ذكرياتكم في طريق اخذ الليسن ^_^

[M7MDOGRAPHY]

ان شاء الله تكون بداية فرج . ،نقص هالتراي ونفتك

​

 

[M7MDOGRAPHY]

باق ٦ ساعات :mellow:​

 

[جامعيه p:]

باقي يوممين :tears:
​

 

[*أبو حيدر*]

بعد ما قصيت الكجة .. عطوني محاضرة بعد عشرين يوم .. تالي صادني ظرف و ما قدرت اروح المحاضرة و أجلتها .

و عطوني بعد 24 يوم .. المهم .. بعد المحاضرة جه وقت البحث عن الكنز .. صارلي 3 أشهر و تالي حصلت واحد نزر .. يدربني في الإسبوع ساعة ، ما استحملت الوضع و قلت له ما بجي و كرهت الليسن حزتها .

بعد خمس شهور حصلت مدرب "عيار" بس تمام من طرف صبيان الفريق .. بالرغم ان كان يدربني نص ساعة و ياخذ عليي مال ساعة.. بس احسها ساعتين من زود ما يشرح كل شي .. هالمدرب الطيب لازم اللي يتدرب عنده يدفع الساعات اللي يبيهم مقدما و تالي المتدرب يروح يقص التراي و قبل موعد التراي يروح يتدرب عند هالمدرب ..

بالنسبة ليي .. برا ما طلعني الا مرة وحده .. و كانت سياقتي زفت .. تالي بحمد الله سيطرنا على الوضع في التراي و اخذنا الليسن من الأول .

 

[مارد المصباح]

باق ٦ ساعات :mellow:

بشر يا الحبيب ..؟ غالب لو مغلوب ؟
​

 

[M7MDOGRAPHY]

بشر يا الحبيب ..؟ غالب لو مغلوب ؟


​

لحد الان الوضع مستتب ​

 

[M7MDOGRAPHY]

باقي ٥ ساعات .. ​

 

[جامعيه p:]

لا 11 , موفقة خيو

ها بشرري ; نجحتين ؟
​

 

[إعلاميه*]

رسبنا ي أُختاه ! المرتفع اللي كنت اتقنه ف التدريب ف الامتحان رسبت فيه !!


#صادني_أحباط.

وانتي بشري ؟

 

[مارد المصباح]

رسبنا ي أُختاه ! المرتفع اللي كنت اتقنه ف التدريب ف الامتحان رسبت فيه !!


#صادني_أحباط.

وانتي بشري ؟

ما عليه خيو ... اليوم لو باجر .. بتاخذين الليسن
لا تحبطين روحش ولا شيء
​

 

[المهندس عبدالله]

أخ أخ بس صار لينه 4 أشهر من أخدنه هل ليسن و هذا هو معلق

 

[M7MDOGRAPHY]

أخ أخ بس صار لينه 4 أشهر من أخدنه هل ليسن و هذا هو معلق

ههه احمد ربك ، صار لي سنتين من قصيت الكجة وهي معلقة ، مو راضية تكبر وتصير ليسن

 

[معمر]

محاضرة امتحان السياقة ضروري ندخلها
وﻻعادي نتدرب بدون ما ندخلها

 

[Blue Castle]

محاضرة امتحان السياقة ضروري ندخلها
وﻻعادي نتدرب بدون ما ندخلها

اذا أخذت مقرر السيق في المدرسة ما يحتاج تاخذها بس اذا لا ، لازم تاخذها

 

[فاطمه`~]

مامدراني اقرا قصصكم كامل بكتب قصتي وبرجع اكمل
الي بيقرا لازم يكون بينام
بسم الله
صرت 18 شهر 5 بس كان مدارس قالوا عقب عيد الفطر عشان الميزانية وجدي فقصيت الكجه شهر 8 وكنت مكلمه المدرب وكل شي المهم مادربني الا اول يوم ف داك الكورس شهر 9 .. المهم يدرب ساعه وف الاسبوع مرتين ويبيني من ثاني ساعه اعرفف كل شييرغم ان انيي كنت واجد اوكي اول مامشيت السيارة ماخفت ولاشي بس بعد يعني القير العادي للين اتعود يبيله شوي وكله يتكلم ف التلفون يخليني اتنرفز واكلمه بنزاره ومره البايخ شال رجولي بكبرها من ع الريس يخيي مالك حق قول شيليهاا صدم مشاعري واااجد كان تافه ومن النوع الي يدخل اوادم من صوبه بدون مايخلص الي عنده وجا عيد الاضحى قال اتصلي هالتاريخ بقولش متى بدربش واتصلت الا يقوول واجد ناس جو قبلش شهالمدرب ولا بعد يقول اذا مابتنطرين اسبوعين يمكن اقدر او دوري غيري اخلاق صراحة!!! المهم كلمت المدرب الي يصير ابو رفيقة اختي الي كنت مابي اتدرب عنده وان داك يدرب رفيقتي وجدي وطلع ذهببب الرجال اخلاق ومن النوع الي ياخد الساعه كامله بدون ماينقص مو مثل المدربين ويدربني ساعتين كل يوم ومايحب يصارخ ويعيب ع الي يصارخون يقول احنا جايين نعلم وتحمل فيني عدلوكنت واجددد احبب الريووسس عشقق عششق هو والمرتفعكملت الساعات في اسبوع ويومين طبعا ماتدربت وياه الا شهر 12 لانه ماعنده مجاال ...المهم واجد هدرت بريكلكن اخر ساعتين تدريب عندي كانت رجولي واجد تعورني بس قلت لا ابي اخلص جان اني الي اوكي وكل شي من الالم ركبت ع الرصيف مال الاشارة في اليوتيرن
المهم قصيت تراي من حظي عطوني عقب اسبوعين وكنت افوشر لانه كلمن عقب شهر يعطونهم واني بدون واسطه وعطوني اسبوعين
المهم لتراي العصر وماكنت خايفه والي ويايي كانوا البنات متوترين الا اني اتعلف ف الرايح والجاي اونس روحي
ومادخلت لتراي الا المغرب وكان ظلام ونجحت من اول تراي داك الشهر بس المرور ماكان ليها زاغر وتتنيزر وجدي وكاانت توترني بنزارتها بس يعني قدها وقدود وكذا هههه احلى شي انها تبيني كله مسرعه واني احب السرعه استانس
لما رحت يوقعون ليي المرور تم يعلق عليي على وناستي وان كنت متشققه حدييي شوي وانااطط بس كانت فرحة ماتنوصف ماكنت متوقتنهاا تنجحني رغم ان كل شوي كنت اطالع ع صوب وهي ويايي ماجوفها كتبت شي وبعد لما رحت استلم الليسن الي هناااك بعد قعد يعلق عليي ولا يسالني بعد ناجحه !!! بعد وش تجوف ماتجوف عيوني طلعت برااا


وبس يعني الي يعرفني يسوي روحه مايعرفني
وتوته توته خلصت الحتوته
​

 

[غريبة الدار]

ههه احمد ربك ، صار لي سنتين من قصيت الكجة وهي معلقة ، مو راضية تكبر وتصير ليسن

الحمدالله

بس ليش سنتين ما حصلت ليك مدرب ؟ ما دخلت تراي ؟


لي عودة مع قصتي لين الله يفرجه وأخذ الليسن بقول ليكم قصتي

 

[M7MDOGRAPHY]

الحمدالله

بس ليش سنتين ما حصلت ليك مدرب ؟ ما دخلت تراي ؟


لي عودة مع قصتي لين الله يفرجه وأخذ الليسن بقول ليكم قصتي

بلى ، بداية كنت متفق وية مدرب قال بعد ما تخلص المحاضرة خبرني ، وخلصت وكل ما اتصل ما يرد ذهب ولم يعد :mellow:

بعد ٧ شهور تقريبا حصلت مدرب وقال بعد شهر رمضان بدربني ، ومن شهر ٧ ما خلصت الا شهر ١٢ بعد تعذيب ومعاناة وجان زين يعرف يدرب ، كل مهاجل برة ويخليني اوصله مشاويره واخلص له شغله :tears:

بعدها دخلت تراي ، وما صار توفيق .. وبعدين بدلت مدرب ، تدريبه افضل من الاولي بس نفسه خايسه ألعن من اللي قبله ،

والله ييسر إن شاء الله ونكمل على خير ​

 

[M7MDOGRAPHY]

١١-١٢-٢٠١٣ - طلعت الكجة
١٢-٣-٢٠١٥ - الحلقة الآخيرة
ــــــــــــــــــــــــــــــــــــــــــــــــــــــــــ


​

​

 

[غريبة الدار]

١١-١٢-٢٠١٣ - طلعت الكجة
١٢-٣-٢٠١٥ - الحلقة الآخيرة
ــــــــــــــــــــــــــــــــــــــــــــــــــــــــــ


​

​

مبروك والله يعطيك خيره ويكفيك شره
وعقبال السيارة

 

[المهندس عبدالله]

١١-١٢-٢٠١٣ - طلعت الكجة
١٢-٣-٢٠١٥ - الحلقة الآخيرة
ــــــــــــــــــــــــــــــــــــــــــــــــــــــــــ


​

​

ويش قولك طلعت الكجة 17-8-2013
اخدت الليسن 17-8-2014