بشكل جيد للطلبة
يعني لازم الطالب يتعود عليه لأن عقب بتشتغلون وبتختلطون مع الأوادم والموظفين
اذا ما كان عندكم هالجرأة بتآخذون وقت طويل ليما تتعودون ع هالشي
فمن الحين تعودوا ع البرزنتيشن مع الطلبة والدكتور تالي في الشغل
بكون ما يحتاج تتأقلمون ولا شي بكون الوضع عادي لأنكم متعودين عليه
ليش الطالب يخاف من البرزنتيشن في سببين
ساعات الدكتور بنفسه يفشل الطالب ويعلق ع الطالب جدام الطلبة
فمنعا للأحراج وناس حساسين وايد ما يحبون ينحرجون جدام احد
وساعات بعد الطلبة ليهم دور مثلا الطالب قال شي خطأ يقعدون يضحكون
ويفشلون من جذي بعض الناس تخاف تسوي البررزنتيشن
اني في البرزنتيشن اول اخاف تالي يكون عادي الوضع

 

[وردة البحر]

صراحة انا اخاف من هالشي
ما عندي الجرأة اني اوقف قدام الناس واشرح ، حتى ايام المدرسة معلمة الاجتماعيات كانت تعطينا فقرة وتقول لنا نشرحها ,, انا كنت اشرح وانا واقفة مكاني

موضوع جميل

 

[qassoomy]

السلام عليكم
الصراحة الموضوع ششوي يوتر بس من تروحين عند السبورة و تقولين كلمتين تحسين صار عادي
جربت البرزنتيشن من قبل و كلش عادي
مهما يكون اهنا طلبة و هم طلبة و في النهاية كلنا رراح نسوي البرزنتيشن في السكشن

 

[نغمة الحياة]

اممم بصراحه اتوتر قدام كل الي ف سكشن اشرح كلهم عيونهم عليج :mellow:
بس جربت ف محاضرة هستوري عاد ماطالعت الا بنات او كان اووكي

 

[أوراد]

بصرااحة شي يوتر و يخوف
اول مرة شرحت ان الدكتورة ساعدتني بأسلوبها ... محد يسولف ف المحاضرة يعني ما اسمع تعليقات
2 و3 مرة الدكتور ساعدني خلاني اشرح على فهمي .. يعني ما اتقيدت بشي
ف البداية توتر عددل لكن من ننطق بكلمة خلاص كلشي يطلع بعدين
تخصصنا كل دكتور يطلب شرح ... يعني غصبن عنا نشرح
نستحي ما نستحي .. نتفشل ... لازم شرح ولا صفر ف التقرير

 

[ضجيج الأمل]

امم .. جربته في الجامعة .. الشي بالنسبة ليي عادي لان يقولون فيني جرأة شوي !
بس حزة الإلقاء يحمر وجهي ويبين ان اني مستحيه ومرتبكه ..
وجربته خارج الجامعة في مسابقات تبع جمعيات دينية >> قدام لجنة متخصصين ومدرسين .. كنت ارتبك واني اشرح بس اطلع بنتيجة زينه الحمدلله
وجربت تسميع القرآن قدام لجنة متخصصه في التوجيد .. وكان ادائي ممتاز ..
اعتقد تجاربي خارج الجامعة فادتني واجد .. وصرت اكثر جرأة في الشرح والإلقاء قدام اي احد ..

 

[نجمة تشرين]

و عليكم السلام و رحمة الله و بركاته
بالنسبة للشرح امام مجموعة طلابية او كما يسمى بالبرزنتيشن
انا بالنسبة لي الموضوع جدا طبيعي و عادي يعني لو كنت حاليا اخاف من الوقوف امام طلبة مثلي على اي اساس باجر بتجيني جرأه الوقوف امام قضاه في المحكمة
طبعا عن تجربة شخصية انا بالابتدائي تعودت على الالقاء في مسابقات شعر و كان للجنسين بس كنت طفلة يعني
و بالثانوي و الاعدادي مسابقات قصة قصيرة بس كانت مسابقات بناتية و كنت اعرف معظم الطالبات فما كنت اخاف حتى بالأعدادي لما كنت مجلس طلابي كانت تحظر معانا المديرة و المشرفة و كنت جريئة
و هذا غير الطابور الصباحي فترة الاذاعة .... كانوا بنات يتأففون اذا وقفنا نلقى و يستملون لان عن يا زعم نأخرهم و كلامنا فاضي و هم واقفين بالشمس كنت احزن بس ما يهموني
فكانت من نشأتي عندي قدرة على البرزنتيشن
لما دشيت الحقوق الطلبة يقولون نخاف و ما الى ذلك بس لما يكون لبرزنتيشن يكونون طبيعيين يمكن يرتبكون في البداية بس يواصلون في الاخيير بجرأه و هذا حال الاغلبية ما اقول ان اول ما ندخل بداية الكورسات في طلبة ينحرجون و يخافون و يقعدون مكانهم و يشرحون بس الدكاترة يخلونهم لان على قولتهم كتاكيت الكلية هه بس كلما نكبر تزيد الجرأة و الكل يوقف و يسوي برزنتيشن حتى لو كان بيقرأ بالاخير بس الجرأة بتجيه

بس ما استوعبت الخوف و الارتباك الحقيقي بالنسبة للطلبة من البرزنتيشن الا لما اخذت الهستوري ذاك الكورس كنت عند حمدي و كان يطلب برزنتيشن لبوربوينت كانوا اللي يقوم يقرأ و هو مختبص و ووجه اصفر على احمر و غير ان الدكتور تعليقاته تزيد الطين بله و غير اللي تنازل عن القومة و ضحى ب20 درجة على ما اعتقد لان يخاف .. صدق صدق استغربت من الوضع و تفاجئت توقعت هالشي يندثر عنذ الطلبة من الثانوي و بالجامعة كل شي يتغير على اساس انهم كباار و نضجوا بس الخوف هذا هو ما تغير و حتى الدكتور عجبه طريقة اللقائي و حفظ اسمي هه و حتى سألني انتي تروحين مؤتمرات فقلت ليه لا اني ادرس حقوق و احنا متعوديين على هالسوالف ... ما احب امدح نفسي بتاتا لان مو من اطباعي بس لما شفت الخوف في عيون الطلبة و الطالبات بشكل اكبر حسييت ان الموضوع خطيير جدا و على فكرة استغربت اكثر من طلبة تناقش الدكاترة بالحصص بس وقت اللبرزنتيشن يختلف الوضع ليش ما ادري مع ان هذا انتي و هذا الدكتور و هذليين الطلبة هم هم بس مكان الوقفة يتغييير

مع ان البنات في الهستوري و حتى في الحقوق كانوا يقولون ليي ان هيأتش و شكلش الخارجي ما يوحي انش جريئة و تقدرين تشرحين بثبات يعني هم كله يقولون ان اني وياهم حياوية وقت اللي اتكلم فعلى ايا اساس اصيير جادة و قوية قدام الطلاب وقت الشرح يستغربون ؟؟
بالنسبة ليي البرزنتيشن شي مطلوب و يعطي انطباع للطالب و جديته بالدراسة و ما فيها اي عيب او خطأ اجتماعي او اخلاقي او اشكال شرعي في هالموضوع
المفروض كل شخص يثق بالله سبحانه ان بيعطيه القدرة و يثق بنفسه ان يقدر و على فكرة في خطة قالتها لي معلمة الله يذكرها بالخير كانت تقول اذا كنتوا ترتبكون من نظرات العيون طالعوا سيدة الى الجدار و تناسوا الاشخاص و انطلقوا و اشرحوا بطلاقة و حتى لو تعثرتوا في لفظ كلمة لا تخجلون بل كرروها صحيحة وواصلوا المشوار بابتسامه


موضوع ممتاز
ارجوا ان كانت مداخلتي لطيفة

 

[Dun Dun Dun!]

أحسه شي عادي

 

[math girl]

موضوع حلو ومهم جدا
انا بالنسبة لي من صغري عندي جراه و ماتخوفيني هالسالفه بالعكس من احد يطلب هالشي سيده رزيت الفيس
وطبعا هذا مو موجود عند الكل
لكن المفروض ان هذا المشكله (ما بنقول مشكله) احد الامور الاساسية الي كان من المفروض ان الطالب ما يتخرج الا وهو عنده خبره في هذا الموضوع
هذي مو ماده ناخذها لكن ف ي اساسيات في شكليات في امور تاخذ بعين الاعتبار قد تكون موجوده بالفطره عند اشخاص لكن يجب تدرسيها وتعليمها افضل
ليكون عند الكل تهيا مسبق للمستقبل الي يتمثل في الجامعة والشغل
يعني كان تؤخذ على شكل دورات او محاضرات في المدارس
لما كنت في المدرسه كان في برامج مشتركه بين موسسة الشباب والرياضه و الي يقومون فيها طلبه الجامعات واغلبهم طلبة جامعة البحرين
كان من اول الامور الي يعلمونها ا البريزنتيشن شلون نحضر الماده شنو نلبس شلون نوقف شلون نطالع بعيونا حتى ومره جاوبوا لنا ناس اجانب بعد يعلمونا واكان هذا من الامور الي عطونا اياها ويخلونا ندرب على هذه الامور مثلا عطونا انه عندنا عرض لشركه و نبي نبيعهم سلعه ولازم نحضر عرض بوربوينت ماده نعرضها لهم و كل شخص يوقف ويقدم بريزنتيشن فكان تدريب كلش حلو وفي تقيم وفريق يفوز على هالاساس
لو تشوفو ن الغرب وايد يهتمون لهالسالفه ومن المدارس بحيث ان اكثر المواد الي عندهم تتضمن الموسيقى والمسرح والرياضه والمشاريع الي على مستوى مو حزمه اوراق نطبعا ونسلمها للمدرس الي للاسف هذا الي صاير عندنا وبعد متغربلين قد تحكمنا بعض الامور لكن بعد احنا قدها محد احسن من احد لو كان عندنا بعض الاشياء الي عندهم جان الكل طلع العبقريه والابداعات

 

[قمَر]

اني الموضوع عادي عندي
على الرغم من اني خجولة بعض الشي
ولما أوقف اشعر بـ توتر شديد، وحتى احس ان ضغطي يصير مو طبيعي وأحيان أرتجف
بـ اختصار احس اني مو طبيعيه ، واحتمال راسي يدوور
لكن اسأل الأوادمات يقولون ليي كنتين عاديّة وما يبين انش مرتبكه
فـ هذا الشي شجعني شوي

اني ششرحت في المدرسة
مع انهم كلهم بنآات بس نفس الحآالة من الاضطراب تصيدني
بس الأمر يعدي على خير ..
وشرحت مرة في الجآامعه
كان رهييب
50 طالب.. من الجنسين
والدكتور نفسه هو يفشل، وتعليقاته خطييرة
فـ اني بذلت قصآارى جهدي عشآان يكون شغلي مضبوط وما يفشلني..
مآا قدر يتحجج على الشغل ابداً
وكل ما حاول يحرجني
في صبي الله يذكره بـ الخير
كل مآا شسمه، جاوب عني
دعيت ليه من قلبي الصراحة >> يمكن هو من زمآان تخرج الحين
وفي النهآاية يوم بندت العرض..
انجان يتحجج على الخلفية
كنت حاطة بنيّة انمي..
كنت ابي اغيّرها قبل، ونسيت
الآ يقول: ايه الخلفيّة الوحششة دي :mellow:
ويضحكوووت الصبيآان
استويت طمآاطة
بس يعني عدى على خير..
كانت تجربة ممتعه

يسسلمو عـ الطرح الموفق​

 

[ماث ستيودنت]

اني بالنسبة لي عادي ..
بالعكس لازم ما نتخرج الا عندنا هالمهارة ..
خصوصا اللي بيشتغلون في مجال التعليم او الادارة او شيء جدي ..
لابد ان تكون عندهم هالمهارة .. اوردي احنه نتعامل ويه الناس لازم عندنا جراة ..

موضوع لطيف جدا ...

تحياتيـــ
​

 

[c o d e]

أشكركم كامل على المشاركة الطيبة , أتمنى الكل يعبر عن رايه سواء مع البرزنتيشن او ضده , يخاف او عادي عنده .
ترى حتى الكلام في موضوع عادي في الانترنت عن شي معين , له دور وأثر !

أشكر كل اللي حطوا تجاربهم التشجيعية , شي حلو نتعرف على الاسباب او الظروف اللي صقلت هالموهبة عندكم .

* الشباب اللي قالوا أنهم يخافون بسبب توجه انظار الطلبة والطالبات لهم ,
ماهو الحل هنا ؟
شي طبيعي الموجودين بيطالعون الشخصية اللي تشرح في الأمام !

كيف نتغلب على الخوف , وكيف نتغلب على الخجل ؟
هل للثقة في النفس دور هنا ؟

 

[قمَر]

بـ خصوص المنآاقشات والمواجهآات في النت..
اعتبر نفسي جريئة جداً ​

 

[ضجيج الأمل]

كيف نتغلب على الخوف , وكيف نتغلب على الخجل ؟
هل للثقة في النفس دور هنا ؟

بصراحه الخجل والخوف شيئان واردان ..
وحقيقة لا أنكر شعوري بهما خلال الشرح .. واعتقد الاستمرارية والتعود هما الركيزتان الاساسيتان في التغلب على هذا الشعور .. ومن هذا المنطلق أدعوا كل طالب وطالبة بالتجربة ولو مرة وحده .. بعدها يجرب مره ثانيه .. وبالتكرار سوف يتغلب على هاذين الشعورين إن شاء الله ..
أما عن الثقة بالنفس بالطبع لها دور كبير جداً و أنا ممن يعتمد عليها بشكل كبير ..

و أود ان أذكر موقف بسيط حدث لي في الجامعة ..
كنت طالبة جديدة .. وطلب مني الدكتور ان أحل مسألة على السبورة ولم أمانع ..
وكان هناك طريقتان للحل طويلة جداً وقصيرة جداً .. فأجبت بالطويلة لان القصيرة لم أتعلمها جيداً ..
قمت وكتبت و اخطأت خطأ بسيط .. فقام بعض الطلبة بالسخرية مني والتعليقات المحبطة و المحرجة أمام الطلبة ..
فما كانت ردة فعلي إلا ان رجعت الى الكرسي بعد ان اعطيتهم نظرة جانبية فسكتوا جميعاً ..

 

[أمواج]

قد أكون متمكنة من اعداد الدروس و العروض
لكن العرض يسبقه قلق و خوف و خجل
لذلك لابد من الاستعداد و عمل "بروفا" قبل التطبيق الحقيقي

في المدرسة كنت أطبق ذلك و أرتبك أيضاً

في الجامعة لم أجرب هذا الشعور
لكن اتوقع أن يكون الإرتباك بشكل أكبر
لوجود الجنس الآخر و حداثة الأجواء​

 

[m.g.s]

بالنسبة لي من بداية الفصل اقول بشرح او مابشرح

الكورس اللي راح كان لي نفس اشرح بس مافي ولا مادة طلبو ان نشرح
هالكورس مالي نفس اشرح كللش

مادري ليش هالحالة عندي ​

 

[Z.E.E.Z]

موضوع جميل !
اني تونيي سنة اولى وطبعا للحين ماعندنا مواد فيها برزنتيشن , بس من الحين قاعدة افكر واحاتي لأني خجولة نوعاً مآ , واتفشل لمآ اقوم اتكلم وسط اوادم مآ أعرفهم ومن الجنسين
وكله أقول ابي اصير جريئة وأتخلى عن الخوف والحيا , بس من تصير لحظة الصدق يرجع الخوف
جربت ايام المدرسة اقوم اشرح وهيك طبعا يكون خوف بس كلش عادي من ابدي اتكلم ويصير تفاعل خلاص , لانه البنات اعرفهم والمعلمات عادي معآهم !
غير عن الجامعة ! ,,
فـ اللي عنده نصآيح ويعرف شلون نتغلب على الخوف ونبين واثقين من نفسنآ يسدح لينا هووون ..
وشكرا ع الموضووع الشميييل